Mbete Marki 13
13
1Zezu ƴo ti̧h ke ɓil ila vul kani Ŋgerzah ke nzuk-dih fal yeri dale, nzuk-dih fal ye mbew ɓahri : « Metere, mú ko sam kasaw a feluri kú-u mboh keni vulri ɓil ila vul kani Ŋgerzah ké su kona luki-aw. »
2Mí Zezu ɓahri : « Kasaw a bawu bawuri kú-u mboh keni vuluri ké mu ko-aw, nzukri ɓay haw riw ku̧ siɓa#13.2 Laɓ mbihmbam 40 fal tɔrna Zezu ma nunmbam, soze sezar-ri haw vul kani Ŋgerzah. Ka̧h guri-ay, vul kani-u el mboh ya.. Kasaw mbew ké ɓay toŋ síɓa ta-a. »
3Zezu ka̧h tul kasaw Oliveh ke nzuk-dih fal yeri. Ku kaɓ, nun woyri ko kona ma tul vul kani Ŋgerzah, mí Piyer, Zak, Za̧h, Andere, ku vbi ni ɓay ké-e ɓah ra ɓahri : 4« Mú ɓah tehɓayu hi̧ na, náh lah. Seh suŋ mí vulri-aw ɓay ɓeɓu le ? Fe sɔkna fe mí ɓay sɔk na nam ké ɓeɓna-aw ɓay ti̧h-u le ? »
5Dale Zezu ɓahri : « Í ko-ko rɔkɔ nzuk ɓá hi̧ wuri í reh ful. 6Nzukri ɓa ŋgi̧-u ɓay mbi riŋ ɗina bi ɓahri, a woyri ku ɓa Ŋgermbay. Mí ku ɓay ra̧h keni daɓa nzukri. 7Gelke i lah ɓay ŋgermuri ma gini ma sa̧ le, í hi̧ law woiri ɓá lu ya. Na ani ani gaŋ kara ŋgermu ɓay laɓu. Keni-aw kara sew a ɔh tɔr sewri ta-a ɓáy. 8Sa̧wnzukri ɓay ur ruh ŋgermu ke sa̧wnzuk a ɓoruri. Puh laknari ɓay ruh ŋgermu ke puh lakna a ɓoruri pi. Tusiɓa ɓay laŋ yik yik ke gelri ɓoɗ ɓoɗ. Ɗaka ɓay lih puhri. Kosehri-aw ɓa titil fe munu ɓay na kandɔk mahɓil ké kaɓ peŋe ɓay mbuŋna kaŋ.
9Í ko tul woiri ger. Ku ɓay mgba wuri si pol ŋgernzuk vul misoŋri hi̧ ku kuŋ salɓay ku̧ tul woiri. Ké vul misoŋ ku zɔ́r wuri ke ndehdɔŋ. Ku ɓay si ziŋ wuri pol guvener-ri ke mbay tusiɓari ɓayu ké i ƴo tul riŋ bi. Fe-u ɓay laɓ hi̧ wuri í te-teh ɓay bi hi̧ niri ku lah. 10Na ani ani gaŋ kara sa̧wnzukri gbam ɓá lah ɓaysuki bi#13.10 Zezu ɓahri, ɓaysuki bi mí ke ɓah si tul, ɓaysuki hul ye ké-e ɓay ya̧ keni nzukri.. 11Gelku-u kɔklɔ wuri si ndoh ndɔk nzukri le, í hi̧ law woiri ɓá lu ya. Law woiri ɓá nzah ɓay ké i ɓah-u ké pol nzukri ra ya. Wara le ɓay ké Tempuki hi̧ wuri ke sa̧wseh-u le, í ɓah. Ɓayu ké ta ɓa ɓay woiri mí i ƴo ɓah-u ya. Wara le ɓa ɓay Tem lawpuki mí i ɓah hi̧ nzukri-aw. 12-13Nzukri gbam ɓay fu̧y wuri ɓayu ké i ƴo tul riŋ bi. Nzuk ɓay te yi̧n ye hi̧ kú i. Bah gun ɓay te gun ye hi̧ kú i. Gun ɓay ur ziŋ nzukri ké mbuŋ ni ɓay i niri. Mí nzuk ké su̧h law ye tul riŋ bi kpu̧ru ka̧h hul ye le, ke ɓay ti̧h ke ndɔk hul.
14Kaŋ dale nam ké i ko fe ra̧m ké mah kona ya mí nzukri si kan ɓil vul kani Ŋgerzah le, nzuk ké ƴo ki̧ mbete-ay ɓá tu ɓa teh-u, nzukri ké ƴo tusiɓa Zude ɓá ɗuk ma tul kasawri wara. 15Nzuk ké ƴo tul vul ɓá ɗuk fe ye kiriŋ. Ké lu kerɓay-fa̧h fe yeri ké ɓil vul. 16Nzuk ké ƴo waka ba, ɓá el gi puh ɓay mbi mah gar ye ya. 17Kúy. Namaw ra mah ɓilri ke mah gun nzak pamri ɓay ko seh mbamba. 18Kaŋ le í goŋ Ŋgerzah ɓay rɔkɔ fe-u ɓá laɓ ke ɓil belem#13.18 Ɓay lah ɓay belem le, í ki̧ gun ɓay ké si ke gel ki̧na Mbete Matiye 24.20. 19ɓayu ké koseh ɓay kpuh mbamba ke namuri-aw. Ur ke titilu ké Ŋgerzah laɓ nunmbam ke tusiɓa gi ka̧h guri-ay, sam koseh a kandɔkaw laɓ nzukri bɔk mbew ya ɓáy, mí ta laɓ nam a ɓoru mba wu̧m wara. 20Gaŋ tul feri riw hi̧ nam koseh-aw el fal ya le, nzuk mbew ta tí̧h ke ndɔk hul ya. Mí ɓay tul nzukri ké Ŋgerzah lu ɓa sa̧w ye le, ke ɓay hi̧ namu el fal.
21-22Wara mí nzuk a suŋ suŋ ké ɓahri, Ŋgermbay mí ƴo-ay, mini, ke ƴo sa̧-aw le, í ya̧ ɓay ye ya ɓayu ké nzuk nzak rɔknari ɓay sɔk mun woyri ɓa Ŋgermbay ya le, ɓa gun nzak pihna Ŋgerzah. Ku ɓay laɓ fe saŋri ke feri ké mah kona ya ɓay hi̧ nzukri reh ful. Ku ɓay leh ŋgerna woyri ɓay hi̧ nzukri ké Ŋgerzah lu niri ɓa sa̧w ye ɓá reh ful. 23A woiri le í ko ger, mi ɓah gbam hi̧ wuri i lah pol da.
24Aŋay dale fal kosehri-aw, seh ɓay sih nduŋ. Few ta teh gel mba pi. 25Gunwu̧y nunmbamri ɓay ga̧y ku̧ siɓa. Ŋgerna fe nunmbamri ɓay laŋ yik yik. 26Wara mí gun nzuk pirmatul ɓay ti̧h nun nzukri, ke ƴo gina ɓil ɗikmambam ke ŋgerna a luki ɓil riŋ ɗina mbay ye. 27Wara mí ke píh tem nzak pihna yeri ɓay mbu̧h nzukri ké-e lu ɓa sa̧w ye ke ti̧w tusiɓa ké niŋay gbam ur ke fál tí̧h seh si ka̧h fál ríŋ seh. Ku mbú̧h niri ur ke tusiɓa gbam si ka̧h gel a gbu̧h-u ké nunmbam sa̧.
28Í ko kpuh nzu̧y, kpuh nzu̧y ƴo sɔk fe ɓay í tu. Gelke kpuh nzu̧y tuŋ mí el loŋ gay dale, i tu ɓahri se, nzak mbam ka̧h da. 29Kaŋ pi mí gelke i ko feri-aw ti̧h le, í tu ɓahri, gun nzuk pirmatul ka̧h nzakful da.
30Ɓa ketina. Mi ƴo ɓah hi̧ wuri ɓahri, dara gun tukala-ayri ɓá kal le feri-aw gbam ɓay ti̧h-u. 31Nunmbam ke tusiɓa ɓay ka-kal, mí ɓay biri ba, ɓay na kpatara.
32Ɓay tu ɓay nam gina gun nzuk pirmatul mini sa̧wseh-u ra, nzuk mbew ta tu ya. Tem nzak pihna Ŋgerzahri ké ƴo nunmbam kara ta tu ya, gun kara ta tu ya pi. Ɓa baah ke hȩk mí tu. 33Í ko ger. Í ƴo tul bɔk woiri ɓayu ké i tu nam ké gun nzuk pirmatul ɓay el gi keni ya. 34Gina gun nzuk pirmatul na kandɔk nzuk mbew ké poŋ kerpuh ye tɔr si gahru ɓa ɗih-u. Ke hi̧ gun-laɓ pihna yeri pihna woyri ke gelu gelu. Ke ɓah ɓa teh-u hi̧ gun-kɔr nzak vul ɓahri, gunu ɓá ƴo tul bɔk. 35Kaŋaw mí í ƴo tul bɔk ɓayu ké i tu nam ké nzuk puh ɓay el gi keni ya. Ke él ke bɔklew mini ke haŋgel mini ke káh tuhndoy mini ke tipele kara i tu ya pi. 36Í ƴo tul bɔk ɓay rɔkɔ ké gi ti̧h tul woiri kpur ké tul nam. 37Ɓayay ké mi ƴo ɓah hi̧ wuri-ay, mi ƴo ɓah hi̧ nzuk a ɓoruri gbam : Í ƴo wuri tul bɔk.
നിലവിൽ തിരഞ്ഞെടുത്തിരിക്കുന്നു:
Mbete Marki 13: SIAFNK
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Wycliffe Bible Translators, Inc. All rights reserved.
