Matyê 9
9
Yěso ghʉ tâʼ ngaŋə-pwóʼtə́ shwítə
(Mks 2.1-12; Lks 5.17-26)
1Gháp laʼ yə́rə́, Yěso kə̂u cər kənyúʼ, ə́ ntə́u nci, ə́ mbə̌ʉ lə̂ cər túsoŋ záp, 2ə́ nkə́u wó, pə́ laghʼ cǒ ngaŋə-pwóʼtə́ ńtó, a nûŋ ndəu kweʼ. Yěso jwô mbə̂u yi, mbiŋə pi gháp lǎghʼ yé ńtó lǎghʼ ńcóghʼ ntə̂ʉ lə́ zʉ́ Yěso, ə́ ndáʼ lə́ ngaŋə-pwóʼtə́ ngô: «Môu ghâa ô ndʉʉ-mboŋ! Pə́ lyəghʼə məno tə́poŋ mô ńŋə́ mbó gho.» 3Pəcó pəkeʼtə́-lə́pə́ʉ Mə̌usə̂i* pə̂ yʉʼ wó, ə́ nzúʼ, ə́ mə́ ndâʼ təcər páp ngô: «Ŋuu wo kaŋ mə́ lwoŋ Sê!» 4Yěso jî zə̂u yi gháp pə́ nkwǎŋ, ə́ ndǎʼ lə́ páp ngô: «Ə́ lei gháʼá pei poŋə́ ghwǒ yo mbə̂u məkwaŋtə tə́poŋ cər məntə̂ʉ pei? 5Ə́ gháʼá ngwo lə̂ ndâʼ lə́ ŋuu ngô: “Pə́ lyəghʼə məno tə́poŋ mô”, gháp pə lə̂ ndâʼ lə́ zʉ́ ngô: “Lěsê ə́ ŋə̌i.” Zárə́ zaŋə́? 6Məŋ ngwo nyarə́ wéi ngô: Môu Ŋuu* pə́ ndəu ndesé, mə́i pə́ lə ŋə́ mətəʉ lə́ zʉ́ lə̂ ndághʼ ńdyəghʼə́ məno tə́poŋ pye-mə́soŋ ńŋə́ mbó páp.» Ə́ ncʉ́ʼ nkə́ ndáʼ lə́ ngaŋə-pwóʼtə́ ngô: «Lěsê, ə́ ńkhwǒr kweʼ zô, ə́ ndaghʼ ńdə́r lə̂ nzeʼ gho.» 7Ŋuu wêi lêsê, ə́ ndər yé lə̂ nzeʼ zʉ́. 8Lâʼ jwô yo no, ə́ kəʼə gháp, gháp pə̂ ngûʼtə Sê ghíʼ a ŋə̌ yo mbə̂u mətəʉ lə́ pye-mə́soŋ.
Yěso laʼ lə́ Matyê ńgó a tsə́ʉ nzəm zʉ́
(Mks 2.13-22; Lks 5.27-39; 15.1)
9Yěso fû yʉʼ wó ndə́r, ə́ ngǐ lěi yʉʼ yi pə́ pfû ntsəp Pəlóma* wó, cǒ ŋuu nyâŋ, ləjôghʼ yé pə̂ Matyê. Yěso lâʼ lə́ zʉ́ ngô: «Tó poghʼo lə̂ cʉ́ʼ ŋə̂i.» A lêsê, ə́ ntsə́ʉ nzəm zʉ́. 10Ə́ ghʉ mbə̂ có leʼé, Yěso pə̂ ndə̂ Matyê ə́ mə́ nzʉ̂ zə̂u, pəcó pəpfǔ-ntsəp Pəlóma* tə nzáa, gháp pə pəcó ngaŋə cǐ tə́poŋ, tô ńkwátə́ Yěso gháp pə ngaŋə-jyêʼ-no* yé, gháp pə pǎp nyâŋ sê ə́ mə́ nzʉ̂ zə̂u. 11Pəfalísia* jwô yə́rə́, ə́ ntúŋú ngaŋə-jyêʼ-no* Yěso ngô: «Ńté hó tə́ wei gháp pə pəpfǔ-ntsəp Pəlóma* gháp pə pəcó pye tə́poŋ təmtə zə̂u ńzʉ́?» 12Yěso zûʼ ghíʼ gháp lâʼ, ə́ ndǎʼ lə́ páp ngô: «Mboʼ ŋuu pə̂ yé shʉʼʉ, ə́ ngwo ndôu ngʉ-məfu po, ŋuu pə̌ ngǒu mboŋə́ lǒu yé. 13Ə̂ zə̂u yi ə́ ghʉ̌, m mə̂ ndâʼ lə́ pei ngô: Pei wó njyéʼ zə̂u yi yo no yi pə́ lə ŋwaʼá laghʼ ńdáʼ: “məŋ kôŋ tsâa-mə́jʉ̂ŋ, ə́ nděi poʼ yi pə́ laghʼ ńgûʼtə ghâa.” Yo zə̂u yi ə́ ghʉ̌, məŋ ndâʼ ngô: kâa n nkə tó ghâa lə̂ fúŋ pye shʉʼʉ, məŋ kə tó ńté pə́ pəghaŋə məfaa ńgó gháp pə̂ʉ lə̂ mbó Sê.»
Ləkǒŋ koŋə́ nyáŋ nji ńté no Sê
14Pəghaŋə-ku Jâŋ ghʉ ńtó, ə́ ntúŋú Yěso ngô: «Paghʼ Pəfalísia* nyâŋ nkôŋ koŋə́ nyâŋ nji lə̂ sʉ́ʉtə́ Sê, kâa zô ngaŋə-jyêʼ-no kə́ mbóu mə́ ngʉ záp yə́rə́ ńté hó?» 15Yěso pwôr lə́ páp ngô: «Tə mboʼ pə́ wó yʉʼ pîŋ ŋuu, a pyêr nyáŋ nyáŋə́ pəsə̌u pi pə́ yǎa ngə́u gháp pou mə́ fʉ̂ ńté hó? Lə́ pə́ táa fú mbó páp có leʼé sǎʼ yé, gháp jî lə̂ nyáŋ nji mpfu wêi ə́ sʉ́ʉtə́ Sê.»
16Yěso kə̂ ncí ndâʼ ngô: «Mboʼ ŋuu lâghʼ yé zə̂u ndǐ shwî ńcə́r ngwʉ̂ lə́ ndwuŋu ndǐ po. Ŋuu lə̌i ngʉ́ yə́rə́, mə́i zə̂u ndǐ shwî wo kʉʼʉ́ sə̌ ndwuŋu ndǐ, ə́ ngwʉ̂ kʉʼʉ́ ngúʼ. 17Pə́ lə̌i mə́ ngwô ndoʼo məluʼ cər ntə̂uʼ ngəp*, pə́ côghʼ yé məluʼ mi pə́ pyér ncwor cworə́ cər ndwuŋu ntə̂uʼ po. Pə́ lə̌i ńgʉ́ yə́rə́, mə́i məluʼ mi shwî wo fə̌uʼ, ə́ sáa ndwuŋu ntə̂uʼ zei, ə́ pə cwí məluʼ, ə́ nkə́ ncwí ntə̂uʼ lə́wó. Ə́ pə́ ntúŋu ńgó pə́ cóghʼ məluʼ shwî pə́ cər ntə̂uʼ shwî, məluʼ gháp ntə̂uʼ nâa ncwór.»
Yěso ghʉ cǒ məngyě shwítə, ə́ mbou nkə́ ncí ngʉ́ cǒ môu məngyě zʉ̂ʉ
(Mks 5.21-43; Lks 8.40-56)
18Yěso pə̂ ndâʼ no mbó páp yə́rə́, cǒ ntikáŋ tô ńnúŋ məku zʉ́ ə́ ndǎʼ ngô: «Môu ghâa yi məngyě kə̌ nkwʉ́ pə̂ mpfu wo, lə́ tó ńzápə́ pô zô lə́ zʉ́ a pə́ wó.» 19Yěso lêsê, gháp pə ngaŋə-jyêʼ-no* yé tsə̂ʉ nzəm zʉ́.
20Gháp pə̂ ndə́r, cǒ məngyě pə̂ nou lâʼ, ə́ ngwǒ ghou mə́sóu, mə́i ə́ ghaghʼə mə́ yé ghaghʼə́ nguʼ tsap-pwô lə̂ ləghə̂m. Ə́ nyêʼtə, ə́ fú nzəm, ə́ ntó ńkə̂u lətsáa ndǐ Yěso. 21Ńté no a lə pə́ ndâʼ cər ntə̂ʉ zʉ́ ngô: «N ndə̌i ncághʼə́ pô zâa tə mbə́i nkə̂u pə̂ ndǐ yé, mə́i n ngwo shwítə́.» 22Yěso shə́rə, ə́ njwó yé, ə́ ndǎʼ lə́ zʉ́ ngô: «Môu ghâa, ô ndʉʉ-mboŋ, ə mbə̂u yi o lǎghʼ ńcóghʼ ntə̂ʉ lə́ məŋ ghʉ o shwítə.» A kə̂ ntóghʼ shwítə́ pə̂ mpfu wêi mpfu wêi.
23Yěso lə̂r tə nkə́u nzeʼ ntikáŋ wə̂, ə́ njwó, mə́i pəpúʼ-lə́lúŋú lə̂ ndághʼ ńtʉ́ŋ mpfû, yaa mə́ ndáʼ ntó tə nkə̂itə́, ə lâʼ pou mə́ nzórə́. Yěso lâʼ lə́ páp ngô: 24«Pei lə̂r wéi, môu məngyě wêi kə́ kwʉ̂ yé, a lê lě.» Lâʼ zûʼ, ə́ njwî yé. 25Pə́ fû ndə̂ ə́ nkwarə́ pye. Yěso kə̂u ndə̂, ə́ ngwǒ pô môu məngyě wêi, a lêi-lěi ndésê. 26Pə́ laghʼ no zêi fú ńsár yʉʼ lə́ zêi paghʼə-ngoŋ.
Yěso ghʉ pəfwoghʼ-mə́nyôghʼ pə́pwô shwítə
27Yěso fû yʉʼ wó mə́ ndə́r, pəcó pəfwoghʼ-mə́nyôghʼ pə́pwô tsə̂ʉ nzəm zʉ́, ə́ mə́ ngeʼtə́ ńdâʼ ngô: «Môu fou Ndavîd tsáa məjʉ̂ŋ mághʼ.» 28A lə̂r tə nkə́u ndə̂, pəfwoghʼ-mə́nyôghʼ pə̂ tô ńkwátə́ yé, a túŋu gháp ngô: «Tə pei pə̌ mbə̂i cər ntə̂ʉ pei ńgó mboʼ n ngʉ̂ zə̂u yi pei túŋu lə̂?» Gháp pwor ngô: «Ə̂ŋ Nde o kuʼ lə̂ ngʉ́.» 29Yěso cʉ̂ʼ nkə́ nzápə́ mbô lə̂ nyôghʼ máp, ə́ ndǎʼ ngô: «Pə̂i-ntə̂ʉ zéi ghʉ ńgó zə̂u yi pei ntsáa zěi, ə̂ pə́ yə́rə́.» 30Nyôghʼ máp cʉ̂ʼ nkə́ ndêi-lěi shwítə́, gháp ji lə̂ njwó yʉʼ. Yěso cwôtə gháp ngô: «Pei páa lə̂ ngʉ́ tə ŋuu jî zə̂u yi ə́ lěi.» 31Lə́ gháp zêʼ tə ńkə́u péi, ə́ ndǎghʼ ləjôghʼ Yěso fú ńsár yʉʼ tsəm lə́ zêi paghʼə lâʼ.
Yěso ghʉ cǒ cípúʼ lâʼ no
32Pəfwoghʼ-mə́nyôghʼ ghi fú ndə̂ kwǎr, pə́ laghʼ cǒ ŋuu ńtó mbi Yěso, mə́i có zəghʼə tə́poŋ* lə ghʉ a cʉ̂ʼ cípúʼ. 33Yěso lêi tə nzûŋ zêi zəghʼə tə́poŋ*, cípúʼ wei kə̂ ntóghʼ njí lə̂ ndáʼ no. Lâʼ jwô, ə́ fú mâa, ə́ mə́ ndâʼ ngô: «Pə́ laa kə́ jwó zêi mbə̂u no cər ngoŋ pye Ísə́lahêl.» 34Lə́ Pəfalísia* lâʼ záp ngô: «Tə́-ndə̂ məzəghʼə tə́poŋ* lə̂ ghʉ̌ záʼa ndě Yěso poŋə́ kǔʼ lə̂ nzúŋ məzəghʼə tə́poŋ* mêi!»
Yěso tsâa məjʉ̂ŋ nou lâʼ
(Mks 6.34; Lks 10.2)
35Yěso pə̂ ndêi cər mətúsoŋ mə́tsəm tə mbaa cər məlâʼ, ə́ ŋə̌i nkə̂u cər məndə̂ cûʼtə*, ə́ njyêʼ pye no Sê, ə́ ndêʼtə Nkəʉ Shʉʼʉ yi ə ndeʼtə ghíʼ Ləfou Sê* pə̂, ə́ ngʉ məghou mbə̂u lə̂ mbə̂u me lə́ pye, məlǒʼ* mbə̂u lə̂ mbə̂u me ndəu pye, 36ə́ njwó mənou lâʼ, məjʉ̂ŋ máp kôo yé, ńté no gháp lə pə́ ghíʼ nou məndənzʉ* tə́ mbápə. Gháp pə̂ məjʉ̂ŋ məjʉ̂ŋ, mə́i gháp fú mə́ nkáa. 37A cʉ̂ʼ nkə́ ndáʼ lə́ ngaŋə-ku* yé ngô: «Məzʉ̂ mi pə́ wo nkâʼ ndǒghʼ wó ə́ záa gháʼate, ndwuŋ pəghaŋə-faʼ pou nkhwóghʼ. 38Ə́ poŋ ńgó pei sʉ́ʉtə́ ngaŋə nkâʼ a kʉʼʉ́ pəghaŋə-faʼ pi gháp wo pə́ loghʼ məzʉ̂ mêi.»
നിലവിൽ തിരഞ്ഞെടുത്തിരിക്കുന്നു:
Matyê 9: NLA
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
