MARKUS 5
5
I Yesus nompa'alinakon mian anu sinoku'on nu roh ma'idek
(Mat. 8:28-34, Luk. 8:26-39)
1Lapas aitu i Yesus ka' anu saja' mombatuki Ia tinoka i santoa nu Dowiwi Galilea, i tano' nu Gerasa. 2Salatan i Yesus ilumobos lengkat i duangan, Ia i lambanan mae nu samian na mo'ane anu nosabat mae lengkat i liang nu kubulan. 3Mian aijo' kinuasanmo nu roh ma'idek ka' jojoong i anu saja' pongkubulan. Ia madi'mo daagi' opoko segoti; mau mule' tiba lante'. 4Toho'mo tengke ka' limanyo pinungu, panyo lante' haha aijo' saja' nu botu'i, ka' besak i tengkenyo nu pato'i. Ia talalo mahoson ka' madi' ko samian pe'e na moko tahani. 5Sinaa ka' pihi ia mahalajangan i kubulan ka' i to bungku bungkutnyo, maha-maha poloboo'an ka' mombelai butongnyo nu batu.
6Daagi' jo'o-jo'on ia nontoa i Yesus tinoka, ia nopadeka', lantas nonsombah i ahop hi Yesus. 7Tiba potatae anu daka' ia noloboo', “Yesus, Anak nu Tumpu Allah anu Talalo Matangkas na Kuasa-Nyo! Nu posiamo na aku aiya? Tiba sanggo nu Tumpu ku poita, bolimo monsakisa aku!” ( 8Mian aijo' motatae sumo aitu, kalana i Yesus notatae hi ia, “Roh ma'idek posabatmo lengkat hi mian aiya!”)
9Lantas i Yesus nompokilawa hi ia, “Ihe na sanggoum?”
Mian aijo' nontaami, “Sanggongku ‘Legiun’ – kalana kami aiya da'isan hondo!” 10Saja' ia nompoita sabole-bole da i Yesus boli monsai to roh-roh anu ma'idek aijo' mosabat lengkat i tano' aijo'.
11Madi' majo'on lengkat i tampat aijo' manjoo' hondo na bau' anu hau-haunyo molio mongkaan i tengke nu bungkutnyo. 12To roh-roh anu ma'idek aijo' nompoita hi Yesus, “Saimo na kami minsoop i uno nu to bau-bau' haha aijo'.” 13Ka' i Yesus sinetujumo. Jadi, to roh-roh anu ma'idek aijo' nosabat lengkat hi mian aijo' ka' ninsoop i uno nu bau' haha aijo'. Sampahas na bau' aijo' iwi-iwi' nopadeka' ka' nalaloa i biwi nu keles nu dowiwi ka' nolomos – iwi-iwi'mo kila-kila ohua' na madala na bau'.
14Anu saja' monjagai bau' aijo' nopadeka', ka' nompolele lele aijo' i kota ka' i kampung anu mompaha ohani. Lantas to mia-mian nosabat da montoa apaa na anu jinadi. 15Aha tinoka hi Yesus, lantas nontoa mian anu u'uka pininsoopan nu roh ma'idek aijo', hau-haunyo suha-suhang i kiijo'. Ia nompusokmo baju' ka' pikilannyo mule' na'ima'mo. Lantas aha iwi-iwi' tinimbali nabuhuk. 16To mia-mian anu toamo kajadian mongkona mian aijo' ka' bau' haha aijo' nonsisik apaa na anu jinadi. 17Lantas to mia-mian anu i tano' aijo' nompoita da i Yesus mompala'i tano' aijo'.
18Tempo'nyo i Yesus sinumake' i uno nu duangan, mian anu u'uka mae kinuasanmo nu roh ma'idek aijo' nompoita hi Yesus, da timbali mombatuki.
19Panyo i Yesus madi' nontalima, ola ahi' koo-Nyo, “Pinsusule'mo, ka' poto'i hi to utu-utusum apaa na anu binaumo nu Tumpu hi beleyum, ka' kino ima'nyo hondo na Ia hi beleyum!”
20Mian aijo' mule' namba ka' nontampu'unimo saja' nonsisikakon i tano' Sampulu' na Kota apaa na anu binaumo i Yesus hi ia. Iwi-iwi' na mian binangang na nohongo.
Anak i Yairus – Boune anu nontiik juba' i Yesus
(Mat. 9:18-26, Luk. 8:40-56)
21I Yesus ninsusule' mule' nokiijo' i santoa nu dowiwi. I biwi nu dowiwi aijo', da'isan na mian anu toka mogombu ka' montikubi i Yesus. 22Tinokamo na samian anu sanggonyo i Yairus. Ia atina'mo samian anu monjagai laigan pogalejaan i kota aijo'. Salatan ia nontoa i Yesus, ia nonsombah i ahop-Nyo, 23ka' nompoita totu-totu'u, “Kita Tuuma, anakku boune masakit hondo. De timbali toka pe'e mae da mompanyaakon, da ia ma'alin ka' boli silaka!”
24Sahingga i Yesus namba nohingga-hinggat i Yairus. Da'isan na mian mombatuki Ia ka' mompakisa da ohani hi ia.
25I totonga' nu aha daagi' mule' ko samian na boune anu noko sampulu'mo ka' ohua' na taun masakit binuntulan nu home ola kalana tinokamo na adat nu boune. 26Iwi-iwi' halata'nyo ningkotmo pinake bau pombayan to doko-dokoten, panyo madi' ko kapa'alinannyo, ola ahi' panyakitnyo mintuang maboat. 27Boune aijo' nohongomo manjoo' na anu nubau i Yesus. Sahingga itotonga' nu mian da'isan aijo' ia nongohani i Yesus lengkat i hiku, 28kalana ia binapikin, “Mau ola aku montoongi juba'-Nyo, aku timbalimo ma'alin!”
29Ia nontoongi juba' i Yesus, ka' madi' pinin aijo' binelentimo na ia binuntulan nu home. Ingoa'annyo ia na'alinmo. 30Tempo'nyo aijo' mule' i Yesus nongoa'i saba' daagi' ko kahosonan anu nosabat lengkat i butong-Nyo. Sahingga Ia nosiloi hi mian da'isan aijo' ka' nompokilawa, “Ihe na nontoongi juba'-Ku?”
31Anu saja' mombatuki Ia notatae, “Tuuma posi toamo mian da'isan aitu nogogensotanmo. Ka' Kita Tuuma daagi' mompokilawa, ihe na anu nontiik Kita Tuuma?”
32Panyo i Yesus ola ahi' saja' montoa anu montikubi Ia molio mian anu nontiikmo Ia. 33Boune aijo' anu monsumbu' apaa na anu tinimbalimo i butongnyo, i lakatnyo ka' nabuhuk ka' nonsombah i ahop i Yesus ka' ingakuannyo iwi-iwi'. 34Lantas i Yesus notatae hi boune aijo', “Anak-Ku, kalana beleyum palesaya hi beleng-Ku, beleyum ma'alin! Lako'mo ima-ima' beleyum sinehatmo totu-totu'u!”
35Hau-haunyo i Yesus daagi' motatae, to pia-piangkuka na posaihon tinoka lengkat mae i laigan hi Yairus. “Langkoyang nu kita Tuan sinilakamo,” koonyo nu aha hi Yairus. “Bolimo kita Tuan monsusa'i mule' Tuumanto i Gulu'.”
36Madi' montapali apaa na anu tinaeakon nu to mia-mian aijo', i Yesus notatae hi Yairus, “Boli mabuhuk, palesayamo!” 37Lantas i Yesus i lumajang lau-laus, panyo Ia madi' mompobee' mau samian pe'e na anu mombatuki Ia, ola sambiha'nyo i Petrus tiba i Yakobus ka' i Yohanes moto utus. 38Salatan aha tinoka i laigan i Yairus, i Yesus nontoa ka'ada'an i hengge'mo ka' nohongo haang ka' tando' talalo daka'. 39Lantas i Yesus ninsoop ka' notatae hi aha, “Kadaka' talalo hengge' ka' humaang? Anak aijo' madi' sinilaka; ia ola i hoyot!”
40Aha nongkokojoi i Yesus. Sahingga Ia nonsai aha iwi-iwi' mosabat. Lantas Ia nomboa tina tuumanyo nu anak aijo' ka' aha totolu' na anu saja' mombatuki Ia, ninsoop i uno nu salipi' nu anak aijo'. 41I Yesus nontoongi lima nu anak aijo' ka' notatae hi ia, “Talita kum,” alati'nyo; “Anak boune, Aku motatae hi beleyum: pobula!”
42Anak langkoyang aijo' nalia' nobula ka' i lumajang. (Umunnyo sampulu'mo ka' ohua' na taun.) Iwi-iwi' anu nonsakisi apaa na anu tinimbali aijo' binangang hondo! 43I Yesus nompoliwa' hondo mompoto'i han aijo' mau mule' pa' hi he. Lantas koo-Nyo, “Bee'i mongkaan na anak aijo'.”
നിലവിൽ തിരഞ്ഞെടുത്തിരിക്കുന്നു:
MARKUS 5: LAILOE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
