Ko-Dabirɛnu 2
2
Duninya Dan-Koe Tele Wɔrɔnfila Nyɔgɛ
1Alla banta duninya danna ka le anubɛ fan min bɛɛ ye a rɔ.
2 #
Hiburunu 4.4, 10 #Bɔ-Koe-Iyipiti 20.11Alla ya wɔlɛ min bɛɛ kɛ, a ya wo ban tele wɔrɔ le kɔrɔ. A tele wɔrɔnfila nyɔgɛ ma, a ya a sulen. 3Woletɔ Alla ya ata duwɛ layigi a tele wɔrɔnfila nyɔgɛ wo ma ka wo ma tele-latankanɛ la kamasɔrɔn Alla ya a sulen duninya dan-koe ma wulɔn le. 4Alla ya duninya dan wo nya na le.
Allata Nakɔɛ Wara-Koe
Mari Alla ya duninya dan tumɛ min, 5dugu-kole makolɔn le nun. Ki-fan anubɛ fira sa nun kamasɔrɔn mɔgɔ sa min si a wɔli, ado Mari Alla ma bandɛ lana wɛ dugu-kole kuma nun 6fɔ yi min bi bɔla dugi kɔrɔ, wo le ye dugi kimala nun.
7 #
1 Kɔrɛnti 15.45
Wo kɔma, Mari Alla ya kei dan ka bɔ bɔnkɛ rɔ. Alla ya a nyɛrɛ niyi bila a sunyɛ rɔ. Kei wo ya niyila fɛyɛ dabira. A mara dali-fen-kɛndɛ la.
8Wo kɔma, Mari Alla ya nakɔɛ labɔ kan tinɛ do rɔ min tɔgɛ Idɛn. Wo ye tele-bɔɛ wara la. A ya kei min dan, a ya wo sigi nakɔɛ wo rɔ. 9#Lankɛnimayɛ 2.7; 22.2, 14 Kɔlɔma su bɛɛ minnu kin, ado anu gbɔɛ si dɔn, Mari Alla ya wonu nafɛrɛn nakɔɛ wo rɔ. Kɔlɔma fila ye nakɔɛ wo tɛma nun, “Nimaya-Kɔlɔma” anubɛ “Ko-Nyimɛ-anubɛ-Ko-Yoge-Lɔn-Kɔlɔma.”
10Bɛ do ye Idɛn nakɔɛ wo tɛma. Kɔlɔma min bɛɛsi ye nakɔɛ wo rɔ, wonu sulinu bi yi sɔrɔnna bɛ wo le tɔ. Ba-kun nani sɔra bɛ wo ma Idɛn nakɔɛ wo kɔma kilɛ la. 11Bɛ wo kelan tɔgɛ le Pisɔ. Bɛ wo le tara ha Hafila nyamanɛ rɔ ka basan a la. 12Sɛnɛ-hakikɛ anubɛ tulu-suma-diyamɛ anubɛ kuru-da-gbɛlɛmɛnu bi nyɔ le. 13Bɛ doi fanan tɔgɛ le Kiyɔn. Bɛ wo le tara ha Kusi#2.13 Kusi: Nyamanɛ wo tɔgɛ do le Mɛsopotemiya. nyamanɛ rɔ ka basan a la. 14Bɛ doi fanan tɔgɛ le Takarasi. Bɛ wo le tara ha Asiriya nyamanɛ tele-bɔɛ wara la. Bɛ doi fanan tɔgɛ le Yufereti.
15Mari Alla ya kei wo sigi Idɛn nakɔɛ wo rɔ alako a ni nakɔɛ wo fɛ-bira. 16Mari Alla ya a fɔ kei wo ye ko, “Kɔlɔma min bɛɛsi ye nakɔɛ kɛ rɔ, i ni wonu gbɔɛ dɔn. 17Kɔnɔ fɔ ‘Ko-Nyimɛ-anubɛ-Ko-Yoge-Lɔn-Kɔlɔma’ gbɔɛ, i kana wo dɔn kamasɔrɔn ni i ya wo dɔn, i si faga serr!”
18Mari Alla ko, “Kei kelan ma bɛn. N si a dɛnbɛnɛ dan a ye, anubɛ min si bɛn.”
19Ado nfan, Mari Alla ara soge anubɛ kona min bɛɛsi ladan bɔnkɛ la nun, a nara anu na kei wo wara alako a ni a lɔn kei wo si na anu tɔgɛ sa nya min. Kei wo ya nima-fan wonu bɛɛsi tɔgɛ sa nya min, anu tɔgɛ tora wo nya na le. 20A kolo-fen wo, a kona wo, a sogo wo, kei wo ya wo tɔgɛ sa kɔnɔ kei wo ma a dɛnbɛna yen wonu tɔ anubɛ min si bɛn. 21Mari Alla ya kinɔgɔ-belebele latenbi kei wo ma. A ye kinɔgɛ wo rɔ, Alla ya a kɔgɔ-barasa-kolo kelen bi ka a fɛrɛ latogon a gbɛ rɔ. 22Mari Alla ya kɔgɔ-barasa-kole wo bi ka a ma musi la. A nara musi wo la kei wara ka a di a ma. 23Kei wo ko,
“Sobore!
N nyɛrɛ kole anubɛ n nyɛrɛ fɛrɛ-bɔnkɛ le kɛ la.
N si kɛ kele ko, ‘musi’#2.23 Musi: Hiburu-kan rɔ, ka a fɔ kei anubɛ musi, wonu fɔ-nya gbɛrɛnnɛ anu nyɔgɔn ma iko “ish” anubɛ “isha.” kamasɔrɔn a ara bɔ kei rɔ.”
24 #
Matiyu 19.5; Maraka 10.7-8; 1 Kɔrɛnti 6.16; Ɛfɛsa 5.31 Woletɔ kei si a na anubɛ a fa boloka ka tugun ala musi la. Anu si ma mɔgɔ kelen na.
Kei anubɛ Musila Hakɛ Kɛ-Koe
25Nba, kei wonubɛ ala musi, anu filɛ bɛɛsi lakolɔn le nun kɔnɔ anu ma miliya ko lɔn nun.
നിലവിൽ തിരഞ്ഞെടുത്തിരിക്കുന്നു:
Ko-Dabirɛnu 2: KCLB
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Kuranko Common Language Bible © The Bible Society in Sierra Leone, 2006.
