Nte 12
12
Makhasëko Maküü
1Itungo rasëë mutemi Hereode agaghoora mëkhono akwe uvakhasya ivë nanguu ahuvëi vëgëtunga va kanisa. 2Agamuuragha Yakobo muuna wamwa Yohana gwa itemeo. 3Naarë mweeso waona mwino ntendo ëyëë avayanjisya Ayahudi agafwaghëëra na agamukwata Fetero na umuutëa ujera. Ntendo ëyëë adwëëre itungo ra sigunkuu a Mëkaate nëititendee changa. 4Naarë wamukwata Fetero agamuutëa ujera na agamutunga, na agamutoa gwa maburi ane a asikae vëmughoje. Herode arë ufangie umufunya unji gwa antu në Fasaka akëa. 5Uvii Fetero agautëwa ujera. Kanisa rëgamurombea kunë Muungu gwa nguu na gwa nkhoo ëmwedu.
Malaëka Wamufunya Fetero Ujera
6Utiku wasuu Herode arë waramwua umufunya unji gwa antu, na Fetero arë uree mukhatëkhatë a maburi avëë a asikae. Mweeso arë utungiwe na mënyororo#12:6 Mënyororo: Ighavaa nërëoghohiwe gwa machuma. ëvëë, na asikae vangëja arë vëughoja gënyamwango ga gunji ga ujera. 7Na rarava, malaëka wa Müküü agadweera, na weru ugamwëka mu gadurumu; na mweeso agamukhua Fetero gu uvaru na agamufëtya, uguhanya, “Uka urë.” Na mënyororo* ëgagwa fang'ë ufuma u mëkhono akwe. 8Na malaëka agamwëëra, “Itunge mughonjo na yaa maatu ako.” Na agatenda uyi. Na mweeso agamwëëra Fetero, “Yaa nkhanjo ako na ung'onge nene.” 9Na mweeso agafuma unji na Fetero agamuhonga Mweeso ainamanyaa asaa në malaëka wayatendie arë a tutë, ëgweeso agaghema arë ugoona ndoti. 10Naarë veeso vakëa iburi ra mwandyo ra asikai na ra gavëë, vëgafika u gënyamwango ga chuma ga giingera umujini. Rurii wasuu ugarughuka weeso wiyene, na veeso vëgafuma unji na vëgaenda ukëërëa nyumba igëtunga: na gënyahafo malaëka agamureka mweeso. 11Nënaa Fetero wasagha iyene, agahanya, “Itungwee namanyaa mwino Müküü wamutumaa malaëka wakwe na antyoe nene ufuma u mëkhono amwa Herode na ufuma u mantu oong'e në Ayahudi arë vëyaindëe.”
12Naarë mweeso wamanya uyi, agaenda u nyumba amwa Mariamu, nyinya wamwa Yohana në rina rëngëja Mariko, kunë antu vaingë arë vihangwëye itambëëmwe vëuromba. 13Na mweeso naarë wagonontia u gënyamwango ga gunji, muncha unë mutumami wa u nyumba rina rakwe Roda agaja urumëëya. 14Naarë wamanya ruri wamwa Fetero, gwa uyanjo wakwe ainarughua gënyamwango ëgweeso agadua againgëa mung'ë na agavakhanëa mwino chu Fetero wëmëkie u gënyamwango. 15Veeso vëgamwëëra, “Veve umuhari.” Ëgweeso mweeso agasusutëya në tutë. Veeso vëgahanya, “Wasuu në malaëka wakwe.” 16Ëgweeso Fetero agafwaghëëra ugonontya. Na naarë veeso varughua, vëgamwona na vëgataka. 17Ëgweeso agavahumbwëra mukhono wakwe gusoko vëkire, mweeso agavadonea mwino Müküü wamufunyiye unji a jera. Na mweeso agavaëra, “Mumukhanëe Yakobo nanë anyandughu vangëja sayu ëyëë.” Uvii mweeso agahegha faafo na agaenda ng'andëëngëja.
18Naarë wacha, asikai vëgaingëwa na hënga hënga nküü, ntuni nëadwëëra kunë Fetero. 19Naarë Herode wamufenja na ainadaha umuhanga, agavawëyënkëëya asikai na agaraghëëya mwino veeso vënoneye vauraughwe. Uvii mweeso agaenda ufuma uYuda faka u Kaisaria, na agasagha kuuko.
Ikuya ramwa Herode
20Na Herode arë agavahura antu va uTiro na uSidoni. Uvii veeso vëgaenda viiburi umwona Herode. Tanju veeso vëgamufefeheya Bulasto atendeke u guuvaru wao. Mweeso arë mughondanëyi wa nyumba a mutemi. Veeso vëgamuromba majëghana, gusoko ng'ë ao arë ëuhangëa malëwa ufuma u ng'ë a mutemi. 21Naarë itiku ra umwona raghea Herode agayaa isaa rakwe ra utemi, agagikhaa gitumbë rakwe ra utemi, na agavatanantëya antu. 22Na antu vëgakurya mukindo vëuhanya, “Urui unë ruri wa muungu, na tiëse wa muntu!” 23Gënyahaafo malaëka wa Müküü agamukhua mweeso, gusoko ainamufaa Muungu iküryo, na mweeso agalëwa na mang'unyi na agakuya.
24Ëgweeso ukhani wa Muungu ugafwaghëëra na ugagiongeeya.
25Na Barinaba ina Sauli naarë vadaha mwëëmo wao wa utanantya Sayu Njija, vëgasuka uYerusalemu na vëgamuhoreeya Yohana unë rina rëngëja Mariko.
നിലവിൽ തിരഞ്ഞെടുത്തിരിക്കുന്നു:
Nte 12: RNT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Kirimi New Testament © Bible Society of Tanzania, 2008.
