Mathiyu 7
7
Baŋ thonkine biya bihɛna
(Luku 6:37-38, 41-42)
1“Baŋ niyɔkɔ bakɔnsɔŋɔŋ biya, wuna sa nɛnɛ bena Masaala kɔnsɔŋɔŋ, 2baa kukɔnsɔŋɔŋ ku beŋ konsiŋine biya bihɛna, kuna nɛnɛ bena Masaala konsiŋine. Masaala kɔŋ bena konsiŋine ka sirani binthe bi beŋ konsiŋine biya bihɛna beŋ.#Maki 4:24 3Mbɛ hu yi kaho ba detha ntha kimɛɛsɛ kiŋ ka hooya hu ka ntɔ nda haŋ, yi tha tenke kuta kuthopi ku yina ka hooya koŋ? 4Maa mbɛ hu yi dome ka ntɔ nda, na ‘Saa, yaŋ be fuŋuŋ ntha kimɛɛsɛ kiŋ ka hooya nda haŋ,’ mahɛŋ mabɛina e kuthopi koŋ niyɔ ka hooya nda haŋ? 5Yindo banitɔkɔ woŋ. Yenke hintiŋ fuŋuna kuthopi koŋ ka hooya nda haŋ, awa yi kɔŋ kutu nagberekethe ba fuŋuna ntha kimɛɛsɛ kiŋ ka hooya hu ntɔ nda haŋ.
6“Baŋ dunkuŋ ntha ki beŋ niye Masaala na kubatho ka ŋatheŋ beŋ, bi kɔŋ bena dapitiyeke e bindɛ bena dekiya. Awa baŋ yɛli munki mu kahɛ mɔlɔŋ ka kɔsɛŋ bitɔlɔy beŋ. Thampo bi kɔŋ muŋ bɔdɔbɔdɔŋ ka ŋathaki namɛŋ ŋaŋ.
Thɔnthiŋinaŋ, deethuwaŋ, gbɛdiŋaŋ biyo haŋ
(Luku 11:9-13)
7“Thɔnthiŋinaŋ, awa beŋ kɔŋ dunkuno. Deethuwaŋ, beŋ kɔŋ kutu. Gbɛdiŋaŋ biyo haŋ, beŋ kɔŋ pɛthiya. 8Baa wɔ yo wɔ wo thɔnthiŋinɛ ndɛ kɔŋ dunkuno ntha; awa wɔ yo wɔ wo deethuwɛ, ndɛ kɔŋ kutu ntha; wɔ o wɔ wo gbɛdiŋɛ biyo haŋ, ndɛ kɔŋ pɛthiya. 9Komisa na ka ka beŋ wo, naa hati nama thɔnthɔŋɔŋ niŋ ba kutoŋ, ndɛ niŋ dunkune raka. 10Maa mɛnɛ hati nama thɔnthɔŋɔŋ niŋ ba niŋ dunkune he, ndɛ sa niŋ dunkune wokɛkɛŋ. 11Mɛnɛ beŋ, bendo biya binɛnɔy beŋ, thɔyi ba dunkuna munkii muyɔhɔy ka mpati bikendeŋ beŋ, mbu ntiŋ nda Fanda ndeŋ wo ka ariana woŋ? E ndɛ sa dunkuŋ munkii muyɔhɔy ka bi niŋ thɔnthɔŋɔŋ beŋ?
12“Huna bɛyi o bɛyi bayɔhɔy ba thimo beŋ ba biya bena niyiyɛ, niyiyaŋ bindɛ bɛŋ,#Luku 6:31 baa nɛna tepe Siraŋ ba ka Musa baŋ mɛnɛ mathanani ma ka banabiŋ beŋ maŋ.
Biyo hunɔthitɔy haŋ
(Luku 13:24)
13“Biiyandeŋ ka biyo hunɔthitɔy haŋ, baa biyo hu ka yahanama haŋ aŋaraŋ, awa gboŋa ba kaaye kɛndɛ baŋ aŋɛnɔ ba fuŋe, awa bi kɔɔyɛ bɛŋ beŋ abɔyi. 14Kɛrɛ biyo hu biiyando ka sii baŋ haŋ anɔthitɔ, awa gboŋa ba kaaye kɛndɛ baŋ akaahi ba fuŋe, awa bi kɔɔyɛ bɛŋ beŋ athahuwɔ.
Kuyeŋ koŋ mɛnɛ mutiŋ nama muŋ
(Luku 6:43-44)
15“Niyaŋ kuthɛgbɛ ba banabiŋ bibahothiŋ beŋ. Bi kɔŋ see kendeŋ e bindɛ si tɔŋinɔkɔ nɔŋ takɛŋ bithɛbɛ, kɛrɛ maniyɔ ma ka siini bakɛnamɛŋ baŋ nɔŋ yaŋɛŋ bibaŋɔy. 16Beŋ kɔŋ bindɛ kothiye ka maniyɔ namɛŋ maŋ. Kuyeŋ kunɛnɔy sa tiŋ mutiŋ muyɔhɔy, awa kuyerethe sa tiŋ mutiŋ muthɔma. 17Huna, kuyeŋ ndo kuyeŋ kuyɔhɔy ku kɔŋ tiŋ mutiŋ muyɔhɔy, kɛrɛ kuyeŋ kunɛnɔy koŋ kuna tiŋ mutiŋ munɛnɔy. 18Kuyeŋ kuyɔhɔy sa tiŋ mutiŋ munɛnɔy; awa nɛna hɛlɛŋ nɛŋ kuyeŋ kunɛnɔy, kuŋ sa tiŋ mutiŋ muyɔhɔy. 19Awa kuyeŋ ndo kuyeŋ ku sa tiŋ mutiŋ muyɔhɔy, ku kɔŋ yuuta e kuŋ yelo ka buu buŋ.#Math 3:10; Luku 3:9 20Beŋ kɔŋ ŋɛŋ kothiye ka mutiŋ mu ŋɛŋ tiŋ muŋ.#Math 12:33
Yaŋ kɔita bena
(Luku 13:25-27)
21“Wuŋ ka ba dɔma na wɔ yo wɔ wo dɔŋ, na ‘Mariki, Mariki’ na biyande ka huybakine hu ka ariana haŋ. Kɛrɛ wo ni bɛyiniŋ ba thimo Fandaŋ wo ka ariana woŋ na kɛndɛ biyande. 22Ka lɔkɔ babɛina biya bimandiŋ bi kɔŋ yama dɔŋ, na ‘Mariki, Mariki, e miŋ kutɛ nde niye hunabi ka keŋ kukɛnda koŋ beŋ? E miŋ nde kɔ kaninande biya iŋ mbayiŋ ka keŋ kukɛnda koŋ, awa e miŋ nde kɔ niya bɛyiniŋ babukuyuwɛ ka keŋ kukɛnda koŋ?’ 23Ka lɔkɔ babɛina yaŋ kɔŋ bindɛ tepe ba dɔma, na ‘Yaŋ kɔita bena, gbɔniyɔkɔŋ nuŋ dondo baŋ, bendo nde ni bɛyiniŋ banɛnɔy beŋ.’#Ŋaiŋa 6:8
Bathoyini biye beŋ
(Luku 6:47-49)
24“Wɔ o wɔ wo yuyɛ mathananini niŋ maŋ e ndɛ niya ba tepe yaŋ baŋ, yaŋ kɔŋ thɔyintande wɔ bɛina nɔŋ wɔ kele wo thoyɛ banka nama baŋ ka kuthara koŋ ka thinthi. 25Awa e koyoŋ time banka babɛina, e mandi matɛnkɛ maŋ pɛnka banka babɛina, awa e huru humandiŋ bɛŋ pɛnka. Kɛrɛ bɛŋ tha ŋɔti, baa bɛŋ thoyo ka kuthara ka thinthi.
26“Awa wɔ yo wɔ wo yuyɛ mathananini niŋ maŋ e ndɛ thana niya ba tepe yaŋ baŋ, yaŋ kɔŋ thɔyintande wɔ bɛina nɔŋ wɔ wothɔkɔy wo thoyɛ banka nama baŋ ka thɛkɛyaŋ haŋ. 27Awa e koyoŋ time banka babɛina, e mandi matɛnkɛ maŋ pɛnka banka babɛina, awa e huru humandiŋ bɛŋ pɛnka; kɛna ŋɔti bɛŋ. Awa ŋɔta huyete kutɛ ŋɔti bɛŋ.”
Mayoho ma ka Yisɔs maŋ
28Awa naa thanki Yisɔs gbonkiya bɛyiniŋ baŋ baŋ, sɛthɛ bamandiŋ baŋ ni thakaba ba mathanani ma ka Yisɔs maŋ, 29baa ndɛ thanani bindɛ nɔŋ wɔ wo iŋ mayoho. Awa ndɛ tha bindɛ thanani nɔŋ bikarimɔkɔiŋ namɛŋ bi ka Siraŋ baŋ beŋ thaninuwe na.#Maki 1:22; Luku 4:32
നിലവിൽ തിരഞ്ഞെടുത്തിരിക്കുന്നു:
Mathiyu 7: LMBNT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© The Bible Society of Sierra Leone, 2011
