Kub 8
8
Ebyabaireho amaizi obu gakeehere omunsi
1Kandi Ruhanga yaijuka Noha n'ebisoro byona, n'ente zoona ezi akaba ainazo omu lyato. Ruhanga yaleeta omuyaga omunsi, amaizi gaakeeha, 2ensoro ez'okuzimu n'ebihengeezi by'iguru byaigara, enjura eyagwaga, yakya, 3amaizi gaagenda nigakeeha mpora mpora omunsi. Ebiro kikumi mu ataano obu byahoireho, gaayoma; 4kandi ha kiro ekya ikumi na musanju eky'okwezi oku okwa musanju, eryaato lyayemerra ha nsozi z'Ararati. 5Amaizi gaagenda nigakeeha mpora mpora okuhika ha kiro eky'okubanza eky'okwezi okwa ikumi, emitwe y'ensozi yazooka.
6Ebiro makumi ana obu byahoire, Noha yakingura idirisa ly'eryato eri akaba akozire, 7yatuma ekingoora; kyaikara nikigendagenda kunu na kuli okuhika amaizi obu gaayomiire kimu omunsi. 8Hanyuma, yatuma eriiba eri akaba ayinalyo omu lyato, ayetegereze amaizi obu garaaba gakeehere omunsi; 9baitu obu lyabuzirwe h'okwemerra, lyamugarukira, habwokuba amaizi gakaba gakyali omunsi yoona. Aho yata omukono aheeru, yalikwata, yalitaahya omu lyato nambere akaba ali. 10Yalindaho ebiro musanju ebindi, yayongera yatuma eriiba eri; 11eriiba lyagaruka nambere ali orwebagyo, linyina ibabi eryakaruga kunogwa; Noha nuho yamanyiire amaizi nkooku gakeehere omunsi. 12Yayongera yalindaho ebiro musanju ebindi, yatuma eriiba, leero obu litagaruke.
13Ha kiro eky'okubanza eky'okwezi okw'okubanza, Noha eki yahikiizeeho emyaka rukaaga na gumu ey'obukuru, amaizi gaayomera kimu omunsi; Noha yahigaho ekikaba kiswekere eryato, yalinguza aheeru, yarora ensi yoona eyomere 14Ha kiro ekya makumi abiri na musanju eky'okwezi okw'akabiri, ensi ekaba eyomere. 15Nubwo Ruhanga yagamba Noha ati: 16“Turuka omu lyato, iwe, mukazi wawe, batabani bawe na bakabaana bawe. 17Turukya buli kyomeezi kyona ekinyakwina omubiri eki oinakyo; ebinyonyi n'ebyekurra byona ebinyakwekururra ha itaka, bizaale, bikanye biijule omunsi.” 18Noha yaturuka na batabani be, na mukazi we, na bakabaana be. 19Ebisoro byona, ebyekurra byona n'ebinyonyi byona n'ebintu byona ebinyakuli omunsi, byaturuka omu lyato omu nganda zaabyo.
Noha naahongera Ruhanga, okusandaara kw'amaizi kuhoireho
20Nubwo Noha yayombekiire MUKAMA itambiro, yakwata ebisoro byona ebitarukuzirwa, n'ebinyonyi byona ebitarukuzirwa, yabihonga yabyokeza ha itambiro. 21Ruhanga obu yaboyiirwe ekisorrokoko ekirungi, yamalirra ati: “Tindyongera kukyeena ensi habw'omuntu, habwokuba okuruga omu buto bwe, atwalirizibwa obubi; kandi tindyongera kuhwerekereza ebihangwa byona ebyomeezi nkooku nakozire. 22Akasumi koona ensi obu eriba ekyaaroho, isiga n'igesa, obutiti n'obutagasi, ekyanda n'irumbi, nyamusana n'ekiro, tibirihwaho.”
നിലവിൽ തിരഞ്ഞെടുത്തിരിക്കുന്നു:
Kub 8: BRR2008
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Bible in Runyoro/Rutooro Interconfessional Translation © Bible Society of Uganda, 2008.
