Mbete Za̧h 1
1
1Titilu dara feri riw ɓá laɓ le, a ye Ɓay, ke ƴo ri. Ke ƴo ta̧w Ŋgerzah. Ŋgerzah mí ɓa Ɓay ra. 2A ye ke ƴo ke titilu ké ta̧w Ŋgerzah.
3Ŋgerzah laɓ feri riw ke ndɔk Ɓay#1.3 Ɓay lah ɓay « ɓay », í mgba Mbete Sa̧w fe 1 tuh ke gel ki̧na-ay.. Fe mbew ké Ŋgerzah laɓ dan Ɓay ta-a. 4Ɓayu ɓa sa̧w ɔkna feri riw. Sa̧w ɔkna ra ba, ɓa gel tehna nzukri#1.4 Ɓay gel tehna na ɓil mbete Ŋgerzah par par kandɔk Mbete Siŋ (Psaumes) mah-u 19 ke mah-u 119 ke mah-u 27 gunu 1. Í mgba Mbete Ten sa̧wɓay 22.1-5 tuh ke gel ki̧na-ay pi. . 5Gel tehna ra teh ké ɓil tirima. Tirima ba, pɔr ni ya.
6Ŋgerzah pih gun nzak pihna a hani mbew gi. Riŋ ye ɓa Za̧h. 7Ke gi ɓa nzuk-teh ɓay gel tehna dale, nzukri gbam ɓá kan law tul gel tehna ɓay tehɓay ye. 8A ye ra, ke ɓa gel tehna-aw ya. Wara le ke gi ɓay te-teh ɓay gel tehna.
9Gel tehna ra ɓa gel tehna a kpakpaŋu ké gi rih tukala mí ƴo hi̧ nun nzukri riw ko kona ɓa teh-u. 10Gel tehna-u teh gel ké tusiɓa. Nunmbam ke tusiɓa laɓ ke ndɔk gel tehna, mí nzukri tu ni ya.
11Gel tehna gi sakra nzuk yeri. Nzuk yeri ba, ya̧ ni ma ta̧w woyri ya. 12Mí nzuk a a̧yri ké ya̧ ni ma law woyri hi̧ law woyri te sa tul ye dale, ke hi̧ niri ŋgerna, ku na ɓa gun Ŋgerzahri. 13Nzukuri, sa̧w mbuŋna woyri ta ɓa mbuŋna sem nzuk pirmatul ya, ta ɓa law sana haymun ya, ta ɓa fe ké law nzuk laɓ ya pi. Ŋgerzah mí ɓa sa̧w mbuŋna woyri.
14Ɓay ra ba, ti̧h ɓa nzuk pirmatul a sa̧w som siɓa. Ke ɗeh puh ké haŋsekle wah. Nah ko riŋ ɗina ye ke nun wah gbak gbak. Riŋ ɗina-u ɓa riŋ ɗina gun Ŋgerzah mbew yaŋ. Lawsuki ke ketina ya̧ mun ye gbam.
15Za̧h te-teh ɓay gun Ŋgerzah. Ke ka-kah ɓahri, Nzuku ɓa a ye. Za̧h ɓah ɓay tul ye ɓahri se, nzuku ƴo gina fal ye, mí nzuku mba tul ye Za̧h mba-mba ɓay fe le, nzuku ƴo pol dara ku mbuŋ ni ɓáy. 16Sɔk ɓahri se, a wah gbam nah ya̧ lawsuki le, nah el ya̧ ra ɓáy. Sa̧w lawsuki-u ra ɓa mun ye gbam. 17Ɓay fe le mbete bolkusol Ŋgerzah ké vbeh pol sa̧ ra, ndɔk Moyiz mí vbeh. Lawsuki ke ketina ra ba, laɓ ke mun Ŋgermbay Zezu. 18Nzuk a hani ké ko Ŋgerzah ko ta-a. A ye ké-e ɓa gun Ŋgerzah mbew yaŋ, ké-e ɓa mun Ŋgerzah mí ke hi̧ na, nah tu Ŋgerzah te-teh.
19-20Za̧h te-teh ɓay ra bale, ziɓri ké Zurusalem pih nzuk fe puhna Ŋgerzahri ke Levi a ɓoruri ké so pihna vul kani Ŋgerzah si ta̧w ye. Mí ku vbi ni ɓay ɓahri : « A wo mu ɓa ge le ? »
Za̧h ɓah ketina ye. Ke mu̧h niri ɓay ya. Nzak ye ɓah ketina ɓahri se : « A bi le, mi ɓa Ŋgermbay ra ya. »
21Ku el vbi ni ɓahri : « Mí le, mu ɓa Eli gun nzak pihna Ŋgerzah a lewsa̧ ra le#1.21 Ɓay tu ɓay Eli gun nzak pihna Ŋgerzah ké ziɓri ƴo geŋu ra, í ki̧ Mbete Malachie 3.23 ke Mbete 2 Rois 2.11-12. ? »
Ke ɓah : « A bi ta-a. »
Ku el vbi ra ɓáy : « Mu ɓa gun nzak pihna Ŋgerzah ké eŋ Moyiz ra le#1.21 Ɓay tu ɓay gun nzak pihna Ŋgerzah a mbewu-aw ké eŋ Moyiz ra ké ziɓri ƴo geŋu, í ki̧ Mbete Deutéronome 18.15-19. ? »
Mí ke yih nzak woyri ɓahri : « Mi ɓa a ye ya pi. »
22Bale ku el vbi ni ra ɓáy ɓahri : « Mu ɓa ge le ? Nah si sɔ́k nzukri ké pih na gi ra ani le ? A wo ke mun wo ba, mu ɓah ani le ? »
23Mí Za̧h mbi ɓay Ezay gun nzak pihna Ŋgerzah a lewsa̧ yih nzak woyri keni ɓahri se : A bi mi ɓa nzuk ké kusol ye ƴo mgbe ɓil lawkɔr ɓahri, í ndar wuri mahful kparak kparak geŋ Miƴori#1.23 Gel ki̧na-u na ɓil Mbete Esaïe 40.3..
24Ké haŋsekle nzukri kú-u pih niri-aw fariziri ƴo ri pi. 25Ku vbi Za̧h ɓay ɓahri : « Mí-aw ba, mu ɓa Ŋgermbay ya, mu ɓa Eli ya, mu ɓa gun nzak pihna Ŋgerzah ya pi-aw wa, ɓay fe mú-u ƴo hi̧ nzukri ti̧h ɓil batem a mbih le ? »
26Za̧h yih nzak woyri ɓahri : « A bi mi hi̧ nzukri ti̧h ɓil batem a mbih. Mí nzuk a ɓoru ƴo ri ké sakra woiri-ay. Nzuku, i tu ni ya. 27A ye ke ƴo gina fal bi. Ɗíŋ tul ɓay sel sal sabɔk ye kara mi mah ya. »
28Feri-aw laɓ ké Beɗtani kala mahmbih Zurdeŋ, mbih ké Za̧h soh ri nzukri batem.
29Tipele-u Za̧h ko Zezu ƴo gina ma ta̧w ye bale, ke ɓahri : « Í ko gun sami Ŋgerzah ké gi-aw, a ye ké-e lú salɓay suya ké tul nzuk tukalari. 30Ɓay tul ye ra, mi ɓahri se, fal bi le, nzuk ƴo gina. Ke mba tul bi mba-mba ɓay fe le, ke ƴo pol dara ku mbuŋ mi ɓáy. 31A bi kara mi tu ni pol ya. Mí ɓay hi̧ ké ti̧h nun gun Izarayelri mí-i gi hi̧ nzukri ti̧h ɓil batem a mbih ɓayu. »
32-33Za̧h el te-teh ɓay ra ɓáy ɓahri se : « Wara mí-i ko Tempuki ko ɗer ke nunmbam kandɔk mbɔre gi kaɓ tul ye. Mi tu ni pol ya. Mí Ŋgerzah ké pih mi gi hi̧ nzukri ti̧h ɓil batem a mbih ra, a ye ke sɔk mi nzuku. Ke ɓahri se, nzuk a a̧y ké mi ko Tempuki ɗer kaɓ tul ye le, a ye mí ke ɓa nzuk-ndoh nzukri ti̧h ɓil batem a Tempuki. 34Kandɔkaw mí-i ko fe-u laɓ ké nun bi gaŋ, mí-i el te-teh ɓayu ɓahri se, a ye gun Ŋgerzah ra munu. »
35Tipele a ɓoru Za̧h ƴo gel batem ra ɓáy. Andere ke nzuk-dih fal Za̧h a ɓoru ƴo ri-aw pi. 36Za̧h ko kona zi̧h ma tul Zezu ké ƴo kalna dale, ke ɓah : « Í ko wuri gun sami Ŋgerzah ké si-aw. »
37Nzuk-dih fal Za̧hri ké seɗe ra lah nzak ye, mí ku si dih fal Zezu. 38Zezu sɔɓ nun mí ko kona ma tul woyri kú-u ƴo dih fal ye bale, ke ɓah : « A fe mí i ƴah le ? »
Ku ɓahri : « Rabbi, gel nam wo na suŋ le ? »
(Rabbi yih sɔk ɓahri, metere.)
39Ke ɓah : « Í gi, í ko. »
Kaŋ mí ku ɓaŋ ni si ka̧h gel nam ye, mí ku ko. Ku kaɓ ziŋ ni ke namu-aw. Sa̧wseh-u ra ɗih ya ke sa̧wseh niŋ a bɔklew.
40Andere nzuk-dih fal Za̧h a mbewu-aw, ke lah nzak Za̧h ké-e dih fal Zezu ra, ke ɓa yi̧n Simu Piyer. 41Ke si ɓa gah-u ziŋ gun bah ye Simu. Ke ɓah : « Nah ziŋ Mesi da. »
(Mesi yih ɓahri, Ŋgermbay.)
42Andere maŋ yi̧nu ra si ta̧w Zezu.
Zezu ko ni zi̧h, mí ke ɓah hi̧ ni ɓahri : « Mu ɓa Simu gun Za̧h. Ku tú mu ɓa Sefas. »
(Riŋ Sefas sɔk ɓahri, Piyer. Piyer ba, yih ɓahri, kasaw.)
43Tipele-u Zezu tɔr. Ke yih ɓay si ma tusiɓa Galile. Ke ziŋ Filiɓ, mí ke ɓah hi̧ ni ɓahri : « Mú dih fal bi-ay. »
44Filiɓ ra ɓa nzuk Beɗsayda. Puh woyri mbew ke Andere ke Piyer. 45Mí Filiɓ si ziŋ Nataniyel, mí ke ɓah : « Nah ziŋ nzuk ké mbete bolkusol Ŋgerzah ɓah ɓayu ɓil mbete vbehna Moyiz ke mbete vbehna gun nzak pihna Ŋgerzah a lewsa̧ri ra da. Nzuku ɓa Zezu gun Zezeɓ ké Nasareɗ. »
46Mí Nataniyel ɓah hi̧ ni ɓahri : « Suki fe mí ɓay ti̧h ké Nasareɗ le ? »
Filiɓ ba, ɓah : « Mú gi, mú ko. »
Mí ku tɔr. 47Zezu ko Nataniyel ƴo gina, mí ke ɓahri : « Í ko gun Izarayel a kpakpaŋu ké rɔkna ta ta̧w ye ya ké gi-aw. »
48Nataniyel ba, ɓah : « Mu tu mi fál suŋ le ? »
Dale Zezu yih nzak ye, mí ke ɓahri : « Dara Filiɓ ɓá ɗi mu le, mi ko mu, mu kaɓ sa̧w kpuh nzu̧y. »
49Bale Nataniyel yih nzak ye ɓahri : « Rabbi, a wo mú-u ɓa gun Ŋgerzah. Mu ɓa Ŋgermbay wah gun Izarayelri gaŋ. »
50Mí Zezu ɓah ɓay hi̧ ni ɓahri : « Ɓayu ké mi ɓah hi̧ mu ɓahri, mi ko mu ké sa̧w kpuh nzu̧y kaŋto mú-u el kan law tul bi wa ? Mu ɓay ko fe a mbamba-uri ké kal tul fe a a̧y ka-kal ɓáy. »
51Zezu el ɓahri se : « Gelu munu, ɓa ketina. Mí-i ƴo ɓah ɓayay hi̧ mu, mahful ké nunmbam ɓay na ŋgah ké nun wo dale, mu kó tem nzak pihna Ŋgerzahri ƴo hil ma síɓa, ƴo ɗer ma siɓa ké tul gun nzuk pirmatul kandɔk ɗiki kaŋ#1.51 Í mgba Mbete Sa̧w fe 28.10-12 tuh ke gel ki̧na-ay. . »
നിലവിൽ തിരഞ്ഞെടുത്തിരിക്കുന്നു:
Mbete Za̧h 1: SIAFNK
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Wycliffe Bible Translators, Inc. All rights reserved.
