Jâŋ 1
1
Ə tsâr ə̂ nkeʼ, ə́ mbə́ ləcwôr
1Nzʉ̂ lə ghí jǐ, ə tsâr pə̂ wó. Tsâr gháp Sê lə nǎa mbə́, ə tsâr lə pə́ Sê. 2Tsâr zêi gháp Sê lə pə́ tə fú ləjitə́. 3Sê lə lei lə́ zʉ́, ə́ ntsuŋú zə̂u tsəm, kâa có zə̂u pə̂ yé wó yi Sê lə tsuŋú tə́ zʉ́. 4Ləcwôr lə pə́ lə́ zʉ́, ə́ mbə́ ləcwôr yi a keʼ pye-mə́soŋ. 5Nkeʼ pə̌ nkêʼ nzə̌m, lə́ kâa nzə̌m pə́ fwôtə yé. 6Ə Sê ghʉ̂ ntə̂u cǒ ŋuu ləjôghʼ yé pə̂ Jâŋ. 7A tô, ə́ mbə́ nzǔʼ-njwó lə̂ ndâʼ pye no yi a jǐ lə̂ nkeʼ zêi, lə́ pə́ yi wǒwó wo lei lə́ zʉ́, ə́ pə́i no nkeʼ zêi. 8Káa a lə pə̂ yé nkeʼ, a lə tô yé pə́ lə̂ ndâʼ pye no ńté nkeʼ. 9Ə́ pə̂ kwaʼ nkeʼ yi ə́ lə tó ndəu nzʉ̂ lə̂ nkêʼ maa ŋuu ntsəm. 10Tsâr zei lə pə́ cər nzʉ̂, káa pye-mə́soŋ jî gháp yé, lə́ ə́ mbou ngáʼá ə́ ndə lěi pə́ lə́ zʉ́ mboŋə́ pə́ wó. 11A lə tó lâʼ páp, káa pye lâʼ páp pfû gháp yé. 12Lə́ ngwǒ lə́ pye pi gháp lə pfú yé, ə́ mbə́i no yé, mə́i a lə ŋə́ gháp mətəʉ lə̂ ndághʼ ńcʉ́ʼ ghəpə́ Sê. 13Gháp ghí pə́ ghəpə́ Sê, káa fú pə́ lə̂ məci, káa fú pə́ lə̂ mbap mbəʉ, káa fú pə́ lə̂ ləkoŋtə pye-mə́soŋ, lə́ ə́ fú pə́ lə̂ ləkoŋtə Sê. 14Ə tsâr lə shərə ńcʉ́ʼ ŋuu-məsoŋ, ə́ ntó ńnyáŋ təcər paghʼə, paghʼə jwô ləghûʼ ye, a pə̂ ləghûʼ Môu moʼ yi a ghwǒ mbwórə, gháp no lə́nə́ʉ yi ə́ fú mbó Sê. 15Jâŋ lâʼ no yi a pə̌ njí lə́ ŋuu wêi lə̂ təʉ ngô: «Yo ŋuu yi n ndə lǎʼ wéi ngô: “A pə́ nzəm məŋ mə́ ntó, ə́ ndéi ghâa lə̂. Pə́ lə ghí jí ghâa, mə́i a kə pə́ mə́ wó.”» 16A kə tó, ə́ ndǎghʼ poŋə-ntə̂ʉ yé ə́ ŋə́ məfuʼ mághʼə, ə́ mbyə́ghʼə́ ńŋə́, ńté no nkoŋə ye zǎa gháʼate. 17Sê lə lei lə́ Mə̌usə̂i, ə́ ŋə́ ləpə̌ʉ, lə́ mbwórə gháp no lə́nə́ʉ lei lə́ Yěso Kəlísto, ə́ mbə́ wó. 18Ŋuu laa kə́ jwô yé Sê, lə́ Môu moʼ yi a pə̌ Sê, ə́ mbə́ lə́ Tə́ lə ghʉ pə́ jî yé.
Jâŋ Mbaptísʉ pə̌ ntsətə nkəʉ yi a ghwǒ
19Yo nzǔʼ-njwó yi Jâŋ lə lǎʼ mpfu yi pəyúda lə fú Yelúsalêm, ə́ ntə́u pənuŋú-poʼ Sê gháp pə pye ngər Levî ńgó gháp wó ntúŋú yé ngô: «Ô wǒ?» 20A sâa-sǎa ndâʼ lə́ ŋuu ntsəm tə́ mʉ̂ŋtə ngô: «Káa m mbə̂ ghâa Kəlísto yi Sê lə tsóʼ.» 21Gháp túŋu yé ngô: «Tə o pə̌ pə̂ wǒ? Ô Elyê?» Jâŋ pwôr ngô: «Ə́ ngə́, káa m mbə̂ ghâa zʉ́.» Gháp kə̂ ncí ntúŋú yé ngô: «Ô ntsətə-nkəʉ Sê áa?» A pwôr ngô: «Ə́ ngə́» 22Gháp cʉ̂ʼ ndáʼ lə́ zʉ́ ngô: «Tə o pə̌ pə̂ wǒ? Paghʼ kə́u lǎʼ pye pi gháp yǎa ntə́u wághʼ ńgó ho? Lǎʼ wághʼ no lə̂ tû-mbəʉ zô. Ə nkwar ndə̂ zô ə̂ hó?» 23Jâŋ lâghʼ tsâr yi Esǎya ntsətə-nkəʉ Sê lə lǎʼ, ə́ mbwôr ngô: «Mə̂ŋ
“nji ŋuu yi pə̌ koŋə-məkwaʼá
ə́ mə́ ndâʼ ngô: Pei shítə́ laŋə́-ndə̂u Nde ə̂ tə́ʉ ndʉŋ-ndʉŋ!”»
24Pye pi pə́ lə tə́u gháp lə́ Jâŋ lêi, ə́ lə pə́ pəfalísia. 25Gháp kə̂ ncí ntúŋu yé ngô: «Kôo pə́ nzaʼ-nkʉ, káa pə́ Elyê, káa kə́ pə́ ntsətə-nkəʉ Sê, ə́ mbǒu ŋə̂ pye nci ńté hó?» Jâŋ pwôr lə́ páp ngô: 26«Ə́ wo lə́ məŋ, mə́i n ndaghʼ zâa pə̂ nci ńŋə̂ nci lə́ pye. Lə́ cǒ ŋuu pə́ təcər pei yi káa pei pə́ njî wéi yé. 27A pə́ nzəm məŋ mə́ ntó, lə́ káa m mbə́i nkuʼ ghâa lə̂ nkéʼ nkʉ laŋə́ yé.» 28Pə́ lə túŋu jâŋ məno mwo gháʼa Betanî lə̂ cǒ njʉŋə́ nci Yuudêŋ, ə́ yʉʼ yi a lə ŋə̂ pye nci wó.
Yěso Môu ndənzʉ Sê
29Nzʉ̂ fôghʼ, Jâŋ jwô Yěso pə̂ ntó ńcə́r yé, a lâʼ ngô: «Yo môu ndənzʉ yi a soghʼ məfaa pye-mə́soŋ. 30Ə̂ zʉ́ yi n ndə laʼ wéi ngô: “cǒ ŋuu pə́ nzəm məŋ mə́ ntó, ə́ nděi ghâa, pə́ lə ghí jí ghâa, mə́i a lə pə́ mə́ wó.” 31Kwaʼ məŋ, káa n ndə pə́ njî ghâa ŋuu yi â zʉ́. Lə́ n ndə tô zâa, ə́ mə́ ndâghʼ nci ńŋə̂ Mbaptísʉ lə́ pye lə̂ ndághʼ ngʉ̌ ńgó pye Ísə́lahêl jí yé.» 32Jâŋ pə̂i nzǔʼ-njwó, ə́ ndǎʼ ngô: «N ndə jwô Zəghʼə Sê fû tʉ̌-lə́pû shíʼ, ə́ mbə́ ghíʼ pə́ptə́, ə́ nyáŋ ndəu zʉ́. 33Kwaʼ məŋ, káa n ndə pə́ njî ghâa yé. Lə́ Sê yi a lə tə́u ghâa ńgó n ngwó ńdǎghʼ nci ńŋə́ Mbaptísʉ lə́ pye lə laʼ lə́ məŋ ngô: “O lə̌i ntáa njwó Zəghʼə Ndə̂i-lěi shíʼ ńnyáŋ lə́ ŋuu, o jî ńgó â zʉ́ yi a wo ndaghʼ Zəghʼə Ndêi-lěi ńŋə́ pye nci.” 34N ndə jwô, ə́ mbou ndéʼtə́ lə̂ lâʼ ńgó â môu Sê.»
Pəluŋ-mbi pəghaŋə-jyêʼ-no Yěso
35Nzʉ̂ fôghʼ, Jâŋ gháp pə có ngaŋə-jyêʼ-no yé pwô kə̂ ncí mbə́ yʉʼ wó. 36A jwô Yěso pə̂ ndêi, a lâʼ ngô: «Yo môu ndənzʉ Sê.» 37Ngaŋə-jyêʼ-no Jâŋ pêi pwô zûʼ tsâr zei, ə́ ntsə́ʉ nzəm Yěso. 38Yěso shə́rə ńjwó gháp nzəm zʉ́, ə́ ntúŋú gháp ngô: «Pei lou hó?» Gháp pwôr ngô: «Cícye, o cî ghó?» 39A lâʼ lə́ páp ngô: «Pei tó, pei wo jwó.» Gháp tsə̂ʉ nzəm zʉ́, ə́ nkə́u ńjwó yʉʼ yi a cî wó. Ə́ ghi pə́, ə́ mbə́ pəmə́nəu pə́tárə́ mpfu mbwǒr-nəu, gháp pə pǎp nyâŋ tə myâghʼ zêi leʼé mbî.
40Ləjôghʼ cǒ tâʼ lə̂ ngaŋə-jyêʼ-no Jâŋ pə́pwô pi gháp lə zúʼ tsâr yé ə́ ntsə́ʉ nzəm zʉ́ lêi, ə́ lə pə́ Aŋderê fə̌r Pyêh. 41Nduŋ-mbi ŋuu yi Aŋderê wǒ ńjwó yé, ə́ ndǎʼ yé ńgó gháp jwó mə́ Nzaʼ-nkʉ#1.41 Nzaʼ-nkʉ laghʼ ńdâʼ gháʼá ńgó Kəlísto. pə̂ fə̌r Pyêh. 42Ə́ ndǎghʼ Síməu ńgwó ńcə́r Yěso, Yěso náŋtə yé, ə́ ndǎʼ lə́ zʉ́ ngô: «Ô Síməu môu Jâŋ, pə́ ghʉ̌ cʉ́ʼ fúŋ ghô pə́ ńgó Sefásʉ#1.42 Sefásʉ laghʼ ńdâʼ ńgó Ləghǒ..»
Fílîp gháp Natanayêl
43Nzʉ̂ fôghʼ, Yěso pə̂ ndə̂r lə̂ Galilêi, ə́ nkə́u laŋə́ ńjwó Fílîp, ə́ ndǎʼ lə́ zʉ́ ngô: «Tsə́ʉ nzəm məŋ!» 44Fílîp wêi pə̂ ŋuu Betsayída, ə́ pə̂ túsoŋ pə Aŋderê gháp Pyêh. 45Fílîp wo njwó Natanayêl, ə́ ndǎʼ lə́ zʉ́ ngô: «Paghʼ jwǒ ŋuu wə̂ yi pə́ lə lǎʼ no ńté yé cər ŋwaʼa ləpə̌ʉ Mə̌usə̂i mbaa cər ŋwaʼa pətsətə́-nkəʉ Sê lə̂, ləjôghʼ yé Yěso, a pə̂ môu Yosêp ŋuu Nǎazalêi.» 46Natanayêl túŋu Fílîp ngô: «Tə mboʼ có zə̂u kwar Nǎazalêi tə mbôŋ?» A pwôr ngô: «Tó ńjwó.»
47Yěso jwô ghíʼ Natanayêl pə̌ ntó ńcə̂r yé, ə́ náŋtə́ yé, ə́ ndǎʼ lə́ zʉ́ ngô: «Yo kwaʼ môu Ísə́lahêl yi káa a pə̂ yé ngaŋə píʼí.» 48Natanayêl túŋu Yěso ngô: «O jǐ ghâa ghó?» Yěso pwôr ngô: «Fílîp tə̌i ngǐ fúŋ ghô ləcʉŋə́ figyê, m mə̂ njwô ghô.» 49Natanayêl lâʼ ngô: «Cícye, ô Môu Sê, ô fou pye Ísə́lahêl.» 50Yěso laʼ lə́ zʉ́ ngô: «O pə̂i mpfu wo ńté no n ndaʼ ńgó n ntə̌i njwó ghô ləcʉŋə́ figyê, lə́ o pǒu kə́ cí jwó məcó məzə̂u mi ə́ lěi mwo.» 51Yěso pou nkʉ́ʼʉ́ ndǎʼ ngô: «Kwaʼ lə́nə́ʉ, pei ghʉ̌ jwó ghíʼ ntsʉ tʉ̌-lə́pû tsóʼó ńtə́ʉ, pəcwôʼ Sê pə́ shíʼ ńtó ńcə̂r Môu ŋuu mbou mbə̂ʉ ńkóʼ.»
നിലവിൽ തിരഞ്ഞെടുത്തിരിക്കുന്നു:
Jâŋ 1: NLA
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
