Lúʼkáasʉ 20
20
Ŋuu yi a ŋə̂ Yěso mətəʉ
(Mat 21.23-27; Mks 11.27-33)
1Yěso pə̂ có leʼé, ə́ mbə́ ndə̂ Sê mə́ njyêʼ pye zə̂u mbou mə́ ntsə́tə́ Nkəʉ Shʉʼʉ lə̂ lâʼ, pətə́-ndə̂ pənuŋú-poʼ Sê gháp pə pəkeʼtə́-lə́pə́ʉ Mə̌usə̂i, ə́ nkʉʼʉ́ pətikáŋ cər lâʼ zêʼ ńkə́u ndə̂, 2ə́ ntúŋú yé ngô: «Wǒ ŋuu ŋə̌ ghô mətəʉ lə̂ ndághʼ ngʉ̌ mwo məno? O laghʼ ləjôghʼ wó ńgʉ̂ zə̂u pei tsəm?» 3Yěso pwor lə́ páp ngô: «Məŋ zâa lə́wó, n ngwo tuŋú wéi tâʼ no. Pei láʼ ghâa: 4Wǒ ŋuu lə tə́u Jâŋ ńgó a ŋə̂ pye nci? Sê lə̂ kə tə́u yé kəʉ pə̂ pye mə́soŋ?» 5Gháp zûʼ, ə́ ntsəmtə́ təcər páp ngô: «Paghʼə lə̌i ndáʼ ńgó ə Sê lə́ lə̂ tə́u yé, mə́i a wo túŋú wághʼə ńgó tə ńté hó káa paghʼə lə zúʼ ntsʉ Jâŋ wêi? 6Lə́ ə́ mbǒu ndáʼ ńgó pye-mə́soŋ lə́ lə̂ tə́u yé, mə́i lâʼ wo lǎghʼ məghǒ tə́m wághʼə jwítə́, ńté no gháp pə́ ntsuŋú ńjî ńgó Jâŋ lə pə́ ntsətə-nkəʉ-Sê.» 7Ə́ nkwǎŋ yə́rə́, ə́ ncʉ́ʼ mbwôr ngô: «Káa paghʼ pə́ njî wághʼ ŋuu yi a lə tə́u yé.» 8Yěso lâʼ lə́ páp ngô: «Tə mbaa məŋ zâa, n ngwô lâʼ ghâa wéi ŋuu yi a ŋə̂ ghâa mətəʉ n ndaghʼ ngʉ̂ mwo məno po.»
Saghʼ-ləghaa ńté no pəlwoŋə
(Mat 21.33-46; Mks 12.1-12)
9Yěso lâʼ yə́rə́, ə́ njǐ lə̂ ndághʼ saghʼ-ləghaa ńdáʼ lə̂ lâʼ ngô: «Cǒ ŋuu lǎʼ mbǐ mətʉ̌ mi pə́ kêi məntǎa měi ńdághʼ ńtsuŋu cǒ mbə̂u məluʼ cər nkâʼ zʉ́, ə́ mə́ ndə̂r lə̂ ləŋəi yi a kə́u wó ə́ cí, ə́ njwóʼ nkâʼ yé wêi mbó pəlwoŋə ńgó gháp pə́ fâʼ cər wó. 10Leʼé tǎa nkûʼ a tə̂u cǒ ngaŋə-faʼ ye ńgó a wó ńjwó pye pi a lə jwóʼ nkâʼ lə́ páp, ə́ mpfú yé zə̂u yi ə́ kwǎr nkâʼ, lə́ gháp ghou ngaŋə-faʼ ye wêi, ə́ sə́u yé ńzúŋ yé, a pə̂ʉ mbó fe. 11A kə̂ ncí ntə́u cǒ tâʼ, gháp kə̂ ncí sə́u wei wə̂, ə́ noʼtə́ yé, ə́ nzǔŋ yé a pə̂ʉ mbó fe. 12A kə̂ ncí ntə́u mbâatə tárə́, gháp côghʼ məfʉ̌ŋ lə́ wêi wə̂, ə́ fú nkâʼ nzǔŋ yé. 13Ngaŋə nkâʼ lâʼ ngô: Tə n ngwo ghʉ̌ gháʼá? N ngwo tə̂u Môu ghâa yi n nkǒŋ yé gháʼate. Ndeʼ có gháp kə̂u ńgúʼtə́ yé. 14Lə́ gháp jwô ghíʼ a tô, ə́ tsəmə́ təcər páp ngô: Ŋuu yi a táa zʉ́ nkâʼ, â wo a tô lo, paghʼə jwí yé ńjí ńgó nkâʼ táa ncʉ́ʼ ḿbə́ pə̂ wághʼə. 15Gháp shuŋ yé ńdǎghʼ yé fú nkâʼ nkwǎr, ə́ njwí yé ḿméʼ.» Yěso lâʼ yə́rə́ tə ə́ kûʼ a túŋú gháp ngô: «Pei jwô zéi ńgó ŋwâr nkâʼ ghʉ̌ tó ghʉ̌ gháʼá lə́ páp? 16A táa tó ghʉ̌ pə jwítə́ gháp, â jwóʼ nkâʼ lə́ pye mə́ndeʼe.» Ə lâʼ zûʼ ghíʼ Yěso lǎʼ yə́rə́, ə́ ndǎʼ ngô: «Koo mbə̂u no zêi nyâŋ nkwátə pye!» 17Lə́ Yěso náŋtə gháp tə ndáʼ ngô: «Tə wo nkaŋ yi pə̂ cər ŋwaʼa Sê lo, ə́ pə́ gháʼá ndághʼ ńdâʼ ńgó hó? Ləghǒ yi pəpóu-ndə̂ lə měʼ zěi, lə pou ncʉ́ʼ ləghǒ yi ə́ pyěʼ ndə̂. 18Ləghǒ zêi ə̂ yi ə́ lə̌i mbə́ pə̂ wǒ ə́ mpfúŋ mə̂u, mə́i a wo pwóʼtə́; ə́ póu mpfúŋ lə́ ŋuu, mə́i ə́ wo fú nyotə́ ngaŋ.»
Pə́ kwaʼtə Yěso lə̂ no ntsəp pye Lóma
19Pətə́-ndə̂ pənuŋú-poʼ Sê gháp pə pəkeʼtə́-lə́pə́ʉ Mə̌usə̂i lə pə́ ńdôu ngôu Yěso pə̂ mpfu wêi mpfu wêi, ńté ńgó gháp lə tsuŋu ńjí ńgó a lâghʼ saghʼ-ləghaa wêi ńdâʼ no gháʼá pə́ lə́ páp, lə́ mbou mə́ mbôghʼ lâʼ. 20Ə́ ncʉ́ʼ nkə́ ntə́u mənâŋ nzəm zʉ́, ńgó gháp ŋə́i ghíʼ pye shʉʼʉ lə̂, ə́ ngwo ntúŋú yé no ndághʼ ńkwaʼtə yé, ńjí ńgó mboʼ a kə̂u mbwǒr wó, ə́ ngwʉ̌ ləpə̌ʉ, pə́ ghôu yé ńŋə́ lə́ ngə́mnaa. 21Gháp tô ńtúŋú Yěso ngô: «Cícye, paghʼ pə̌ ńjí ńgó no yi o lâʼ ə́ mbóu njyêʼ pye zěi, ə́ pə́ lə́nə́ʉ. Koo o pə́ nkwé gho no ńdághʼ nkôŋ cǒ ŋuu. Lə́ o jyêʼ pye pə̂ no lə́nə́ʉ lə̂ ndághʼ ńgʉ̌ zə̂u yi ə́ wo poŋə́ Sê. 22Lǎʼ wághʼ: Ləpə̌ʉ zághʼə ə́ ghíʼi mbə́i ńgó paghʼə máʼ ntsəp fou pəlóma kəʉ ngə́?» 23Lə́ Yěso jî kwaŋtə záp, ə́ ndâʼ lə́ páp ngô: «Pei nyarə́ ghâa paghʼə nkâp ńjwó. 24Ə sʉ̂ ŋuu gháp ləjôghʼ yi ə́ pə̂ mə́u ə́ mi wǒ?» Gháp lâʼ lə́ zʉ́ ńgó ə̂ mi fou pəlóma. 25Yěso lâʼ lə́ páp ngô: «Ə́ poŋ! Pei ŋə́ zə̂u fou lə́ fou, ə́ ŋə́ yi Sê lə̂ Sê.» 26Pwor-tsâr yi a ŋə̌ lə́ páp kəʼə gháp tə gháp cʉ̂ʼ nâʼ naʼá; káa kə́ kuʼ gháp lə̂ ndághʼ tsâr yé ńgôu yé mbi lâʼ.
Ləzʉ̌ʉ lə̂ ləwʉ̂
(Mat 22.23-33; Mks 12.18-27)
27Pəcó Pəsadúsia pi gháp lâʼ ńgó kâa ŋuu pə́ nzʉ̂ʉ yé lə̂ ləwʉ̂ cʉ́ŋə mbáatə́ Yěso, ə́ ntúŋú yé ngô: 28«Cícye, Mə̌usə̂i lə ŋwaʼá cər ləpə̌ʉ zághʼ ngô: Ŋuu lə̌i nzóʼ məngyě, ə́ nkwʉ̂ yé tə́ měʼ zə̂u, ə́ pə́ ntúŋú ńgó fə̌r ye sóghʼ mpfǒghʼ, gháp zʉ́ jîtə ghəpə́ ńdaghʼ ńnúŋú ngər ŋuu yi a kwʉ mə́ lei. 29Lǎʼ wághʼ: pəcó pəfə̌r lə pə́ wó, ə́ mbə́ mbiŋə saambwô, nduŋ-mbi zôʼ, ə́ ngʉ́ nkwʉ́ tə́ měʼ zə̂u. 30Mbâatə sôghʼ mpfǒghʼ, ə́ nkə́ ncí nkwʉ́ yé tə́ měʼ zə̂u. 31Mbâatə tárə́ kə̂ ncí sóghʼ mpfǒghʼ wêi, ə́ nkə́ nkwʉ̂ yé pə́ tə měʼ zə̂u. Ə́ lə kə́ mbə́ pə́ yə́rə́, tə pəfə̌r pêi saambwô kwʉ́tə gháp pə́tsəm tə́ měʼ zə̂u. 32Ə́ tâa ngí lyəghʼtə́ məngyě wei kə̂ nkwʉ̂ yé lə́wó.» 33Gháp táa zʉ̂ʉ lə̂ ləwʉ̂, məngyě wêi pə́ yi warə́ ŋuu təcər páp? Ńté ńgó pəfə̌r pêi saambwô kə zóʼ məngyě wêi pə́tsəm. 34Yěso pwor lə́ páp ngô: «Pye pi gháp pə́ cər ngoŋ yi mpfu wo pə́ ngwô pəngyě, ə́ mə́ ngwô pələ̂u. 35Lə́ ngwǒ lə́ pye pi Sê táa ghʉ̌ gháp zʉ́ʉ lə̂ ləwʉ̂ ə́ nkə̂u cər ngoŋ shwî, mə́i gháp táa kə́ pǒu zôʼ gháp po. 36Ə́ kə́ pǒu kwʉ̂tə gháp po, ńté ńgó gháp táa cʉ́ʼ pə̂ gháp pə́ ghíʼ pəcwôʼ Sê, ə́ pǒu pə́ ghəpə́ Sê yi a ghʉ̌ gháp zʉ̂ʉ lə̂ ləwʉ̂. 37Tû-mbəʉ Mə̌usə̂i lə sâa-sǎa mbə́i ńgó ləzʉ̌ʉ lə̂ ləwʉ̂ pə́ wó. Ə́ pə́ lə̂ yʉʼ ŋwaʼa yi ə́ leʼtə no mǒghʼ yi ə́ lə pə́ nkʉ̂ lə̂ ləcuʼú ləghěi, a tə̂ʉ yʉʼ wó ə́ fúŋ Nde ngô: Ə Sê Ábələhâm, ə Sê Ísaghʼ, ə Sê Yokôp.» 38Yěso kʉʼʉ ńdáʼ ngô: «Ə Sê gháʼá mbə́ pə̂ Sê pətəʉ, káa a pə̂ yé Sê pəpfû. Ńté ńgó ŋuu tsəm wə́ mbó Sê ḿbə́ pə̂ ntəʉ.» 39Yěso pwôr yə́rə́, pəcó pəkeʼtə́-lə́pə́ʉ Mə̌usə̂i tôutə ńdáʼ ngô: «Cícye o pwor kwaʼ shʉʼʉ.» 40Ə́ pə̂ yə́rə́, káa pye pêi kə́ mbóu nkuʼ gháp lə̂ nkə́ ncí ntúŋú yé có no.
Nzaʼ-nkʉ ghíʼi ḿbə́ môu fou Ndavîd?
(Mat 22.41-46; Mks 12.35-37)
41Yěso pou ndâʼ lə́ páp ngô: «Pei fûŋ Nzaʼ-nkʉ ńgó môu fou Ndavîd ńté hó? 42Tû-mbəʉ fou Ndavîd lâʼ cər ŋwaʼa məzap-nci ngô: Ə Nde Tǎa Sê laʼ lə́ Nde ghâa ngô: Tó ńnyáŋ lə̂ ndyəghʼə́ pô ghâa yi təʉ, 43tə ndáʼ nkə́u mpfu yi n ngwo lǎghʼ pəghaŋə mbəu pô ghʉ̌ lətǎghʼ məku zô. 44Tə mboʼ fou Ndavîd fûŋ Nzaʼ-nkʉ ńgó Nde ye, a pou mbə́ môu ye lə́ zarə́ mbə̂u?» 45Ə lâʼ lə ghí təʉ pə́ zúʼ, Yěso cwî ngaŋə-jyêʼ-no yé, ə́ ndǎʼ lə́ páp ngô: 46«Pei páa pəkeʼtə́-lə́pə́ʉ Mə̌usə̂i. Gháp koŋ lə̂ máʼ pətəsə məndǐ ńdághʼ ŋáa ńkár, ə́ mbǒu nkóŋ ńgó pə sóghʼə́ gháp ndəu məzǎa. Ə́ nkə̂u məndə̂ cûʼtə gháp pə məyʉʼ lətsei, ə́ nkâŋ máp məyʉʼ pə́ mbi. 47Gháp pi gháp laghʼ jîno mpfû məzə̂u pəpfǒghʼ-pəngyě, ə́ mbou nkôŋ lə̂ ngʉ́ sʉ̂ʉtə záp saghʼ, gháp laghʼ ńfûtə mənyôghʼ pye. Zap ngwôʼ táa tə̌i gháʼate.»
നിലവിൽ തിരഞ്ഞെടുത്തിരിക്കുന്നു:
Lúʼkáasʉ 20: NLA
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
