Matta 17
17
Yesu tə Shabiyadzə Paməu
(Mar 9:2-13; Luk 9:28-36)
1Ahir hanyi kwah, Yesu tə hətə Bitrus, Yakubu ana Yohana zamənya Yakubu, ga təra na nda gyo kəra mə dzəgaməu nanda səkənda. 2Sakanda nda kwa ndzam nyi, kəl ngə nda la'a Yesu tə sha matsa nda cha parang, huɗəma cha kwa mbəl wi pəchi, ləkutə dza cha tə sha pərtə tyal kwa mbəla. 3Kəl ngə shawa makər inda tə la'a Musa ana Iliya tə chabiyadza, nda kwa ɓwanya na Yesu.
4Ngə Bitrus tə nar nyi nə Yesu, “Tlakəu, mənakə gagaɗa təmən tangna, ma cha kwa i ka, yo latə madləɓa makər tangna, nənghə patləu, nə Musa patləu ana nə Iliya patləu.”
5Tsəu cha ku huɗa ndəra kəl ləmbəkə pərtə nda kwa mbəla tə səya haɗiya nda dərdla'a, kəl nda ngatə kurakə tə səya kyo ləmbəkə nda, kwa na, “Nənnə ngə Zər ɗa, nda yo nyida, yo mər hirgyaɗi nacha gagaɗa. Sə ma himi da cha!”
6Nda shawa inda tə ngatə kurakə nda, nda dla səya hu'i na ləvəra. 7Ngə Yesu tə shili ləhə dzən nda ga tsəka nda, ga na, “Hya'atə ma, ngwa hya da ləvər wa!” 8Manda har kər a na nda la'a vanya ndə wa kəl Yesu.
9Ma ndo səya kyo mə nda, Yesu tə tsau nda bar, “Ngwa hya da dəkar nyi nə madawa sənda hya la'a wa, kəl ma Zər Ndə tə hya'atə ku hwa.”
10Ngə shawa inda tə jau nyi, “Ja ma'a ngə ka maləm gadlagadla Musa kwa na, tuku Iliya ndər mətakər kwa ghəya shili təvi Kəristya?”
11Ngə Yesu tə wum ga na, “Vəvəl tuku ngə Iliya kwa ghəya shili tangərma, ka cha shili məməlabiya dəhə səu. 12Kəl ja, yo nar hi Iliya wurta shili, ya a da nda ngabiya nyi wa, ngə nda mərtə nyi dəhə sənda kəra nda i. Əngə tanyi tsəu nda kwa ɗa məndza'u na Zər Ndəu.”
13Ngə shawa inda tə ngabiya ənda təkəra Yohana ndər mər baɓtisma ngə cho ɓwanya.
Yesu tə Mbandə Zər na Məlləm ku Kəra Cha
(Mar 9:14-29; Luk 9:37-43)
14Nda Yesu ka shawa nyi inda tə səya gwa ku dlama nji, ngə vanya ndə tə shili uzhi mar Yesu ga na, 15“Tlakəu, ngatə təhuɗə təkəra zər ɗa, sə ngo chinyi, kwa pa nyi gagaɗa, zhaka ɗang tanyi cha kwa dla gu hu'u, ka gwatə dəl. 16Ngə ya shili nacha da shawa nghə inga, ya a da nda nau mbandə nyi wa.”
17Ngə Yesu tə wum ga na, “Kara nahi njir bəji na, nji kəla jiri, nji ɗimi, ba'a sakamani yo ngya kə'i hya? Ba'a sakamani yo ngya ka səsə'u hya? Anda ma na zər nga tangna!” 18Ngə Yesu tə tsə məlləm nda, təma ngə cha biya ku zər nda, ngə zər nda mbə ku nda na bəji.
19Ahir nga, ngə shawa nyi inda tə shili da Yesu tə nda səkənda ga jau nyi, “Mi nda katə ea tsa gədləbiya məlləm nda?”
20Yesu tə nar nda, “Aka a jirikur kəhi da wa nga. Vəlvəl yo nar hi, macha jirikur kəhi da kushi wi məlar mustad, hyo nau nar nyi nə mə na, ‘Təsə tangna, ka təra yi na nda,’ kəl cho təra, ya səda kwa ndiya dunama kəhi wa.”#17:20 Alenya tsəfə tangərma nda nja tsəfə na chi tə tsakəngər chada 21 Chul ngə da kwa biya əngə tanyi wa, kəl ana pətlənya ana səmdzən.
Yesu tə Ɓəla Ɓwanya təkəra Tə Nyi
(Mar 9:30-32; Luk 9:43-45)
22Ahir nda ɓəla tsəmtədzə vu Galili, kəl Yesu tə nar nda, “Njo tləɗanda Zər Ndə nə nji. 23Nda kwa tsəya nyi, kəl ja, pəshir hanyi makərkunyi cho hya'ati na pi.” Kəl huɗa shawa nyi inda tə tla.
Ki Tsachi ka Mbwa'alə Hyel
24Nda Yesu ka shawa nyi tə dzəva Kafarnahum, njir tsəm tsachi ka mbwa'alə Hyel tə shili da Bitrus ga jau nyi, “A maləm kəhi da kwa ki tsachi mbwa'alə Hyel ma?”
25Ngə Bitrus tə na, “Kwa ki cha.” Nda Bitrus tə shili ku ki, ngə Yesu tə ghəya ndər nənyi, ga na, “Mi sənda ka har təkəra ɓwanya nga? Atsa wa ngə təltəl nə dunəya ingə kwa dləu tsa cha, atsa nguli kənda zəma aa tsa nji shilishili?”
26Ngə Bitrus tə na, “Atsa nji shilishili.”
Ngə Yesu tə ɓəlakə nyi “Yau, a char tə nguli kənda do ki wa. 27Kəl ja, dəhə ka ənga tsa huɗa nji ingə da tla tsamən, ma'i gu fa'a, ka gwa bəzəu ngəliki, kalfi nda ka səya tangərma ko mbəɗiya nyacha ko həbiya kwaba kwa. Ka hətə ka yi kinda ma tsachi ngə ni.”
നിലവിൽ തിരഞ്ഞെടുത്തിരിക്കുന്നു:
Matta 17: hbbNT
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
© Wycliffe Bible Translators, Inc. and © The Nigeria Bible Translation Trust 2018
