Dimatekenu 25
25
O luvualu lua Mbalahamu Kua Ketula
(I Malunda 1.32-33)
1Mbalahamu anga u sakana muhatu ua mukuá, dijina diê Ketula; 2Anga u mu vualela Zimilame ni Jokosane, ni Medane, ni Midiiana, ni Jijibake, ni Suua. 3Jokosane anga u vuala Seba ni Dedane; anʼa Dedane, Axudimi, ni Letusime, ni Leumine. 4Anʼa Midnana: Efa, ni Efele, ni Henoko, ni Abida, ni Eleda; ene osoʼá anʼa Ketula.
5Mbalahamu-phe jimbongo jê joso ua ji bhana Izake. 6Maji anʼa akâma-phe, a kexe-nâ Mbalahamu, Mbalahamu ua a bhana maujitu kioso muene kiala hanji ku muenhu, u a tuma ku leste, a di sandule ni monʼê Izake, a kala mʼoxi ia mutundila-kumbi.
Ufuilu ua Mbalahamu
7IIi iene-phe izuua ia muenhu ua Mbalahamuʼii, u laia mu hama ia muvu ni makuinhi sambuadi ni itanu. 8Mbalahamu anga u batula muenhu, ufua kiá ku uadiakimi uavulu, ua kuka kiá, ua kukidila muene, mivu ia mu kumu; anga a mu bhongoluela ku malembʼê. 9Anʼê Izake ni Ijimaiele anga a mu funda mu dibânda dia Makapela, mu mukáu ua Efelone, monʼa Zouale, mukua Hiti, bhua lulama ni Mamele; 10uene mukáu ua sumbu Mbalahamu ku anʼa Hiti; muene mua funda Mbalahamu ni Sala mukajiʼê. 11O kutunda mu kúfua kua Mbalahamu, Nzambi u zediuisa Izake monʼê; Izake anga u tunga bhu kixima kia Lahai-loi.
O luvualu lua Ijimaiele
(I Malunda 1.28-31)
12Ingo ia vumu ienhiʼi ia Ijimaiele, monʼa Mbalahamu ua diiala, a mu vuala ni Hangale mukua Ijito, kahatu ka Sala. 13Anʼa Ijimaiele majina mâ eniʼá, kala kia di kaiela ku majina mâ ni ku miiji iâ; phande-kumbi ia Ijimaiele, Nebaiote; ni Kedale, ni Adbeel, ni Mibisame, 14ni Mixima, ni Duna, ni Masa, 15ni Hadade, ni Tema, ni Jetule, ni Nafixe, ni Kedemah; 16enhá ene anʼa Ijimaiele, ku majina mâ, ni ku jisanzala jâ, ni ibangu iâ; kuinhi dia sobha ni kiiadi, kia di kaiela mu ilombo iâ. 17Iii iene izuua ia mivu ia muenhu ua Ijimaiele, hama ia muvu ni makuinhi atatu ni sambuadi; anga u batuka muenhu, ufua, hé a mu bhongoluela ku malembʼê. 18O kutunga kuâ atunda mbambe Havila katé ku Asídia ku mutundila-kumbi ua Ijito; a zukama ku jindandu jê joso maji ene a suku ku thunda.
Ana a vuala Izake
19Ingo ia vumu ienhiʼii ia Izake, monʼa Mbalahamu: Mbalahamu u vuala Izake: 20Izake anga u kala ni makuinhi auana a muvu kia sakana ni Bebeka, monʼa Betuuele, mukua Sídia, mu Panda-alame, phange ia Labanu mukua Sídia, phala a kale mukajiʼê. 21Izake anga u diondela muhatuʼê kua Jihova, mukonda kala kuvuala; Jihova anga u mu ivua kudikola kuê, Bebeka mukajiʼê anga u imita. 22Ana anga a kala mu bhânga moxi diê; muene-phe uixi: Kua ngiza-hi dingi, ngala kiki? Anga uia mu kuibhula kua Jihova. 23Jihova anga u mu vutuuila, uixi: Ifuẋi iiadi ia ku kala moxi diê, miiji iiadi ia kà di uanununa tunde mu vumu, muiji umoxi ua kà tunda mukuâ mu nguzu, o dikota dia kà bhikila o ndenge.
Uvadiue ua Izaú ni Jakobo
24Kia zubha kubhiẋila mu izuua iê ia kudisanza, manhi mu vumu diê mua kala akua-ndumba. 25Ua dianga kutunda anga u kusuka, u vula jindemba mu mukutu; kiene kia mu lukila dijina dia Izaú.#25.25 Vula-ndemba. 26Kia zubha kutunda, kua kaiela mukuá, lukuaku-phe lua kuata mu kasende ka Izaú; kiene kia mu lukila dijina dia Jakobo.#25.26 Kuata-Kasende. Izake anga u kala mu makuinhi asamanu a muvu kia vuala muhatuʼê ana eniʼá.
Izaú u sumbisa o ukota uê
27Minzangala anga i kula; Izaú anga u kala dinhanga dia dikota, mukua kunhunga mu iangu; Jakobo-phe muthu ua di xibhʼê, uia ni kuxalʼê ku bhata. 28Izake-phe u zola Izaú, mukonda uene kudia ku xitu iê ia unhanga; Bebeka-phe u zola Jakobo.
29Jakobo anga u lamba makunde; Izaú anga u tunda mu iangu, uiza kubhata, ua senduka ni nzala. 30Izaú anga u ambela Jakobo, uixi: Nga ku diondo ngi bhane-ku ngidie, Kiakusukʼokio mʼombia; nga senduka ni nzala; kiene kia xalela ni dijina dia Idomo;#25.30 Kamukusu.
31Jakobo-phe, uixi: Ngi sumbise-phe kizuua kia lelu o ukota ué.
32Kuala Izaú: Ki ngalʼiki-ze, kua ngi kambe ngó kúfua; ukota-phe ua-nda ku ngi bhandulula kima kiahi?
33Jakobo uixi: Ngi lokele-phe kizuua kia lelu; muene anga u mu lokela, u sumbisa o ukota uê kua Jakobo. 34Jakobo anga u tela Izaú mbolo ni makunde; anga u dia, u nua menha, u balumuka-bhu, uia njila iê; kala kiki Izaú, ukota uê ua u kita ki kima.
നിലവിൽ തിരഞ്ഞെടുത്തിരിക്കുന്നു:
Dimatekenu 25: KMB80
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Kimbundu Bible © United Bible Societies, 1980.
