Ruka 6

Abawiriki asiri vunde rago sabiti

(Mt. 12:1-8; Mk. 2:23-28)

1Si ki ta du wa gere ti gu ue sabiti Yesu andu rogo ati vunde; gako abawiriki ki siri vunde, ki ta tukumo ho beyo niri he. 2Agu yo dagba aFarusi ki ya, “Tipagine oni namanga gu pai ti ni wa aru nga manga ha rago sabiti ya?” 3Yesu ki ta karaga ha fu yo niya, “Oni ageda nga kina gi te re, nga gu Dawidi amangi, ho gomoro amangi ko ni, na agu aboro nadu na ko; 4wa ko arimi ku rogo ga Mbori bambu yo, ki di kpokuta yugopai ki niri he, ki fu he fu agu yo nadu na ko a; nga gu i aida nga pa ri he ya, ono fu kina aboromotumo ni sa yo?” 5Ko ki ya fu yo, “Wiri boro du ni gbia sabiti.”

Kumba na kurugbo beko

(Mt. 12:9-14; Mk. 3:1-6)

6Si ki ta du wa gere ti kura sabiti, Yesu ki rimi ku bambutiria yo ki niyugu pai. Kumba adu yo na kurugbo kumbabeko. 7Abakeapai ki pidi ko na aFurusi, si ngia ko ahusa ko rago sabiti; i bi gu pai ka i kiti ngbanga ko mbiko ho. 8Ono ko aini gayo aberã; ki ya fu gu ko nadu na kurugbo beko, “Mo gúari, ki ru dagba yo.” Ko ki guari ki ru. 9Yesu ki ya fu yo, “Mi nasana roni, watadu manga wenepai rago sabiti na manga gbegberẽpai, ka batasa unga na ka gbarasa ha, gini gu ru?” 10Ko ki ngere kirikiri fuo yo dunduko ki ya fu ko, “Mo tãi bero.” Ko ki mangi he wo; beko ki hu. 11I ki nigbiriwo kuti ko; i ki fura dagba yo tipa gu pai ka i mangi Yesu na ni.

Yesu asia amokedi bawe na ue

(Mt. 10:1-4; Mk. 3:13-19)

12Si ki ta du wa gere ti gu rago re, Yesu akuru ki ndu ku bagangara yo ka kpara yo; ko ki nikpari akpara fu Mbori yuru sasasa. 13Ho rago agiri ni, ko ki yambu gako abawiriki koyo du ko ni. Ko ki sia agu yo dagba yo bawe na ue, ko ki ya a ti agi yo re amokedi; 14nga Simona, ko ayambu kura rimoko a nga Petero, na Andarea nangia wirinako, na Yakoba na Yoane, na Firipo na Barutoromayo, 15na Matayo na Toma, na Yakoba nangia wiri Arafayo, na Simona nga gu ko i aya ti ko Zerote, 16na Yuda nangia wirina Yakoba, na Yuda Keriota nga gu ko nakusi Yesu.

Yesu aunda rimbasa aboro

(Mt. 4:23-25)

17Yesu ki zorõ na amokedi, ki ru auru kpasakpasa sende, na bakere rimbasa gako abawiriki, na gu dungu aboro naye Yuda yo na Yerusarema yo, na pangba baime Tura yo na Sidona yo, ka gia gako pai, na ka hu be gayo akaza. 18Agu yo du ni fudifudi yo be gbigbita atoro ki hu. 19Rimbasa aboro ki asadi ka zada ko dunduko; bambiko tandu anikuru ti ko, ki husi yo dunduko.

Maku na rungo

(Mt. 5:1-12)

20Ko ki ngere koyo du gako abawiriki ni, ki ya,

“Aboro maku nga oni, rungorungo aboro, bambiko ga Mbori ngbi nga gaoni.

21“Aboro maku nga agu roni du na gomoro awere, bambiko oni ambíka.

“Aboro maku nga agu roni nakpara ni aume awere, bambiko oni amóma.

22“Aboro maku nga oni, ho aboro ka soga roni ni, na ho i ka kpara roni ni ti yo, ki nisenge roni, ki ba rimoroni ku sa yo wa gbegberẽ he, tipa rimo Wiri boro. 23Oni ngí angi ni gu rago re, ki niguku ni ngbarago; oni ngére nga, gaoni mosoro du ni bakere he ngbangbaturũ yo bambiko abayo amangi anebi kina wo.

24“Ono na gberẽ he fu agu roni nakumuko! bambiko oni ima dia gaoni wasa.

25“Na gberẽ he fu agu roni du na mbire awere! bambiko gomoro amánga roni.

“Na gberẽ he fu agu roni namoma awere! bambiko oni arúngo ki nikpari ni aume.

26“Na gberẽ he fu roni ho aboro dunduko ka tambua roni ni, bambiko abayo amangi kina wo a fu airazire anebi.”

Nyemuse tipa avura boro

(Mt. 5:38-48; 7:12a)

27“Ono ya mi fu roni nagia ha, Oni kpí nyemu avuraroni, oni mángi pa agu yo nasoga roni, 28oni sámbua agu yo nasenga roni, oni kpári tipa agu yo namanga roni gbegberẽ. 29Gu ni ka nari bagaro mo ária gu kura ha fu ni a; gu ni ka di ga gbanga remu ka mo ká nga na ga baukadi be ni a ya. 30Mo fú he fu gu ni ka sana ro; gu ni ka di gamo ahe, ka mo sána nga ni ti ni berewe ya. 31Wa oni akpi nyemu aboro nimangi fu roni, oni mángi he fu yo kina wo a.

32“Ka oni kpi nyemu agu yo nakpi nyemu roni, gini tambuahe ka du fu roni ti ni? bambiko aboro ingapai nakpi nyemu agu yo nakpi nyemu yo a. 33Ka oni mangi pa agu aboro namanga pa roni, gini tambuahe ka du fu roni ti ni? aboro ingapai namanga kina wo a. 34Ka oni fu he ni bape fu gu ni oni nakpi nyemu ka dia ha be ni berewe, gini tambuahe ka du fu roni ti ni? aboro ingapai nafu he ni bape fu aboro ingapai ka dia kina ha berewe. 35Ono oni nikpí nyemu avuraroni, ki nimangi pa yo wenengaĩ, ki nifu he fu yo ni wasa; gaoni mosoro adu ni bakere he, oni ki du ni awiri gu Ko du ni Bahe. Bambiko ko naina pai fu aboro gbangbati na aboro ingapai. 36Oni íni pai fu aboro a wa Baroni naina pai fu aboro.

Sapangbanga kura aboro

(Mt. 7:1-5)

37“Ka oni sápu nga ngbanga boro ya, ka i asápa nga ngbanga roni a ya: ka oni mbúsi nga boro ya, ka i ambúsa nga roni a ya; oni vú boro i ki vu roni; 38oni fú he, i ki fu he fu roni; si ki rengbe gbe, i así he asi, nizigizo ho, si ki niuka auka, kina wo i ka fu he fu roni. Bambiko na gu moduka oni ka nduka he na ni, i andúka he na kina ha fu roni berewe.”

39Yesu ki gumba sanza fu yo a, “Ka iravurari gasi iravurari? i ue ka ti ku due yo, te? 40Bawiriki nasusa nga gani bayugupai te; ono gu ni du ni teketeke ni ni ka wira gani bayugupai. 41Tipagine mo nabi gu toni he du rogo bangiri wirinamo ti ni, ono mo ata ruga nga tiro na gu bakere he du kina rogo bangiro te? 42Mo awíra pa ya fu wirinamo wãi, ‘Wirina, mi dí gu toni he du rogo bangiro’, a wa mo ata ruga nga tiro na gu bakere he du bangiro yo te? Irabiriki nga mo, mo dí kina gu bakere he du bangiro yo mbata mo ki bi he wenengãi ka dia gu toni he du bangiri wirinamo yo.”

I naina ngua ti zuzuhe

(Mt. 7:17-20; 12:34b-35)

43A nga wene ngua sa ka zuku gbegberẽ rinde te; a nga gbegberẽ ngua sa ka zuku wene rinde te. 44Bambiko i aina angua dunduko ti kina zuzuhe. Bambiko aboro akata nga zuzu vurumo ti kiwe te, i akata nga kakue ti zigidiri kiwe te. 45Wene boro nakusa wene apai ti gu wene kumuko du ngbaduni yo; gbegberẽ boro nakusa gbigbita apai ti gu gbigbita kumuko du ngbaduni yo; bambiko ngba boro nagumba pai mbiko gu pai dũ ngbaduni yo kpaima.

Mburu bambu: watadu mbia na ngume

(Mt. 7:24-27)

46“Tipagine ya oni ti re ti ni, ‘Gbia, Gbia,’ ka oni amanga nga agu apai mi agumba fu roni ya? 47Gu ni ka ye kono du mi ni, ki gi gimi apai ki nimangi he, mi ayúgo gu boro fu roni ni nawira ni: 48ni wiri gu boro nadua bambu ki ge he dudungura, ki moi mburuhe auru mbia. Ho ime afu kuti gu bambu ni re, ka si azigizo nga ha ya; bambiko ni adua ha wenengãi. 49Gu ni nagia pai ka ni amanga nga ha ya, ni wiri gu boro nadua bambu auru sende zanga mburuhe; ime ki fu afu kuti he, si ki ti ati ni ba sa; tigo gu bambu re ki du ni bakere he gbe.”

നിലവിൽ തിരഞ്ഞെടുത്തിരിക്കുന്നു:

Ruka 6: ZB1978

ഹൈലൈറ്റ് ചെയ്യുക

പങ്ക് വെക്കു

പകർത്തുക