Ruka 2
2
Batika Yesu
(Mt. 1:18-25)
1Were, si ki ta du wa gere, Kaisara Auguseto ki rũ ndika, i ke rimo aboro dunduko. 2Bambata ke rimo aboro nangia ha, ho Kuirinu adu ni ni banyaki Suria yo. 3Aboro ki ndu ka ke rimoyo dunduko, gu ni ku rogo gani bakporo. 4Yosefa ki ndu Gariraya yo tigako a, rogo gu bakporo nangia Nazareta, ku Yuda yo, ku rogo gu bakporo nangia ga Dawidi, i niya ti ni Betereme, bambiko ngbatunga Dawidi nangia ko, nangia titako a; 5i ke rimoyo na Maria, gu ri i apazua ri fu ko, ri ki gbe na gude. 6Si ki ta du wa gere, ho i adu yo ni, rago ki rengbe ri batika. 7Ri ki batika bambata wiriri; ri ki ukadi ko ni gbanga remu, ki pigi ko rogo ga anya sanduki riahe yo, bambiko ba adu nga sinziri yo tipa yo te.
Ababanda akandoro na amaraika
8Ababanda akandoro adu kina rogo gu ringara re, nanidu pati gayo rimbasa akandoro yuru nvuo yo. 9Ga Gbia maraika ki ru pati yo, ga Gbia imarago ki hasi rago pati yo kirikiri, i ki nigunde agunde gbe. 10Maraika ki ya fu yo, “Ka oni gúnde nga ya; bambiko oni ngére, mi naye na wene pangbanga fu roni nga ga bakere ngbarago nga gu nikadu adu fu aboro dunduko; 11bambiko i vungu Batasi fu roni areme rogo gu bakporo nga ga Dawidi, nga Kristo Gbia. 12Gi pai adú ni yuguyugu he fu roni re: oni abí fogo gude ukadi yo ko ni gbanga remu pi rogo ga anya sanduki riahe yo.” 13Barimbasa amaraika ngbangbaturũ ki du na gu maraika ni ba sa, nitambua Mbori, niya,
14“Taarimo dú fu Mbori ri arago dũ,
zereda dú dagba aboro sende no, i ngba ti ko!”
15Si ki ta du wa gere, ho amaraika aguari ni pati yo ku ngbangbaturũ yo, ababanda akandoro ki ya dagba yo we, “Ani ndú kina ku Betereme yo awere, ki bi nga gi pai mangi re, nga gu Gbia niyugu he fu rani.” 16I ki ye ni ipo, ki bi aMaria na Yosefa, fogo gude ki pi rogo ga anya sanduki riahe. 17Ho i abi ko ni, i ki taki pande gu pai i agumba ha fu yo tipa gi gude re. 18Si ki iriwo airiwo ti agu yo dunduko nagi agu apai ababanda akandoro agumba fu yo. 19Maria ki ka kuti agi apai dunduko re niberẽ pa ha kpotori yo. 20Ababanda akandoro ki yega, ki ta taasa rimo Mbori nitambua he tipa agu apai i agi he ki bi he dunduko, a wa i agumba ha fu yo.
Ga Yesu yeratise
21Ho rame arengbe ni muambi i yere ko ni yerati, i ki yambu rimoko nga Yesu, nga gu maraika ayambu he mbata ka Maria ata du nga na mobara ku rukumbu yo ya.
Yugo pa Yesu yekaru yo
22Ho rame gayo munzere arengbe ni ku sangba ga Mose rugute yo, i ki ye na ko ku Yerusarema yo, ka fu ko fu Gbia. 23Si ni keke he rogo ga Gbia rugute yo, ya “Agu akumbagude dunduko naza rukumbu i ka ya ti yo kparakpara yo fu Gbia”. 24I andu ka tumo ni motumo ku sangba gu pai i agumba ha rogo ga Gbia rugute yo, ya “ambipo ue watadu paranga agbungu ue.” 25Mo ngére, kumba adu Yerusarema yo, rimoko nangia Simona. Gi kumba adu ni ruru ko re, ki niberẽ ga Mbori pai aberã gbe, ningere ti gu wasa nga ga aYisaraere; Ziazia Toro ki du ti ko. 26Ziazia Toro ayugu he fu ko, ya ko abi nga kpio mbata ko nikabi ga Gbia Kristo te. 27Koki ye mbiko Ziazia Toro ku tii yekaru yo; ho avunguko aye ni na gu gude nga Yesu, ka manga sino rugute tipa ko. 28Simona ki di ko ku beko, ki nisambua Mbori, ki niya,
29Awere Gbia, mo ídi ga moyambu guari zezeredi, wa mo agumba,
30mbiko bangire bi ga bata,
31gu mo ambakadi ku bangiri rika aboro dunduko,
32si du ni imarago i yugu he fu auro,
ki du ni gu taarimo nga ga aYisaraere, nga avururo.
33Agu apai i agumba ha tipa ko si ki iriwo airiwo ti Yosefa na nako. 34Simona ki fu maku fu yo, niya fu nako nga Maria,
“Mo gí he, i moi gi gude re tipa tigo agu yo dagba aYisaraere ni dungu yo na guari yo ku ari,
na tipa gu yuguyugu he i nikagumba pai kuti ni
35ii, baso nikakora kpotoro yo a,
ya i kusi agu aberã du kpoto
aboro yo ni dungu yo.”
36Were de adu ho nangia Ana, ni denebi, nangia wiri Fanuere, ni ngbatunga Asera, garãri adu ni dungu he, fuo du ri ni ngasu de ri asungu na kumbari garã ki du saba. 37Ri ki du ni dekurugbo ono garãri ki du dunduko 84, ri aguari nga yekaru yo te, ono ri anafu tambuahe nigina riahe ki nikpari kpe yuru na uru. 38Ri ki ta rima ti kina gu rago re, nitambua Mbori, ki nigumba pa ko fu agu yo dunduko naangera tipa gu motumo nga ga Yerusarema.
Karagatise ku Nazareta yo
39Ho i amangi agu apai ni dunduko ku sangba ga Mbori rugute yo, i ki ga ku Gariraya yo, ku rogo gayo bakporo nangia Nazareta. 40Gude ki sono, ki ngarã, ki du na tatamana; ga Mbori undahe adu ti ko.
Yesu ni gude ku yekaru yo
41Were, avunguko anandu na garã ku Yerusarema yo rago pumbo susiri. 42Ho garãko adu ni bawe na ue, i ki ndu a wa sino pumbo nidu. 43Ho i anyasi pa gu rago re ni, wa i ayega, gu gude nga Yesu anye sa yo Yerusarema yo; ka avunguko aina nga ha ya. 44I ki ndu tipa rame sa ki ya tigayo ko rimbasa yo. I ki gbata ko dagba agumeyo na agu aboro i aini yo; 45ho i abi nga ko ni ya, i ki karaga tiyo ku Yerusarema yo nigbata ko. 46Si ki ta du wa gere, i ki bi ko fuo rame biata yekaru yo, ko nisungu dagba abayugupai ki ta gia gayo pai nisana yo tipa apai. 47Gako rugatinapai ki iriwo ti agu yo dunduko nagi pa ko na gako karagapai. 48Ho i abi ko ni, si ki iriwo ti yo. Nako ki ya fu ko, “Gude, tipagine mangi mo rani ti ni were? Mo ngére, abamo nigbata ro na mi ni aume.” 49Ko ki ya fu yo, “Tipagine oni agbata re ti ni? Oni aina nga ha ya ka mi mangi ga Buba sunge amanga te?” 50Ka i aina nga gu pai ko agumba ha fu yo ya. 51Koki ga na yo, ki da Nazareta yo; ko ki gi sangbayo. Nako ki ka kuti agi apai kpotori yo dunduko re.
52Yesu ki sono na tatamana na ome, ki ngba bangiri Mbori na bangiri aboro a.
നിലവിൽ തിരഞ്ഞെടുത്തിരിക്കുന്നു:
Ruka 2: ZB1978
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
La Sainte Bible en Zande © Alliance Biblique Universelle, 1978.
