PAMUNGKAAN 6
6
Hajahaton ni jolma
1Dung mur mamarpar jolma i di tano on jana sorang angka anak boru di halahi, 2diligi angka “anak ni Debata” ma bahaso na jeges do angka anak boru i. Gabe dibuat halahi ma anak boru por ni roha ni halahi be. 3Gabe didok Tuhan ma, “Nada Hupatola jolma i mangolu salolot-lolotna; angkon laing mate do halahi. Mamungka sian on, nada salpuan ni halahi be 120 taon.” 4Di hatiha i ma, dohot dung salpu ni i adong angka jolma raksasa di tano on; i ma pomparan ni angka dadaboru sian jolma dohot angka “anak ni Debata” i. Angka ulubalang na godang-godang do jolma raksasa i boti jolma na tarbarita di hatiha narobi.
5Di na nipamanat ni Tuhan, hape na sun do jahat ni jolma i sude di tano on, boti santak ni busuk ni angka pikiran ni halahi, 6manyosal ma Tuhan hara ni na dung nitompaNia halahi jana dibaen Ia maringanan di tano on. I noma hancit ni roha ni Tuhan, 7jabat didok Ia, “Huabiskon noma jolma na Hutompa on, dohot sude binatang bope angka unggas i, harana manyosal do Au manompa halahi.” 8Tapi anggo mida si Noak sonang do roha ni Tuhan.
Si Noak
9-10On ma barita ni si Noak. Adong do tolu anaknia, i ma si Sem, si Ham dohot si Jafet. Nada adong sala ni si Noak, jana hum sasada ia ma jolma na burju di hatihania i. Marpardonganan dohot Debata do ia di ngolunia. 11Hape anggo angka na asing i sude do jungkat di parnidaan ni Debata jana sanga di dia pe hakejamon noma na masa. 12Ditatap Debata ma sude tano on jana diida Ia do hajahatanna dibaen madung sude ngolu ni jolma i jahat.
13Jadi didok Debata ma tu si Noak, “Madung putus di rohangKu, paujungonKu ma sude ngolu ni jolma. MatehononKu noma halahi, angke madung gok na satano on hajahaton ni halahi. 14Baen ma sada kapal di ho sian hayu na pir; baen ma angka bilikna di bagasan jana lampis ma dohot ter sian bagasan dohot sian ruar. 15Angkon adong ma ginjangna 133 meter baenonmu, bidangna 22 meter jana gincatna 13 meter. 16Martarup ma baen kapal i jana holang-holang ni tarup i tu dindingna i baen ma 44 sentimeter. Tolu tirket ma baen kapal i jana baen ma sada pintu di tonga-tonga ni bujurna i. 17ParoonKu ma aek na oto di tano on laho mamatehon sanga aha na mangolu, sude na di tano on angkon mate, 18tapi baenonKu ma padan dohot ho. Masuk ma ho tu kapal i dohot dadaborumi bope angka dakdanakmu rap dohot dadaboru ni halahi be. 19-20Pamasuk ma tu kapal i sada jantan dohot boru-boru sian sude ragam ni binatang dohot sian ragam ni unggas anso ulang dohot halahi mate. 21Boan muse ma sude ragam ni panganon di ho dohot di angka binatang i.” 22Jadi dipatulus si Noak ma sandok na niparentahon ni Debata tusia.
നിലവിൽ തിരഞ്ഞെടുത്തിരിക്കുന്നു:
PAMUNGKAAN 6: LAIAKB
ഹൈലൈറ്റ് ചെയ്യുക
പങ്ക് വെക്കു
പകർത്തുക
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fml.png&w=128&q=75)
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Indonesian Bible Society