Yoane 17
17
Ga Yesu kpe tipa gako abawiriki
1Agi apai re Yesu agumba; ko ki ningere ku ngbangbaturũ vo, ki ya, “Buba, ragoho da; mo táasi rimo wiro, wiro táasi rimoro; 2wa asia mo pa aboro fu ko dũ, ya agu yo fu mo yo fu ko, ko fu nyenye unga fu yo. 3Nyenye unga nga gere, nga i ini ro nga bangisa ndikidi Mbori, na gu ko mo akedi ko, nga Yesu Kristo. 4Mi taasi rimoro rogo kpotosende, mi nyasi gu sunge fu mo fere mi mangi he. 5Ako Buba, mo táasi rimorani na mo awere ni gu taarimo ani adu na ni na mo mbata zegino nikadu.
6“Mi yugu rimoro fu agu aboro mo afu yo fere zegino. Gamo yo nadu, mo ki fu yo fere; i ka kuti ga pai. 7I ini awere ya agu apai fu mo fere dũ si ye yo du mo ni; 8bambiko agu apai fu mo fere mi fu he fu yo; i ki di he, i ki ini ni rengo ya mi aye yo du mo ni, i ki idi pa re ya mo nakedi re. 9Mi nakpara tipa yo; mi akpara nga tipa aboro zegino te, ono tipa agu yo fu mo yo fere; bambiko gamo yo du. 10Agu ahe dunduko nga gimi gamo du, gamo nga gimi; mi ni taasitaasi rimore rogo yo yo. 11Mi zegino berewe te, agi yo du zegino re, mi naye koyo du mo ni. Ako Ziazia Buba, mo ká kuti agu yo fu mo yo fere ni rimoro, i du adu sa wa kina rani. 12Wa ani adu na yo, mi aka kuti yo ni gu rimoro fu mo fere. Mi abanda yo abanda, gu ni akpi nga wa sa te, kina wiri kpio; Ziazia Kekeapai da ti rengo. 13Mi naye koyo du mo ni awere; agi apai re mi nagumba ha zegino, gi ngbarago moi pai ti yo. 14Mi fu ga pai fu yo; aboro zegino asogo yo asoga, bambiko aboro zegino nga yo te, wa kina re adu nga ni boro zegino ya. 15Mi akpara nga foro mo rogo yo aroga zegino te, ono mo ka aka kuti yo ti gbegberẽ ko. 16Aboro zegino nga yo te, wa kina re adu nga ni boro zegino ya. 17Mo kpára yo rogo rengo yo; ga pai nga rengo. 18Wa mo akedi re ku zegino, kina wo kedi mi yo ku zegino. 19Mi kpara tire tipa yo, i du ni kparakpara yo a ni tiyo ni rengo.
20“Mi akpara nga tipa kina agi yo sa te re, ono tipa agu yo a nikaida pa re mbiko gayo pai, 21i du adu sa dunduko; wa kina ro, Buba, du rogo re yo, mi ki du rogo ro yo, i du rogo rani yo a; aboro zegino idi pa re ya mo kedi re. 22Gu taarimo fu mo fere mi fu be fu yo, i du adu sa, wa kina rani du adu sa; 23mi du rogo yo yo, mo ki du rogo re yo, i mongo du adu sa; aboro zegino ini ya mo nakedi re, mo nakpi nyemu yo, wa kina gu mo nakpi nyemu re. 24Buba, agu yo fu mo yo fere, mi nakpi nyemu ani du na yo ho du mi ni a; i bi gu gi taarimo fu mo fere, bambiko mo aima diga nikpi nyemu re mbata zegino nikadu. 25Ako ruru Ba, aboro zegino aina nga ro te, mi naini ro; agi yo ini re ya mo nakedi re. 26Mi yugu rimoro fu yo, mi ayúgo ho ayugo; ya gu nyemuse mo nakpi nyemu re na ni, si du rogo yo yo, mi ki du rogo yo yo.”
നിലവിൽ തിരഞ്ഞെടുത്തിരിക്കുന്നു:
Yoane 17: ZB1978
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
La Sainte Bible en Zande © Alliance Biblique Universelle, 1978.
