DUUCA 6

Wäädeetatoojo anooto awä tödööemjönö tödö’jödö Jesuuquidiito nowaanomaadö wwäiñe

1Yaawä wäädeetatoojo anooto awä Jesuuquidiito cönta’to audaajä ai. Töötädaawäiñe ñoowanoomadö natö ejeedödö cömjä’a’to tuduucomooje, tamäädöcoomo que aji’jä’ancädä. 2Yaawä anejjacoomo jaadiseeo cönä’döa’to:

—¿Aaquene mmaja wäädeetatoojo anooto awä tödööemjönö mödööato? quee cönä’döa’to.

3Jesuuquidiito cöneccujä’a’to; cönä’döaacä:

—¿Ana’de’tä’da ca meiya’quene Dawí nödö’jödö ämiije töweichö, chääjadoncomo mmaja? 4Töwö cönoomomöi Wanaadi weichojo taca. Uu täneemöje tödööajä cönäu’cwai, töjaadoncomo wwä cuntui chea. Yää cönä’jaacä mäccö mmädä uduuje tödööajääjönö, Wanaadi wwä töwa’deuwaamo uduucomooje tödööajä mma; quee cönä’döaacä Jesuuquidiito jaadiseeo wwäiñe.

5Edääje cönä’döa’dea töwö:

—Soto nnedö na wäädeetatoojo anooto edhaajäje jadä’jödöödä; quee.

Dhamäädö töwaamo’mongato wei’jödö

6Aneedawä wäädeetatoojo anooto awä daja Jesuuquidiito cönoomomöi judhío we’jummato’como taca; soto cönoowanooma’to yaawä. 7Yäätä cönä’jaacä dhanwa dhamäädö töwaamo’mongato ämu’demjönö dö’se. Judhío owaanomannamo, jaadiseeo mmaja, Jesuuquidiito cöneene’ma’to: “ ¿Adoncatai ’ja, wäädeetatoojo anooto yeichaame?” quee töucwadööcomooje, chääjäcä cone’da töwa’deuto’como ejoodödö wetä. 8Jesuuquidiito dhowaanäcä cönä’jaacä chö’tajäätödööcomo. Töwö cönä’döaacä dhamäädö töwaamo’mongato wwä.

—Aanöncä; ä’cäde sadäädä.

Ñäädä cönammöi yaawä. 9Yaawä Jesuuquidiito cönä’döaacä yäätoncomo soto wwäiñe:

—Yä’cä, maneecamma’jotäiye. ¿Ane’cäämö wäädeetatoojo anooto awä tödööemööje necammaanä waanontänä imennaajä, aashichaato ’ja, conemjönööne’ ? ¿Ewaanacaadö, emaadööne’ ? quee cönä’döaacä.

10Yaawä tameedä ene’mancädäiñe, Jesuuquidiito cönä’döaacä ñäädä dhanwa wwä:

—Änwojoocä; quee.

Ñäädä cönänwojoi; dhamäädö aashicha cönä’döi yaawä. 11Ñanno jaadiseeo cönäätömaicho yaawä jooje. Tönwannoje dea cöna’deuwa’to töwwäiñe Jesuuquidiito emaatojo jäcä.

Amoojadooto de’wä aaco’como anonta’como

12Yääje mma yaawä Jesuuquidiito cöntämä jöö de’cäi, Wanaadi wwä a’deuwe. Iiña coijaicho cömja’do’joi, wa’deunäje. 13Yaawä yaawaana’jäcä, tönoowanoomadö cöni’jummaicho. Dhantawonnoiñe cöne’toicho amoojadooto de’wä aacä, ecammajä’e tanontaamoje. 14Ñanno cönä’ja’to Simón, ñäädä Peedhodooje cöne’täichö; dhacoono Antedé mmaja; Jacoowo mmaja; Juan mmaja; Jediipe mmaja; Waadotoodomé mmaja; 15Mateo mmaja; Tomá mmaja; Jacoowo mmaja, ñäädä Aadeujeeo nnedö; Simón mmaja, ñäädä jäduujato wa’deuwödööje töne’tä cönä’ja’todö; 16Juudha mmaja, Jacoowo acoono; Juudha Icaadiyoote mmaja, ñäädä Jesuuquidiito u’nei’jödö dea.

Jooje soto owaanoma’jocoomo

17Jesuuquidiito jöö daca cönä’täi yaawä ñanno töne’to’jocoomo jadäiñe. Acaanawä cönä’jaacä yaawä tönoowanoomadö jadäiñe. Jooje Judheea ñancomo cönä’ja’to dea chääjadäiñe, jooje Jeduusadén ñancomo mmaja, Tiido ñancomo mmaja, Sidhón ñancomo mmaja, ñanno dama jawoncomo. Ñanno cönä’ja’to dha’deddu eta ye’a’como, chäwwä töwaadoncajoodöcoomo wetä ye’a’como mmaja. 18Odo’sha ’ja’como wäntunamjödö mmaja cönääjichö’täjoicho dea chäwwä. 19Tameedä ñanno jooja’como soto Jesuuquidiito ajoojo’se cönä’ja’to, ijäädudu töweeja’ca yeijäcä, tameedä yaadoncato’comooje.

Aashicha weiñä jäcä Jesuuquidiito necammajäätö’jödö

20Yaawä Jesuuquidiito tönoowanoomadö ene’mancädäiñe cönä’döaacä:

—Ta’cwaiñe eijai maato änwanno tönsomaaquemjöncomo, Wanaadi acaajichaanaichomooje yeijäcä.

21“Ta’cwaiñe eijai maato änwanno ämiije määnetäänedö; änwanno äwwäiñe aashichaato nä’tua’de, ämjummadööcomo wa’cä.

“Ta’cwaiñe eijai maato änwanno töwaamo’como; änwanno adha’seuwato’de yaawä.

22“Ta’cwaiñe eijai maato soto wwäiñe aquiiñeme’ca’comjäcä, asancwa’comjäcä mmaja, adheetana’ta’comjäcä mmaja, conemjönööje adhe’ta’comjäcä mmaja öwö, Soto nnedö, sotoije aweichöcoomo jo’tädööje. 23Adha’cwainchatääcä’de yaawä; ä’wa’dätääcä’dede, adheejemaato’como jooje yeijäcä caju ña. Mädääje dea dhadai’choncomo tömmaminchaiñe töweiye cönä’ja’to Wanaadi wa’deuwödö ecammannamo.

24“Änwanno tönsomaaca’como mmaane wentumje maato’de. Eduuwa mma mä’wa’deme’caato.

25“Wentumje maato’de änwanno jooje töwääwashinchä määnetäänedö; ämi miyeetuncaato’de yaawä.

“Wentumje maato’de änwanno eduuwa töwa’seuwa’como; änwanno maamoaato’de wentumje aweichöcoomo e’nei.

26“Wentumje maato’de änwanno tameedä soto aashicha ya’deuwa’comjäcä äjääcäiñe; mädääje dea dhadai’choncomo tönnöeiñe töweiye cönä’ja’to ñanno ecammajä’nnamo chäänöngemjöncomo.

Tutu’de’tänei ijummadö

27“Edääje wä’döa änwanno ya’deddu etannamo wwäiñe: Atu’de’tännamo ijummatääcä. Aashicha tödöötäcä aquiiñeme’nnamo. 28Adheunenaamo wwäiñe aashicha adha’deutäcä. Wanaadi wwä adha’deutäcä adheetana’tännamo jäcäiñe. 29Anejja wwä ajoojeta’ma’jäcä, ijaato daja eneejocääde chäwwä. Asaawanai che anejja wwä adhenwajiiña’jäcä, owoomö’tädö mmaja u’cä’de chäwwä. 30Äwwä e’ca’nei wwä u’cä. Ännödö que adhenwajiiñanei’jödö wwä maniiñacai’chede. 31Äjääcäiñe soto yei’sheiñe maatodöje mmaja chääjäcäiñe eichäcääde.

32“Ajummannamo mma ijumma’jäcä äwwäiñe, ¿aaquene mmaja yää aashicha eichöde’ ? Mädääje mmaja conemjönö tödöönei nijumma tujummanei chea mma. 33Aashicha ayöödönnamo mma aashicha tödööa’jäcä äwwäiñe, ¿aaquene mmaja yää aashicha eichöde’ ? Mädääje mmaja conemjönö dönnamo weneeneto. 34Tönwacaamaamöje mma u’a’jäcä äwwäiñe, ¿aaquene mmaja yää aashicha eichöde’ ? Mädääje mmaja conemjönö tödöönei töweichacoono wwä nu’a, tönwacaamaamöje mmaja. 35Änwanno mmaane ätu’de’tännamo ijummajai maato, aashichaato chääjäcäiñe tödööjai mmaja. Soto wwäiñe u’täcä’de, inwacaamajoodö jäcä ätö’tajä’ancädäiñe’da. Yaawä adheejema’jocoomo jooje na’de. Mädääje Wanaadi O’jodhaato nnedööje eijai maato, yääjatoone yeiyajä töwö, töjääcä chö’tajä’jöncomo aashicha tönnöe, conemjönö dönnamo mmaja. 36Wentumje äneetä eichäcä, Oomotoncomo wentumje äneetä naadöje mmaja.

Töweichacoono emmencadö

37“Ajimmotoncomo mma manemmencatäi’che, Wanaadi wwä mma mätämmencajooto’node änwanno. Anejja chäänöngemjönööje mane’tätäi’chede, yääje mmaja mätä’täjooto’node Wanaadi wwä. Conemjönö äjääcäiñe ajimmotoncomo nödöödö tönencwanno’joone eichäcä, ocoone’nadiiyöcoomo ätäncwanno’joiyede. 38Tamääne’da eichäcä. Yaawä towontä’da mmaja äwwäiñe nä’tua’de, oneejaajä chäänöngato, chö’jaajä, töwä’je’moone jeene. Änwanno mätämmencajaato’de anejjacoomo memmencaatoodöje mmaja; que cönä’döaacä Jesuuquidiito.

39Yaawä töwö yö’seeno joi cöneecammajäätöi chäwwäiñe; cönä’döaacä:

—¿Tänuuquemjönö dea ca tänuuquemjönö adääjai ñai? Yääje yeiya’jäcä ¿a’nädä ejucca’da ca eijai ñaicho sö’jato aca? 40Ñäädä towaanomaamö towaanomaanei e’jodhe’da töweiye nai, töwoowanoomadö jäcä töwä’ca’jäcä towaanomaanei nönge töwä’döeemöje töweichaame.

41“Ane’cotoojo aweichacoono wämmamö’jödö’cä mencano’taanä? ¿Amäädä äwämmamö’jödö adai’jä’cä yeichaame anencano’tä’da manä? 42¿Aaquene yääje mä’dödö deaade’ aweichacoono wwä: “Weichacoono, äwämmamö’jödö’cä wu’ca’ñojo;” quee, adai’jä yeichaame amäädä äwämmamö’jödö? Yääjönö wa’coto wäänejoodö amäädä. Äwämmamö’jödö adai’joto u’cacä awa’de, aashichaane meneiye yaawä aweichacoono wämmamö’jödö’cä u’cadö wetä.

Chääjedöödö jäcä dee ene’jutuudu

43“A’que na dee aashichaato conemjönö chääjedöödö. A’que mmaja na dea dee conemjönö aashichaato chääjedöödö. 44Chääwaadäi dee ejeedödö täne’ju’dhe töweiye nai. Waju’nä ejeedödööje eijai’cha na wesooca ejeedödö. Tameemö ejeedödööje eijai’cha na adhaawidi ejeedödö. 45Ñäädä soto aashichaato aashicha na’deuwa, aashicha chö’tajäätödö wei’jäcä. Soto conemjönö mmaane cone’da na’deuwa, cone’da chö’tajäätödö weijäcä. Tötö’tajäätödö nönge wa’deunä töweiye nai.

Aacä maa amännamo wei’jocoomo

46“Ane’que’nei Cajiichaanaje cä’taato, ya’deddu woije’da aweichaameiñe? 47Etaatäcä eduuwa yö’seeno joi neecammajäätödö ñäädä öwwadäädono we’ajä jäcä, ya’deddu etaanei jäcä mmaja, tödöönei mmaja. ¿Änääcö nönge töwö, quee ’ja? 48Töwö na dhanwa tooja de’wä tömmai amäänei’jödö nönge. Ñäädä dhanwa nono cöncai sö’je, tooja tojoodöeene. Yää aca tömmai mu’dudui cöneewaacai. Tuna cuncumai yaawä jooje, maa yo’wannacaajai tödööene. Ommo’wannaca’da cöneiyacä, tooja de’wä yo’wadö weijäcä. 49Ñäädä ya’deddu töneeta’jödö nönge ännöjöönö mmaane anejja dhanwa wei’jödö nönge na. Ñäädä dhanwa tömmai cönaamäi nono de’wä; sö’je’da mma tumu’dudui ewöötö cöncai. Chuuma’jödö cöneejä yaawä cho’na. Yaawä dea mma cönnaata’dojoi yää maa. Chuuma’jödö cönaadäi yaawä tameedä; quee cönä’döaacä Jesuuquidiito ñanno jooja’como soto wwäiñe.

നിലവിൽ തിരഞ്ഞെടുത്തിരിക്കുന്നു:

DUUCA 6: MCH

ഹൈലൈറ്റ് ചെയ്യുക

പങ്ക് വെക്കു

പകർത്തുക