ଲୁକ 24
24
ଜିସୁ ସାତିମାଣାନ୍ ମାରିଡ଼େସି ନିଙ୍ଗିଁତାନ୍
(ମାତିଉ ୨୮:୧-୧୦; ମାର୍କ ୧୬:୧-୮; ଜୋହନ ୨୦:୧-୧୦)
1ମାତର୍ ୱାରାଦି ଆଗିଡ଼ିରି ନାଣ୍ତିଙ୍ଗ୍ ଉଟ୍ଲା ନାଡ଼ାକାଦେ ୱାକ୍ ୱାନିକା ତିଆର୍କିତି ବାସ୍ନାଦିଜିନିସ୍କୁ ନି ନିୟୁ ଆସ୍ତେନୋ ମୁସ୍ତି ଲାକ୍ତୁ ସୋର୍ଏ । 2ମାରି, ୱାକ୍ ମୁସ୍ତିମାଣ୍କୁ କାଲୁ ପେଲେକିତି ମାର୍ଇକା ସୁଡ଼ୁତେ, 3ମାତର୍ ଲୋଇ ସୋରେଏନୋ ପ୍ରବୁ ଜିସୁଦି ମାଡ଼ା ପୟ୍ଉତେ । 4ମାରି, ୱାକ୍ ଆୟା ବିସୟତାନ୍ ବାୟାବେମ୍ରି ୱାଜା ଆତେ, ଇୟାୱାଜା ସମୟତୁ ସୁଡ଼ୁଦୁ, ଜାୟ୍ତି ୱାତି ଆରାତିକେଙ୍ଗ୍ ରିଏର୍ ମୁସ୍କୁପୁର୍ତି ଦୁତ୍କୁ ୱାନିକା ଲାକ୍ତୁ ୱାତେ; 5ଆବେଟ୍ ୱାକ୍ ତିଲାତେ ନୋ ତାଲା ଆଡ୍ଗି ପାଡ଼୍ତେ ମାର୍ଏ, ଦୁତ୍କୁ ୱାନିକାଙ୍ଗ୍ ଇର୍ଏ, “ସାତିୱାରି ମାଣାନ୍ ମିର୍ ଏନ୍ଧା ଜିତିୱାନିଙ୍ଗ୍ ପୋଇଜିନିଦେର୍ ? 6#ମାତିଉ ୧୬:୨୧; ୧୭:୨୨,୨୩; ୨୦:୧୮,୧୯; ମାର୍କ ୮:୩୧; ୯:୩୧; ୧୦:୩୩,୩୪; ଲୁକ ୯:୨୨; ୧୮:୩୧-୩୩.ୱାନ୍ ଇବେନୁ ସିଲେନ୍, ମାତର୍ ନିଙ୍ଗିଁତାମାନାନ୍ ? ୱାନ୍ ଗାଲିଲିଦୁ ମାର୍ଇୱାଲେ ମିଙ୍ଗିଁ ଇନିକା ଇର୍ଆମାର୍ଆନ୍ ଆକା ଏତ୍ କିଦୁ, 7ମନୁସ୍ୟପୁତ୍ରଦିଙ୍ଗ୍ ଜେ ପାପି ଲୋକା କିୟୁଦୁ ସର୍ପେ ଆଜି କ୍ରୁସକାଟ୍ତୁ ସାଦେଙ୍ଗ୍ ଆନାତ୍ ମାରି ମୁଣ୍ତ୍ରି ଦିନ୍ତିନାଣ୍ତିଙ୍ଗ୍ ସାତିମାଣ୍ନା ଡେସିଜିବନ୍ ଆଜି ନିଙ୍ଗିଁତା ମାନାନ୍ ।”
8ଆବେଟ୍ ୱାର୍ ୱାନି ବାକ୍ୟ ଏତ୍ କିତାର୍, 9ମାରି ମୁସ୍ତିମାଣ୍ନା ଡେସିସୋର୍ଏନୋ ଏଗାର୍ ଲୋକାଙ୍ଗ୍ ନି ଆଇ ୱିଜେରିଙ୍ଗ୍ ଇୟାୱିଜୁ ମାଟା ୱେର୍ତେ । 10ଇୟାକେଙ୍ଗ୍ ମଗ୍ଦଲିନି ମରିୟମ୍, ଜୋହାନା, ଜାକୁବରି ଆଇସି ମରିୟମ୍ ମାରି ୱେନିକା ୱାଲେ ମାନି ଆଇ ଆଇମେକ୍, ଇୟାକେଙ୍ଗ୍ ସିସୁରିଙ୍ଗ୍ ଇୟାୱିଜୁ ବିସୟ୍ ୱେର୍ତେ । 11ମାତର୍ ଇୟାୱିଜୁ ମାଟା ୱାରି ଲାକ୍ତୁ ବାୟାଦିମାଟା ୱାଜା ଆତାତ୍, ମାରି ୱାର୍ ୱାନିକାଙ୍ଗ୍ ବିସ୍ବାସ୍ କିଏତାର୍ । 12ମାତର୍ ପିତର୍ ନିଙ୍ଗିଁତାନ୍ନୋ ମୁସ୍ତି ଲାକ୍ତୁ ଉରୁକ୍ସିସର୍ହାନ୍, ମାରି ପାଡ଼ିଗିଜି ବେସ୍ତାନ୍ନୋ ୱାର୍ଇ ୱାତିଙ୍ଗ୍ୱିଜୁ ସୁଡ଼ୁତାନ୍, ମାରି ୱାନ୍ ଆୟା ଗଟ୍ନା ବିସୟ୍ତାନ୍ ତିଲାତାନ୍ନୋ ନିଜେଦି ଇଣ୍ତ୍ର ସୋର୍ହାନ୍ ।
ରିଏର୍ ସିସୁର୍ ଇମ୍ମାୟୁ ନାଟ ସୋଲ୍ସି ମାର୍ଆର୍
(ମାର୍କ ୧୬:୧୨-୧୩)
13ମାରି ସୁଡ଼ୁଦୁ, ଆୟାନାଣ୍ତିଙ୍ଗ୍ ୱାରି ମାଣ୍ନା ରିଏର୍ ଲୋକୁ ଜିରୁସାଲମତାନ୍ ପୁରା ଏଗାର୍ କିଲମିଟ୍ରଦାନ୍ ଆକ ଇମ୍ମାୟୁଦି ନାଟ ସୋଲ୍ସିମାର୍ଆର୍ 14ମାରି ଇୟାୱିଜୁ ଗଟ୍ନା ବିସୟ୍ତାନ୍ ନିଜେ ନିଜେଦି ମାନୁ ୱାର୍ଗିଜିସାଜି ମାର୍ହାର୍ । 15ୱାର୍ ୱାର୍ଗିଜିସାନିକା ମାରି ଲୋଇ ଲୋଇ ୱାର୍ଗିଜିସାନିୱାଲେ ଜିସୁ ୱାନ୍ଣ୍ତ୍ରେ ୱାରି ଲାକ୍ତୁ ୱାଜି ୱାରି ୱାଲେ ଦାପେ ଦାପେନେ ବୁଲାଦେଙ୍ଗ୍ ଆସ୍ତାନ୍ । 16ମାତର୍ ୱାରି କାଣୁକୁ ଇୟାୱାଜା ନାମିତେ ମାର୍ଏ, ୱାର୍ ୱାନିଙ୍ଗ୍ ଚିନିସ୍ କିଦେଙ୍ଗ୍ ଆଟ୍ଏତାର୍ । 17ୱାନ୍ ୱାରିଙ୍ଗ୍ ୱେନ୍ବାତାନ୍, “ମିର୍ ବୁଲାଜି ବୁଲାଜି ଏମେ ୱିଜୁ ବିସୟ୍ ନିଜେ ନିଜେଦି ମାନୁ ୱାର୍ଗିଜି ସାଜିନିଦେର୍, ଆୟାୱିଜୁ ଇନିକା ? ଆବେଟ୍ ୱାର୍ ଦୁଃକ୍ତୁ ମୋକ୍ମତାନ୍ ନିର୍ଆର୍ରୋ ତେବାତାର୍ ।” 18ମାରି, ୱାରି ମାଣ୍ନା କୟାପା ଦର୍ତିକାନ୍ ଅରେନ୍ ୱାନିଙ୍ଗ୍ ଇର୍ଆନ୍, “ଜିରୁସାଲମତି ଲୋକାରି ମାଣ୍କୁ ନିନ୍ ଇନିକା ଅରିନ୍ଦେ ଆୟାବାଡିଦି ଇୟା ଏସ ଦିନ୍ତି ଗଟ୍ନା ନେସେଇ ?”
19ଜିସୁ ୱାରିଙ୍ଗ୍ ୱେନ୍ବାତାନ୍, “ଇନି ଇନି ୱାଜାଦି ଗଟ୍ନା ?” ୱାର୍ ୱାନିଙ୍ଗ୍ ଇର୍ହାର୍, “ନାଜରିତିୟ ଜିସୁଦି ବିସୟ୍; ୱାନ୍ ମାପୁରୁ ମାରି ୱିଜୁ ଲୋକାଦି ଆଗିଡ଼ି ପାଣିଦୁ ମାରି ବାକ୍ୟଦୁ ଅରେନ୍ ବପୁଦି ବାବବାଦି ମାର୍ହାନ୍, 20ମାରି ମା ପେରି ଜାଜକର୍ ମାରି ପେରିକାର୍ ଏଣ୍ତେସ୍ ୱାନିଙ୍ଗ୍ ସାନି ଦଣ୍ତ୍ ବଗାଦେଙ୍ଗ୍ ସପ୍ରେ କିଜି ୱାନିଙ୍ଗ୍ କ୍ରୁସକାଟ୍ତୁ ସାପିସ୍ କିତାର୍, ଇୟାୱିଜୁ ବିସୟ୍ । 21ମାତର୍ ଏନ୍ ଇସ୍ରାଏଲତିଙ୍ଗ୍ ଡ଼ିସିସ୍ କିନାନ୍, ୱାନ୍ ଜେ ଇୟା ଲୋକୁ, ଆକା ମାପୁ ଆସା କିତା ମାର୍ଆପ୍; ଇରିଙ୍ଗ୍ ଇକା ଡ଼ିସ୍ତିଙ୍ଗ୍ ଇୟାୱିଜୁ ଗଟାତି ନେର୍ଆନ୍ ମୁନେନ୍ ଆତାତ୍ । 22ମାରି ବା, ମା ମାଣ୍କୁ ଏସ ଆଇମେକ୍ ମାଙ୍ଗିଁ କାବା କିତେମାନେ; ୱାକ୍ ଉଟ୍ଲା ନାଡ଼ାକାଦେ ମୁସ୍ତି ଲାକ୍ତୁ ସୋରେଏମାରେଏ, 23ମାରି ୱାନି ସାତି ମାଡ଼ା ପୋଇଉତେନୋ ୱାଜି ଇରେଏ, ୱାକ୍ ଦୁତ୍କା ସୁଡ଼ୁତେ ମାରେଏ ମାରି ଆୟା ଦୁତ୍କୁ ଇରେଏ ଜେ, ୱାନ୍ ଜିବନ୍ ମାନାନ୍ । 24ମାରି, ମା ସଙ୍ଗ୍ତି ଲୋକା ମାଣ୍କୁ ଏର୍ ଏର୍ ମୁସ୍ତି ଲାକ୍ତୁ ସୋଲ୍ସି, ଆଇମେକ୍ ଏଣ୍ତେସ୍ ୱେର୍ତେମାରେଏ, ଆୟାୱାଜା ସୁଡ଼ୁତାର୍, ମାତର୍ ୱାନିଙ୍ଗ୍ ସୁଡ଼ୁଏତାର୍ ।”
25ଆବେଟ୍ ଜିସୁ ୱାରିଙ୍ଗ୍ ଇର୍ଆନ୍, “ଏ କାବାଦିକାର୍, ବାବବାଦିରି ମାଣ୍କୁ ୱେର୍ତିମାର୍ଇ ୱିଜୁ ବାକ୍ୟଦିଙ୍ଗ୍ ବିସ୍ବାସ୍ କିଦେଙ୍ଗ୍ ଦିରେ ବୁଜାନିଲୋକ୍, 26ଇୟାୱିଜୁ ଦୁଃକ୍ କାସ୍ଟୁ ବୋଗାଜି ନିଜେଦି ମହିମାଦାନ୍ ସୋନିକା ଇନିକା କ୍ରିସ୍ତଦିଙ୍ଗ୍ ଦର୍କାର୍ ସିଲେତାତ୍ ?” 27ମାରି, ମୋସା ମାରି ୱିଜେରି ବାବବାଦିରିମାଣୁକୁ ଆରାମ୍ କିଜି ୱିଜୁ ଦାର୍ମୁସାସ୍ତ୍ରଦୁ ନିଜେଦି ବିସୟ୍ତି ମାଟା ୱାନ୍ ୱାରିଙ୍ଗ୍ ବୁଜାକିତାସିତାନ୍ ।
28ମାରି, ୱାର୍ ଏମେ ନାଟ ସୋଲ୍ସି ମାର୍ଆର୍, ଆବେଣି ନାର୍ ଲାକ୍ତୁ ଇତାର୍, ୱାନ୍ ମାରି ଆଗିଡ଼ି ସନିୱାଜା ଆତାନ୍ । 29ମାତର୍ ୱାର୍ ଜିସୁଙ୍ଗୁଁ ତେବାକିଜି ଇର୍ହାର୍, “ମା ୱାଲେ ମାନ୍ଆ, ମାତର୍ ୱେଡ଼ା ଆଜି ୱାଜିନାତ୍ ମାରି ୱେଡ଼ା ସୋଲ୍ସିନାତ୍ ।” ଆବେଟ୍ ୱାନ୍ ୱାରି ୱାଲେ ମାନ୍ଣ୍ତ୍ରେଙ୍ଗ୍ ଇଲୁ ଲୋଇ ସୋର୍ଆନ୍ । 30ମାରି, ୱାରି ୱାଲେ ଉଣିମାନୁ ବାସ୍ତି ୱେନ୍କା ଜିସୁ ରୁଟି ଅତାନ୍ନୋ ମାପୁରୁଙ୍ଗୁଁ ଆସିର୍ବାଦ୍ କିତାନ୍, ମାରି ଆୟା ରୁଟିଦିଙ୍ଗ୍ ରୁକ୍ସି ୱାରିଙ୍ଗ୍ ସିଦେଙ୍ଗ୍ ଆସ୍ତାନ୍ । 31ଆବେନୁ ୱାରି କାଣୁକୁ ସୁଡ଼ୁଦେଙ୍ଗ୍ ଆଟ୍ତାର୍ ମାରି ୱାର୍ ୱାନିଙ୍ଗ୍ ସିନିସ୍କିଦେଙ୍ଗ୍ ଆଟ୍ତାର୍; ମାରି, ୱାନ୍ ୱାରି ଆଗିଡ଼ିରାନ୍ ସାଣେକ୍ତିଙ୍ଗ୍ ଏମେନୋ ଆତାନ୍ । 32ଆବେଟ୍ ୱାର୍ ନିଜେ ନିଜେଦିମାନୁ ୱାର୍ଗିଜି ସାତାର୍, “ଏସ୍ତିୱାଲେ ସାରିଦୁ ୱାନ୍ ମା ୱାଲେ ୱାର୍ଗିଜିସାଜି ମାର୍ଆନ୍ ମାରି ମାଙ୍ଗିଁ ଦାର୍ମୁସାସ୍ତ୍ର ବୁଜାକିଜି ମାର୍ଆନ୍, ନାସ୍ତିୱାଲେ ଇନିକା ମା ଜିବନ୍ ସିସୁ କାସ୍ନି ୱାଜା ଆଏଜି ମାର୍ଆତ୍ ନୋ ?”
33ତାନେୱେନ୍କା ୱାର୍ ଆୟା ଦାପ୍ରେ ନିଙ୍ଗିଁତାର୍ ନୋ ଜିରୁସାଲମ୍ତୁ ଡ଼େସିସୋଲ୍ସି ଉଣ୍ତ୍ରେମାନୁ ଆତିମାନିକା ଏଗାର୍ ସିସୁରିଙ୍ଗ୍ ମାରି ୱାରି ସଙ୍ଗ୍ତିୱାରିଙ୍ଗ୍ ସୁଡ଼ୁତାର୍; 34ସିସୁର୍ ଇଜି, “ପ୍ରବୁ ସତ୍ନେ ନିଙ୍ଗିଁତାମାନାନ୍ ମାରି ସିମୋନ୍ତିଙ୍ଗ୍ ତରାତାମାନାନ୍ ।”
35ତାନେୱେନ୍କା ଇୟା ରିଏର୍ ଲୋକୁ ସାରିଦୁ ଆମାକା ୱିଜୁ ଗଟାତା ମାର୍ଆତ୍, ଆୟାୱିଜୁ ୱାରି ଆଗିଡ଼ି ୱେର୍ତାର୍, ୱାନ୍ ରୁଟି ରୁକ୍ନି ବେଡ଼ାଦୁ ୱାର୍ ଏଣ୍ତେସ୍ ୱାନିଙ୍ଗ୍ ସିନେକିଦେଙ୍ଗ୍ ଆଟ୍ତାର୍, ୱାର୍ ଆୟାୱିଜୁ ବିସୟ୍ ଇର୍ହାର୍ ।
ଜିସୁ ନିଜେଦି ସିସୁରିଙ୍ଗ୍ ତରାୟାଆତାନ୍
(ମାତିଉ ୨୮:୧୬-୨୦; ମାର୍କ ୧୬:୧୪-୧୮; ଜୋହନ ୨୦:୧୯-୨୩; ପ୍ରେରିତ ୧:୬-୮)
36ମାତର୍ ସିସୁର୍ ଆୟାୱିଜୁ ମାଟା ଇଜିମାର୍ଇ ବେଡ଼ାଦୁ ପ୍ରବୁ ଜିସୁ ନିଜେନେ ୱାରିମାନୁ ୱାତାନ୍, ମାରି ଇର୍ଆନ୍, “ମି ସାନ୍ତି ଆପିତ୍ ।”
37ମାତର୍ ସିସୁର୍ କାବାଜି ମାରି ତିଲାଜି ଉଣ୍ତ୍ରି ଦୁବା ସୁଡ଼ୁଜିନାପ୍ ଇଜି ଅଡ଼୍ବିତାର୍ । 38ଆବେଟ୍ ୱାନ୍ ୱାରିଙ୍ଗ୍ ଇର୍ଆନ୍, “ଇନ୍ନ୍ଧାନିଙ୍ଗ୍ ତିଲାଜିନିଦେର୍ ? ମାରି ମି ମୋନ୍ତୁ ଏନ୍ଧା ନାମ୍ଏଣ୍ଗା ଲୋଇ ଲୋଇ ୱାର୍ଗିଜିନିଦେର୍ ? 39ଇକାନ୍ ଜେ ନିଜେ ନାନ୍, ନା କିୟୁ ମାରି ପାଦାମ୍କୁ ସୁଡ଼ୁଦୁ, ନାଙ୍ଗିଁ ମୁଟ୍ସୋ ସୁଡ଼ୁଦୁ, ମାତର୍ ନାନ୍ ଏଣ୍ତେସ୍ ଜିବନ୍ମାନି ମେନ୍ଧଲ୍ ମାନିକା ସୁଡ଼ୁଜିନିଦେର୍, ଦୁବା ଆୟାୱାଜା ସିଲେ ।”
40ମାରି, ଜିସୁ ଇକା ଇନ୍ଞ୍ଜି ୱାରିଙ୍ଗ୍ ନିଜେଦି କିୟୁ ମାରି ପାଦାମ୍କୁ ତର୍ତାନ୍ । 41ଆଦେଙ୍ଗ୍ ୱାର୍ ବିସ୍ବାସ୍ କିଏତାର୍, ଆତିଙ୍ଗ୍ବା କାବାଆଜି ୱେଡ଼ିକା ଆତାର୍ ଆରିଙ୍ଗ୍ ଜିସୁ ୱାରିଙ୍ଗ୍ ୱେନ୍ବାତାନ୍, ଇବେନୁ ମି ଲାକ୍ତୁ ଇନିକା ଉଣିକା ମାନାତ୍ ? 42ଆବେଟ୍ ୱାର୍ ଜିସୁଙ୍ଗୁଁ କାଣ୍ତେକ୍ ୱାର୍ତି ମିନ୍କୁ ସିତାର୍ । 43ମାରି, ୱାନ୍ ଆୟା ମିନ୍କୁ ଅତାନ୍ନୋ ୱାରି ଆଗିଡ଼ି ତିର୍ଆନ୍ ।
44ଜିସୁ ୱାରିଙ୍ଗ୍ ଇର୍ଆନ୍, “ମୋସାଦି ନିୟମ୍ତୁ ମାରି ବାବବାଦିରି ମାରି ଗୀତସଂହିତା ଦାର୍ମୁସାସ୍ତ୍ରଦୁ ନା ବିସୟ୍ତାନ୍ ଆମାକା ଆମାକା ରାସାତାମାନାତ୍, ଆୟାୱିଜୁ ପୁରା ଆଦେଙ୍ଗ୍ ଦର୍କାର୍, ନାନ୍ ମି ୱାଲେ ମାର୍ଇ ୱାଲେ ମିଙ୍ଗିଁ ଇୟାୱିଜୁ ମାଟା ଇର୍ହାମାର୍ହା ।”
45ନାସ୍ତିୱାଲେ ୱାର୍ ଏଣ୍ତେସ୍ ଦାର୍ମୁସାସ୍ତ୍ରଦି ବିସୟ୍ ବୁଜାଦେଙ୍ଗ୍ ଆଟ୍ନାର୍, ଆୟାଉଣ୍ତିଙ୍ଗ୍ ୱାନ୍ ୱାରି ବୁଦିଦି ସେର୍ଲା ରେତାନ୍; 46ମାରି, ଜିସୁ ସିସୁରି ଲାକ୍ତୁ ୱାଜି ଇର୍ହାନ୍, “ଇୟାୱାଜା ରାସାତାମାନାତ୍, କ୍ରିସ୍ତ ଦୁଃକ୍ ପୟ୍ନାନ୍ ମାରି ମୁନେଟାନ୍ ସାତି ଲୋକାମାଣାନ୍ ଡ଼େସି ନିଙ୍ଗିଁନାନ୍, 47ମାରି ଜିରୁସାଲମ୍ତାନ୍ ଆରାମ୍ କିଜି ୱିଜୁ ଜାତି ଲାକ୍ତୁ ୱାନି ଦର୍ତାନ୍ ପାପ୍କେମା ଉଣ୍ତିଙ୍ଗ୍ ମନ୍ତିଙ୍ଗ୍ ଡ଼େପ୍ନି ବିସୟ୍ତାନ୍ ଲୋକୁ ୱିକ୍ନାର୍ । 48ମିର୍ ଇୟାୱିଜୁ ବିସୟତି ସାକି ଆନିଦେର୍ । 49#ପ୍ରେରିତ ୧:୪.ମାରି ସୁଡ଼ୁଦୁ, ନା ବୁବା ଆମାକା ପାର୍ମାଣ୍ କିତାମାନାନ୍, ଆକା ନାନ୍ ମି ଲାକ୍ତୁ ପକ୍ନା, ମାତର୍ ମୁସ୍କୁରାନ୍ ସାକ୍ତି ପୁଟ୍ଇ ସାନ୍ଦି ମିର୍ ଇୟା ଗାଡ଼୍ତୁ ମାନ୍ଡ୍ରୁ ।”
ଜିସୁ ମୁସ୍କୁପୁର୍ତୁ ସର୍ଆନ୍
(ମାର୍କ ୧୬:୧୯-୨୦; ପ୍ରେରିତ ୧:୯-୧୧)
50 #
ପ୍ରେରିତ ୧:୯-୧୧. ତାନିୱେନ୍କା ଜିସୁ ୱାରିଙ୍ଗ୍ ବେତନିୟାଦୁ ସନି ସାରି ସାନ୍ଦି ଅତାନ୍ ମାରି ନିଜେଦି କିୟୁ ପେର୍ଜି ୱାରିଙ୍ଗ୍ ଆସିର୍ବାଦ୍ କିତାନ୍ । 51ମାରି, ୱାରିଙ୍ଗ୍ ଆସିର୍ବାଦ୍ କିବୁ କିବୁ ୱାନ୍ ୱାରିମାଣାନ୍ ୱେର୍ଏ ଆଜି ମୁସ୍କୁପୁର୍ତୁ ସର୍ଆନ୍ । 52ମାରି, ୱାର୍ ୱାନିଙ୍ଗ୍ ମାଡ଼ିସ୍ କିଜି ନାଣ୍ତ ୱେଡ଼ିକାଦାନ୍ ଜିରୁସାଲାମ୍ତୁ ଡ଼େସିୱାତାର୍ । 53ମାରି ୱାର୍ ୱିଜୁଦିନ୍ ମନ୍ଦିର୍ତୁ ମାନ୍ଜି ମାପୁରୁଦି ଦନ୍ୟବାଦ୍ କିଦେଙ୍ଗ୍ ଆସ୍ତାର୍ ।
നിലവിൽ തിരഞ്ഞെടുത്തിരിക്കുന്നു:
ଲୁକ 24: NTKoo20
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020
