DOSECHO 7
7
Eteewa necammajäätö’jödö
1Yaawä ñäädä Wanaadi wwä töwa’deuwaamo edhaajotoncomo Eteewa cöneecamma’joi:
—¿Chäänöngato ca mädä na’deuwantodö? quee cönä’döaacä.
2Eteewa cöneccujä’acä; cönä’döaacä:
—Änwanno jimmä, inchoncomo mmaja, cätaatäcä. Ñäädä Wanaadi o’jodhaato cönäänejoi cadai’choncomo Aawadán wwä, Meesopootaamiya ña yeichö, Adán ña ejaata’tä’dadä. 3Töwö Wanaadi cönä’döaacä chäwwä: “Ajaatadö e’nomjacä, ajimmä mmaja. Anejja nono de’cäi äjääne, öwö neecammadö döiña;” quee cönä’döaacä Wanaadi Aawadán wwä. 4Yaawä Aawadán cöntämä Caadea ñanno; Adán ña cöneejata’täi yaawä. Yää ’jeje yuumö wääma’jäcä Wanaadi Aawadán cönne’joi sadä, edä nono de’cäi, eduuwa maatoodö döiña. 5Aawadán nudä yeichö Wanaadi ñoonodö neeneje töweiyemö äntu’da cöneiyacä chäwwä; yää nono immai ye’wä cönä’ja’dö jadä’jödöödä ñoonodööjönö cönä’jaacä. Tacamma mmaane Wanaadi cöneecammai chäwwä iiñödööje töweiyemööje yeichö, iiñacoomo nonoodöcoomoje töweiyemööje yeichö mmaja, iiñacoomo ’je’da dea yeichaame. 6Edääje mmaja Wanaadi cönä’döa’dea Aawadán wwä: “Adhaatödö naato’de anejjacoomo nonoodö de’cäi, shootoichoomooje. Ñanno soto wwäiñe tönwanno nätä’maminchajaato’de tooni soto soto wedu. 7Yaawä öwö daja wimaaminchaato’de ñanno adhaatödö maminchannamo’jödö. Yää ’jeje adhaatödö nötaato’de yäätonno; sootoije naato’de yaawä eetä;” quee cönä’döaacä Wanaadi Aawadán wwä. 8Yää Aawadán wwä töneecamma’jödö ene’ju’tojooje töwö Wanaadi cöneecammai chäwwä siicunsidaadoje weiñä. Yääje yeijäcä tönnedö Isaaca wennua’jäcä töwö Aawadán siicunsidaadoje cönnöi, aaduwaawä amoojato anooto yä’döa’jäcä. Mädääje mmaja Isaaca tönnedö Jacoowo cönnöi chea. Yää ’jeje Jacoowo mmaja tönnacoomo yääje cönnöicho dea, ñanno amoojadooto de’wä aaco’como, iisadaaediitacoomo adai’choncomooje naatoodö.
9“Ñanno cadai’choncomo, Jacoowo nnacoomo, tacontoncomo José cöni’ñeimma’to; cuntuicho Ejiito ñancomo wwä. Yääje yeichaame Wanaadi José jadä cönä’jaacä; 10töwö cöni’wa’täi tameedä conemjönö shinchädö jäcä. Töwö Wanaadi cuntui chäwwä shejjedö, Jaadaón wacö’je yeichojo mmaja, ñäädä Ejiito ñano cajiichaanai’chädö. Yaawä Jaadaón José cönnöi tösootoi edhaajotoncomooje, tömmai edhaajäje mmaja.
11“Yaawä jooje ämi cönä’jaacä tameedä jata waadäi, Ejiito ña mmaja, Canaán ña mmaja. Ñanno cadai’choncomo täwanshiñööcomo ejoodöjai’cha cönä’ja’to. 12Yaawä Jacoowo wwä eta’jäcä Ejiito ña äwanshi töweiye yeichö töwö tönnacoomo cönaanontoicho iiña, ñanno cadai’choncomooje naatoodö. Yää cönä’jaacä awa’deene Ejiito ña iichädööcomo. 13Yaawä aacädeeto ai iicha’comjäcä José cönääcammai dhacontoncomooje töweichö. Jaadaón dhowaanäca cönä’döi yaawä José weichö. 14Yaawä José cönaanontoicho tumö Jacoowo wetä, tameedä chääjadoncomo mmaja; aaduwaawä sotooto de’wä juujatonnä soto cönä’ja’to ñanno. 15Yaawä Jacoowo cöntämä Ejiito ña; yäätä töwö cönäämai; yäätä mmaja cadai’choncomo cönä’jajoicho dea. 16Yää ’jeje Jacoowo dhe’jämjödö cönaadoicho Siquen ña, äwa aca ewaacadö wetä. Yää äwa cönä’jaacä Amoodo nnacoomo wwä jödaata que Aawadán nejeema’jödö Siquen ña.
17“Yaawä Aawadán wwä Wanaadi necamma’jödö weja’do’tojo cu’nädö amoinche’da yä’döa’jäcä, ñanno iisadaaediitacoomo jooje cöneejanga’to Ejiito ña. 18Anejja Ejiito ñancomo cajiichaanaichomooje cönä’jaacä yaawä, José dhowaanojöönö töwö. 19Ñäädä cajiichaana cöjimmotoncomo’jödö cönencu’toicho, cadai’choncomo tömmaminchaiñe cönä’ja’dea. Chäwwäiñe iiñacontoncomo ennueenö tömmö’jo cönä’jaacä, yä’jajoodöcoomo wetä. 20Yaawä Moisé cönennui; Wanaadi wacö’je töwö cönä’jaacä. Aaduwaawä nuunä yeenö töjaadä cönnöi tömmai chaca. 21Yaawä chäwwäiñe imö’cö’jeje Ejiito ñano cajiichaanai’chädö nnedö cöneedantäi Moisé nnejeedö ñängajä; töwö tönnedööje cöniiñejencai yaawä. 22Yääje yeijäcä töwö Moisé cönoowanoomai tameedä Ejiito ñancomo wätunnäichomo jäcä. Jäduuje dha’deddu cönä’jaacä, iiñödö mmaja.
23“Yaawä aacä soto wedu töwä’döa’jäcä Moisé töjimmä ene’seiñe cönä’jaacä, ñanno iisadaaediitacoomo. 24Yaawä töwö cöneedantäi Ejiito ñano wwä töjimmä maminchadö. Moisé töjimmä cömjo’täi yaawä; Ejiito ñano cöneemai. 25Töwö tötö’tajä’e cönä’jaacä ñanno iisadaaediitacoomo owaanäcäiñe eijai yeiyaatäi tädhaajotoncomooje tödöödö Wanaadi wwä. Yääje yeichaame ñanno äntö’tammecö’da cönä’ja’to yääje yeichö. 26Yää jenamma naadöje Moisé cöneedantoicho aacä töjimmä wataiju’jätöödöcoomo. Töwö a’cwaima’seiñe cönä’jaacä; cönä’döaacä chäwwäiñe: “Ñanno dea dajaane änwanno, ¿ane’que’nei mataiju’jä’ato dea?” quee cönä’döaacä. 27Yaawä ñäädä töweichacoono aiju’jä’nei Moisé cönaadimai; cönä’döaacä chäwwä: “ ¿Änääcö ayöödöne ñaa cajiichaanaije, ñaa ecamma’joneije mmaja? 28¿Yeema’se ca mannea, coiñadä Ejiito ñano memaanedööje mmaja?” quee cönä’döaacä Moisé wwä. 29Yää eta’jäcä Moisé cönäänejei yäätonno; Maadiyán ña cöntämä. Yäätä cönä’jaacä yaawä, yäätonooje’da töweichaame. Iiña cönennecai yaawä; aacä cönä’ja’to iiñacoomo, dhanwaacomo dea.
30“Yääje mma yaawä aacä soto wedu yä’döa’jäcä Wanaadi amoodedö cönäänejoi Moisé wwä jata ’jemjönö aca, Sinaí ’jödö ña. Chuuta wätuudedö do’taca cönääneaacä ñäädä amoode. 31Yää eneea’jäcä Moisé cönääcatoncai; amoinche’da jeene cöntäma yaawä chääjäcä, aashicha jeene eneedö wetä. Yaawä töwö cöneetaacä Cajiichaana a’deddu: 32“Öwö ñäädä adhaadai’choncomo Wanaadiyö, Aawadán Wanaadiyö, Isaaca Wanaadiyö mmaja, Jacoowo Wanaadiyö mmaja;” quee cönäätaacä. Moisé cöntätä’nöngacä; ene’se’da cönä’jaacä yaawä. 33Yaawä Cajiichaana cönä’döaacä chäwwä: “Asaajatui u’cacä; amoi mädä nono ye’wä maadö. 34Öwö töneene wäänene sootoi wätä’maminchajoodöcoomo Ejiito ña; töneeta wäänene dea yeecadaujätöödöcoomo. Eduuwa weejä ewaanacaiñe. Ääma’täcä eduuwa, Ejiito ña manaanontäiye;” quee cönä’döaacä Cajiichaana Wanaadi Moisé wwä.
35“Ñanno iisadaaediitacoomo awa’deene Moisé cönquiiñemeecöicho, edääje cönä’döa’todö naane’: “ ¿Änääcö ayöödöne ñaa cajiichaanaije, ñaa ecamma’joneije mmaja?” quee. Yääje yeichaame Wanaadi Moisé cönnöi chaajichaanaichomooje, ewaanacaaneichomooje mmaja. Ñäädä tamoodedö chuuta wätuudedö do’taca cönäänejoichö ai Wanaadi yääje cöna’deuwöi Moisé wwä. 36Yaawä ñäädä Moisé cadai’choncomo cönaadoicho Ejiito ñanno. Ejiito ña töwö cönnöi aashichaato, ene’ju’tojo mmaja; Seweichato Cu’jä ña cönnöi chea, aacä soto wedu jata ’jemjönö aca töweichöcoomo mmaja. 37Ñäädä dea Moisé cönä’döaacä iisadaaediitacoomo wwä: “Aneedawä Wanaadi töwa’deuwödö ecammanei nanonta’de äwwadäädäiñe, öwö yaanontäneedöje mmaja; ajimmotoncomooje dea na’de. Töwö yoije eichäcä’de;” quee cönä’döaacä Moisé chäwwäiñe. 38Moisé dea cönä’jaacä soto we’jumma’como jadä jata ’jemjönö aca yeichöcoomo, amoode jadä mmaja Sinaí ’jödö de’wä, yaawä chäwwä amoode cöna’deuwa’dawä; cadai’choncomo jadä mmaja Moisé cönä’ja’dea. Chäwwä mmaja weichojo a’deu ecammajäätödö cönä’tui chea, cöwwäiñe tu’emööje.
39“Yääje yeichaame ñanno cadai’choncomo Moisé cömjo’maicho; yoije töwei’sheiñe’da cönä’ja’to. Tönwanno Ejiito ña mmaja töwennaca’seiñe cöna’ja’to. 40Tönwanno cönä’döa’to Aadón wwä: “Cöwaanadiiyöcoomoje töweiyemööje äncu’tocooto, cowaajoiñe täiyeto. Ñäädä Moisé, Ejiito ñanno cäne’täneedö, cowaanäcäiñe’da na eduuwa, ¿äsha ca naichö jääcä?” quee cadai’choncomo cönä’döa’to Aadón wwä. 41Yaawä jaaca nnedö’cä cuncu’toicho. Ñäädä cu’taajä wwä saaquidiijiisiyo cönnöicho. Tönwanno ta’cwaiñe cönä’ja’to tönaamode’nädööcomo jäcä mmädä. 42Wanaadi cöneetömaicho yaawä, shidiichä caju ñancomo töwaanadiiyöcoomoje tödöödö wetä chäwwäiñe. Mädääje dea imennaajä wä’dödö na, Wanaadi wa’deuwödö ecammannamo nimenno’jocoomo. Edääje nä’döa yää imennaajä:
Änwanno Iisadaaeeda weichö, öwwonooje’da saaquidiijiisiyooje tödööemö tönaamiiñä’ca mä’ja’quene aacä soto wedu jata ’jemjönö aca aweichöcoomo.
43Modooco weichojo mma töneemannä’e mä’ja’quene yaawä, ñäädä awaanadiiyöcoomoje töne’tä mä’ja’quennö.
Shidiichä cu’taajä mmaja töneemannä’e mä’ja’quennea, ñäädä awaanadiiyöcoomo Demjaana shidiichäi.
Yää michu’tätääne chäwwäiñe awa’deuto’comooje;
yääje yeijäcä manaadäjaato’de Waawidooniya ñano mänseedä’cä; quee imennaajä nä’döa.
44“Jata ’jemjönö aca töweichöcoomo ñanno cadai’choncomo wwä cönä’jaacä Wanaadi weichojo amääajä. Yää tawä tönsoma cönä’ja’to jenaado’jä waanontänä imennajä, yää täju jäcä imennaajä cönä’ja’dö. Yää Wanaadi weichojo cönnöicho Moisé wwä Wanaadi necamma’jödö nönge dea, yaawä ñeene’jödö nönge Wanaadi chäwwä cönnöja’dawä. 45Yää Wanaadi weichojo cadai’choncomo wwä cönä’tui iiñödööcomooje töweiyemööje. Yaawä ñanno Josué jadoncomo’jödö töjaadäiñe yää Wanaadi weichojo cönnejooto judhíojöncomo ijaatadööcomo que cönenwajiiñaichodaawä, ñanno dhowaajoiñe Wanaadi cönenno’jaichodö cadai’choncomo jataadöcoomoje yää yeichö wetä. Yäätä Wanaadi weichojo amääajä cönä’jaacä yaawä Dawí wennudu wa’cä. 46Ñäädä Dawí cönä’jaacä Wanaadi wacö’je. Töwö cöne’catäichö’je Jacoowo Wanaadiyö weichojo amootojo; 47Saadomón jaiñoone Wanaadi weichojo cönaamäi. 48Ñäädä Wanaadi o’jodhaato amääque amääajä tawä ei’cha yeichaame. Edääje Wanaadi wa’deuwödö ecammanei nimennä’jödö nä’döa:
49Caju öwö ya’täije na,
nono u’judu weichojooje.
¿Ane’cäämö ömmaije manaamätäädö deeade’ ?
¿Äshono mmaja öwö weichojooje eichöde’ ?
50¿Öwö önnödööjönö ca edä tameedä? quee nä’döa Cajiichaana Wanaadi; quee imennaajä nä’döa.
51“Änwanno töwäätuujacoonemjöncomo; Wanaadi dhowaanojöncomo nönge maato, eta’se’da, chäänönge’da mmaja ätö’tajäätödööcomo. Änwanno Epíiditu Santo jäcä töwä’jädu’tä määnetääne. Adhaadai’choncomo wei’jocoomo nönge dea maato. 52¿Äshono ca Wanaadi wa’deuwödö ecammanei ämmamincha’da cöneiya’to ñanno adhaadai’choncomo? Tönwanno cöneemaicho ñanno jenaadä ñäädä aashichaato weejödö jäcä ecammannamo’jödö. Ñäädä aashichaato we’a’jäcä änwanno mu’täne yaawä, memaatäne dea. 53Amoode aiñe jenaado’jä waanontänä äwwäiñe yä’tu’jödö weichaame aneecamjö’da dea änwanno; quee cönä’döaacä Eteewa chäwwäiñe.
Eteewa ema’jödö
54Yääje ya’deuwödö eta’jäcä chäwwäiñe, ñanno cajiichaanacoomo, Wanaadi wwä töwa’deuwaamo mmaja, cönäätömaicho yaawä; jooje cone’da cönä’ja’to Eteewa jäcä. 55Yaawä töwö Eteewa cönä’jaacä Epíiditu Santo jäduudu ’je; caju ña cöneene’maacä; Wanaadi nnataadö cöneeneaacä yaawä. Jesuuquidiito mmaja cöneenea’dea jiid Wanaadi nnäcä, ämu’demjönö dö’se. 56Yaawä Eteewa cönä’döaacä:
—Caju wata’ducaadö eneetäcä. Soto nnedö näänea jiidi Wanaadi nnäcä, ämu’demjönö dö’se; quee cönä’döaacä.
57Yaawä ñanno soto töjaanadööcomo cöna’duicho; töcä’tömjä’ancädäiñe cöneeca’tömöicho Eteewa wwadäädä, ajäichö wetä. 58Jata tö’cäi cönaadoicho yaawä; yäätä täju que cönwäjäätöicho. Ñanno töwännamo’jödö, enennamooje cönä’ja’todö, töwoomöcoomo de’wono cöneedai’chäja’to ääjömaanö wwä, Saudoje töwö chäätö. 59Töwääjätöödawä Eteewa cöna’deuwöi; cönä’döaacä:
—Cajiichaana Jesuuquidiito, yeecato adääcä; quee.
60Yaawä tä’mudhe töwä’dödö’jo töcä’de cöna’deuwöi; cönä’döaacä:
—Cajiichaana, encwanno’jocä mädä conemjönö nödööaatoodö; quee.
Yääje töwa’deuwödö’jo cönäämai yaawä.
നിലവിൽ തിരഞ്ഞെടുത്തിരിക്കുന്നു:
DOSECHO 7: MCH
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© 2014 Reservados todos los derechos
