DUUCA 22
22
Jesuuquidiito emaadö a’de’tä’jödö
1Yaawä amoinche’da cönä’jaacä uu ummannä’cajootojo ’jemjönö täu’tojo anootoi’chädö, yää Weja’dätä’jä anooto comjedensiyai’chädö tödöötojo. 2Yaawä Wanaadi wwä töwa’deuwaamo edhaajotoncomo, judhío owaanomannamo mmaja, a’que cunuujiya’to Jesuuquidiito emaatojo. Tönwanno soto cönnonta’to.
3Yaawä Caajuushawa cönääwaacai Juudha aca, ñäädä Icaadiyooteje chäätö cönä’ja’dö, ñäädä amoojadooto de’wä aaco’como jimmä. 4Ñäädä cöntämä Wanaadi wwä töwa’deuwaamo edhaajotoncomo jadäiñe a’deuwe, Wanaadi weichojo edhaamo jadäiñe a’deuwe mmaja, chäwwäiñe töwwä Jesuuquidiito u’tojo jäcä. 5Tönwanno cöna’cwainchaicho yaawä; chäwwä cöneecammaicho jödaata utuudu. 6Yaawä Juudha cöneecammai chäwwäiñe töwwä Jesuuquidiito u’tojo. Yää ’jeje töntö’tamme’que cönä’jaacä soto ’nawäiñe Jesuuquidiito u’tojo.
Awa’deene Santa Seena tödö’jödö
7Uu ummannä’cajootoojo ’jemjönö täu’tojo cu’nädö aca cönä’döi yaawä, yää Weja’dätä’jä anooto comjedensiyai’chädö tödöötojo. Yää anooto awä oweeja nnedö’cä saaquidiijiisiyooje tönaamiñä’ca cönä’ja’to. 8Yaawä Jesuuquidiito cönaanontoicho Peedhodo, Juan mmaja; cönä’döaacä chäwwäiñe:
—Ojoncomo; Weja’dätä’jä anootoi’chädö awä cöwääwashinchoto’como choonecaatantäcä; quee cönä’döaacä.
9Ñanno cönä’döa’to:
—¿Äsha ñaa nichoonecaanä?
10Jesuuquidiito cönä’döaacä chäwwäiñe:
—Jataaca äwä’döa’comjäcä dhanwa mejoodöaato’de, tuna dha’me, tucuudi aca. Chääjadä ojoncomo’de. Yää maa chaaca nomonga’dedö taca mmaja odhoomontäcä’de änwanno. 11Edääje caichäcä’de yää maa edhaajä wwä: “Yääje Owaanomaanei äwwä nä’döaanä: ¿Äsha ä’sa nai noowanoomadö jadäiñe Weja’dätä’jä anooto awä wääwashinchotoojo?” quee caichäcä’de chäwwä. 12Yaawä töwö necamma’de äwwäiñe ä’sa adai’joto, taawa de’wä, töcoonecaajä’e. Yäätä cöwääwashinchoto’como choonecaatäcä’de; quee cönä’döaacä Jesuuquidiito.
13Ñanno cöntonto yaawä. Tameedä cöneedantoicho Jesuuquidiito necamma’jödö nönge. Yäätä Weja’dätä’jä anootoi’chädö awoono wääwashinchotoojo cönconeecaicho.
14Chu’nädö aca yä’döa’jäcä Jesuuquidiito cönaatajiimai meesa dö’tä, ñanno amoojadooto de’wä aaco’como anonta’como jadäiñe. 15Yaawä töwö cönä’döaacä chäwwäiñe:
—Jooje tötö’tajä’e wä’jaaquene edä Weja’dätä’jä anootoi’chädö awä ajaadäiñe wääwashinchotoojo jäcä, wäämadö owaajo. 16Öwö yääje wä’döa äwwäiñe, ajaadäiñe Weja’dätä’jä anooto awoono amiiñä’caajä änäänä’da wa’de eduuwa, yää Weja’dätä’jä anooto cu’tädö yä’dödö wa’cä, Wanaadi cajiichaanaje yäänejoodö wa’cä; quee cönä’döaacä Jesuuquidiito.
17Yaawä töwö wocö cönannäjöi; chääjäcä cöna’deuwöi; cönä’döaacä:
—Edä; entäcä tameedä änwanno; awaadäiñe ecaamotääcä. 18Yääje wä’döa äwwäiñe, chääjedöödö eccudu aneenö’da wa’de eduuwa Wanaadi cajiichaanaje yäänejoodö wa’cä; quee cönä’döaacä.
19Uu daja cönannäjöi chea yaawä. Chääjäcä töwa’deuwö’jeje, cöni’yajäätöi. Chäwwäiñe cuntui yaawä; cönä’döaacä:
—Edä yää yeejö, äjääcäinchädäiñe tu’emö. Edääje tödöötäcä’de jääcä ätö’tato’comooje; quee.
20Yääje mmaja, töwääwashinchädööcomo’jo, wocö cönannäjöi chea; cönä’döaacä:
—Edä wocö yää yaaquiyö, chäänönge Wanaadi necamma’jödö yeichö ene’ju’tojo, äjääcäinchädäiñe töja’emö.
21“Eneetäcä’ma eduuwa, yu’nei amäädö meesa de’wä naadö, yaamädö dö’tä. 22Soto nnedö nä’döja’de töwä’döjootojo nönge dea. Yaawääne’ wentumje na’de ñäädä Soto nnedö u’nei’jödö; quee cönä’döaacä Jesuuquidiito.
23Yaawä ñoowanoomadö cönaajäntoicho töwwäädäiñe töwäätäcamma’jodööcomo:
—¿Änääcö cantawäiñe mädä tödöötai? quee cönä’döa’to.
¿Änääcö o’jodhe’cä nai?
24Tönwanno cönaajäntoicho yaawä töwäätäccujäätödööcomo; ¿Änääcö cantawäiñe o’jodhe’cä nai? queeto jäcä cönäätäccujä’a’to. 25Yaawä Jesuuquidiito cönä’döaacä chäwwäiñe:
—Edä nono de’woncomo acu’shänääcomo tösootoi jäduuje tönaanontäiñe weneeneto. Ñanno chäädhajootoncomo aashicha tödönnamooje töwäätä’täjo weneeneto dea. 26Änwanno mmaane yääje eijai’cha maato. Ñäädä adhantawäiñe cajiichaanajaato, odho’noncomo nönge eijai ña; ñäädä adhaanontäneichomo, anooje mmaja eijai ña dea. 27¿Äshono ca cajiichaanaje jeene töweiye nai, äwanshi ejoodönei ’ja, meesa de’wono wääwashinchädööne? ¿Meesa de’wono wääwashinchädö jönca? Öwö mmaane wa ajaadäiñe äwwäiñe tödöönei nönge.
28“Änwanno jaadä dea töweiye mä’ja’quene wäntunamjödö jona’da. 29Yääje yeijäcä cajiichaanaje aweicho’como wu’a’de äwwäiñe, Jaaja öwwä cajiichaanaje weichojo cuntuichöje mmaja. 30Jaadä määwashinchaato’de yaawä cajiichaanaje weichö; mude de’wä mmaja mataajimaato’dede ñanno Iisadaaeeda weichö cajiichaanaichomooje, ñanno amoojadooto de’wä aaco’como iju’jä naatoodö; quee cönä’döaacä Jesuuquidiito.
Peedhodo wwä töjoome’dotoojo Jesuuquidiito necamma’jödö
31Yaawä Cädhaajotoncomo cönä’döa’dea:
—Amäädä Simón, Caajuushawa adhe’ca’täne ayuunacaadöcoomo wetä, tönö’nä momjödö töweiye naichöje. 32Yääje yeijäcä Wanaadi wwä we’ca’ne ecamjödööje dea aweichojo. Yaawä aweeconeeca’jäcä ajimmä ijäädu’täcooto’de; quee cönä’döaacä Jesuuquidiito.
33Simón cönä’döaacä chäwwä:
—Cajiichaana, ajaadä täjai wa jedeesoje wä’dödö jonaane, wäämadö jonaane mmaja; quee cönä’döaacä.
34Yaawä Jesuuquidiito cönä’döaacä chäwwä:
—Edääje wä’dö’se wa äwwä, Peedhodo. Edä coijaichawä dea wameedi wetöömödö owaajodä amäädä aaduwaawäde cöjoome’da’de; quee cönä’döaacä Jesuuquidiito.
Tucu’nädö amoinche’da yeichö Jesuuquidiito necamma’jödö
35Yääje mma yaawä Jesuuquidiito cönä’döaacä tönoowanoomadö wwäiñe:
—Yaawä töcanwaiche’da manaanontätäänedaawä, ajöödataichomo ewöötö ’je’da mmaja, asaajatuichomo ’je’da mmaja, ¿äwwäiñe tujunnato ’je’da jönca cönä’jaacä? quee cöneecamma’joicho.
—Ng’jn; quee cöneccujä’a’to ñanno.
36Yaawä Jesuuquidiito cönä’döaacä chäwwäiñe:
—Eduuwaane ñäädä töcanwaichato töcanwai nado’ñojo, jödaata ewöötö mmaja. Ñäädä tösaudaichemjönö töwoomo nejeemajo’ñojo, chääje’jödö que sauda aneejemaiye. 37Edääje wä’döa äwwäiñe, Wanaadi a’deddu imennaajä naadöje töwä’döeemöje wa, yää edääje yä’dödö naichö: “Conemjöncomo jimmäje cöne’toicho;” quee. Tameedä yää Wanaadi a’deddu öwö jääcä tömennä naadö eja’dätä’da eijai’cha na; quee cönä’döaacä Jesuuquidiito.
38Yaawä ñoowanoomadö cönä’döa’to:
—Cajiichaana, edä na aacä sauda; quee.
Töwö cönä’döaacä chäwwäiñe:
—Na’ñojo eduuwa; quee.
Jeseemaní ña Jesuuquidiito Wanaadi wwä ya’deuwö’jödö
39Yaawä Jesuuquidiito cöneeja’cai. Odiiwo ’jödö ña cöntämä, töweichö nöngeedä. Ñoowanoomadö inchäcä cöntonto. 40Iiña töwä’döa’comjäcä Jesuuquidiito cönä’döaacä chäwwäiñe:
—Wanaadi wwä adha’deutäcä, mä’yunaacajooto’no; quee.
41Choojonnoiñe cöntämä yaawä amoinche’cä, täju emaadö ’cäwa’cä. Yäätä tä’mudhe cönä’döi; Wanaadi wwä cöna’deuwacä; 42cönä’döaacä:
—Jaaja, mädä jääcä töweeja’dä’emö naadö öwwä yeetuncajo’se’da aweiya’jäcä mäiñetuncajoi’che. Yaawääne’ amäädä owoije tödööcä, öwö umjummadö woije’daane; quee cönä’döaacä.
43Yaawä Wanaadi amoodedö caju ñano cönäänejoi chäwwä, ijäädu’täneije. 44Jooje wentumje töweijäcä jooje’cä cöna’deuwöi yaawä. Yäädamu’jätöödö nono jo cöneeca’tai yaawä munuuje.
45Töwa’deuwödö jonno töwaanönga’jäcä töwö cöntämä yaawä tönoowanoomadö döiñaiñe. Wönö’näje cöneedantäicho wentumje töweichomjäcä. 46Töwö cönä’döaacä chäwwäiñe:
—¿Aaquene mädä wa’cä ännö’cato dea? Ä’jätääcä; Wanaadi wwä adha’deutäcä, mä’yunaacajooto’no; quee Jesuuquidiito cönä’döaacä chäwwäiñe.
Jesuuquidiito ajäi’jödö
47Yääje Jesuuquidiito ya’deutaame dea jooje soto cöneejoto. Ñäädä Juudha täätö, ñanno amoojadooto de’wä aaco’como jimmä, awa’de cöne’acä. Töwö Jesuuquidiito wwadäädä cöneejä shuumadö wetä. 48Yaawä Jesuuquidiito cönä’döaacä chäwwä:
—¿Shuumadö que Soto nnedö mu’anä, Juudha?
49Ñanno Jesuuquidiito jadoncomo yää eneea’jäcä cönä’döa’to chäwwä:
—¿Quewäänä’taato ca, Cajiichaana? quee.
50Yaawä tooni Jesuuquidiito jadoono Wanaadi wwä töwa’deuwaamo edhaajotoncomo anoonö cöneetunui’chäi; cömjanaacätäi ämu’demjönö dö’se. 51Jesuuquidiito cönä’döaacä:
—Na’ñojo. Chääwa’cä na; quee.
Yaawä töwö ñäädä janaadö ajoojodö que cöneejichö’täi. 52Yaawä Jesuuquidiito cönä’döaacä Wanaadi wwä töwa’deuwaamo edhaajotoncomo wwäiñe, Wanaadi weichojo edhaamo wwäiñe mmaja, inchoncomo wwäiñe mmaja, ñanno tajäiñenaamo we’a’como wwäiñe:
—¿Aaquene tämeenato wwadäädä’da mmädä töwaichaqueiñe öwwadäädä me’ato? 53Anooto waadäi Wanaadi weichojo taca ajaadäiñe wei’jödö weichaame yaajojo’da töweiye mä’ja’quene. Chäänönge na, äcu’nädööcomo mädä eduuwa naadö, tööjano’tacaano jäduuje yeichojo mmaja; quee cönä’döaacä Jesuuquidiito.
Peedhodo wwä Jesuuquidiito jome’dä’jödö
54Jesuuquidiito ajäichö’jo tönwanno cönaadoicho yaawä Wanaadi wwä töwa’deuwaamo edhaajotoncomo mmai chaca. Inchäcäiñe Peedhodo cöntaacä, amoinche. 55Jödoodo awä wa’to tönemjannädööcomo dö’tä yaatajiima’comjäcä, Peedhodo mmaja chääjadäiñe cönaatajiimai chea. 56Yaawä dhanoonöcoomo Peedhodo cöneedantäi, wa’to o’wawä yaatajiimaajä. Ñäädä wodi yäätäädä Peedhodo cöneene’maacä; cönä’döaacä:
—Määdhä mmaja Jesuuquidiito jadä cönä’ja’dea; quee cönä’döaacä.
57Töwö Peedhodo cöneejome’däi yaawä; cönä’döaacä:
—Yoowanoojönö ñäädä mecammaadö; quee.
58Äcuude’cä anejja daja Peedhodo cöneenea’dea; cönä’döaacä:
—Chääjadoncomo dajaane amäädä; quee.
Peedhodo cönä’döaacä:
—Ng’jn, ijimmotoncomoojönö öwö.
59Tooni shii wääseca’jödö yää ’jeje anejja cöna’deuwöi chea; cönä’döaacä:
—Chääjadoncomo dajaane määdhä, Caadideea ñanooje naadö naane’.
60Yaawä Peedhodo cönä’döaacä:
—Yoowanääcä’da na mädä mecammaadö; quee cönä’döaacä.
Yaawä dea mma wameedi cöneetömöi, yääje Peedhodo wa’deutaame dea. 61Yaawä Cädhaajotoncomo cönä’jedennacai Peedhodo wwadäädä; yäätäädä cöneene’maacä. Peedhodo cöntö’tai yaawä töwwä Jesuuquidiito wa’deuwö’jödö jäcä: “Edä coijaichawä dea amäädä aaduwaawäde cöjoome’da’de, wameedi wetöömödö owaajodä;” quee yä’dö’jödö jäcä. 62Jödo’na Peedhodo cöneeja’cai yaawä; wentumje cönaamoaacä.
Jesuuquidiito enno’jätö’jödö
63Ñanno Jesuuquidiito edai’chännamo cönenno’jä’a’to; cönaiju’jä’a’to dea. 64Ije’dudu’jo cömjojeeta’mojä’a’to, edääje töwä’döancädäiñe:
—Ene’ju’cä adhaiju’nei’jödö; quee töwä’döancädäiñe.
65Jooje anejjejaato töwa’deuwödööcomo que mmaja cöneetana’ta’to dea.
Äcamma’jonnamo je’tacaiñe Jesuuquidiito wei’jödö
66Yaawaana’jäcä inchoncomo cöne’jummaicho, ñanno judhío edhaajotoncomo; Wanaadi wwä töwa’deuwaamo edhaajotoncomo cöne’jummaicho dea, judhío owaanomannamo mmaja. Ecamma’jotoojo taca Jesuuquidiito cönaadoicho. Ñanno äcamma’jonnamo cönä’döa’to chäwwä:
67—¿Äwaanacaanei cha amäädä? Ääcammacä; quee cönä’döa’to.
Töwö cönä’döaacä chäwwäiñe:
—Sa’donna wääcamma’jäcä yeecamjö’da eijai maato. 68Öwwä adheecamma’ja’comjäcä yeccujäätö’da eijai maato dea, saaca’da mmaja. 69Edääje mmaane wä’döa äwwäiñe, eduuwaiche mma Soto nnedö Wanaadi jäduujato nnäcä nataajima’de, ämu’demjönö dö’se; quee cönä’döaacä Jesuuquidiito.
70Tameedä tönwanno cöneecamma’joicho yaawä:
—Yääje yeiya’jäcä ¿Wanaadi nnedö ca amäädä? quee cönä’döa’to.
Töwö cönä’döaacä:
—Ee, ñäädä öwö, mecammaatoodö; quee.
71Yaawä tönwanno cönä’döa’to:
—¿Ane’cäämö mma määtonno wa’deunä cämjummatäädö deeade’ ? Töwö dea dajaane nääcammai cöneetadööcomooje; quee cönä’döa’to.
നിലവിൽ തിരഞ്ഞെടുത്തിരിക്കുന്നു:
DUUCA 22: MCH
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2014 Reservados todos los derechos
