JUAN 2
2
Caná ña jötaanä tödö’jödö
1Aaduwaawä anoototo ai jötaanä soto cönnöa’to Caná ña, yää Caadideea nono de’wono jata. Yäätä Jesuuquidiito dhenö cönä’jaacä. 2Jesuuquidiito mmaja, ñoowanoomadö mmaja cönaata’dejjajoicho dea jötaanä tödöödö döiña. 3Yaawä yoocödööcomo chääjedöödö eccudu wataamea’jäcä Jesuuquidiito dhenö cönä’döaacä chäwwä:
—Chääjedöödö eccudu nataamei; quee.
4Jesuuquidiito cönä’döaacä chäwwä:
—¿Ane’cotoojo mädä mecammaanä öwwä, maama? Cu’nädö aca ä’döjai’cha dea na; quee cönä’döaacä.
5Yaawä Jesuuquidiito dhenö cönä’döaacä äwanshi ecaamonnamo wwä:
—Tödöötäcä tameedä ñaanontädö woije; quee cönä’döaacä.
6Yäätä cönä’jaacä tooni amoojato tuna ewöötö, ädiiñä döaajä. Adai’jocoomo cönä’jaacä yää, canaawa adai’joto ’cäwa’cä. Tuna ewöötö yää cönä’jaacä, judhío nödöödöcoomo, ñaamoichato’como. 7Yaawä Jesuuquidiito cönä’döaacä äwanshi ecaamonnamo wwä:
—Tuna ewöötö adö’tätääcä tuna que.
Tönwanno cönaadö’toicho tu’que. 8Yaawä Jesuuquidiito cönä’döaacä:
—Anaanöntäcä eduuwa tuna ewöötö acanno; adäätäcä äwanshi ejoodödö edhaajä wwadäädä; quee cönä’döaacä.
Tönwanno cönnöicho ñaanontä’jödö woije. 9Ñäädä äwanshi ejoodödö edhaajä cönoonejai yää chääjedöödö eccudu, tunaaje awa’de cönä’ja’dö. Töwö dhowaanäcä’da cönä’jaacä tunaaje yei’jödö. Ñanno mmaane, tuna eiñamo’jödö mmaane dhowaanäcäiñe cönä’jaacä. Yaawä äwanshi ejoodödö edhaajä cöna’dejjai ñäädä töjöötaamö; 10cönä’döaacä chäwwä:
—Soto wocöödöcoomo chääjedöödö eccudu ecaamodö töweiye nai aashichaato awa’de; yää ’jeje jeene, a’dejja’como wwä enga’jäcä jeene aashichamjönöiche mma ecaamodö. Amäädä mmaane chääjedöödö eccudu aashichaato medeemuntäi eduuwa tängemööje; quee cönä’döaacä äwanshi ejoodödö edhaajä.
11Yää cönä’jaacä awa’deeto täneemö Jesuuquidiito wwä tödöödö. Yää cönnöi Caná ña, Caadideea ñano jataawä. Yää tödöödö que töwö täjäädudu cöneenejoi; ñoowanoomadö cöneecamjöicho yaawä.
12Yää ’jeje Jesuuquidiito cöntämä Cajeedamu ña, senö jadä, tacontomo jadäiñe mmaja, tönoowanoomadö jadäiñe mmaja. Yäätä cönä’ja’to äächädä anooto mma.
Wanaadi weichojo tacanno töwäätätöijaamo ija’canö’jo’jödö
13Yaawä amoinche’da cönä’jaacä Weja’dätä’jä anooto, yää judhíocoomo comjedensiyai’chädö tödöötojo cu’nädö. Yääje yeijäcä Jesuuquidiito cöntämä Jeduusadén ña. 14Yäätä Wanaadi weichojo tawä cöneedantäi töwäätätöijaamo. Tönwanno cöneejemaaja’to jaaca, oweeja mmaja, jaduuma mmaja. Jödaata chamjiyaacannamo yäätä cönä’ja’to dea, shuucu. 15Yää eneea’jäcä töwö Jesuuquidiito ato cönnöi aiju’jo’to’comooje. Tameedä cömja’canö’joicho yaawä Wanaadi weichojo tacanno, oweeja jadä, jaaca jadä mmaja. Jödaata chamjiyaacannamo meesaichomo cönaawotönnacaajätöi ijöödataichomo emja’madööje mma. 16Töwö cönä’döaacä jaduuma ejeemajonnamo wwä:
—Canno adääcoto eetonno. Wätäätöijatoojoje mma Jaaja mmai männötäi; quee cönä’döaacä.
17Yaawä ñoowanoomadö cöntö’taicho Wanaadi a’deddu imennaajä jäcä. “Äämajai tödööene ämmai jäcä tö’neiñe wäänene;” queeto jäcä cöntö’taicho.
18Yaawä judhíocoomo cönä’döa’to Jesuuquidiito wwä:
—¿Ane’cäämö täneemöje tödööjai manä ñaa neneedöje, ñaa owaanäcä yeichö wetä mädä tödöötojo ’je aweichö?
19Jesuuquidiito cöneccujä’a’to; cönä’döaacä chäwwäiñe:
—Edä Wanaadi weichojo emajja’jäcä äwwäiñe öwö wödööa’dede aaduwaawä anooto; quee.
20Yaawä judhíocoomo cönä’döa’to:
—Aacä sotooto de’wä tooni amoojato wedu dajaane cönä’ja’to edä Wanaadi weichojo amäädöje. ¿Amäädä amääjai ätö’taanä aaduwaawä anooto mma? quee cönä’döa’to Jesuuquidiito wwä.
21Töwö Jesuuquidiito cöna’deuwacä tödo’tadö jäcääne; Wanaadi weichojooje tödo’tadö cöne’taacä. 22Äcuude’cä, töwäämaajo jonno Jesuuquidiito waadonca’jäcä, ñoowanoomadö cöntö’taicho yaawä yääje yä’dö’jödö jäcä. Tönwanno cöneecamjöicho yaawä Wanaadi a’deddu imennaajä; Jesuuquidiito wa’deuwö’jödö mmaja cöneecamjöicho dea.
Jesuuquidiito tameedä dhowaanäcä yeichö
23Yaawä Weja’dätä’jä anooto comjedensiyai’chädö awä Jeduusadén ña Jesuuquidiito cönä’jaacä. Yaawä jooje soto cöneecamjöicho täneemö iiñödö eneedö’jo. 24Jesuuquidiito mmaane ätäncu’tojo’da cönä’jaacä chäwwäiñe, towaanäcä yeijäcä tameedä soto tö’tajäätödööcomo. 25Anejja chäwwä ecammajai’cha cönä’jaacä soto weichö, töwö dea dhowaanäcä yeijäcä tameedä soto tö’tajäätödööcomo.
നിലവിൽ തിരഞ്ഞെടുത്തിരിക്കുന്നു:
JUAN 2: MCH
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2014 Reservados todos los derechos
