Epacerero 3
3
Yoottheka yoopacera
1Vano enowa yaari ni miruku soolokottha opwaha inama sootheene sa ntuphini Yave Muluku aapankaawe. Enowa yaamukoha muthiyana: “Ti yeeyo Muluku eenraawe: ‘Muhice naari yoowiima emoha ya nyiri sa ematta’?” 2Muthiyana aahaakhula enowa: “Ninoowera oca soowiima sa nyiri sa mmatta, 3mene Muluku eenre: ‘Muhice yoowiima ya mwiri ori eriyari ya ematta hata muhitave weera muhikhwe.’” 4Enowa yaamweerela muthiyana: “Vekhaikhai, khamurwa mukhwa! 5Muluku oosuwela weera vanihukuni nyuwo muneeraanyu muce, maithwaanyu eniihuleye ni mmwikhale ntoko Muluku, musuwelaka yooreera ni yoonanara!” 6Oonakaru muthiyana weera mwiri ole waalikana woosiva wa nlumi, woohaaweleya wa maitho ni, ohiya toko yeeyo, woomvorenghela murima weera aphwanye miruku, aarukula yoowiima ya mwiri ole, anaca, anamvaha iyawe ni owotho aahooca. 7Maitho a ooweeli ale yaahuleya ni yaahoona weera khayaawanre. Vano yaakohola makukhu a efiigu* weera yiittiyeleleno. 8Iiwaka mulopwana ni mwaariye mikhitto sa Yave Muluku eettaka mmatta yoopaka epheyo ya oxekuwa, yaahiipitha vamaithoni wa Yave Muluku variyari wa nyiri sa mmatta. 9Vano Yave Muluku aamwiitthana mulopwana amukohaka: “Muri woowi nyuwo?” 10Owo aamwaakhula: “Kohiiwa mikhittosanyu mmatta ni kinoova niwoko kiri pwitipwiti, tivawo kiipinthaaka.” 11Vano Muluku aamukoha: “Taani ooleenleni weera khamuwanre? Nyuwo murimooca yoowiima ya mwiri, mwa yoowo Miyo kookhoottihenraakani oca?” 12Mulopwana aaheera: “Ti muthiyana mukivanghaanyu ntoko mukhwaaka okivanghe yoowiima ya mwiri ni miyo kohooca.” 13Yave Muluku aamukoha muthiyana: “Eheeni nyuwo mpankaanyu?” Vano muthiyana aamwaakhula: “Enowa yookilokottha ni miyo kohooca.” 14Yave Muluku aaheerela enowa: “Weenre opakaka yeeyo – oolaphiwa ti weyo variyari wa mihuwo sootheene ni variyari wa inama sa ntuphini. Ngwiipurule ni erukuluwaawo ni ngweesele ntthupi mahuku ootheene a okumaawo. 15Nkiittanihe variyariwawo ni muthiyana, variyari wa ekhapiraawo ni ya muthiyana. Owo anaaswanye murwaawo ni weyo onuulume etthottopwaawe.” 16Aamweerela muthiyana: “Nkaattihe vancipale ohaawa wa orupalawanyu. Moohaawani nyuwo munimwaayara anamwane. Yoohaawelaanyu eniikhale wa ayinyu ni owo onimoolamulani.” 17Vano aamweerela mulopwana: “Mweenre mmwiiwelelaka mwaarinyu ni muca yoowiima ya mwiri, mwa yoowo Miyo koolamulenlaakani weera muhice, yoolaphiwa ti etthaya niwoko na nyuwo. Mmwice ni ohaawa otokotoko mwa yeeyo mookuminimwanyu wa mahuku ootheene. 18Eyo eniyoovaheeni malaxi a nyiiwa ni ontthuneya weera nyuwo muceeke soomela sa mmatta. 19Mmweereke oca yoocaanyu muvaraka muteko moota woovihaxa mpaka muneeraanyu muhokoleele vatthayani. Vano mmwivenxiwe mwa yeeyo, niwoko nyuwo ntthupi ni mmwihokoleele wa ntthupini.” 20Adamu aamutteha mwaariye Eva, niwoko owo aarwa othatuwa maayi a omutthu wootheene. 21Yave Muluku aapaka soowara sa ixapala ni aahaawariha seiye Adamu ni Eva. 22Vanonto Yave Muluku aaheera: “Vano mutthu oothatuwa ntoko Hiyo asuwelaka yooreera ni yoonanara. Khoontthuniheriwa weera owo arukuleke yoowiima ya mwiri wa okumi weera ace ni akhale ni okumi mahuku ootheene. 23Tivawo Yave Muluku aamoomonlaawe mmatta ya wEdeni weera alimeke mutthayani mwa mwemmwe owo aakhumihiwaawe. 24Amoomolakaru mulopwana, Yave Muluku aawiikaathi mpatta wa ninkhuma nsuwa wa ematta ya wEdeni akerubini* ni ikatana sa mooro ni saattikinyeya elipelelaka ephiro enrowa wa mwiri wa okumi.
നിലവിൽ തിരഞ്ഞെടുത്തിരിക്കുന്നു:
Epacerero 3: VMK2021
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Makhua Shirima Bible © Christelike Lektuurmaatskappy NPC, 2021.
