PAMUNGKAAN 9
9
Parjanjian ni Debata dohot si Noak
1Dipasupasu Debata ma si Noak dohot angka dakdanaknia i jana didok Ia ma, “Maranak marpahompu ma hamu, anso diingani pomparanmunu tano on sude. 2Mabiar ma mida hamu sandok binatang, unggas dohot ihan sude. Di toru ni kuasomunu ma i sude. 3Jana saonnari tola ma panganonmunu i sude tamba ni angka simarata; Hupasahat ma i sude gabe sipanganonmunu. 4Hum on ma na so tola panganonmunu, i ma juhut na laing marmudar; harana di mudar i do hosa. 5Muda adong sanga ise na mambuat hosa ni jolma, uhumon do i. MatehononKu do sandok binatang na mambuat hosa ni jolma. 6Songon Debata do jolma i ditompa, jadi hara ni i sanga ise na mambuat hosa ni jolma, bunuon ni jolma muse ma ia.
7Olo tutu, angkon maranak marpahompu ma hamu bahat-bahat, anso diingani pomparanmu tano on sude.”
8Didok Debata ma tu si Noak dohot angka anaknia, 9“Saonnari baenonKu ma parjanjian dohot hamu bope dohot pomparanmunu, 10dohot tu sude na mangolu, i ma angka unggas sudena, binatang, pendekna tu sude na ruar sian kapal i rap dohot hamu. 11Di na Hudok on ma Hubaen parjanjian dohot hamu: Marjanji ma Au, na so bunuon ni aek na oto be sandok na mangolu. Sada aek na oto pe nada adong be manyegohon tano on. 12Songon tanda ni parjanjian, salolot ni lolotna na Hubaen dohot hamu bope dohot angka na mangolu, 13gabe Hubaen ma di ombun i halibutongan. I ma tanda ni janjingKu dohot portibi on. 14Ganop Hututupi langit dohot ombun i, gabe tarida ma halibutongan i, 15ingotonKu ma janjingKu na tu hamu dohot tu sandok binatang, i ma na so bunuon ni aek na oto be sandok na mangolu. 16Sanga andigan tarida halibutongan di ombun i, idaonKu ma i jana ingotonKu ma parjanjianKu na hot i, antara Au dohot sandok na mangolu di tano on. 17I ma tanda ni janjingKu na Hulehen tu sandok na mangolu di tano on.”
Si Noak dohot angka dakdanaknia
18Anggo dakdanak ni si Noak na ruar sian kapal i, i ma si Sem, si Ham, si Jafet. (Si Ham i ma ama ni si Kanaan.) 19Anak ni si Noak na tolu halak on ma ompu ni sude jolma na satano on.
20Partani do anggo si Noak. Ia ma na parjolo mambaen kobun anggur. 21Jadi dung diinum ia anggurnia i, gabe mabuk ma ia. Ditalduskon ia ma sandok pakeannia i, modom ma ia marsaemara di bagasan undung-undungnia i. 22Di na ro si Ham amang ni si Kanaan i, diida ia ma amangnia i marsaemara, jadi ruar ma ia paboahon tu kahangginia na dua i. 23Dung i ro ma si Sem dohot si Jafet maroban sada abit, dipahirbang ma i di pudi ni halahi, jana ditiop ma i di abara ni halahi. Dung i mardalan pudi ma halahi masuk tu undung-undung i laho mangulosi amang ni halahi dohot abit i. Dipadao halahi ma panaili ni halahi anso ulang diida halahi amang ni halahi na marsaemara i. 24Dung tarsunggul si Noak sian na mabuk i, jana diboto ia ma sanga na bia pambaen ni anaknia siampulan i tusia, 25didok ia ma,
“Hona bura ma si Kanaan!
Gabe hatoban ni angka kahanggina ma ia.
26Pinuji ma Tuhan, Debata ni si Sem!
Gabe hatoban ni si Sem noma si Kanaan.
27Sai ditambai Debata ma pasupasu tu si Jafet.
Jana mur mabidang ma inganannia.
Sai rap sauduran ma pomparannia dohot pomparan ni si Sem.
Hatoban ni si Jafet noma si Kanaan.”
28Dung salpu aek na oto i, mangolu dope si Noak 350 taon nari. 29Marumur ma ia 950 taon di na marujung ngolunia.
നിലവിൽ തിരഞ്ഞെടുത്തിരിക്കുന്നു:
PAMUNGKAAN 9: LAIAKB
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Indonesian Bible Society
