Nte 11

Fetero Ugufunya Sayu uKanisa uYerusalemu

1Atumami nanë ahuvëi kuuko uYerusalemu vëgategheeya mwino antu va ndughu ingeja noo vahuvëa ukhani wa Muungu. 2Uvii Fetero naarë wenda uYerusalemu, iburi ra antu nëvëtowe ihungu vëgamukosoa#11:2 Vëgamukosoa: Vëgëmukhanëa mahutye akwe. 3vëuhanya, “Asikë në veve wendie gwa aghosya nëvineenda ihungu na walile mwinao.” 4Ëgweeso Fetero agaandya na agavadonea mpoampoa; 5“Nene arë ngu muji në üküü wa u Yafa nguromba, na ngaandya utindia ngaotea ndoti, gëntu gëusima gënya mwenda në üküü, gëusima fang'ë ufuma girunde gwa mafembu ayo ane, na gëgaja fifë kunë nene. 6Nëgagërarava gëntu gasëë gwa fifë na nëgaona maimwana nanë maimwana nëugulia nyama nanë maimwana nëëgiutuuta na nda nanë nyonyi ya unto. 7Na ngategheeya ruri ugunkhanëa nene, ‘Fetero, uka kigita na ulie.’ 8Ëgweeso nene ngahanya. ‘Vee, Müküü, gusoko gëtu nëgëkwalë na mbesa nëgikhwe ginakëa kamwe u momo wane.’ 9Ëgweeso ruri wasuu ugasucha kangë muhënjo wa gavëë ufuma girunde, ‘Në Muungu wayaoyiye veve utinoneye uyaëtana ëkhwalë.’ 10Ërëë rëgadwëëra mëhënjo ëtatu, na oong'e ëgasuchwa kangë unto girunde. 11Gënyahafo itungo ërëëro antu vatatu naarë vatumiwe kunë nene ufuma uKaisaria vëgafika unyumba kunë nene arë ngikhaa. 12Na Mwahu Mweru agankhanë nënde itambëëmwe ginao, na ntahange wisaghasaghëi. Anyandughu avai nëvëmutandatu vëgakhuvëa nanee mu muhënjo, na gugaingëa u nyumba amwa Korinelio. 13Na mweeso agagukhanëa sese mwino mweeso wamuune malaëka wimëkie unyumba akwe na agamukhanëa, ‘Tuma antu uYafa na vende umwëtaana Simioni nëugwëtaanwaa Fetero, 14mweeso winjë ugukhanëa veve sayu unë injë ugutenda veve utyoeke, veve na antu voong'e va ukhaako.’ 15Mwino naarë naandya gutufu urighëëtya, Mwahu Mweru agavasimëa mwino chu arë wagusimëe sese hafo mwandyo. 16Na nene ngakumbukwa ukhani wa Müküü, mwino mweeso arë wahanyiye, ‘Yohana wabadisiye gwa majë, ëgweeso nyenye mujie ubadiswa gwa Mwahu Mweru.’ 17Uvii nësa Muungu waafie veeso gëfewa ëkëëko mwino mweeso wagufee sese itungo narë sese gwahuvëa gwa rina ra Müküü Yesu Kiristo, nene në anyu nëdahe umufënga Muungu.” 18Itungo naarë veeso vategheeya uyii vëgakia twë. Na veeso vëgamukurya Muungu, vëuhanya, “Uvii Muungu waafie antu va ndughu ingëja noo itungo ra ufea na uhanga ufanga wa khae na khae.”

Kanisa ra Antiokia

19Ahuvëi vëgafaghata gusoko a makhasëko naarë adwëëre itungo naarë Sitefano wauraghwa. Veeso vëgaenda faka uFoinike, na uKipuro, na Antiokia, vëutanantya ukhani gwa Ayahudi gutufu. 20Ëgweeso gwina antu vëgëtunga mukhatë ao, ufuma uKipuro na uKirine, unë arë vafika Antiokia vëgarighëëtya na Ayahudi nënaa vëhongie ntende a Gëyunani, vëumutanantya Müküü Yesu. 21Na mukhono wa Müküü arë wëitambëëmwe inao, na iburi iküü ra avoo naarë vëgahuvëa vëgamufëtukëa Müküü. 22Ahuvëi va kanisa ra uYerusalemu vëgategheeya sayu iyii, na veeso vëgamutuma Barinaba Antiokia. 23Mweeso naarë wafika na agaona mboto a Muungu, mweeso agayanja; na agavasusutëya veeso voong'e vasaghe gu uhuvëi kunë Müküü itambëëmwe na ndolyo nënkhamu. 24Barinaba arë muntu muja wijue Mwahu Mweru nanë uhuvëi. Na iburi rikuu ra antu vëgagiongeeya kunë Müküü. 25Uvii Barinaba agaenda uTariso umufenja Sauli. 26Na itungo nënaa wamuhanga mweeso, agamwëta faka Antiokia. Gwa mwaka woong'e veeso vëgatang'ana itambëëmwe na ahuvëi, na vëgasëya iburi iküü ra antu. Na gu Antiokia atumami vëgaëtaanwa Akiristo gwa muhënjo wa mwandyo.

27Mung'ë a matiku ayaa anyagëdaghu ufuma uYerusalemu vëgaja faka Antiokia. 28Na umwedu mukhatë awe rina rakwe Agabo agaëmëka na agaraghëa gwa udaho wa Mwahu mwino gujie utendeka gwina njaa nküü gu urëmi woong'e, na ëyëë ëgadwëëra naarë Kilaudio utemie. 29Na atumami vëgaramwua, mu muntu ugining'ana na nguu yakwe atoe waarëyi gwa anyandughu në vëgikhaa uYuda. 30Na veeso vëgatenda uyii, vëgavatoera anyampaa ukëërëa mëkhono amwa Barinaba ina Sauli.

നിലവിൽ തിരഞ്ഞെടുത്തിരിക്കുന്നു:

Nte 11: RNT

ഹൈലൈറ്റ് ചെയ്യുക

പങ്ക് വെക്കു

പകർത്തുക