DUUCA 20

¿Änääcö woije mädä tönnöe määnene?

1Aneedawä anooto awä Jesuuquidiito soto cönoowanooma’to Wanaadi weichojo taca. Aashichaato wätunnä cöneecammajä’acä chäwwäiñe. Yaawä yöiña cöneejoto ñanno Wanaadi wwä töwa’deuwaamo edhaajotoncomo, judhío owaanomannamo mmaja, inchoncomo mmaja. 2Tönwanno cönä’döa’to chäwwä:

—¿Änääcö woije mädä tönnöe määnene? ¿Änääcö cuntui mädä tödöötojo äwwä? Ñaa wwä ecammacä; quee cönä’döa’to.

3Jesuuquidiito cönä’döaacä chäwwäiñe:

—Öwö maneecamma’joto’ñojo awa’de; cäccujä’täcä’de yaawä. 4¿Änääcö woije Juan wautisaaje soto tönnöeiñe cönä’jaacä, Wanaadi woije ’ja, soto woijeene?

5Yaawä ñanno judhío owaanomannamo tönwannoje dea cönäätäccujä’a’to; cönä’döa’to:

—¿Aaquene queccujä’ato? “Wanaadi woijato cönä’jaacä;” ca’jäcä cöwwäiñe, töwö yääje ä’döjai ña yaawä: “ ¿Ane’que’nei dha’deddu aneecamjö’da meiya’quene, yääje yeiya’jäcä?” quee. 6Dha’da ’quene, “Soto woijato mma cönä’jaacä;” ca’jäcä, tameedä soto täju que cöwääjä’jaiñe naato, Wanaadi anoonöje Juan ecaanö’eetö’da chäwwäiñe; quee cönä’döa’to ñanno judhío edhaajotoncomo.

7Yaawä tönwanno cönä’döa’to Jesuuquidiito wwä:

—Ñaa owaanäcä’da na, änääcö woijato cönä’ja’dö jääcä; quee cönä’döa’to.

8Yaawä Jesuuquidiito cönä’döaacä chäwwäiñe:

—Öwö mmaja aneecamma’da wa dea edä tödöödö jäcä yaanontänei’jödö; quee cönä’döaacä.

Conemjöncomo töweetadaawa’cajaamo’jödö dö’seeno

9Yaawä Jesuuquidiito cönaajäntäi yö’seenoje töwa’deuwödö soto wwäiñe. Töwö cönä’döaacä:

—Dhanwa tönaudä’jödö aca chääjedöödö cönnatö’täi. Yaawä töweetadaawa’cajaamo wwäiñe cöneedai’chojoi. Anejja nono de’cäi cöntämä yaawä. Iiña numa cönä’jaacä. 10Yeejössataatojo cu’nädö aca yä’döa’jäcä töwö tanoonö cönaanontäi tönaudädö edai’chännamo wwadäädäiñe, tönaatödö ejeedödö wetä. Ñanno edai’chännamo dhanoonö cönaiju’jätöicho. Tänwase’da cöniiñacaanö’joicho yaawä. 11Yää ’jeje audaajä edhaajä anejja tanoonö daja cönaanontäi chea yaawä. Ñäädä wwä cone’da cöna’deuwöicho dea ñanno audaajä edai’chännamo; cönaiju’jätöicho dea. Tänwase’da cöniiñacaanö’joicho dea yaawä. 12Yää ’jeje audaajä edhaajä aaduwaawädeeto cönaanontäi chea yaawä. Ñäädä mmaja tätuunui’chä cöniiñacaanö’joicho.

13“Yaawä ñäädä audaajä edhaajä cönä’döaacä: “ ¿Ane’cäämö wödööanä eduuwa? Önnedö umjummadö wanontäiye. Ñäädä eneea’jäcä’da ca ñontäjai ñaichodö jääcä;” quee cönä’döaacä. 14Ñäädä eneea’jäcä ñanno edai’chännamo wwäiñe, tönwannoje dea cönä’deuwa’to; cönä’döa’to: “Määdhä ñäädä tumö ca’semjödö töwwä tödöönei. Queematäiye ja, cönaudädööcomooje eiye yaawä edä;” quee cönä’döa’to. 15Audaajä tö’cäi cönaadoicho yaawä, emaadöje mma. ¿Aaquene ñanno edai’chännamo tödööjaiñe nichö’taanä ñäädä audaajä edhaajä? 16Töwö e’jai ña ñanno audaajä edai’chännamo töja’eiñe, anejjacoomo wwä audaajä edai’chojoodö wetä; quee cönä’döaacä Jesuuquidiito.

Yää eta’jäcä töwwäiñe ñanno soto cönä’döa’to:

—Mädääje Wanaadi ännö’daane yei’she; quee.

17Yaawä ene’mancädäiñe Jesuuquidiito cönä’döaacä chäwwäiñe:

—¿Aaquene töwä’dö’se yeichö ca edä imennaajä, yääje yeiya’jäcä:

Yää täju, maa amännamo cönquiiñemeecöichodö,

anno’tojooje na eduuwa; quee yä’dödö naichö?

18Näädä yää täju jonaano wejuccadö näätunui’cha. Ñäädä mmaane ye’coiñe yää täju wejuccadö mmaane nataaji’ja’de; quee cönä’döaacä Jesuuquidiito.

Acu’shänä wwä jödaata utuudu

19Ñanno Wanaadi wwä töwa’deuwaamo edhaajotoncomo, judhío owaanomannamo mmaja, Jesuuquidiito ajäi’she cönä’ja’to yaawä, towaanäcäiñe yeijäcä töjääcäiñe yää yö’seenoje ya’deuwö’jödö; töwäädä soto cönnonta’tone’. 20Yaawä tönwanno tanoonöcoomo cönaanontoicho, aashicha’como wa’cä töwäänejancädäiñe, cone’da Jesuuquidiito a’deudeme’jo, jedeesoje tödööjodö weta yaawä acu’shänä wwä. 21Ñanno Jesuuquidiito cöneecamma’joicho:

—Owaanomaanei, ñaa owaanäcä chäänönge awa’deuwödö weichö, chäänönge onoowanoomadö weichö mmaja. Ye’wono woije mma anemmenca’da amäädä. Chäänöngeene Wanaadi a’deddu que tönoowanooma määnene. 22Edääje adheecamma’jo’se ñaa na: ¿Aashicha eijai ñai jödaata utuudu acu’shänä wwä, cone’daane? quee cönä’döa’to Jesuuquidiito wwä.

23Jesuuquidiito dhowaanäcä cönä’jaacä cone’da ta’deudeme’jo’se yeichöcoomo. Töwö cönä’döaacä:

—¿Ane’cotoojo cuyuunacaato? 24Jödaata eneejotääcä. ¿Änääcö imennaajä mä’dä chääjäcä naadö, änääcö eetö imennaajä mmaja? quee cönä’döaacä.

Tönwanno cönä’döa’to:

—Acu’shänä imennaajä mä’dä, töwö chäätö mmaja.

25Yaawä Jesuuquidiito cönä’döaacä chäwwäiñe:

—Acu’shänä wwä u’täcä töwö chäwwono; Wanaadi wwono mmaane Wanaadi wwä u’täcä; quee cönä’döaacä.

26Tönwanno cone’da a’deudeme’jojai’cha cönä’ja’to soto netaadöcoomoje. Töweeta’jöe mma cöneeta’jöjäätöicho, ñeccujäätödö eta’jäcä.

Töwäämaajo jonno waadoncanä jäcä Jesuuquidiito ecamma’jo’jödö

27Yää ’jeje Jesuuquidiito wwadäädä cöneejoto anejjacoomo saadhuseeo, ñanno töwäämaajo jonno waadoncanä aneecanö’jöncomo. Tönwanno cönä’döa’to Jesuuquidiito wwä:

28—Owaanomaanei, edääje Moisé cöwwoncomooje cömmennäi: “Dhanwa enneca’da yääma’jäcä dhacoonomjödö ijiiñamomjödö dö’tä ä’döjai ña yaawä, töweichacoono atöödö tödöödö wetä;” quee cömmennäi Moisé. 29Aacä amoojato dhanwaacomo cönä’ja’to, ñanno dea. Yuichoncomo cömjötai. Cönäämai yaawä enneca’dadä. 30Dhacoonomjödö ijiiñamomjödö dö’tä cönä’döi yaawä; ñäädä mmaja enneca’da cönäämai chea. 31Aaduwaawoto mmaja ñäädä wodi jadä cönä’ja’dea. Chäänönge mmaja tameedä ñanno aacä amoojato’como. Enneca’da cönä’jajoicho tameedä. 32Yaawä jeene ñäädä wodi cönäämai. 33¿Aaquene eichai’che yaawä, töwäämaajo jonno waadoncanaawä? ¿Äshono jiñamooje nai’che ñäädä wodi, ñanno aacä amoojato’como ijiiñantoncomo’jödö? quee cönä’döa’to ñanno saadhuseeo.

34Jesuuquidiito cöneccujä’a’to; cönä’döaacä:

—Edä nono de’woncomo töjööta weneeneto; tönnacontoncomo töniiñonoojo mmaja. 35Ñanno mmaane, aashicha töwei’jocoomo weijäcä caju ña naato’dedö, ñanno töwäämaajo jonno yaadonca’como, ijööta’da naato’de, tönnacontoncomo aniiñonoojo’da mmaja. 36Tönwanno äämajai’cha naato’de yaawä; Wanaadi amoodedö nöngeiñe mma naato’de, Wanaadi nnacoomoje mmaja, töwäämaajo jonno yaadonca’comooje töweijäcäiñe. 37Moisé dea yä’ja’a’como töwaadonca yeichöcoomo cöwwäiñe cöneene’ju’joi, yää chuuta wätuuca’jödö jäcä immennä’jödö jäcä naichö. Yäätä töwö Moisé Cajiichaana necamma Aawadán Wanaadiyööje yeichö, Isaaca Wanaadiyööje yeichö mmaja, Jacoowo Wanaadiyööje yeichö mmaja. 38Ñanno Aawadán töwä’jajo’jocoomo weichaame nudä naato. Dha’da ei’jo Wanaadi chäädhajootoncomooje ätä’tä’da eichöne’; quee cönä’döaacä Jesuuquidiito saadhuseeo wwäiñe.

39Yaawä anejjacoomo judhío owaanomannamo cönä’döa’to chäwwä:

—Owaanomaanei, chäänönge yääje mä’döa; quee cönä’döa’to.

40Yää ncäcäädä tönwanno Jesuuquidiito tönoiñe töneene cönä’ja’to, ane’cä’cä ecamma’jo’se’da.

¿Änääcö weichö ñäädä Äwaanacaanei?

41Yaawä Jesuuquidiito cönä’döaacä chäwwäiñe:

—¿Aaquene Dawí weichöje Äwaanacaanei töne’tä weneeneto? 42Töwö Dawí chea yääje cömmennäi Wecanta’ñotoojo jajeedai’chädö jäcä:

Cajiichaana cönä’döaacä Yeedhajä wwä:

“Önnäcä ataajimaacä, ämu’demjönö dö’se,

43odho’cäi ätu’de’tännamo tödöödö wa’cä öwwä;” quee

Cajiichaana cönä’döaacä; quee cömmennäi Dawí.

44¿Aaquene mmaja Dawí nnedööje Äwaanacaanei eijai ñai chea, töwö Dawí tädhaajäje töne’tä yei’jödö weichaame mmaja? quee cönä’döaacä Jesuuquidiito.

Jesuuquidiito wwä judhío owaanomannamo ijiiyemeecö’jödö

45Yaawä tameedä soto netaadöcoomoje Jesuuquidiito cönä’döaacä tönoowanoomadö wwäiñe:

46—Odhoowoinchadäiñe’da eichäcä judhío owaanomannamo jäcäiñe, ñanno nuwe töwoomöcoomo yaacötö’como. Tönwanno yaacö’comje weneene tönoiñe täne’madööcomo que soto wwäiñe ta’dejjadööcomo jata antawä. Täneejuca’como a’täi ye’wä töwei’sheiñe weneeneto we’jummanaawä, wääwashinchänaawä mmaja. 47Tönwanno iiño wääma’jödö nödöödö töneijä’e weneeneto. Yää encwanno’jodööje nuwe Wanaadi wwä töwa’deuwe yaawä. Tönwanno jooje’cä nätä’maminchajaato’de; quee cönä’doaacä Jesuuquidiito.

നിലവിൽ തിരഞ്ഞെടുത്തിരിക്കുന്നു:

DUUCA 20: MCH

ഹൈലൈറ്റ് ചെയ്യുക

പങ്ക് വെക്കു

പകർത്തുക