Matyê 3
3
Jâŋ Mbaptísʉ pə̌ ndeʼtə no Sê
(Mks 1.2-6; Lks 3.1-6; Jâŋ 1.19-23)
1Ə́ nyêʼ ncí, Jâŋ Mbaptísʉ kwâr koŋə-məkwaʼá Yudêi, ə́ mə́ tsə́tə ngô: 2«Pei kə́p cǐ zéi, ńté no mpfu yi Sê wo nyarə́ ləfou yé cʉŋə mə́ tə mbáatə́.» 3Jâŋ lâghʼ ḿbə̂ ŋuu yi Esǎya ntsətə-nkəʉ Sê* lə lǎʼ no ńté yé ngô:
«Nji ŋuu kǒʼ, ə́ fú koŋə-məkwaʼá, ə́ mə́ ndáʼ ngô:
Pei tsúŋtə́ laŋə́-ndə̂u Nde,
ə́ ngʉ́ pəshwáŋə-láŋə́ pé tə́ʉ ndʉŋ-ndʉŋ!»
4Jâŋ lə pə́ koŋə-məkwaʼá, ə́ mǎʼ ndǐ, ə pə̂ yi pə́ lǎghʼ mənyuŋ kamêl ḿbáʼ; ə têi yi ə́ lə pə́ luʼú zʉ́ pə̂ ngəp mə́nye*; məzʉ̂ mé pə̂ ngʉ̌ʉ gháp ŋwâʼ tyer. 5Ə pye pə̂ fû túsoŋ Yelúsalêm mbaa cər Yudêi ntsəm, ə́ fû cər paghʼə-ngoŋ yi ə́ pə́ nkaŋ nci Yuudêŋ ńtó ńjwô Jâŋ, 6ə́ ntə́ʉ mbi lâʼ, ə́ mbə̂i məno tə́poŋ máp, Jâŋ ŋə̂ gháp nci cər nci Yuudêŋ.
7Jâŋ jwô ghíʼ pye lə̂ nou pəfalísia* gháp pə pye lə̂ nou Pəsadúsia* tô záp tə nzáa lə̂ mpfú nci, ə́ ndǎʼ lə́ páp ngô: «Ngər mənô, wǒ kə jyéʼ wéi lə̂ nkhʉ̂ ngwôʼ yi Sê pə̌ ngwo ntághʼ wó tû pei. 8Pei ghʉ́ pə̂ məno shʉʼʉ mi ə́ wo nyarə́ ńgó pei kə́p mə́ cǐ zéi. 9Pei páa lə̂ ndághʼ pə̂ ndaʼ ntsʉ wéi ńdáʼ ngô: “Pâghʼ ngər Ábələhâm.” Pei cʉ́ʼ n ndâʼ wéi, Sê kuʼ lə̂ shə́rə́ məghǒ mwo ńdághʼ ńgʉ̌ ngər Ábələhâm. 10Pə́ tə́i mə́ ndáʼ nkhwór nzaa lə̂ ndághʼ ńkhwóʼ zarə́ zarə́ tʉ̌ yi kâa pə́ nzə̂m yé məntǎa shʉʼʉ; pə́ wo fú sê nkhwóʼ zěi, ə́ mǎʼ mǒghʼ.
11N ndaghʼ zâa pə̂ nci fefe ŋə̂ wéi nci lə̂ ndághʼ nyarə́ ńgó pei kə́p mə́ cǐ zéi; lə́ cǒ ŋuu pə́ nzəm məŋ mə́ ntó, ə́ tə̌i ńdéi ghâa tə kâa m mbə́i nkuʼ ghâa pə́ lə̂ nkéʼ mənkʉ məlaŋə́ mé. A táa laghʼ yé pə̂ Zəghʼə Ndêi-lěi gháp mǒghʼ ńŋə́ wéi nci. 12A wo tó, ə́ tétə́ məzə̂u mi pə́ lǒghʼ nkâʼ. Ə́ cóghʼ mi shʉʼʉ cər nkəi. Ə́ cʉ̌ʼ mətyʉŋə, a cwə̂r cər mǒghʼ yi tə́ láʼ ncwí*.»
Yěso pfû nci
(Mks 1.9-11; Lks 3.21-22; Jâŋ 1.29-34)
13Yěso cʉ̂ʼ nkə́ fú Galilêi ńtó lətsǒ nci Yuudêŋ, ə́ ncə́r Jâŋ, â ŋə́ yé nci. 14Jâŋ pə̂ ndə̂ʼ, ə́ mə́ ndâʼ lə́ zʉ́ ngô: «Gho lə̂ ghwǒ lə̂ ŋə́ ghâa nci, o pou ntó ńgó məŋ lə̂ ŋə́ ghô nci áa?» 15Lə́ Yěso pwôr lə́ zʉ́ ngô: «Pə́i ńgó ə̂ pə̂ yə́rə́ mpfu wo, ńté no poghʼo lə̌i ngʉ́ yə́rə́, ə́ laghʼ ḿbə́ zə̂u yi Sê pə̌ ntúŋú.» Jâŋ cʉ̂ʼ nkə́ mbə́i, 16ə́ ŋə́ yé nci. Yěso lêi tə nkwár, ntsʉ tʉ̌-lə́pû tsóʼo ńtə́ʉ. A jwô Zəghʼə Sê fû tʉ́, ə́ shíʼ ə́ mbə́ ghíʼ puŋu lə̂, ə́ ntó ńnyáŋ lə́ zʉ́. 17Cǒ nji fû tʉ̌-lə́pû ə́ ndǎʼ ngô: «Yo Môu ghâa, n nkoŋ yé gháʼate, â ghâa lətsei.»
നിലവിൽ തിരഞ്ഞെടുത്തിരിക്കുന്നു:
Matyê 3: NLA
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
