MARKUS 13
13
I Yesus nonsisik Laigan nu Tumpu mohobo'mo
(Mat. 24:1-2, Luk. 21:5-6)
1Salatan i Yesus nompala'i Laigan nu Tumpu, samian na anu saja' mombatuki Ia notatae, “Tuumangku Gulu', soba toa na bangunan haha aijo'. Palahatikan na batu haha aijo'. Palias hondo na ko ima'nyo!”
2Tinaaman i Yesus, “Temisa' beleyum nontoamo bangunan anu daka' haha aijo'? Madi' ko sa'angu' pe'e na batu i bangunan haha aijo' na tasusun i tampatnyo. Iwi-iwi' o hobo'akon.”
Kasusa'an ka' ponsakisa'an
(Mat. 24:3-14, Luk. 21:7-19)
3Lapas aitu i Yesus namba i Bungkut nu Zaitun, ka' sinumuhang i tampat anu mompaha ahop tiba Laigan nu Tumpu. Lantas i Petrus, i Yakobus, i Yohanes, ka' i Andreas tinoka hi Ia da basisik tiba Ia ola posi aha. 4“Tuuma, soba kita Tuuma poto'i mae hi kami,” koonyo nu aha hi Ia, “hipian na iwi-iwi' aijo' jadimo? Ka' tanda-tanda apaa na anu mompotingaan saba' tempo'nyo tokamo?”
5“Obala'ingati”, tinaaman i Yesus, “boli sampe komiu nu akali. 6Da'isan na mian anu tokaje mae mompake sanggong-Ku ka' notatae, ‘Akumo aiya na Ia!’ lantas mongakali da'isan na mian. 7De komiu mohongo lontup nu pahampatean ka' lele mahampate, boli mabuhuk. Han haha aijo' tionyo jadimo, panyo aijo' misa' alati'nyo au'aitu tempo'nyomo na kiamat. 8Bansa sa'angu' mahampate mongewa bansa sangga'at. Negara sa'angu' mahampate tiba negara sangga'at. Iyayamae timbali na luulu' ka' balaa' nu kapo'ohopan. Iwi-iwi' aijo' sala'je tampu'unannyo, sumo masakit anu o'oa'i nu samian na boune anu kahanda'mo monganak.
9 #
Mat. 10:17-20, Luk. 12:11-12 Komiu tionyo mombala'ingati, kalana komiu o hakop ka' o hela' mokiijo' hi anu momputusi hukuman. Komiu o boboti i to lai-laigan pogalejaan. Komiu oboa mangadap hi anu mongkuasai ka' hi to tomu-tomundo', kalana komiu anu saja' mombatuki Aku. Ka' aijo'mo na kasampatan hi komiu mombee'i katalangan mongkona Aku hi aha. 10Lele Ma'ima' lengkat mae hi Tumpu aijo' tionyo opolele pe'e hi bansa-bansa. 11Ka' de komiu o hakop ka' oboa mokiijo' i pomputusian hukuman, boli bata-bata mongkona apaa na anu tionyo otaloakon miu. De tokamo na tempo'nyo motatae, taloakonmo apaa na anu pinoto'i hi komiu i tempo'nyo aijo' kalana potatae anu otaloakon miu, aijo' misa' posi potataeum, panyo toka lengkat mae i Roh nu Tumpu. 12Mian mongkabisa'i posi utusnyo da opatei. Aijo' suele timbali hi tuuma tiba anaknyo. To anak-anak mongewa tina tuumanyo, ka' mombee' aha da opatei. 13#Mat. 10:22 Komiu nuka'ideki nu mian iwi-iwi', kalana komiu anu saja' mombatuki Aku. Panyo mian anu balatahan toka i mihinyo, oposalamat.”
Ka'idekan anu monsilakai
(Mat. 24:15-28, Luk. 21:20-24)
14 #
Dan. 9:27, 11:31, 12:11 “Komiu montoaje' ‘Ka'idekan anu Monsilakai’, tuminjo i tampat anu opoliwa' hi ia. (Pompotuka' hi anu mombasa': Palahatikan apaa na alati'nyo!) Tempo'nyo aitu mian anu jojoong i Yudea, tionyo malai mamba i i bungkutnyo. 15#Luk. 17:31 Mian anu aita' i atop nu laigan, boli mintau' ka' minsoop i uno nu laigan mongala apa-apaa. 16Mian anu kiijo'mae i ale', boli minsusule' mongala jubahnyo. 17Palias na ko ideknyo sinaa tempo' aitu hi to boboune anu poboa ka' tina anu daagi' momposusu anaknyo. 18Balado'a da han haha aijo' boli timbali i tempo' nu ujan. 19#Dan. 12:1, Why. 7:14 I sinaa ma'idek tempo' aitu daagi' ko kasusa'an anu ma'isa toho' tinimbali, salatanmo pe'e Tumpu nompotimbali dunia sampe tempo' u'uka, ka' madi'mo daagi' po'ule' timbali. 20De Tumpu madi' mongkodo'i tempo' aitu, saba' madi' ko samian pe'e na anu salamat. Panyo kalana mian-Nyo anu palesayamo, Tumpu nomongkodo'imo tempo' aijo'.
21Tempo'nyo aitu de toto samian motatae hi komiu, ‘Toa, Tomundo' anu Momposalamat aijo' daagi' i aiya!’ kabai ‘Toa, Ia daagi' i kiijo'!’ – boli palesaya hi mian aijo'. 22Kalana anu momposalamat bale-baleko' ka' to nabi-nabi baleko' tokamo saidi' mae. Aha mombau palabuatan-palabuatan anu talalo hondo daka', ka' hahan anu okabangangi bau pongakali de timbali, mian nu Tumpu suele. 23Jadi, obala'ingati! Iwi-iwi' aijo' noko Poto'ingkumo hi beleyum ma'isa pe'e han aijo' timbali.”
Katokaan Anak nu Mian
(Mat. 24:29-31, Luk. 21:25-28)
24 #
Yes. 13:10, Yeh. 32:7, Yl. 2:10,31, 3:15, Why. 6:12 “Salatan tempo'mo nu kasusa'an aijo', batu nu sinaa timbalimo pikat, ka' bitu'on madi'mo daagi' minsahaya. 25#Yes. 34:4, Yl. 2:10, Why. 6:13 To manda-mandala' manabu'mo lengkat i langit, ka' anu mongkuasai aita' i langa timbalimo kalangkabut. 26#Dan. 7:13, Why. 1:7 Tempo'nyo aijo' Anak nu Mian otoantoje na toka i uno nu sehu' tiba kuasanyo anu daka' ka' kamulia'annyo. 27Ia monsaije to mala-malaikat molimu' mian anu pinile'an-Nyomo lengkat i opat na pasu'nyo nu dunia aiya, lengkat i puus nu dunia toka-toka i puus nu langit.”
Pangajalan mongkona kau' ara
(Mat. 24:32-35, Luk. 21:29-33)
28“Alamo na pangajalan mongkona kau' ara. De to sumpe-sumpenyo mobilu'mo ka' monguha', ka' montampu'unimo minsumpe, komiu monsumbu'mo saba' tempo' nu posinaa ohanimo. 29Sumo aitumo de komiu montoa han haha aijo' timbalimo, osumbu'mo miu saba' tempo'nyo ohanimo hondo. 30Osumbu'mo! Iwi-iwi' na kajadian aiya saidi' mae timbali, ma'isa pe'e to mia-mian anu tumuu' tempo' u'uka aiya silaka iwi-iwi'. 31Langit ka' dunia lanyap, panyo potataeng-Ku tataap sidu-sidutu'.”
Madi' ko samian pe'e na monsumbu' sinaa ka' jamnyo
(Mat. 24:36-44)
32 #
Mat. 24:36
“Maumo sumo aitu, madi' ko samian pe'e na monsumbu' hipian na sinaanyo kabai hipian na jamnyo. To mala-malaikat i suluga' madi', ka' Anak pe'e madi' monsumbu', ola ahi' Tuuma na monsumbu'. 33Jadi komiu tionyo balajaga-jaga ka' obala'ingati kalana komiu madi' monsumbu' hipian na tempo'nyo. 34#Luk. 12:36-38 Ka'ada'annyo sumomo anu mompala'i laigannyo, lantas mamba i tampat anu majo'on. Ia nonsai to posa-posaihonnyo montamongi laigannyo, ka' nombee'imo palentah hi aha toto samian. Hi aha anu montamongi pontumban, ia nompoto'i da balajaga ma'i-ma'ima'. 35Kalana aijo' komiu tionyo balajaga-jaga, kalana komiu madi' monsumbu' hipian nu tumpu nu laigan aijo' po'ule' mae minsusule' – ugaat ohanimo malom, tonga' pahu, ugaat daagi' subuh, kabai ugaat bete'mo na sinaa. 36De ia toka madi' osumbu-sumbu', boli sampe ia montokai mae komiu hau-haunyo hoyot. 37Apaa na anu Ku taloakon aiya hi komiu, Ku taloakon suele hi iwi-iwi' na mian: balajaga-jagamo!”
നിലവിൽ തിരഞ്ഞെടുത്തിരിക്കുന്നു:
MARKUS 13: LAILOE
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
