ପ୍ରେରିତ 10
10
ପିତର ନି କର୍ଣ୍ଣିଲିୟ
1କାଇସରିଆଦୁ ବାସାନି କର୍ଣ୍ଣିଲିୟ “ଇଟାଲିଦି ବାହିନି” ଦର୍ତି ରମିୟ ସୈନ୍ୟରି ସେନାପତି ମାର୍ହାନ୍ । 2ୱାନ୍ ଅରେନ୍ ଦାର୍ମୁ ଲୋକୁ ମାର୍ହାନ୍ । ୱାନ୍ ମାରି ୱାନି ଇଲୁଦି ୱିଜେରେ ମାପୁରୁଙ୍ଗୁଁ ପାର୍ତନା କିଜିମାର୍ହାର୍ । ୱାନ୍ କାକୁର୍ତି ଜିହୁଦି ଲୋକାଦି ନେଗି ଉଣ୍ତିଙ୍ଗ୍ ନାଣ୍ତ ପାଣି କିଜି ମାର୍ହାନ୍ ମାରି ଦିନାମି ମାପୁରୁମାନୁ ପାର୍ତାନା କିଜିମାର୍ହାନ୍ । 3ଅର୍ଲେନ୍ ୱେଡ଼ାରେନି ତିନ୍ ଗଣ୍ଟା ସମୟ୍ତୁ ୱାନ୍ ଉନ୍ଣ୍ତ୍ରି ଦର୍ସନତୁ ନେଗେନ୍ ସୁଡ଼ୁତାନ୍ ଜେ ମାପୁରୁଦି ଦୁତ୍ ୱାଜି ୱାନିଙ୍ଗ୍ କୁକ୍ସିନାନ୍, “କର୍ଣ୍ଣିଲିୟ ।”
4ୱାନ୍ ତିଲାଜି ଦୁତ୍ତି ତରିନ୍ ସୁଡ଼୍ଜି ଇର୍ହାନ୍, “ଏ ପ୍ରବୁ ଇନିକା ?”
ଦୁତ୍ ଇର୍ହାନ୍, “ମାପୁରୁ ନି ପାର୍ତାନା ନି ଦାନ୍ସିନିମାନୁ ୱେଡ଼ିକା ଆତାମାନାନ୍ ମାରି ତେନି ବାଦ୍ଲୁ ସିଦେଙ୍ଗ୍ ଇଜି ତିଆର୍ ମାନାନ୍ । 5ଇଲେଇ ସିମୋନ ପିତର ଦର୍ତି ଅରେନ୍ ଲୋକ୍ତିଙ୍ଗ୍ କୁକ୍ସ ତାତେଙ୍ଗ୍ ଇଜି ଜପାଦୁ ଲୋକାଙ୍ଗ୍ ପକ୍ଆ । 6ୱାନ୍ ସାମ୍ଦୁର୍ ପାଡ଼ି ବାସାଜିମାନି ସିମୋନ ଦର୍ତି ତଲ୍ପାଣିକିନିୱାନି ଇଲୁଦୁ ମାନାନ୍ ।” 7ଇକା ଇଜି ଦୁତ୍ ସର୍ହାନ୍ । କର୍ଣ୍ଣିଲିୟ ୱାନି ଇଲ୍ତି ରିଏର୍ ସାକର୍ ନି ସନ୍ୟ ପାଣିକିନିୱାରି ଲୋଇ ଅରେନ୍ ଦାର୍ମୁ ଲୋକାଙ୍ଗ୍ କୁକିସ୍ତାନ୍ । 8ୱାନ୍ ୱାରିଙ୍ଗ୍ ୱିଜୁ ଗଟଣା ୱେର୍ସି ଜପାଦୁ ପକ୍ତାନ୍ ।
9ମାରିନାଣ୍ତିଙ୍ଗ୍ ମାଦ୍ଲାମ୍ ୱେଡ଼ାଦୁ ୱାର୍ ଜପାଦି ଲାକ୍ତୁ ଆନିୱାଲେ, ପିତର ପାର୍ତନା କିଦେଙ୍ଗ୍ ଇଜି ସାତ୍ ମୁସ୍କୁ ସର୍ହାମାର୍ହାନ୍ । 10ୱାନ୍ ବାଙ୍ଗାଁ ସାଜି ଉଣ୍ତେଙ୍ଗ୍ ବଦା କିତାନ୍ ମାରି କାଦି ଆନି ସମୟ୍ତୁ ୱାନ୍ ଉଣ୍ତ୍ରି ଦର୍ସନ୍ ପୟ୍ତାନ୍ । 11ୱାନ୍ ସୁଡ଼ୁତାନ୍, ବାଦଡ଼୍ ରେଆତାମାନାତ୍ ମାରି ଉଣ୍ତ୍ରି ପେରି ସାଦର୍ ନାଲ୍ଗି କନାଦାନ୍ ଡ଼ଆଇ ଆଜି ଦୁନିଆଦି ମୁସ୍କୁ ଆର୍ଜି ୱାଜିନାତ୍ । 12ଆବେନୁ ଦୁନିଆଦି ବେସି ରକମ୍ତି ଜାତୁ, ଉଜ୍ନିକେଙ୍ଗ୍ ମାରି ବାଦଡ଼୍ତି ପଟିଙ୍ଗ୍ଁ ମାନେ । 13ମାରି ୱାନ୍ ଉଣ୍ତ୍ରି ବଲ୍ ୱେର୍ଆନ୍, “ପିତର ! ନିଙ୍ଗ୍ଁଆ, ଡାକ୍ସ ତିନ୍ଆ !”
14ମାତର୍ ପିତର ଇର୍ହାନ୍, “ସିଲେ ପ୍ରବୁ, ନାନ୍ ଆଟ୍ଏ ! ନାନ୍ ଏସାଙ୍ଗ୍ ଇନି ତାଗ୍ଇକା ନି ଅପବିତ୍ର ଜିନିସ୍ ତିନ୍ଏ ।”
15ମାରି ଉଣ୍ତ୍ରି ଦେବା ୱାନ୍ ୱେର୍ଆନ୍; “ମାପୁରୁ ଆମାକା ପବିତ୍ର କିତାମାନାନ୍, ନିନ୍ ତାନିଙ୍ଗ୍ ଅପବିତ୍ର ଅଡ଼୍ବିମା ।” 16ମୁଜା ଇୟାୱାଜା ଆନି ୱେନ୍କା, ସାଦର୍ତିଙ୍ଗ୍ ମୁସ୍କୁପୁର୍ତୁ ପେର୍ଜି ଅଆୟ୍ ଆତାତ୍ ।
17ପିତର ୱାନି ଦର୍ସନ୍ତି ଅର୍ତ ମାଟା ଅଡ଼୍ବିଜି କାବା ଆତାନ୍ । ଇୟା ୱେଡ଼ାଦୁ, କର୍ଣ୍ଣିଲିୟ ଏମେୱାରିଙ୍ଗ୍ ପକ୍ତାମାର୍ହାନ୍, ୱାର୍ ସିମୋନତି ଇଲୁଦିଙ୍ଗ୍ଁ ପୟ୍ଜି ଗେଟ୍ ଲାକ୍ତୁ ନିର୍ହା ମାର୍ହାର୍ । 18ୱାର୍ ୱେନ୍ବାତାର୍, “ସିମୋନ ପିତର ଦର୍ତିକାନ୍ ଇବେ ଅରେନ୍ କୁଡ଼ାଏନ୍ ମାନାନ୍ ନୋ ?” 19ପିତର ଆୟା ସାନ୍ଦି ଦର୍ସନ୍ତି ଅର୍ତ ବୁଜାଦେଙ୍ଗ୍ ଇଜି ସେସ୍ଟା କିଜିମାର୍ହାନ୍, ଆୟା ସମୟ୍ତୁ ଆତ୍ମା ଇର୍ହାତ୍, “ସୁଡ଼୍ଆ, ଇବେ ମୁଏର୍ ଲୋକୁ ନିଙ୍ଗିଁ ପୟ୍ଜିନାର୍ । 20ତିଆର୍ ଆଜି ଆଡ୍ଗି ସାଙ୍ଗ୍ଆ ମାରି ୱାରିୱାଲେ ସନ୍ଡ୍ରେଙ୍ଗ୍ଁ ଇଜି ଅଡ଼୍ବିଏଣ୍ଗା, ଇରିଙ୍ଗ୍ ନାନ୍ ୱାରିଙ୍ଗ୍ଁ ପକ୍ତାମାନା ।” 21ପିତର ଆଡ୍ଗି ସଲ୍ସି ଆୟା ଲୋକାଙ୍ଗ୍ ଇର୍ହାନ୍, “ମିର୍ ଏମେୱାନିଙ୍ଗ୍ ପୟ୍ଜିନିଦେର୍, ନାନ୍ ଆକାନ୍ । ମିର୍ ଏନ୍ଦା ୱାତିମାନିଦେର୍ ?”
22ୱାର୍ ଇର୍ହାର୍, “ସେନାପତି କର୍ଣ୍ଣିଲିୟା ମାଙ୍ଗିଁ ପକ୍ତାମାନାନ୍ । ୱାନ୍ ଅରେନ୍ ଦାର୍ମୁଦି ଲୋକୁ । ୱାନ୍ ମାପୁରୁଙ୍ଗ୍ଁ ଆରାଦନା କିନାନ୍ ମାରି ଜିହୁଦିର୍ ୱିଜେରେ ୱାନିଙ୍ଗ୍ ମାନାନାର୍ । ନିଙ୍ଗିଁ ୱାନି ଇନ୍ଡ୍ର କୁକ୍ସି ଅସିନି ସିକିୟା ୱେନ୍ଡ୍ରେଙ୍ଗ୍ ଇଜି ମାପୁରୁଦି ଅରେନ୍ ପବିତ୍ର ଦୁତ୍ ୱାନିଙ୍ଗ୍ ଆଦେସ୍ ସିତାମାନାନ୍ ।” 23ପିତର ୱାରିଙ୍ଗ୍ ଲୋଇ କୁକ୍ସି ଅସି ଆୟା ନାଡ଼ା ଆବେ ତେବାଦେଙ୍ଗ୍ ଇଜି ବାତିଙ୍ଗ୍ ମାଲିତାର୍ ।
ମାରିନାଣ୍ତିଙ୍ଗ୍ ୱାନ୍ ତିଆର୍ ଆଜି ୱାରିୱାଲେ ସର୍ହାନ୍ । ଜପାଦୁ ଏସ ବିସ୍ବାସି ତଡ଼ାନ୍କୁ ବା ୱାନିୱାଲେ ଅର୍ସେ ସର୍ହାର୍ । 24ମାରିନାଣ୍ତିଙ୍ଗ୍ ୱାର୍ ସିସେରିଆଦୁ ଇତାର୍ । ଆବେ କର୍ଣ୍ଣିଲିୟ ୱାନି ପାଡ଼୍କାଦି ସଙ୍ଗ୍ ନି ନିଜେଦି ଲୋକାୱାଲେ ପିତରତିଙ୍ଗ୍ କାପ୍କିଜି ମାର୍ହାର୍ । 25ପିତର ଲୋଇ ସନିୱାଲେ କର୍ଣ୍ଣିଲିୟ ୱାନିଙ୍ଗ୍ ତରାଜି ୱାନି ପାଦାମ୍ ଆଡ୍ଗି ଆର୍ଜି ମାଡ଼ିସ୍ କିତାନ୍ । 26ମାତର୍ ପିତର ୱାନିଙ୍ଗ୍ ନିକ୍ସି ଇର୍ହାନ୍, “ନିଙ୍ଗ୍ଁଆ, ନାନ୍ ନିଜେ ଅରେନ୍ ଲୋକୁ ।” 27ପିତର କର୍ଣ୍ଣିଲିୟ ୱାଲେ ୱାର୍ଗିବୁ ୱାର୍ଗିବୁ ଇଲୁ ଲୋଇ ଡ଼ୁଗିତାର୍ ମାରି ଆବେ ନାଣ୍ତ ଲୋକାଙ୍ଗ୍ ଉଣ୍ତାନି ମାନିକା ସୁଡ଼ୁତାନ୍ । 28ୱାନ୍ ୱାରିଙ୍ଗ୍ ଇର୍ହାନ୍, “ମିର୍ ନେଗେନ୍ କିଜି ନେସ୍ନିଦେର୍, ଅରେନ୍ ଜିହୁଦି ୱାନି ଦାର୍ମୁ ବିସ୍ବାସ୍ ଇସାବ୍ତାନ୍ ଅଣଜିହୁଦି ଲୋକା ୱାଲେ ମିସାବିଡ଼ା କିଦେଙ୍ଗ୍ ଆଟ୍ଏନ୍ । ମାତର୍ ମାପୁରୁ ନାଙ୍ଗିଁ ୱେର୍ତାମାନାନ୍, ଏଙ୍ଗ୍ଁ ତାଗ୍ଇକା ନି ଅପବିତ୍ର ଅଡ଼ବିନିକା ନେଗେତ୍ ସିଲେ । 29ଆଦେଙ୍ଗ୍ ମିର୍ ଏସ୍ତିୱାଲେ ନାଙ୍ଗିଁ କୁକିସ୍କିତି, ନାନ୍ ଇନିକା ଅଡ଼୍ବିଏଣ୍ତା ୱାତା । ନାନ୍ ନେସ୍ତେଙ୍ଗ୍ ବଦା କିନା, ନିନ୍ ଏନ୍ଦା ନାଙ୍ଗିଁ କୁକିସ୍କିତି ?”
30କର୍ଣ୍ଣିଲିୟ ଇର୍ହାନ୍, “ମୁନ୍ଡ୍ରିଦିନ୍ ଆଗ୍ଡ଼ି ପୁରା ଇୟା ବେଡ଼ାଦୁ ୱେଡ଼ାରେନି ମୁନ୍ଡ୍ରି ଗଣ୍ଟା ସମୟତୁ ନାନ୍ ନା ଇଲୁଦୁ ପାର୍ତନା କିଜିମାର୍ହା । ଆୟାଦାପ୍ରେ ଅଡ଼ିନିଆଙ୍ଗିଁ ଆରାତି ଅରେନ୍ ଲୋକୁ ନା ଆଗ୍ଡ଼ି ନିଲ୍ସି ଇର୍ହାନ୍; 31କର୍ଣ୍ଣିଲିୟ ! ମାପୁରୁ ନି ପାର୍ତାନା ୱେର୍ହାମାନାନ୍ ମାରି ନିନ୍ କାକୁର୍ତି ଲୋକାଙ୍ଗ୍ ସେବା କିନିକା ସୁଡ଼ୁତା ମାନାନ୍ । 32ସିମୋନ ପିତର ଦର୍ତି ଅରେନ୍ ଲୋକ୍ତିଙ୍ଗ୍ ତାତେଙ୍ଗ୍ ଇଜି ଜପାଦୁ ଲୋକାଙ୍ଗ୍ ପକ୍ଆ । ୱାନ୍ ସାମ୍ଦୁର୍ ପାଡ଼ି ତେବାତିମାନି ତଲ୍ପାଣି କିନି ସିମୋନ ଇଲୁଦୁ କୁଡ଼ାଏନ୍ ଆତାମାନାନ୍ । 33ଆଦେଙ୍ଗ୍ ବେଗି ବେଗି ନାନ୍ ନିଙ୍ଗିଁ କୁକିସ୍କିତା ମାରି ନିନ୍ ଦୟାକିଜି ୱାତିମାନି । ପ୍ରବୁ ନିଙ୍ଗିଁ ଆମାକା କିଦେଙ୍ଗ୍ ଇଜି ସିକିୟା ସିତାମାନାନ୍, ଆକା ୱେନ୍ଡ୍ରେଙ୍ଗ୍ ମାପ୍ ୱିଜେରେ ଇଲେଇ ମାପୁରୁଦି ଆଗ୍ଡ଼ି ଉଣ୍ତାତାମାନାପ୍ ।”
ପିତରତି ସିକିୟା
34ପିତର ସିକିୟା ସିଦେଙ୍ଗ୍ ଆରାମ୍ କିଜି ଇର୍ହାନ୍, “ଇଲେଇ ନାନ୍ ବୁଜାଜିନା ଜେ ସତ୍ ତାନ୍ ମାପୁରୁ ୱିଜେରିଙ୍ଗ୍ ସାମାନ୍ତାନ୍ ସୁଣାନ୍ । 35ଆମା ଇନି ଜାତିଦି ଆମା ଏମେ ଲୋକୁ ପ୍ରବୁଦି ପାର୍ତାନା କିତିଙ୍ଗ୍ଁ ମାରି ୱାନି ଆଗ୍ଡ଼ି ସତ୍ପାଣି କିତିଙ୍ଗ୍ଁ, ପ୍ରବୁ ୱାନିଙ୍ଗ୍ ଆସ୍ନାନ୍ । 36ମିର୍ ନେସ୍ତିମାନିଦେର୍ ଜେ ମାପୁରୁ ଇସ୍ରାଏଲ୍ ଲୋକା ମାନୁ ଏମେ ବାକ୍ୟ ପକ୍ତାମାର୍ହାନ୍, ଆକାନେ ଜିସୁଦି ମାଣାନ୍ ୱେରାୟ୍ଆତିମାନି ସାନ୍ତିଦି ବାକ୍ୟ, ଇୟା ଜିସୁ କ୍ରିସ୍ତ ୱିଜେରି ପ୍ରବୁ । 37ଜୋହନ ମନ୍ ଡ଼େପ୍ନି ମାରି ଡୁବନ୍ ସିନି କାବୁର୍ ୱେର୍ତି ୱେନ୍କା, ଗାଲିଲିଦାନ୍ ଆରାମ୍ କିଜି ୱିଜୁ ଇସ୍ରାଏଲ୍ ଦେସ୍ତୁ ଆମା ୱିଜୁ ଗଟନେଙ୍ଗ୍ଁ ଗଟାତାସର୍ହାତ୍, ଆକା ମିର୍ ନେସ୍ନିଦେର୍ । 38ମିର୍ ନାଜରିତଦି ଜିସୁଦି ବିସୟ୍ତାନ୍ ମାରି ମାପୁରୁ ଏଣ୍ତେସ୍ ୱାନି ମୁସ୍କୁ ପବିତ୍ର ଆତ୍ମା ନି ସାକ୍ତି ସିତାମାର୍ହାନ୍, ଆକା ନେସ୍ନିଦେର୍ । ୱାନ୍ ୱିଜୁ ତରିନ୍ ସଲ୍ସି କାବାଆନି ପାଣି କିତାନ୍ । ସୟତାନ୍ତି ଅଦିକାର୍ତାନ୍ ମାନି ଲୋକାଙ୍ଗ୍ଗଁ ନେଗେନ୍ କିତାନ୍, ଇରିଙ୍ଗ୍ ମାପୁରୁ ୱାନି ୱାଲେ ମାର୍ହାନ୍ । 39ଜିହୁଦିରି ଦେସ୍ତୁ ମାରି ଜିରୁସାଲାମ୍ତୁ ୱାନ୍ ଏମେ ୱିଜୁ ପାଣି କିତାନ୍, ମାପ୍ ଆୟାୱିଜୁଦି ସାକି । ତାନେୱେନ୍କା ୱାନିଙ୍ଗ୍ ୱାର୍ କ୍ରୁସଦୁ ଏକିସ୍କିଜି ଡାକ୍ତାର୍ । 40ମାତର୍ ମାପୁରୁ ମୁନେନ୍ ଲୋଇ ୱାନିଙ୍ଗ୍ ସାତିମାଣାନ୍ ପୁନିଜିବନ୍ ସିଜି ନିକ୍ତାନ୍ । 41ୱାନ୍ ୱିଜେରି ଲାକ୍ତୁ ସିଲେ, ମାତର୍ ମାପୁରୁଦି ବାସେଆତିମାନି ସାକି, ଅର୍ତାତ୍ ମା ଲାକ୍ତୁ ତରାୟ୍ଆତାନ୍ । ମାପୁରୁ ୱାନିଙ୍ଗ୍ ସାତି ମାଣାନ୍ ନିକ୍ତି ୱେନ୍କା ମାପ୍ ୱାନି ୱାଲେ ଉଟାପ୍ ତିର୍ଆପ୍ । 42ଲୋକାମାନୁ ନେଗି କାବୁର୍ ପ୍ରଚାର୍ କିଦେଙ୍ଗ୍ ଇଜି ନି ମାପୁରୁ ଜେ ୱାନିଙ୍ଗ୍ ଜିନିମାନି ନି ସାତିୱାରି ବିଚାର୍କିନି ୱାଜା ନିଲ୍ପତାମାନାନ୍, ଇୟା ମାଟାଦି ସାକି ସିଦେଙ୍ଗ୍ ଇଜି ୱାନ୍ ମାଙ୍ଗିଁ ଆଦେସ୍ ସିତାମାନାନ୍ । 43ୱିଜେରେ ବାବବାଦିର୍ ୱାନି ବିସୟ୍ତାନ୍ ଇୟା ସାକି ଇର୍ହାମାର୍ହାର୍, ଏନ୍ ୱାନିମାନୁ ବିସ୍ବାସ୍ କିନାନ୍, ୱାନି ଦର୍ତି ସାକ୍ତିଦୁ ୱାନି ପାପ୍ କେମା ଆନାତ୍ ।”
ଅଣଜିହୁଦିର୍ ପବିତ୍ର ଆତ୍ମା ପୟ୍ନିକା
44ପିତର ସିକିୟା ସିନିୱାଲେ ଏମେକାର୍ ୱାନି ସିକିୟା ୱେନ୍ଜି ମାର୍ହାର୍, ଆୟା ୱିଜେରି ମୁସ୍କୁ ପବିତ୍ର ଆତ୍ମା ରେତାତାତ୍ । 45ଅଣଜିହୁଦିରି ମୁସ୍କୁ ବା ମାପୁରୁ ୱାନି ପବିତ୍ର ଆତ୍ମାଦାନ୍ ସିନିମାନିକା ସୁଡ଼୍ଜି ପିତରତି ୱାଲେ ୱାତିମାର୍ଇ ଜପାଦି ଜିହୁଦି ବିସ୍ବାସ୍ସିର୍ କାବାଆତାର୍ । 46ଇରିଙ୍ଗ୍ ଜିହୁଦି ବିସ୍ବାସିର୍ ୱାରିଙ୍ଗ୍ ମାପୁରୁଦି ଦନ୍ୟବାଦ୍ କିଜିମାନିକା ନି ଆଇ ବାସାଦାନ୍ ୱାର୍ଗିଜିମାନିକା ୱେର୍ଆର୍ । ପିତର ଇର୍ହାନ୍, 47“ମା ୱାଜା ଇୟା ଲୋକୁ ବା ପବିତ୍ର ଆତ୍ମା ପୟ୍ତାମାନାର୍ । ଡୁବନ୍ ଅତେଙ୍ଗ୍ ଇଜି ଏନ୍ ଇନିକା ୱାରିଙ୍ଗ୍ ବାଦା ସିଦେଙ୍ଗ୍ ଆଟ୍ନାନ୍ ?” 48ଆଦେଙ୍ଗ୍ ୱାନ୍ ୱାରିଙ୍ଗ୍ ଜିସୁ କ୍ରିସ୍ତଦି ଦର୍ତାନ୍ ଡୁବନ୍ ଅତେଙ୍ଗ୍ ଇଜି ଆଦେସ୍ ସିତାନ୍ । ତାନିୱେନ୍କା ୱାର୍ ୱାନିଙ୍ଗ୍ ମାରି ଏସ ଦିନ୍ ୱାରି ୱାଲେ ତେବାଦେଙ୍ଗ୍ ବାତିଙ୍ଗ୍ ମାଲିତାର୍ ।
നിലവിൽ തിരഞ്ഞെടുത്തിരിക്കുന്നു:
ପ୍ରେରିତ 10: NTKoo20
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020
