Matius 9
9
Si tou lailai liné'os ni Yesus
(Mrk. 2:1-12; Luk. 5:17-26)
1Kumawusa niitu, si Yesus karia né pahtuzu'en-Na sumakéma witu u londéi a lumewet u louz. Tumondong niitu, a Sia ikaayola witi wanua tua'na pahwéha-wéhan-Na.#9:1 Si Yesus é niméramé im witi Nazaret a mahwiti-witi Kapernaum witi tembir u louz Galilea. 2Sé woopira tou nimahwalimé wia si Yesus si tou lailai si méikolo' witu um wuwuléngan. I si Yesus nimilek um pa'émanen néra wia ni Sia, ang kuan-Na wia si tou lailai itii, “É oki'-Ku,#9:2 Witu nunuwu'en Yunani ‘teknon’ ung kalakoana é ‘oki'-Ku’, si tou lailai itii én tuama, taan zéi'kan kata'uan sa sia tu'amo kaapa koki'pé'. enté'ela un atému! A singkéla'mu é niampungano.”
3Tumalingamé niitu, witu un até né woopira tou tulap un Torat, ni séra é mahkua, “Si Tou kenu é mahséro'mo wia si Opo Empung.”
4Taan kata'uan ni Yesus am pegena-genangen néra, ang kuan-Na, “Kaa kamu megena-genang a léwo'an witu un até niou? 5Wisa u meripu' umané, kumuama, ‘A singkéla'mu é niampungano,’ kaapa ing kumuama, ‘Tumoozomé wo lumampangoma?’ 6Taan wo kata'uan nioula sa im wia ung kaayahan kenu si Oki' ni Tou ém wéwéhan kawasa i méhé un ampungan wana a singkéla' né tou.” Ang kuan ni Yesus wia si tou lailai itii, “Rumendaiomé, éndonoma um winuléngané ni ko wo mawurimoma witi walému!” 7A si tou lailai itii rumendaié, a lumampang mawurima witi waléna. 8I nimilekla niitu, sé tou lakez itii maindé', a mahlooz si Opo Empung si niméhémomé ung kawasa tanu niitu wia sé tou.
Si Yesus timawah si Matius i maéndo pahtuzu'en-Na
(Mrk. 2:13-17; Luk. 5:27-32)
9I si Yesus nimondolomé im witu, ileken-Nama si menanagi am pajak makangaran Matius makarumez witu um pahpaayanganna. Ang kuan ni Yesus wia ni sia, “Kumiitomé ni Aku.” A rumendaié si Matius ang kumiit si Yesus.
10Tumondong niitu, i si Yesus karegas mahkan witi walé ni Matius, a méyé sé menanagi am pajak wo sé tou mahsingkéla' ang kuman mahwali-wali karia ni Yesus wo sé pahtuzu'en-Na.
11 #
Luk. 15:1, 2 I sé sana réwok tou Farisi nimilekla niitu, ang kuan néra wia sé pahtuzu'en ni Yesus, “Kaa si Méster niou é mahkan karia né menanagi am pajak wo né tou mahsingkéla'?”
12U méikua nérama én tinalingama ni Yesus, ang kuan-Na wia ni séra, “Zéi'kan sé tou zéi'kan saki sé memandung si dokter, taan sé tou saki. 13#Hos. 6:6; Mat. 12:7 Niitumo, mangémo wo pahtata'ula ung kalakoan u Nuwu' witu um Pinantik Lenas kenu, ‘Zéi'kan a raragés ang kapaaz-Ku, taan u raraatéan.’ Pahpaan ni Aku i niméyé én zéi'kan métumawah sé tou ulit, taan métumawah sé tou mahsingkéla'.”
Tumoro u mahpuasa
(Mrk. 2:18-22; Luk. 5:33-39)
14Sé woopira im wia sé pahtuzu'en ni Yohanes Menanarani niméyé wia si Yesus a meligau wia ni Sia, “Kaa kai wo sé sana réwok tou Farisi é mahpuasa, taan sé pahtuzu'en-Nu én zéi'kan?”
15A séra wingkotela ni Yesus, “Sa si brédégom ém witipé' pahpéstaan karia né kakariana, toro wé sé kakariana i mahpengasi'? Taan un orasna é méyé, si brédégom in éndon im wia ni séra. In toro niitumo ni séra mahpuasa. 16Zéi'kan siapa tou mapén u roko' weru witu ung karai tu'amo. Pahpaan sa téntu, u méipapén itii éng kumoskos wo ung karai tu'a itii é makésé' wo ung késé'na é sumelahpé'mé ung késé' kataré-taré. 17Téntu kangkasii, un anggor werupé' én zéi'kan itahu' witu um penanahu'an anggor un urémo, ung kawal né binatang am wangunen. Pahpaan sa téntu, um penanahu'an anggor itii é mawenta' wo un anggor én ikatia'. Taan un anggor weru én itahu' witu um penanahu'an anggor um werupé' wo karia in téntu un anggor wo um penanahu'an én zéi'kan maléwo'.”#9:17 Karia in téntu, si Yesus timuzu' in zéi'kan wangun un tutuzu'-Na weru ém pasemboren karia ung kinanaram uré né Yahudi.
Si kooki' ni tonaas um walé peraragésan né tou Yahudi liné'os ni Yesus
(Mrk. 5:21-43; Luk. 8:40-56)
18Karegas si Yesus i mahkua niitu wia sé pahtuzu'en ni Yohanes Menanarani, méyé si tonaas um walé peraragésan né tou Yahudi, ang kumuruzla i mahsigi' ni Sia ang kumuama, “Si kooki'ku én taré kalekepala, taan sa tanu an toro mangépé'mé witi waléku wo maizeta'mé u lengen-Mu wia ni sia wo ni sia matou sumaup.” 19A si Yesus rumendaié a mangé karia né pahtuzu'en-Na kimiita si tou itii.
20Karegas séra i mahlampang wéwéhan si wéwéné si mapulu' wo zuana ta'uno zézéha im pahondolan. Ni sia é rimétéla witu u muri ni Yesus a sumahiza u rawisna ung karai tonton ni Yesus. 21Pahpaan witu ung genangna, “Maan ni aku sumahiz umana ung karai tonton-Na, ni aku é malé'os.”
22Taan si Yesus luméngéma muri wia si wéwéné itii ang kuan-Na, “É oki'-Ku#9:22 Witu nunuwu'en Yunani é ‘thugater’ ung kalakoana éng kooki'., enté'ela un atému! Um pa'émanennu u limé'os ni ko.” In toro niitukan si wéwéné itii é lé'oso.
23I si Yesus méikaayomola witi walé ni tonaas um walé peraragésan né tou Yahudi, mailekenna sé menenengo am peloit wo sé tou lakez é riomokan, 24ang kua-Na, “Mondoloma, pahpaan si kooki' kenu zéi'kan nimaté, ni sia én timekel uman.” In timalingamé niitu, si Yesus én ipahké'ké' néra uman. 25I sé tou itii méipekiondolomé, a si Yesus muntepa, tionan-Nala u lengen ni kooki' itii, a si kooki' itii rumendaié. 26An ikawoka'ma u nimamuali itii witi péléng un tana' itii.
Sé zua tou letok liné'os ni Yesus
27I si Yesus timula'umomé un tampa itii, wéwéhan sé zua tou letok mahkiité ni Sia karia i mahkérété, “É suzu ni Daud! Iraraaté ndootuumé ni kai.” 28I si Yesus nimuntepoma witu um walé esa, sé tou letok itii niméyé wia ni Sia. Ang kuan ni Yesus wia ni séra, “Pa'émanen niou i ni Aku én toro lumé'os ni kamu?” A séra mingkotla, “Éné, ni kai ma'éman, Tuang.”
29An irasaka ni Yesus u lengen-Na wana am weren néra zua ang kuan-Na, “Mamualima tanu um pa'émanen niou.” 30In toro niitukan ni séra én toromo mahilek. A séra totoz kuaala ni Yesus, “Tia' ipahkukua niou wia si séi uman tumoro u nimamualima kenu.” 31Taan ni séra nimondolé im witu um walé itii, an ipahwoka' nérama wana péléng an tampa witi tana' itii um winanguna ni Yesus.
Si wowo' liné'os ni Yesus
32Karegas sé zua tou letok itii mahondolé, an iwalima né tou wia si Yesus si tou wowo' si sinelazan ni sétang. 33I si Yesus nimohomoma si sétang wia si wowo' itii, a si wowo' itii toromo mahnuwu'. Sé tou nimaréwok witu é mengusi-ngusingsing a mahkua, “Un tanu ung kenu én zéi'kampé' pinahile-ilek naila wia Israel!”
34 #
Mat. 10:25, 12:24; Mrk. 3:22; Luk. 11:15 Taan sé tou wia sé sana réwok tou Farisi é mahkua, “Ni Sia é mahwoho sé sétang karia ung kawasa ni tonaas né sétang.”
U raraatéan ni Yesus wia sé tou lakez
35 #
Mat. 4:23; Mrk. 1:39; Luk. 4:44 Si Yesus wo sé pahtuzu'en-Na é melili-liklik wana péléng am wanua wo wanua tua'na; ni Sia é mahtuzu' wana am walé peraragésan né tou Yahudi wo mahwoka' u Nuwu' Lé'os tumoro ung Kakolanoan ni Opo Empung, wo mahlé'os péléng sé saki wo sé lailai. 36#Bil. 27:17; 1Raj. 22:17; 2Taw. 18:16; Yeh. 34:5; Za. 10:2; Mrk. 6:34 I si Yesus nimileka sé tou lakez i mengii-ngiit uman ni Sia, a méyé u raraatéan-Na wia ni séra, pahpaan ni séra marawoio wo melinga-linganga tanumokan sé domba zéi'kan siapa si memimiara. 37#Luk. 10:2 Ang kuan ni Yesus wia sé pahtuzu'en-Na, “An upu'en é lakez, taan sé mupu' én toyo' uman. 38Niitumo, mahaléiola wia si makauma wo awesan-Namé tou i mémupu'.”
നിലവിൽ തിരഞ്ഞെടുത്തിരിക്കുന്നു:
Matius 9: LAITOM
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
