Lúʼkáasʉ 23
23
Pə́ feʼ Yěso mbi ngə́mnaa Piláto tə mbaa mbi fou Elôdə
(Mat 27.2,11-14; Mks 15.1-5; Jâŋ 18.28-38)
1Ngaŋə cûʼtə lâʼ yə́rə́, ə́ nděsê pə́tsəm, ə́ ndǎghʼ Yěso ńdə́r lə̂ mbi Piláto. 2Ə́ njǐ lə̂ mbútə́ yé ndǎʼ ngô: «Paghʼ jwǒ ŋuu wo ghíʼ a ŋâa nkár cər ngoŋ wághʼə ńcôŋ tû lâʼ, ə́ ntôʼ pye lə̂ máʼ ntsəp ńŋə́ lə́ fou pəlóma. Ə́ mbǒu mə́ ndâʼ ńgó â Kəlísto, ə́ mbə́ fou.» 3Piláto túŋu Yěso ngô: «Ô fou pə Yúda áa?» Yěso pwôr lə́ zʉ́ ńgó: «O pə̌ ndaʼ yə́rə́.» 4Piláto lâʼ lə́ pətə́-ndə̂ pənuŋú-poʼ Sê mbaa lə́ lâʼ ngô: «Káa m mə́ njwó ghâa no yi ŋuu wo fǎa zěi.» 5Lə́ gháp kʉʼʉ ntə̂i ndəʼ ńdâʼ ngô: «A pə̌ ŋáa nkár ńtwótə pye ńgó gháp tə̂i tû ə́ cər lâʼ Yudêi tsəm. A lə ji Galilêi, ə́ yo a kə́ mə́ ndaghʼ ńtó tó tə ńkə́u yaʼa gháʼá lo.» 6Piláto zûʼ yə́rə́, ə́ ntúŋú ngô: «Â ŋuu Galilêi mo?»
7Gháp pə̂i. A tə̂u Yěso ńŋə́ lə́ fou Elôdə, ńté no zʉ́ lə́ lə sâʼ zêi paghʼə-ngoŋ. Ə́ ghi pə́, mə́i Elôdə kə tô tə mbə́ yé Yelúsalêm lə́ məleʼé mêi. 8Elôdə jwô Yěso, ə́ fú ntsêi gháʼate, ńté ńgó tə fú, a pə̂ ntsâa lə̂ njwó yé ńté məno mi pə́ lə ləʼtə ńté yé; ə́ mə́ nkwâŋ ńgó mboʼ a ghʉ̂ cǒ ndǎa-jwô-no wêi, a jwô yé lə́wó. 9Ə́ ntúŋú yé məno tə nzáa, lə́u a pwôr yé có po. 10Pətə́-ndə̂ pənuŋú-poʼ gháp pə pəkeʼtə́-lə́pə́ʉ Mə̌usə̂i pə̂ yʉʼ wó, ə́ fú mə́ nkâp məno tû zʉ́ gháʼate. 11Elôdə gháp pə pəmə́káa pé nzoutə Yěso, ə́ ndyáŋə́ yé tə mbyé ndǐ ləfou, ə́ mǎʼ ndəu zʉ́. Elôdə lâʼ ńgó pə lághʼ yé mbə̌ʉ nzəm ngwó ńŋə́ yé lə́ Piláto. 12Ə́ lə ghi pə́, Piláto gháp Elôdə pə̂ lə̂ mbəu, lə́ tə mbóu fú leʼé wêi, gháp zʉ́ cʉ̂ʼ pəsə̌u.
Pə́ ŋə́ Yěso ńgó pə wó ńjwí yé
(Mat 27.15-26; Mks 15.6-15; Jâŋ 18.39-40; 19.4-16)
13Pə́ lâghʼ yé ńkə́u wó, Piláto fûŋ pətə́-ndə̂ pənuŋú-poʼ, tə mbaa pəsǎʼ-lâʼ gháp pə pye lâʼ pé, ə́ nkə̂itə́ gháp. 14Ə́ ndǎʼ lə́ páp ngô: «Pei yǎa ńdǎghʼ ŋuu wo tó mbi məŋ, ə́ ndaʼ ńgó a pə̌ ŋáa ńcôŋ tû pye lâʼ. N nkə̌ fěʼ yé pə́ mbi pei. N ngwo lə́ məno mi pei yǎa ndǎʼ měi ńté yé, kâa jwô ghâa có no yi a wʉ̌ zěi tə mboʼ pə́ jwî yé jwí. 15Tə mbaa fou Elôdə kâa jwô yé wʉ no yé, tə a pou mə́ mbághʼə yé ńŋə́ lə́ məŋ. Məŋ ndâʼ gháʼá wéi ńgó ŋuu wo kâa wʉ̂ yé có no tə ə́ pə̂ yi mboʼ pə́ jwî yé. 16Lə́ ghíʼ ə́ kə́ mbə́ yə́rə́ lə̂, n ngwo ghʉ̌ pə lághʼ ngwaa ńsə́u yé ńtyághʼ yé ńnyér.» 17Ə́ lə pə̂ lə́ maa lətsei Pásʉ́ka ntsəm, Piláto ghwô lə̂ nkwárə́ tâʼ ngaŋə-tsâŋ. 18Lə́, lâʼ cʉ̂ʼ mbáŋə pə̂ yʉʼ ńdâʼ ngô: «Pə jwí ŋuu wə̂, ə́ nyêr Pənə́páasʉ.» 19Pənə́páasʉ wêi lə pə́ tsâŋ ńté tághʼə́ yi a lǎʼ mbə́ túsoŋ, ə́ mbou nkʉ́ʼʉ́ no njwí ŋuu. 20Piláto kə ncí ndáʼ no lə̂ lâʼ ńté ńgó a lə pə́ nkôŋ nyêr Yěso. 21Lə́ lâʼ tsəm kə̂ mə́ nkʉ́ʼʉ́ mbáŋə pə̂ yʉʼ, ə́ ndâʼ ngô: «Kʉ̌ʉ yé lə́ tʉ̌-mbʉ̂ŋtə! Kə́ nkʉ̌ʉ yé pə́ lə́ tʉ̌-mbʉ̂ŋtə!» 22Piláto lâʼ no lə̂ lâʼ lə̂ mbâatə mpfu tárə́ ngô: «No tə́poŋ yi a ghʉ̌ zěi, ə̂ zarə́? Káa məŋ njwô ghâa có no yi a wʉ̌ zěi tə mboʼ pə́ jwî yé. N ngwo ghʉ̌ pə lághʼ ngwaa ńsə́u yé, məŋ nyér yé.» 23Lə́ gháp kə̂ mə́ ntə̂i pə̂ ndəʼ ńgó pə kə́ nkʉ̂ʉ Yěso kʉ̌ʉ lə̂ tʉ̌-mbʉ̂ŋtə. 24Ə́ tsə Piláto, a cʉ̂ʼ ngʉ́ zə̂u yi gháp lə pə́ ntúŋu yé zěi. 25Ə́ fú tsâŋ ńkwarə́ ŋuu yi gháp lə túŋú ńgó a kwárə́ yé. Ə́ ŋuu yi a lə kə́u tsâŋ ńté tághʼə́ mbaa no njwí ŋuu, ə́ ŋə́ Yěso lə́ páp ńgó gháp laghʼ yé ńgwó ńgʉ̂ záp zə̂u yi gháp kǒŋ.
Pə́ laghʼ Yěso ńdə́r lə̂ ngwó ńjwí yé
(Mat 27.32-44; Mks 15.21-32; Jâŋ 19.17-22)
26Gháp laghʼ Yěso mə́ ndə́r, ə́ nkə́u laŋə́-ndə̂u ńjwó Síməu ŋuu Silêinə pə̂ nkwô nkâʼ. pəlwóʼó-ntso ghou yé ndǎghʼ təʉ ńgʉ́ a khwôr tʉ̌-mbʉ̂ŋtə Yěso ndághʼ ńtsə́ʉ nzəm páp. 27Ə lâʼ lə pə́ nzəm, pəngyě pə̂ nou ŋə́i mə́ mbûʼ mənzoʼ máp ə́ ngêʼtə́ ńtʉ́ŋə ngwôʼ Yěso. 28Yěso ŋəi tə shərə ńnáŋtə́ gháp ndǎʼ ngô: «Pəngyě Yelúsalêm, koo pei kə̂ ndâa ghâa, pei lâa pə̂ tû-mbəʉ zéi tə mbaa ghəpə́ zéi. 29Pei jí ńgó məleʼé lâʼ pə́ ntó, ə́ mbə́ mi pə́ wo lǎʼ ngô: Pəndʉʉ-mboŋ, ə̂ pəkə̌i-pəngyě, ə́ pi gháp laa kə́ jí, káa kə́ nóŋə gháp môu. 30Ə́ wo láʼ kə́ pə́ pə̂ tə pye lâʼ lə́ məkôr jwǐ ngô: Pei kóghʼə́ ńcwə́rə́ lə́ paghʼ, ə́ lǎʼ lə́ mi pəmə́ceʼé ngô: Pei koghʼə́ shwə̌ghʼ wághʼ. 31Ə́ tsâa lə̂ nkwʉ́tə́ yə́rə́, ńté no pə́ lə̌i ndáp lə̂ tʉ̌ shwî gháʼa, mə́i pə́ táa kə́u lə̂ tʉ̌ zə̌u, ə́ fú cʉ́ʼ ghʉ̌ pə́ gháʼá?» 32Pə́ lə nâa Yěso gháp pə pəcó pətsǒŋ pə́pwô ńdǎghʼ ńdə́r, lə̂ ngwó ńjwítə́ gháp pəpáp. 33Gháp lə lə̂r tə nkə́u yʉʼ yi pə́ fûŋ ńgó Kwěi-tû, pə́ kəʉ Yěso lə́ tʉ̌-mbʉ̂ŋtə, tə mbaa pətsǒŋ pêi pə́pwô lə̂ máp mətʉ̌-mbʉ̂ŋtə. Tâʼ pə̂ lə́ ndyəghʼə́ po Yěso yi təʉ, cǒ pə̂ lə́ ndyəghʼə́ po yé yi kwap. 34Yěso sʉ̂ʉtə Sê ngô: «Tǎa, lyəghʼə́ məfaa ghâp, ńté ńgó káa gháp pə̂ ńjí gháp zə̂u yi gháp ghʉ̂ zěi.» Pəlwóʼó-ntso tə̂m pyêr ńdaghʼ ńgáptə́ məndǐ mé. 35Ə lâʼ lə tə̂ʉ mə́ njwô ghíʼ pə́ kʉʉ Yěso. Pəsǎʼ-lâʼ pə̂ njwî yé ńdâʼ ngô: «A lə pfû pəcó pye mbó ləwʉ̂, a pou mpfú tû-mbəʉ yé mpfu wo láa, ghíʼ a lə̌i mbə́ Kəlísto, ə́ ŋuu yi Sê lə tsóʼó yé.» 36Pəlwóʼó-ntso lə kə́ mə́ ndyáŋə záp yé lə́wó, ə́ ncʉ́ŋə́ mbâatə yé, ə́ nkʉ̂ʉ lətǐ ntsʉ zʉ́. 37Ə́ mə́ ndâʼ ngô: «O lə̌i mbə́ fou pəyúda, o pfû tû zô mbô ləwʉ̂ pə́ gho.» 38Pə́ lə ŋwaʼá zə̂u, ə́ nkʉ̌ʉ lə́ tʉ̌-mbʉ̂ŋtə ndəu tû Yěso ngô: «Yo gháʼá mbə́ fou pəyúda.» 39Cǒ tâʼ ntsǒŋ yi pə́ lə kə́r yé lə̂ yé tʉ̌-mbʉ̂ŋtə pə̂ nzôutə Yěso ńdâʼ ngô: «Koo pə́ Kəlísto mo? Pfú tû zô mbó ləwʉ̂, ə́ nkə́u ḿpfú zághʼ lə́wó.» 40Lə́ cǒ zûʼ, ə́ sáʼ yé, ə́ ndâʼ ngô: «Koo o póghʼ Sê áa? Gho yi pei zʉ́ naa nkwʉ̂ tâʼ mbə̂u. 41Poghʼo kwʉ gháʼá məno móghʼo. Lə́ ə́ ngwǒ lə́ zʉ́, mə́i kâa ghʉ́ yé có no tə́poŋ.» 42A lə sâʼ yé yə́rə́, ə́ mbǒu sʉ̂ʉtə Yěso ngô: «Yěso, táa nkʉ́ʉtə́ ghâa mpfu yi o tǒ ḿbə́ fou.» 43Yěso lâʼ lə́ zʉ́ ngô: «Kwaʼ lə́nə́ʉ, məŋ ndâʼ ghô ńgó poghʼo wo nǎa pə́ tʉ̌-lə́pû leʼé wo.»
44Ntə̌ʉ-nəu lə cʉ́ʼ mə́ nkûʼ kuʼú, mə́nəu fû ncwí, yʉʼ naa shʉ́ŋ cər lâʼ tsəm, ə́ ncí tə nkə́u mpfu mbwǒr-nəu lə́ pəmə́nəu pə́tárə́. 45Ndǐ yi pə́ lə lǎghʼ ńkhʉ́ŋə́ yʉʼ yi pənuŋú-poʼ-Sê tə̂ʉ wó ndə̂ Sê fû tʉ́ sáa təcər tə nkə́u sê. 46Yěso ghêʼtə lə̂ təʉ ńdâʼ ngô: «Tǎa n nyěr Zəghʼə zâa mbó gho.» Ə́ ndǎʼ yə́rə́, ə́ ndêi-lěi ntsə́ʉ ńgó kəpə́. 47Ŋuu yi a sâʼ pəlwóʼó-ntso nkʉ pəlóma lə jwô zə̂u tsəm yi ə́ lěi, ə́ ngúʼtə́ Sê ńdǎʼ ngô: «Kwaʼ lə́nə́ʉ, ŋuu wo lə pə́ yé pə̂ mbə̌uʼ.» 48Ə lâʼ lə tô mənou mənou lə̂ njwô mwo məno tə mə́ mbə̂ʉ nzəm, ə́ ŋə̌i ndyár ḿbûʼ mənzoʼ máp. 49Pəsə̌u Yěso pə́tsəm tə mbaa pəngyě pi gháp lə tsə́ʉ nzəm zʉ́ lə̂ fú Galilêi lə tə̂ʉ pə́ lə̂ nzəm, ə́ njwó zə̂u yi ə́ lěi.
Yosêp côghʼ pfú Yěso cər ləshi
(Mat 27.57-61; Mks 15.42-47; Jâŋ 19.38-42)
50Cǒ ŋuu lə pə́ wó, pə́ fûŋ yé ńgó Yosêp, a pə̂ cǒ ngaŋə cûʼtə jwǐ yi Pəyúda. A lə pə́ ŋuu shʉʼʉ, ə́ mbou nkóŋ no lə́nə́ʉ. 51Káa a lə pə́i yé no yi có ngaŋə cûʼtə jwǐ zêi lə zápə́ ə́ mbǒu ńgʉ́ lə́ Yěso. A lə pə́ ŋuu Arimatê cər paghʼə-ngoŋ Yudêi. A lə nyáŋ ə́ mə́ nzʉ́ʼtə Ləfou Sê. 52Yosêp wêi wô ńjwó Piláto, ə́ ndóu pfú Yěso mbó zʉ́, a pə̂i. 53A wô fú lə̂ tʉ̌-mbʉ̂ŋtə shúʼú yé, ə́ ndǎghʼ zə̂u-ndí ńzə́mtə́ yé, ə́ ngwǒ ńcóghʼ yé cər ləshi yi pə́ lə shʉ̌ʼ lə̂ ləghǒ wáŋə́, ə́ pə̂ yi pə́ laa kə́ cóghʼ yé pfû ŋuu cər wó. 54A lə côghʼ yə́rə́ mpfu ngwʉ̂ leʼé yi pə́ lə pə́ ntsuŋtə ghíʼ nzʉ̂ wo fóghʼ, ə́ pə́ leʼé nji Pəyúda. 55Pəngyě pi gháp pə Yěso lə pə́ nou tə fú Galilêi lə tsə̂ʉ nzə̂m Yosêp tə nkə́u yʉʼ ləshi, ə́ njwó mbə̂u yi a lǎghʼ ńnuŋú pfû Yěso cər wó, 56ə́ ncʉ́ʼ mbə̂ʉ gháp lə̂ mənzeʼ páp túsoŋ, ə́ ntsûŋtə́ lamə́ndaa, tə mbaa məcó məwə̂r shʉʼʉ lə̂ ngʉ́ ńdaghʼ ńzóʼ pfû Yěso. Nji kə̂u ndə̂, gháp zətə ghíʼ ləpə̌ʉ lə pə́ ntúŋú.
നിലവിൽ തിരഞ്ഞെടുത്തിരിക്കുന്നു:
Lúʼkáasʉ 23: NLA
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
