JUAN 7
7
Jesuuquidiito acontomo aneecamjö’da yei’jocoomo
1Yää ’jeje Jesuuquidiito cönäämannä’acä Caadideea chäcä. Judheea chäcä töwäämannäjö’se’da cönä’jaacä judhíocoomo täma’se yeichomjäcä. 2Yaawä amoinche’da cönä’jaacä judhío comjedensiyai’chädööcomo tödöötojo cu’nädö. Yää comjedensiya cönä’jaacä amääajä’cä tawä tadai’choncomo wei’jocoomo jäcä chö’tajä’to’como. 3Yaawä Jesuuquidiito acontomo cönä’döa’to chäwwä:
—Ääma’täcä; Judheea ña äjääne, iiñancomo osootoi mmaja eneiyetoode yää tönnöe määneneedö. 4Täneejuque töwä’dö’se weiñawä tacaade’da ännö’da weiñä nai. Tameedä soto wwäiñeene äänejoocä, mädä tönnöeene aweiyajä; quee cönä’döa’to Jesuuquidiito acontomo.
5Tönwanno yääje cönä’döa’to Jesuuquidiito aneecamjö’da töweichomjäcä. 6Yaawä Jesuuquidiito cönä’döaacä chäwwäiñe:
—Ä’dö’da dea na wäänejootojo cu’nädö aca; änwanno mmaane äcu’nädööcomo töweiye weneene. 7Edä nono de’woncomo aquiiñeme’jaiñe’da naato änwanno; öwö mmaane quiiñeme’caato choone’nadiiyöcoomo töneecamma weijäcä. 8Änwannoone äjoncomo comjedensiya döe; öwö mmaane tä’da wa, ä’dö’da dea yeijäcä cu’nadö aca; quee cönä’döaacä Jesuuquidiito
9Yääje töwä’dödö’jo töwö cöno’nomjoi Caadideea ña.
Comjedensiya dödö döiña Jesuuquidiito wötä’jödö
10Yääje mma yaawä tacontomo wöta’comjäcä Jesuuquidiito cöntännea yaawä comjedensiya dödö döiña. Töjääcäjeene cöntämä, soto jadäiñe’da. 11Comjedensiya dödaawä judhíocoomo Jesuuquidiito cunuujiya’to. Tönwanno cönä’döa’to:
—¿Äsha ñäädä nai? quee.
12Jooje soto cöna’deuwa’to chääjäcä. Anejjacoomo cönä’döa’to: “Aashichaato töwö;” quee; anejjacoomo ’quene cönä’döa’to: “Cone’da töwö, soto täncu’täiñe;” quee daja.
13Tönwanno tacaade’da töwa’deuwe cönä’ja’to chääjäcä, judhío nontädööcomooje.
14Yaawä comjedensiya ataamejai yä’döa’jäcä Jesuuquidiito cöntämä Wanaadi weichojo taca, soto owaanomaiñe. 15Ya’deuwödö etaadö’jo judhío cöneeta’jöjäätöicho; cönä’döa’to:
—¿Aaquene mädä wa’cä towaanojo’ne määdhä nai, töwö oowanooma’da töwei’jödö weichaame? quee cönä’döa’to.
16Jesuuquidiito cönä’döaacä chäwwäiñe:
—Edä tönoowanooma wääneneedö öwö ya’deddujöönö, yaanontänei’jödö a’dedduune. 17Ñäädä Wanaadi woije tödö’sato dhowaanäcä na’de neecammajäätödö Wanaadi woijatooje yeichö, dha’da ’quene öwö woijato mma yeiya’jäcä. 18Ñäädä töjääcono wa’deuwödö töwö mma aashichaatoje nätä’ta. Tanontänei’jödö jäcoono wa’deuwödö mmaane chäänöngato ñäädä; ätäncu’tä’da töwö.
19“ ¿Moisé jönca cuntui äwwäiñe jenaado’jä waanontänä? Yääje yeichaame yää ännö’da määnetääne. ¿Ane’que’nei yeema’se maato? quee cönä’döaacä Jesuuquidiito.
20Yaawä soto cöneccujä’a’to:
—Ä’jeta; ¿änääcö adheema’se nai? quee cönä’döa’to.
21Jesuuquidiito cönä’döaacä yaawä chäwwäiñe:
—Wäädeetatoojo anooto awä tooni önnö’jödö weijäcä tameedä adheeta’jöjä’täne. 22Moisé odhoowanoomatääne siicunsidaadoje tödöödö jäcä. Moiséjönö yääje weiñä ajäntänei’jödööje yeichaame, jenaado’jocoomoone. Änwanno ännacontoncomo siicunsidaadoje tönnöe määnetääne wäädeetatoojo anooto yeichaame. 23Wäädeetatoojo anooto awä shiichu’ca siicunsidaadoje tönnöe määnetääne, Moisé waanontä’jödö ämja’do’jo’da aweichöcoomo wetä. Yääje yeiya’jäcä, ¿ane’que’nei yeuwö’se maato dea soto adonca’jödö weijäcä öwwä wäädeetatoojo anooto awä? 24Ye’wono eneedö’jo mma canemmencatäi, chäänöngeene; quee cönä’döaacä Jesuuquidiito.
Töweejö’jödö jäcä Jesuuquidiito wa’deuwö’jödö
25Yaawä anejjacoomo judhío Jeduusadén ñancomo cönä’döa’to:
—¿Ñäädä jönca määdhä emaadö wetä tunuujiye weneenetoodö? 26Eneetäcä’ma, tacaade soto nowaanomaatoodö. ¿Aaquene aneecamma’jo’da naicho dea? ¿Cöcaajichaanaichomo’da Äwaanacaanei atäi necaanö’anto dea? 27Cönwanno cowaanäcäiñe na määdhä weejö’jödö; Äwaanacaanei we’a’jäcä mmaane owaanäcä’da na’de yeejö’jödö; quee cönä’döa’to.
28Yää etaadö’jo Jesuuquidiito täta cöna’deuwöi yaawä Wanaadi weichojo tawä owaanomaadawä. Töwö cönä’döaacä:
—¿Odhoowanääcäiñe dämma wanä? ¿Weejö’jödö mmaja odhoowanääcäiñe nai chea? Öwö woije’da dajaane we’ne; ñäädä chäänöngato yaanontäne, ñäädä odhoowanoojönööcomo. 29Öwö mmaane yoowanääcä na, chääjadonno we’eetö’da. Töwö yaanontäne; quee cönä’döaacä Jesuuquidiito.
30Yaawä ñanno judhíocoomo Jesuuquidiito ajäi’she cönä’ja’todö’je; anaajäi’chaane cöneiya’to, chu’nädö aca ä’dö’da dea yeijäcä. 31Jooje soto cöneecamjöicho töwö; tönwanno cönä’döa’to:
—¿Äwaanacaanei we’a’jäcä jooje ene’ju’tojo tödööjai ñai, määdhä e’jodhe’cä? quee cönä’döa’to.
Jaadiseeo wwäiñe Jesuuquidiito ajäiñamo anonto’jocoomo
32Yaawä jaadiseeo cöneeta’to Jesuuquidiito jäcä soto wa’deuwödööcomo. Yääje yeijäcä tönwanno mmaja, Wanaadi wwä töwa’deuwaamo edhaajotoncomo mmaja, waadiya cönaanontoicho Jesuuquidiito ajäiye. Ñanno waadiya cönä’ja’to Wanaadi weichojo edai’chännamo. 33Yaawä Jesuuquidiito cönä’döaacä:
—A’dhe mma ajaadäiñe weichojo na. Yää ’jeje yennaca’de yaanontänei’jödö döiña mmaja. 34Änwanno cujiiyato’de, yeejodö’daane, öwö öötotoojo döiña täjai’cha aweijäcäiñe; quee cönä’döaacä Jesuuquidiito.
35Yaawä judhíocoomo tönwannoje dea cönä’döa’to:
—¿Äsha tätai’che töwö cönwanno aneejodö’da cöweichöcoomo wetä? ¿Iiñaja ca tätai’che, judhíocoomo wäämecanta’como döiña, quidiiyeecocoomo jadäiñe naatoodö döiña? ¿Quidiiyeecocoomo owaanomaiñe’da tätai’che? 36¿Aaquene töwä’dö’se yeichö mädä nä’döaadö: “Änwanno cujiiyato’de, yeejodö’daane, öwö öötotoojo döiña täjai’cha aweijäcäiñe;” quee nä’döaadö? quee cönä’döa’to ñanno judhíocoomo.
Weichojo tuna
37Yää comjedensiya wataamedö anootoi’chädö cönä’jaacä anooto täneejucaato. Yää anooto awä Jesuuquidiito cönammöi soto we’jumma’como antawäiñe; cönä’döaacä:
—Ñäädä emjätö’sato neejö’ñojo öwwadäädä, aneenöiye. 38Ñäädä yeecanö’nei do’tadö ai neja’ca’de weichojo tuna, Wanaadi a’deddu imennaajä wä’dödö nönge dea; quee cönä’döaacä.
39Töwö cöna’deuwacä Epíiditu Santo jäcä, ecaanö’nnamo wwäiñe tu’emö. Eejö’da dea cönä’jaacä ñäädä Epíiditu Santo, Jesuuquidiito tä’da dea yeijäcä caju ña.
Jesuuquidiito jäcä äänönge’da soto tö’tajäätödööcomo wei’jödö
40Yää eta’jäcä soto wwäiñe anejjacoomo cönä’döa’to:
—Ñäädä dämma määdhä, Wanaadi a’deddu ecammanei töwoomo’quemööje naadö; quee cönä’döa’to.
41Anejjacoomo ’quene cönä’döa’to:
—Ñäädä määdhä Äwaanacaanei; quee.
Anejjacoomo mmaane cönä’döa’to:
—¿Aaquene mmaja Caadideea ñanooje Äwaanacaanei eichöde’ ? 42¿Yääje jönca Wanaadi a’deddu imennaajä nä’döaanä: “Dawí atöödöje na’de Äwaanacaanei; Wedén ñanooje na’de töwö, Dawí jata’jödö awoono;” quee jönca imennaajä nä’döaanä? quee cönä’döa’to soto.
43Mädääje äänönge’da soto tö’tajäätödööcomo cönä’jaacä Jesuuquidiito jäcä. 44Dhantai ajäi’she cönä’ja’to; yääje yeichaame anaajäi’cha cöneiya’to.
Täneejuca’como Jesuuquidiito aneecamjö’da yei’jocoomo
45Yaawä ñanno waadiya, Wanaadi weichojo edai’chännamo, cönennacaicho dea jaadiseeo döiñaiñe, Wanaadi wwä töwa’deuwaamo edhaajotoncomo döiñaiñe mmaja. Ñanno jaadiseeo Jesuuquidiito jäcä cöneecamma’joicho:
—¿Ane’que’nei tajäiye ännejö’da meiyato dea? quee cönä’döa’to waadiya wwäiñe.
46Ñanno waadiya cöneccujä’a’to yaawä:
—A’que na soto ñäädä wa’deuwödö nöngato wa’deuwödö; quee.
47Yaawä jaadiseeo cönä’döa’to:
—¿Änwanno mmaja ca töwäätäncu’tojo maato dea chäwwä? 48¿Aaquene täneejuca’comooquene’ aneecamjö’da naicho, jaadiseeo mmaja? 49Canno i’she’jocoomo mma necaanö’ato, waanontänä dhowaanojöncomo mma: quee cönä’döa’to ñanno jaadiseeo waadiya wwäiñe.
50Jaadiseeo antawäiñe cönä’jaacä Niicodheemo, ñäädä Jesuuquidiito döiña coijai cöneiya’nei. Töwö cönä’döaacä chäwwäiñe:
51—Mädääje mmädä eujai’cha caato soto, ecamma’jodö’jo’da mmädä; mädääje imennaajä wä’dödö, yää cöwwäiñe naadö; quee cönä’döaacä Niicodheemo.
52Yaawä tönwanno cönä’döa’to chäwwä:
—¿Caadideea ñano ca amäädä dea? Oowanoomacä’ma Wanaadi a’deddu imennaajä jäcä, odhoowanääcä mödöiye yaawä Caadideea ñanno’da Wanaadi wa’deuwödö ecammanei we’tojo weichö; quee cönä’döa’to Niicodheemo wwä.
Wodi masuuduijato’jödö
53Yaawä töwaadäiñe cöntonto tömmaichomo taca.
നിലവിൽ തിരഞ്ഞെടുത്തിരിക്കുന്നു:
JUAN 7: MCH
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2014 Reservados todos los derechos
