LUUTI 4
4
Boasi kɛ Luuti Hɛnyɔuyɛi
1Kɛ kia lekee Boasi liini tei wukɔ kɛ i heinga na, kɛ gumawomɔi na Boasi yɛpɛni kɔlooni ngi ma, wai lɔ a na wee. Fale Boasi ndeilɔ yɛ, “Waa mbe, ndiamɔ, hei mbe.” Kɛ i ya na i hei. 2Na wooma Boasi hindo puunga wumbuilɔ ta wai hu gbakoisia lia, kɛ i ndenga yɛ “A hei mbeindo”; fale ti heilɔ. 3Na wooma i ndeilɔ gumawomɔi ma yɛ, “Naomi, na i gbuani Moabi lɔɔlei hu taa ndɔɔlɔma majiama na i yɛni a mu ndewei Ɛlimɛlɛki wo. 4Fale ngi ngililɔ la nde va bi ma, kɛ ngi ndenga ngɛɛ: Ngeya nasia yama ti heini mbe, kɛ nya nungeisia ti gbakoisia yama. Ina ba ngumawo lɔ, ngumawo, kɛɛ ina bɛɛ ngu, nde nya ma kɔ ngi kɔɔ; gbamaile numu yeka gbi ii na bi gulɔ ngumawo va, tawao nya ngi bi wooma.” Fale i ndeilɔ yɛ, “Nga ngumawolɔ” 5Na wooma Boasi ndeilɔ yɛ, “Foloi na ma ba kpalɛi majɔɔ Naomi yeya, ba Luuti Moabaitimɔi bɛ majɔɔ lɔ, haamɔi woo nyahei, kɔ bi li a haamɔi bie ngi woohani mahu.” 6Ji va, gumawomɔi ndeilɔ yɛ, “Ngɛɛ guu nga ngumawo nya vuli va ina ngi nya nda woohani hunyanini. Nya ngumawo lɔnyei wumbu bia vulii, gbamaile ngɛɛ gu a ngumawo la.”
7Kiahuna hi mia i yɛ na ti wie hindei hu ngova ma Isleɛl hu kɔlooni ngumawo kɛ haka maluveilei ma kɔ felei gɔla i lo kpaŋ kaka yila a ngi gɔwɔi gbualɔ kɛ i fenga ngi mbaa wɛ; ji mia a yɛ a seli wuala Isleɛl lɔɔlei hu. 8Fale ji gumawomɔi i ndeni Boasi ma yɛ, “Ngeya bia vulii va,” i ngi gɔwei gbuai lɔ. 9Na wooma Boasi i ndeilɔ kpakoisia ma kɛ nungeisia gbi ma, yɛ, “A foloi ji selingaa mia a wue, kɛ ngi na gbi yeyanga Naomi yeya na yɛni a Ɛlimɛlɛki woo kɛ na gbi yɛ Kiliɔn kɛ Malɔn yeya. 10Ngi gunga gbɔma Luuti bɛ ma Moabaitimɔi, Malɔn nyahei yɛva a nya nyaha, li va a hamɔi lei gulɔ ma ngi woohani mahu, kɔ hamɔi lei aa gbua ngi ndengeisia lia tawao kɔ ngi biyɛi a gbua ngi le gɔlɔi laamɛi; haa seliblɛisia mia a wue.” 11Na wooma nungei nasia ti yɛ gɔlɔi laa ma taa kpakoisia ti ndeilɔ tɛɛ, “Selingaa mia a mue. Ndemɔi i pie nyahei na wama bi ye pɛlɛ bu i wie kia Lesɛli taa Lia na, nasia ti venjɔ ti Isleɛl wɛlɛi loni. Bi ndengeisia le Ɛfilati gohu tawao biyɛ yama Bɛtilɛmi gohu; 12tawao, a ndengɛi nasia hu wee Ndemɔi a fe bi wɛ a nyapoi ji hu wee, bi wɛlɛi i wie kia Pɛlɛsi wɛlɛi na, na Tama i ndeni Juda wɛ.”
Boasi Lengeisia
13Fale Boasi i Luuti wumbuilɔ, kɛ i wotenga a ngi nyaha. Ji ti gbɛlɛni ma, Ndemɔi i pielɔ Luuti i kɔ wumbu, kɛ i hindolo lenga. 14Na wooma nyahangeisia ti ndeilɔ Naomi ma tɛ, “Luba i yɛ Ndemɔi ma, na ii bi loni a foloi ji gumawomɔ majɔɔ va; tawao ngi biyɛi i wɔlɔ Isleɛl hu! 15A wielɔ bi gama a ndɛvu yamamɔ kɛ bi wovangɔi mahugbemɔ; gbamaile bi lo nyahaloi na ngi longɔ a bie, na fisanga bi gama i lewe hingalengaa wofela ma, i hindolo lenga.” 16Na wooma Naomi ye ndoi wumbuilɔ kɛ i ngi laanga ngi gɔwɔma, kɛ i wotenga a ngi makɛmɔ. 17Ngi heinyɔuya nyahangeisia ti biyɛi veilɔ ngi wɛ tɛ, “Ti Hindolo lenga Naomi wɛ.” Ti ngi la heilɔ a Obɛdi; ta mia yɛni a Jɛsi ngi kɛkɛ, Devidi ngi kɛkɛ.
18Kiahuna jisia mia Pɛlɛsi mbondɛisia a tie: Pɛlɛsi mia Hɛsilɔni leni, 19kɛ Hɛsilɔni i Lam lenga, kɛ Lam i Aminadabi lenga, 20kɛ Aminadabi i Nasɔn lenga kɛ Nasɔn i Salmɔn lenga, 21kɛ Salmɔn i Boasi lenga kɛ Boasi i Obɛdi lenga, 22kɛ Obɛdi i Jɛsi lenga kɛ Jɛsi i Devidi lenga.
നിലവിൽ തിരഞ്ഞെടുത്തിരിക്കുന്നു:
LUUTI 4: RMB
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Mende Bible Portions © Bible Society in Sierra Leone and Lutheran Bible Translators, 2020.