Mathiyu 3
3
Kɛwandi wo ka Yɔni wo Babiye biye hu ka Masaala haŋ woŋ
(Maki 1:1-8; Luku 3:1-18; Yɔni 1:19-28)
1Ka malɔkɔ mabɛina Yɔni wo Babiye biye hu ka Masaala haŋ woŋ see kaŋ niya kɛwandi ka wula ba ka Yudiya. 2Ndɛ dome, na “Sikinaŋ sɔkɔrɔ hakɛŋ ndeŋ baŋ, e beŋ biyo biye hu ka Masaala haŋ, baa huybakine hu ka ariana haŋ thuriye.”#Math 4:17; Maki 1:15 3Ndɛ woŋ baŋ na nde banabi woŋ Aisaya gbonkiyiyɛ woŋ ba dɔma, na
“Wɔ wunthe kɔŋ yɛli thampa ka wula baŋ,
na ‘Kɔsinɔkɔŋ gboŋa baŋ ba Mariki woŋ,
awa e beŋ bɛŋ thumbunuwa natoloŋ.’”#Ais 40:3
4Awa Yɔni thooyeŋ nde yaba ba yehinuwo maŋaye ka bɔɔyɛ bu ka maama wo domo na nyɔkɔmɛ. Awa e ndɛ pitha mbumbusa ki ka nthagba ka hirika nama haŋ,#2 Gb 1:8 e ndɛ nde kɔ thɔma sisiŋ mɛnɛ tɔŋɔ. 5Kɛna penko ndɛ iŋ biya bi ŋaye ka Yɛrusalɛmi mɛnɛ bi ka bompi wo ka Yudiya fooma, mɛnɛ bi ka bompi wo ka Yɔdaŋ fooma. 6Kɛna tɛŋinɔkɔy bindɛ hakɛŋ bakɛnamɛŋ baŋ nagberekethe awa ndɛ biye bindɛ biye hu ka Masaala haŋ ka mankɔ ma ka Yɔdaŋ maŋ.
7Kɛrɛ naa kute Yɔni biFaresini mɛnɛ biSadusini bibɔyɛ bi si see kɛnama ba biyo, ndɛ tepe bindɛ ba dɔma, na “Beŋ, bendo kubɔri ku ka wɔthɔiŋ beŋ,#Math 12:34; 23:33 nkaana yelɛ bena ba beŋ kita kugbasaŋati ku ka Masaala koŋ, ku ndɛ ba bena niya koŋ? 8Niyaŋ bɛyiniŋ ba tɔŋɔŋ ba dɔma na beŋ sikiyɔkɔy ŋaye ka hakɛŋ ndeŋ baŋ. 9Baŋ thɛrɛŋ ba kathiŋɔkɔ ba dɔma, na ‘Mpati bi ka Ebrahim bina miŋ.’#Yɔni 8:33 Yaŋ tepe bena, Masaala punkeŋ sɛkitha tharaka thaŋ thaŋ e ndɛ thɛŋ sikinande mpati bi ka Ebrahim. 10Hali ka tete kubapi koŋ yenthiŋino nda ba thonka nthanthɛŋ ki ka ŋayeŋ ŋaŋ kiŋ, baa kuyeŋ ndo kuyeŋ ku sa tiŋ mutiŋ muyɔhɔy ku kɔŋ yuuta e kuŋ yelo ka buu buŋ.#Math 7:19 11Yaŋ kɔŋ bena biye iŋ mandi baa beŋ sikiŋ sɔkɔrɔ hakɛŋ bakendeŋ baŋ; kɛrɛ hiŋ wɔ si see wo yamɛ ba yaŋ kaye-kaye. Yaŋ teŋeta hintiŋ nthɔŋ ba niŋ bohiyɛ dagbalɛŋ nama baŋ. Ndɛ na wɔ bɛina wo si sɛkɛthi Yina wo ka Masaala woŋ awa mɛnɛ buu ba bena biiye. 12Ndɛ boheŋ kubonka koŋ ka yɔnkɔ nama haŋ, ba huukuwa gbethe nama baŋ. Ndɛ kɔŋ kɔsɔŋ paka baŋ ka kuhunkuŋ nama koŋ, e sɛkitha ŋawoi ŋaŋ e ŋɛŋ yɛla ka buu bu sa dɔmɔ buŋ.”
Yisɔs biyo iŋ Yɔni
(Maki 1:9-11; Luku 3:21-22)
13Kɛna see Yisɔs ka Yɔni ŋaye ka Kalili ba biyo iŋ Yɔni ka mankɔ ma ka Yɔdaŋ maŋ. 14Kɛrɛ Yɔni pinde niŋ e niŋ tepe, na “Yina sisande ba yama biye; mbɛ hu yi see kiyaŋ do ba biyo?”
15Kɛrɛ Yisɔs tepe niŋ ba dɔma, na “Wu niyɔyŋ nda tete, baa wu kɔŋ ni ba miŋ thanka niya fooma mathumbɛ ma thimo Masaala maŋ.” Kɛna mɛyi ntiŋ Yɔni ba niŋ biye.
16Naa biyo Yisɔs, ndɛ fuŋ yako ka mandi maŋ. Awa kɛna pɛthɔy ka ariana e ndɛ kuta Yina wo ka Masaala woŋ si thuhu ka mathɔyande ma ka kurotho e tutɔ Yisɔs na. 17Kɛna yuye Yɔni thampa maŋaye ka ariana tha tɛpɛ ba dɔma, na “Hatiŋ wowathe wo thimo yaŋ woŋ na woŋ baŋ, wo yeheŋ yama thukuma woŋ.”#Mthr 22:2; Ŋaiŋa 2:7; Ais 42:1; Math 12:18; 17:5; Maki 1:11; Luku 9:35
നിലവിൽ തിരഞ്ഞെടുത്തിരിക്കുന്നു:
Mathiyu 3: LMBNT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© The Bible Society of Sierra Leone, 2011
