Matta 16
16
Nja Gwa'a Sər Muniya
(Mar 8:11-13; Luk 12:54-56)
1Njir Farisi ka njir Saduki tə shili da Yesu ka nda dzə nyi, kəl ngə nda na cha char nda muniya səya kya huɗamələm, 2Kəl ja, ngə Yesu tə wuma ga na, “Ma akə kwa ɗa hya la'a nda huɗamələm tə ɗa dəzəu, kəl hyo na, ‘Yawah! Əzəkə vi kwa ɗa mənakəu.’ 3Ma hya la'a dlamba mbudla tsəu hyo na, ‘Par kwa nda təɗə ənya.’ Ma hya linghari huɗamələm, hya kwa nau dəkar sənda vi təkəri, ya a da hyo nau dəkəbiya ba'adar bəji nə wa. 4Kəl nda nji pəla'a ana nji kəla nəu nya Hyel nə bəji nə ngə kwa gwa'a la'a sər muniya! Kəl ja, a sə da njo char hi matsa ba'adar Yunana ndər mətakər wa.” Təma ngə Yesu tə ngya nda ga ma'i tanyi.
Tləlam Njir Farisi ana Njir Saduki
(Mar 8:14-21)
5Sakanda shawa Yesu tə təra biyatə ya fa'a nda, a fartə nda hətə gwazhilakə ndani. 6Ngə Yesu tə nar nda, “Gəla ma hya ɓəlatə kərnəhi tsa tləlam njir Farisi ana njir Saduki.”
7Ngə nda ghəya ɓwanya ku pama kərnənda, “Sənda gwa'atə cha na ənga, aka a da məna hətə gwazhilakə wa nga.”
8Yesu zəndətə sənda nda kwa ɓwanya təkəri, ngə cha jau nda, “Nahi njir kushir jiri, mya gwa'atə hyo ɓwanya ku pama kərnəhi təkəra a da hya kar hətə gwazhilakə wa? 9A da hya ta ngabiya ba'a sakanə wa? A tsə'u hyo ɗənghatə takwara tufu nda shili dəbu tufu tə səm nda ma, tsəla yiɗawa nda hya tsəmta? 10Ətsəu ya, fartə hi takwara məɗəfə nda shili dəbu fwaɗə tə səma nda ya, tsəla wawa'a yiɗawa nda hya tsəmtə chiɓa? 11Aman ngə a hya kar ngabiya ənda a da təkəra gwazhilakə ngə yo ɓwanya wa? Gəgatə ma kərnəhi tsa tləlam njir Farisi ana njir Saduki, nacha ngə sənda ya ɓwanya təkəri!”
12Kəl ngə shawa inda tə ngabiya ənda a da təkəra tləlam nda njo mər gwazhilakə nə nda cho ɓwanya wa, kəl nda a təkəra sənda njir Farisi ana njir Saduki kwa dlədləɓa.
Bitrus tə Pəbiya ənda Yesu ngə Kəristi
(Mar 8:27-30; Luk 9:18-21)
13Nda Yesu tə dzəva tə hə'i Kaisariya Filibi, ngə cha jau nya shawa nyi, “Wa njo na na Zər ndəa?”
14Ngə nda wum ga na, “Alenya nji kwa na Yohana ndər mər Baɓtisma, alenya nji kwa na Iliya, alenya nji tsəu kwa na Irmiya, a da wa zhang ku huɗa njir mətakər.”
15Ngə cha jau nda, “Nahi nəkə hi ya, wa hyo na naya?” 16Ngə Shiman Bitrus tə wum ga na, “Nakə ngə Kəristi Zər Hyel nda na pi.” 17Ngə Yesu tə wum ga nar nyi, “Ndər papa'akur kə Shiman zər Yohana, aka a da ndə ngə tə chabiya nghə sə wi ngə wa, kəl nda Ada ɗa nda kya huɗamələm nga. 18Aka əngə yo nar nghə ja, nakə ngə Bitrus, nda nacha ngə fafa. Ətsəu atə fafa na, yo chiya njir nəu ɗa, nda mada gyalkur Hadis da kwa kura wa. 19Yo nənghə sər mbəɗə nyavi təlkur huɗamələm. Ma dəhə sənda ka mbiya tə dunəya, mbiya tə nji kya huɗamələm, ma dəhə sənda ka pəlnda tə dunəya nə tsəu, pəlnda tə nji kya huɗamələm.”
20Kəl Yesu tə təɗəhima shawa nyi tsa'anyata, tsa nda da par nyi nə madawa ənda nacha ngə Kəristi.
Yesu tə Ɓwanya təkəra Chul Tə nda Cho Tah
(Mar 8:31–9:1; Luk 9:22-27)
21Fwatə tə bəji nda, Yesu tə ghəya dəkə nə shawa nyi ənda tuku cho gwa Urshalima, cho gwa sa ɓwaɓwatə ku cha njirawawa'a, ka wawa'ar fərist ka maləm gadlagadla Musa, njo tsəya nyi, pəshir hanyi makərkunyi cho hya'ati na pi.
22Ngə Bitrus tə təɗənda nyi ga guhi nyi, “Hyella kanda, Tlakəu! Chul ngə na sə do ɗa nakə wa!”
23Yesu tə sha ga nar nyi nə Bitrus, “Ɓəl hiɗa Shantan! Ləbam ɗimiɗimi kə na'a, aka jigadəma nghə nə ndəkur nga, a da nə Hyel wa.”
24Kəl Yesu tə nar nyi nə ka shawa nyi, “Dəhə ndə nda kwa i nəu ɗa, tuku ngə cha ngyar kərnyi, cha hətə taməngəla nyi cha nəu ɗa. 25Aka dəhə ndə nda kwa gwa'a cha mbəɗandə pya cha, cho sanda, kəl ja, dəhə ndə nda tə sanda pya cha ka ya, cho uya. 26Mi zhar nda ndə kwa uya macha uya dəhə sər dunəya ga tar pya cha? Aa mi sənda ndə kwa nau bəlabiya pya cha na? 27Aka Zər Ndə kwa shili ku səlir Ada nyi ka Chama nyi, cho nənyi wazəba madawa tsa'atsa'a na sənda cha məra. 28Jiri yo nar hi, alenya nji da tangna sakana, a da nda kwa tə wa, kəl nda la'a shilir Zər Ndə ku təlkur nyi.”
നിലവിൽ തിരഞ്ഞെടുത്തിരിക്കുന്നു:
Matta 16: hbbNT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Wycliffe Bible Translators, Inc. and © The Nigeria Bible Translation Trust 2018
