Epacerero 9
9
Wiiraanyihiwa wa atthu ni Muluku
1Vano Muluku aamureeliha Nowe vamoha ni anamwanaawe aweerelaka: Muyaraneke ni mwaandyeereraneke weera musareyeke mweelaponi moothemwene. 2Inama sa ntuphini sootheene, ipalame, soowiipurula sootheene, ni ihopa sa mphareiya nseereke woothukumelani. Sootheene iyo moovahereriwa mmatatanimwanyu. 3Itthu sootheene sirino okumi nsikhale yoocaanyu. Hiiho ntoko koovanghaakani soowiima weera muce, hiihotho kinoovahani itthu sootheene. 4Muhikhuureke enama nlelo ereene ni ephomaaya, eyo tiiyo okumaaya. 5Vano yoole aneera awiiveeni, hata mwaamunama naari mutthu Miyo kinoomuthoriha, niwoko na ephomaanyu. Miyo kinoomuthoriha yoowo aneera amwiive mukhwaawe. 6Yoowo aneera ayeehe ephome ya mukhwaawe, ephomaawe eniiyeehiwe, niwoko mutthu aapathuxiwe mweekhaleloni ya Muluku. 7Vano nyuwo muyaraneke ni mwaandyeereraneke. Mmwaramwareyeke elapo yootheene ni musareyeke.” 8Vano Muluku aahuuluma ni Nowe vamoha ni anamwanaawe yaari ni yoowo aweerelaka: 9“Kinookhaliha wiiraanawaka ni nyuwo ni ekhapiraanyutho ya muhoolo. 10Aani, kinookhalihatho ni itthu sootheene siri ni okumi siri vamoha ni nyuwo, ipalame, mihuwo, ni inama sa ntuphini sootheene sikhumme munikulani vamoha ni nyuwo, eyo tiiyo itthu sootheene siri ni okumi. 11Wu ti wiiraana kinkhalihaaka ni nyuwo. Khasirwatho siphwatiwa itthu sootheene siri ni okumi niwoko na maahi a epula ya mirupi. Khasirwa sikhalatho mirupi sineera siphwate elapo ya vathi yootheene.” 12Vano Muluku aapwaherera: “Ela ti eneneero ya wiiraana kimpakaaka ni nyuwo, ni itthu sa okumi sootheene siri ni nyuwo, wa ikhapira sootheene sa muhoolo: 13Muuraaka kiikaathiyaaka mmahutteni. Eniikhale eneneero ya wiiraanawaka kinkhalihaaka ni elapo ya vathi. 14Miyo kaaruuhaka mahutte mweelaponi ya vathi ni mwemmo wakhuma muura, 15vano nkuupuwelele wiiraanawaka ni nyuwo ni itthu sootheene sirino okumi sa moota wootheene. Khasirwa sikhala mirupi sineera siphwate elapo yootheene. 16Imaara sootheene muura oneeraaya okhumeke mmahutteni, nkiwehe yoowo ni nkuupuwelele wiiraana woohimala variyari wa Muluku ni itthu sa okumi sootheene sinkhala mweelaponi ya vathi.” 17Amalihaka wuuluma, Muluku aamweerela Nowe: “Ela ti eneneero kikhalinghaaka variyari wa Miyo ni ikhalelo sootheene sa okumi siri mweelaponi ya vathi.”
Anamwane a Nowe
18Anamwane a Nowe yaakhumme munikulani aari Xemi, Hami ni Yafeti. Hami aari tiithi a Kanaani. 19Ale yaari anamwane a Nowe. Okhuma wa yaale elapo yootheene yoomakiwa ni atthu ancipale. 20Nowe aari namalima nitho aari oopacera ophatteya ematta ya iwuuva*. 21Aawura eviinyu, anahapaliwa mpakatho anarula muheemanimwawe. 22Hami, tiithi a Kanaani aahoona ohiwara wa atithawe, anarowa waathalihera axunneiye eeli yaari vaate. 23Vano Xemi ni Yafeti yaakuxa ekuwo ni, yiikuttelenleene, yaawaattamela atithaya. Vanonto, yeettaka nttulittuli erowaka wa atithaya, yaahaakhuneela atithaya, ehoonaka ohiwarawaya. 24Nowe ommwareyaka ohapaliwa ni oonelelaka yeeyo aapankaawe neetthaako, aaheera: 25“Oolamphwa akhale Kanaani. Owo anaakhale ookisera a ipottha sootheene sa axunneiye!” 26Vano aapwaherera: “Ooreelihiwa akhale Yave, Muluku a Xemi! Vano, Kanaani akhale epotthaawe. 27Muluku unnuwihe elapo ya Yafeti, weera ekhapiraawe emake vamoha muheemani mwa Xemi, ni weera Kanaani akhaleke epotthaaya!” 28Sivinreene mirupi, Nowe aapwaherera okhala ni okumi iyaakha macira mararu ni miloko mithanu. 29Aakhanle ni okumi iyaakha macira mathannamaxexe ni miloko mithanu, anakhwa.
നിലവിൽ തിരഞ്ഞെടുത്തിരിക്കുന്നു:
Epacerero 9: VMK2021
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Makhua Shirima Bible © Christelike Lektuurmaatskappy NPC, 2021.
