Matius 11

Yesus kase tau tentang Yohanes Pembaptis

(Luk. 7:18-35)

1Pe abis Yesus mangajar pa Dia pe murit dua blas itu, Dia kase tinggal tampa itu. Kong Dia pigi mangajar deng kase tau Tuhan Allah pe Kabar Bae pa orang-orang yang ada di kota-kota di daera Galilea.

2Waktu itu, Yohanes Pembaptis ada di penjara. Kong waktu Yohanes dengar tentang samua yang Yesus Kristus biking, dia suru dia pe murit-murit pigi batanya pa Yesus. 3Dorang tanya bagini, “Bapa, Bapa ini suda yang Tuhan Allah so janji mo datang itu? Atau torang musti tunggu yang laeng?”

4Kong Yesus bilang pa dorang, “Ngoni bale pa Yohanes kong kase tau pa dia apa yang ngoni so lia deng dengar: 5#Yes. 35:5-6, 61:1orang buta so bisa dapa lia, orang lumpu so bisa bajalang, orang lepra so sembu, orang pongo so bisa dengar, orang mati so hidup ulang, deng orang miskin so dengar Kabar Bae dari Tuhan Allah.” 6Kong Yesus suru bilang lagi pa Yohanes, “Orang yang tara tolak pa Kita kong percaya turus, dia itu yang paling sanang.”

7Waktu Yohanes pe murit-murit so pigi, Yesus mulai bilang pa orang banya di situ tentang Yohanes. Dia bilang bagini, “Tuhari waktu Yohanes mangajar di padang gurun, tampa yang jao dari kampong, ngoni pigi pa dia mo bikiapa? Apa ngoni mo lia pa orang yang hari ini bicara laeng kong beso bicara laeng, sama deng rumpu yang bagoyang kasana-kamari karna angin tiop? Pasti tarada, to? 8Atau untuk apa ngoni pigi ka sana? Apa ngoni mo lia orang yang ada pake baju bagus? Pasti tarada, to? Karna orang yang jaga pake baju bagus, dia pe tampa di raja pe istana. 9Jadi untuk apa ngoni pigi ka sana? Apa ngoni ada pigi lia pa Yohanes karna dia itu nabi yang jaga kase turus Tuhan Allah pe pasáng? Butul suda! Tapi ngoni inga e, Yohanes itu lebe dari nabi biasa. 10#Mal. 3:1 Karna so dari dulu di Kitab Suci ada tatulis tentang dia bagini,

‘Perhatikan e! Kita mo suru Kita pe utusan datang kamuka dari Ngana.

Dia itu yang mo buka jalang untuk Ngana,

supaya orang pe hati siap mo tarima pa Ngana.’ ”

11Yesus bilang lagi, “Inga bae-bae e, dari samua orang yang parampuang so kase lahir di dunia ini, tara ada satu yang lebe basar dari Yohanes Pembaptis. Tapi skarang, sapa saja, biar dia orang biasa-biasa saja, kalu Tuhan Allah Berkuasa sebagai Raja pa dia pe hidup, orang itu lebe basar dari Yohanes. 12#Luk. 16:16 Mulai dari Yohanes Pembaptis datang sampe skarang, ada orang-orang jahat yang malawang pa orang-orang yang so jadi Tuhan Allah pe umat supaya jang percaya lagi pa Tuhan Allah, deng dorang berusaha kuasai pa orang-orang itu. 13Barang, waktu Yohanes bolong datang, di samua aturan yang ada di lima kitab Musa deng di kitab-kitab yang nabi-nabi tulis, so kase tau tentang apa yang Tuhan Allah bilang mo jadi skarang ini. 14#Mal. 4:5; Mat. 17:10-13; Mrk. 9:11-13 Kong di situ ada kase tau, nabi Elia mo datang ulang. Jadi kalu ngoni mau tarima, nabi Elia yang dong bilang mo datang itu, itu Yohanes suda. 15Jadi, dengar itu bae-bae kong simpang di hati!

16Kita mo kase sama orang-orang yang hidup skarang ini deng apa e? Dorang ini sama deng ana-ana yang dudu-dudu di pasar kong baramaeng deng bataria pa dorang pe tamang-tamang bagini,

17‘Torang ada tiop suling untuk ngoni,

tapi ngoni tara mau manari.

Torang ada manyanyi lagu duka,

tapi ngoni tara mau manangis.’

18Orang-orang skarang ini sama deng ana-ana itu, karna waktu Yohanes datang, dorang tara tarima pa dia. Dia jaga bapuasa deng tara minum anggur, tapi dorang bilang kata, ‘Dia kemasukan setang!’ 19Kong skarang, Kita Anak Manusia so datang. Kita tara bapuasa deng Kita me jaga minum anggur. Kong orang-orang bilang kata, ‘Coba lia! Orang ini golojo deng pangbaminum. Dia me jaga batamang deng tukang tagi pajak deng orang-orang berdosa laeng.’ Tapi biar ngoni tara tarima pa Kita deng Yohanes, Tuhan Allah pe hikmat akan ngoni lia waktu orang-orang yang iko Tuhan pe ajaran kase tunju kalakuang yang bae.”

Yesus mara pa orang-orang yang tara mau bertobat

(Luk. 10:13-15)

20Abis itu, Yesus mulai mara pa orang-orang yang ada di babarapa kota, karna biar Dia so banya kali biking mujizat, tapi dorang tara mau bertobat. 21#Yes. 23:1-18; Yeh. 26:1–28:26; Yl. 3:4-8; Am. 1:9-10; Za. 9:2-4 Yesus bilang, “Ee ngoni orang-orang Khorazim deng Betsaida! Cilaka suda ngoni! Tuhan Allah mo hukum pa ngoni barát skali, karna Kita so biking mujizat-mujizat pa ngoni tapi ngoni tara mau percaya kong bertobat. Padahal kalu jaman dulu mujizat-mujizat itu Kita biking pa orang-orang di kota Tirus deng Sidon, biar dorang jahat, pasti dong so bertobat kong taru abu pa dong pe kapala deng pake baju karong, tanda dong manyasal dari dong pe dosa. 22Inga bae-bae e, nanti di hari kiamat, waktu Tuhan mo adili pa samua orang, orang-orang Tirus deng Sidon pe hukuman akan lebe ringan dari ngoni.

23 # Yes. 14:13-15; Kej. 19:24–28:22 Kong ngoni orang-orang Kapernaum, ngoni kira Tuhan Allah mo angka pa ngoni di sorga? Tarada. Mala, Dia mo buang pa ngoni di neraka, karna ngoni so lia-lia Kita biking mujizat-mujizat tapi ngoni tetap tara mau bertobat. Padahal kalu jaman dulu mujizat-mujizat itu Kita biking di kota Sodom, pasti kota itu masi ada sampe skarang. 24#Mat. 10:15; Luk. 10:12 Inga bae-bae e, nanti di hari kiamat, waktu Tuhan mo adili pa samua orang, orang-orang jahat di daera Sodom itu pe hukuman akan lebe ringan dari ngoni.”

Yesus pangge orang-orang datang pa Dia supaya dorang pe hati tenang

(Luk. 10:21-22)

25Waktu itu Yesus berdoa, “Kita bilang tarimakasi pa Bapa, Tuhan yang berkuasa di sorga deng di bumi. Kita bilang tarimakasi karna Bapa tara kase tau itu deng jelas pa orang-orang yang pande deng yang tau banya hal. Tapi pa orang-orang biasa, Bapa biking sampe dorang mangarti. 26Ya Bapa, itu suda yang biking Bapa pe hati sanang.

27 # Yoh. 3:35, 1:18, 10:15 Samua yang ada pa Kita pe Bapa, Bapa so kase pa Kita. Tara ada satu orang yang kanal pa Kita Anak Allah, cuma Bapa saja. Kong tara ada satu orang yang kanal pa Bapa, cuma Kita Anak Allah, deng orang-orang yang Kita pili untuk kanal pa Bapa.

28Mari suda datang pa Kita, ngoni samua yang lala deng banya beban, kong Kita mo kase lapas pa ngoni dari samua itu supaya ngoni pe hati jadi tenang. 29#Yer. 6:16 Dengar kong iko suda Kita pe parenta, sama deng sapi yang ada kase pake tali kong iko dia pe tuang pe parenta. Balajar suda dari Kita karna Kita ini bae-bae deng tara sombong, kong ngoni pe hati akan jadi tenang. 30Barang, parenta yang Kita kase itu tara susa, kong beban yang Kita kase pa ngoni tara barát.”

നിലവിൽ തിരഞ്ഞെടുത്തിരിക്കുന്നു:

Matius 11: PB MMU

ഹൈലൈറ്റ് ചെയ്യുക

പങ്ക് വെക്കു

പകർത്തുക