मत्ती 10

यीशु रे बारां चेल्‍ले

1तां यीशु ने अपणे बारां चेल्‍लेयां जो सद्दी करी तिन्हा जो दुष्टात्मा जो बाहर निकालणे, अते हर तरह री बीमारी ते कमजोरी जो दुर करणे रा हक दित्तेया। 2इन्हा बारहा खास प्रेरितां रे नां ए हिन, पैल्ला शमौन, जिस जो कि पतरस भी बोलदे अते तिसेरा भाई अन्द्रियास, जब्दी रा निक्का याकूब अते तिसेरा भाई यूहन्ना। 3फिलिप्पुस बरतुल्मै, थोमा, चुंगी लैणे वाला मत्ती हलफई रा पुत्तर याकूब, तद्दै 4शमौन जे जेलोतेस नां रे समुह#10:4 शमौन जे जेलोतेस नां रे समुह जेलोतेस नां रे समुह=जेलोतेस समुह रे मणू रोम साम्राज्य रे खिलाफ इस्राएल देस री अजादी तांइ लड़ने वाले मणू थिये। रा मणू थिया अते यहूदा इस्करियोती, जिनिये यीशु जो पकड़वाई भी दित्तेया।

चेल्‍लेयां रा सेवा रा कम्म

5तिन्हा बारा जो यीशु ने ए हुकम देई करी भेजेया, गैर यहूदियां रे लोक्कां का मत जांदे, अते ना सामरिया प्रदेश बिच बड़दे। 6पर इस्राएल रे ‍खानदान री गुआची री भेड़ां का जायो। 7अते जांदे-जांदे तुसा ए प्रचार करी के बोलेयो, स्वर्ग रा राज नेड़े आई गे रा है। 8बिमारां जो खरा करो, मरे रेयां जो जिंदा करो, कोढ़ियां जो सुच्चा करो, दुष्टात्मा जो कड्डो तुसा जो मुफ्त बिच मिलेया है मुफ्त बिच ही देयो। 9अपणी कमर रे थैल्ले बिच ना तां सुन्ना, चाँदी अते ना तां तांबा रखयो, 10रस्ते तांइ ना झोली रख्खो, ना दो कुरते, ना जूत्ते ना सोठी, किजोकी मजदूर जो तिसेरी रोट्टी मिलणी चाएदी। 11जिस भी सहर या ग्रां बिच तुसा बड़गे तां पता करो कि इत्ते कुण लायक है, अते तिस जगाह् जो छडणे तक तित्ते ही रेयो। 12जां तुसा तिस घरे बड़गे तां तित्ते सांती री आशीष देयो। 13जे से घर लायक होया तां तुसा री आशीष तिन्हा पर बणी रेह्णी, पर जे नी हुन्गा तां सांती री तुसा री आशीष तुसा रे का हटी आणी। 14जे कोई तुसा जो नी अपणांदा अते तुसा री गल्लां नी सूणदा, तां तिस घर या तिस सहर का जांदे बेल्ले अपणे पैरां का धूल झम्मी आयो। 15मैं तुसा जो सच बोलदा हिसाब-किताब होणे रे रोज्जे उस सहर री हालत का सदोम अते अमोरा रे देस री हालत केई जादा ठीक होणी।

आणे वाली मुसीबतां

16दिख्खो, जिय्यां कोई भेड़ भेड़िये रे बिच मझाटे हो तिय्यां ही मैं तुसा जो तिन्हा लोक्कां बिच भेज्जेया करदा है। इधेरे तांइ कीड़े सांई चलाक अते कबूतरां सांई भोले बणो 17पर मणूआं का बची करी रेयो, किजोकी तिन्हा तुसा जो पंचायता बिच देई दैणा, अते तिन्हा तुसा जो अपणी सभास्थल बिच कोड़े मारणे। 18तुसा जो मेरी वजह कने राज्पालां अते राज्जेयां रे सामणे लित्तेया जाणा, ताकि उन्हा पर अते गैर यहूदियां रे लोक्कां तांइ गवाह बणो। 19जां से तुसा जो पकड़न तां फिकर मत करदे, कि तुसा जो कै बोलणा ए अते किय्यां बोलणा ए किजोकी उस बेल्ले तुसा जो दस्सी दित्तेया जाणा कि तुसा जो कै बोलणा है। 20किजोकी बोलणे वाले तुसा नी हिन, पर तुसा रे परम-पिता री आत्‍मा ने तुसा रे अन्दर का बोलणा। 21भाई ने अपणे भाई जो पकड़वाई करी मरवाई दैणा, मां-प्यो ने अपणे बच्चे जो पकड़वाई दैणा अते बच्चेयां ने अपणे मां-प्यो रे खिलाफ होई जाणा ते तिन्हा जो मरवाई दैणा। 22मेरी नां री वजह कने सबने तुसा रे कने नफरत करणी, पर जे आखर तांइ सबर रखगा तिसेरा ही छुटकारा होणा। 23जां भी से तुसा जो इस सहर बिच तंग करो, तां दूज्जे सहर नह्स्सी जायो किजोकी मैं तुसा जो सच बोलदा इसका पैल्ले तुसा इस्राएल रे सब सहरां बिच जाणा खत्म करो मणू रे पुत्तर जे मैं ही है, ने आई जाणा।

चेल्ला होणे रा मतलब

24ना चेल्ला अपणे गुरु का अते ना नौक्कर अपणे मालक का बड्डा हुन्दा, 25चेल्‍ले तांइ ए काफी है कि से अपणे गुरु रे बराबर है, अते नौक्कर तांइ ए कि से अपणे मालक रे बराबर है, जे तिन्हा घरे रे मालक जो दुष्टात्मां रा सरदार बोल्ली दित्तेया तां घरे रे दूज्जेयां लोक्कां जो कै किच्‍छ नी बोलणा।

कुसका डरणा चाएदा?

26इधेरे तांइ उन्हा का डरदे मत, किजोकी जे किच्‍छ लूक्के रा है, सब सामणे आई जाणा 27जे मैं तुसा रे कने न्यहारे बिच बोलदा तिसजो तुसा लौ बिच बोलो अते जे मैं तुसा रे कन्ना बिच बोल्लेया है, तिसजो घरे री छत्त पर चढ़ी करी प्रचार करो। 28उन्हा का मत डरो जे सरीर जो मारदे हिन पर आत्‍मा जो नी मारी सकदे, बल्कि परमेश्वर का डरो जे आत्‍मा अते सरीर दोनां जो नरक बिच नास करी सकदा। 29कै बड़ी घट कीमत बिच दो गौरेयां चिड़ी नी बिकदी? फिरी भी तुसा रे पिता री मर्जी रे बगैर इन्हा बिच का इक्क भी जमीन पर नी पेई सकदी। 30तुसा रे सिर रे बाल तक भी गिणे रे हिन, 31इधेरे तांइ डरो मत किजोकी तुसा तदेयी मती सारी चिड़ियाँ का भी केई जादा बधी करी हिन।

यीशु जो अपनाणा या नी अपनाणा

32जे कोई मेरे जो मणूआं रे सामणे अपनांगा, मैं भी तिसजो अपणे स्वर्ग बिच रैह्णे वाले परम-पिता रे सामणे अपणाई लैणा। 33पर जे मणूआं रे सामणे मेरे जो नी अपनांगा, मैं भी तिसजो अपणे पिता रे सामणे जे स्वर्ग बिच हिन, नी अपनाणा।

यीशु रे आणे रे अजांम

34ए मत सोच्चो कि मैं दुनिया रे लोक्कां बिच मेल-मिलाप करवाणा आए रा है, पर लोक्कां जो इक्क-दूए रे खिलाफ करणा आए रा है, 35मैं मुंडे जो तिसेरे प्यो रे खिलाफ, कुड़ी जो उसेरी मां रे खिलाफ, नूह जो तिसेरी सस्सू रे खिलाफ करणे तांइ आये रा है। 36अते तुसा रे दुश्मण तुसा रे अपणे घरे रे ही मणू होणे। 37जे अपणे मां-प्यो जो मेरे का जादा प्यार करदा, से मेरा चेल्ला होणे रे लायक नी है, जे अपणे बच्चेयां जो मेरे का जादा प्यार करदा, से मेरा चेल्ला होणे रे लायक नी है, 38अते जे अपणे आप्पे रा इन्कार करी के अपणे दुख री सुली चुक्की करी मेरे पीच्छे नी चलदा, से मेरा चेल्ला बणने रे लायक नी है। 39जे अपणी जिन्दगी जो बचाणे री इच्छा रखदा तिसने तिसजो गुआई दैणा, अते जे मेरी वजह कने अपणी जिन्दगी जो गुआणा, तिन्ने तिसजो पाणा।

प्रतिफल

40जे तुसा जो अपणाई लिंदा, से मेरे जो अपणाई लिंदा, अते जे मेरे जो अपणांदा से मेरे भेजणे वाले जो अपणाई लिंदा। 41जे कुसकी भविष्यद्वक्ता जो भविष्यद्वक्ता समजी करी अपणांदा, तिसजो से ही ईनाम मिलणा जे भविष्यद्वक्ता जो मिलणा, अते जे तुसा कुसकी धार्मिक मणू जो धार्मिक मणू मन्नी करी अपणांदे तां तुसा जो से ही ईनाम मिलणा जे धार्मिक मणू जो मिलणा चाएदा। 42जे कोई मेरे इन्हा भोले-भाले चेल्‍लेयां जो इक्क गलास ठण्डा पाणी पीणे जो दे कि से मेरा चेल्ला है, तां मैं तुसा रे कने सच्ची बोलदा कि तिसजो इधेरा ईनाम मिलणा ही मिलणा।

നിലവിൽ തിരഞ്ഞെടുത്തിരിക്കുന്നു:

मत्ती 10: CDHNT

ഹൈലൈറ്റ് ചെയ്യുക

പങ്ക് വെക്കു

പകർത്തുക