Luka 22

Ŋutu ga ’yu tatuja Yesu

(Köti Matayo 26.1-5; Marako 14.1-2; Yoane 11.45-53)

1 # Yuö 12.1-27 Nyena a rorwe lo Ambata nagon ’bak Kape gwe nyona.Ŋilo rorwe luŋu a Pasaka. 2A koanejin temejik se ko katodinök ti Saresi ti Mose ga ’yi kiko logon tatuari Yesu, kogwon lepeŋat kukujönö ŋutu.

Yuda a ruggö tiŋdu Yesu i tatua

(Köti Matayo 26.14-16; Marako 14.10-11)

3A Satani lupöni ko Yuda lo luŋu a Isikariota i toili, logon a kenaki i ŋutu kajujumuk puök wot murek lo; 4a nye iti tu, a tujamaki ko koanejin se ko dumalak ti katiyuk ti Kadi na Ŋun ko nye böŋö tiŋdu Yesu ada ko lepeŋat i könisi anyen tatatua. 5A lepeŋat iŋge lyöŋön, a milyekiŋdye tiŋdu Yuda gurut. 6A nye iŋge ruk, a ga ’yi diŋit na ’but nagon lodir lo ŋutu ’bayin anyen wukiŋdya lepeŋ kase i könisi i tatua.

Yesu a saŋu ŋutu kanyit i teteŋdya na kinyo lo Pasaka

(Koti Matayo 26.17-25; Marako 14.12-21; Yoane 13.21-30)

7A lor lo rorwe lo Ambata nagon ’bak Kape ko ’dure, logon ’duŋöri kilolor lo Pasaka. 8A Yesu soŋdi Petero se ko Yoane, a kulyani adi, Iti ta, ko tetenakiŋdye ta yi kinyo lo Pasaka ajo anyen yi böŋö nyonyö. 9A se pije lepeŋ adi, Do ’dek yi teteŋdya ya?

10A nye waddi lepeŋat adi, Mete ta, a nagon ta aje lupö köji kata nu, a ta de rume ko ŋuto logon ’doggu mu ’da lo pioŋ. Nyena keporo ta lepeŋ i lukata na kadi nagon lepeŋ lupö kata nu;

11kulyani ta ko monye kadi adi, Katodinönit lo pija do adi, Niya kadi na kömu nagon nan se ko ŋutu kwe kajujumuk de nyesi rorwe lo pasaka kata? 12A nye de kwekiŋdye ta kadi duma nagon a koŋilore nagon aje peta; tetene ta teten ŋo liŋ ajo nyu. 13A se iti tu, a se ryeji ŋo liŋ gwoso nagon nye aje takiŋdye se nu; a se teteŋdi kinyo lo Pasaka,

Nyeŋ na MATAT likaŋ

(Köti Matayo 26.26-30; Marako 14.22-26; 1 Korinto 11.23-25)

14A nagon diŋit aje po, a Yesu si ’dakine kak i nyesu se ko luyökie i pirit na geleŋ, 15a nye kulyani ko se adi, Nan ko pusök i nyesu na ŋilo Pasaka ko ta i pirit na geleŋ a kokwe nagon nan a ko nyuŋ ŋoŋga, 16kogwon nan takiŋdya ta adi, nan mo ti nyö nye koti kwöŋ tojo ko tokoret nanyit mo a kweya a mo konani kona i Tumatyan na Ŋun. 17a nye ’dumuŋdye kopo, a nagon nye aje tiŋdu Ŋun tinate nu, a nye kulyani adi, Wuji ta, ta liŋ ko ’börik möji ta; 18kogwon nan takiŋdya ta adi, suluja soŋinana nan mo ti möju pioŋ ti ludweki ti binyo tojo ko Tumatyan na Ŋun aje po. 19A nye ’dumuŋdye ambata, a tiŋdi Ŋun tinate, a nye pipiŋdye pipiŋdya a tiŋdi lepeŋat, kulya adi, Na a mugun nio nagon aje tiki kogwon kulya kasu na. [Koŋdi ta sona i yeyeöddu na nan. 20#Yer 31.31-34a nagon se aje jo nyesu nu, a nye köti ’dumuŋdye kopo, a kulyani adi, Binyo na gwon i lo kopo kune a tomoret ludukötyo nagon a tetena ko rima kwe, nagon a ’buköki ta.] 21#Sau 41.9Meddi ta, ŋuto lo tiŋdu nan i tatua lo yi söju konin ko lepeŋ i pirit na geleŋ. 22Te, nan ŋuro lo ŋuto wuwuddya i na kak gwoso nagon aje wulöki nan nu, ama gwon a delya i ŋuto logon a tiŋdu nan i tatua lo! 23Nyena a se suluje totopi ko ’börik ko lon lose lo koŋdya na ŋo.

Rerenyesi kode ŋa lo gwon a duma

24 # Mat 18.1; Mar 9.34; Luk 9.46 A kajujumuk koti poki i rerenya ko ’börik ko lon lose lo yeyeŋ adi lepeŋ lo gwon a duma. 25a Yesu kulyani ko lepeŋat adi, Moran ti na kak tutumatyan ko ŋutu kase, a kasarak kase luŋuni a Kaparak ti jur lose. 26#Mat 23.11; Mar 9.35#Mat 20.25-27; Mar 10.42-44Ama kine kulya ti gwe ti gwon sona kasu kiden; kolumbö ti nye logon a duma kasu kiden lo ti nye gwe a lo ’dit, ko ti kanyömönit gwe gwoso ŋuto logon kikitakiŋdya lo.

27 # Yoa 13.12-15 Ŋa lo gwon a duma, nye lo si ’da i nyesu lo le, kode ŋuto lo kitakiŋdya? Ŋona ti gwon a nye lo si ’da i nyesu lo le? Ama nan gwon kasu kiden gwoso ŋuto lo kikitakiŋdya.

28Ta a ŋutu logon a ’depakiŋdya köyö i möriesi kwe; 29nyena gwoso nagon Baba aje wulökin nan tumatyan na, nyena nan köti wuwulökin ta

30 # Mat 19.28 anyen ta böŋö nyenyesu ko mömöju ko nan i pirit na geleŋ i tumatyan nio, ko anyen si ’da i si ’daesi ti tumatyan i ’duŋgö na kulya ti kötumiton puök wot murek ti Yisaraele.

Yesu a jambu adi Petero mo rerenya nye

(Köti Matayo 26.31-35; Marako 14.27-31; Yoane 13.36-38)

31Simona, Simona, mete, Satani a piyuŋdya ta anyen ŋoŋoja ta gwoso ’bolot; 32ama nan a momo ’yu kogwon kulya kunok adi ti yupet inot gwe ti Iwariara. Nyena do, na löpuŋge do koti na, togole togo luŋösurök. 33a nye waddi adi, MATAT nan gwon ajo i moraddu ko do i rereka ko i tatua.

34A Yesu waddi adi, Petero, nan takiŋdya do adi, sukuri de ti sira i lo lor tojo do a renya daŋin musala adi do a ko den nan.

Saresi i kulya ti likitiat, ko jurakan se ko baŋdujin

35 # Mat 10.9, 10; Mar 6.8, 9; Luk 9.3; 10.4 A Yesu pije kajujumuk adi, I diŋit na soŋdi nan ta kaŋo ’bak likitiat ti gurut, ko jurakan ko kamuka nu, ta ŋona a wiwinya nene ŋo le? A se ruŋge adi, ’Bayin, yi a ko wiwinya. 36a nye takiŋdye lepeŋat adi, Ama soŋinana ti nye lo gwon ko likiti lo gurut kode köti kojurak lo ti nye joŋgi, ti nye logon ’bak baŋdu lo ti tugwoŋi boŋgo nanyit ko ti gwöruŋdye baŋdu. 37#Yis 53.12Nan takiŋdya ta adi, A jama i kulya ti Ŋun na wurö adi, Lepeŋ a kena ko katoronyak i pirit na geleŋ. Kilo kulyaesi agu ködyö kokonaki nan, kogwon ŋo liŋ nagon aje wurö i kulya kwe kune gwe i kona.

38A se kulyani adi, MATAT, mete, baŋdujin murek makulo. A nye kulyani ko lepeŋat adi, Kine kulya aje jo.

Yesu a momo ’yu Ŋun ko pusok

(Köti Matayo 26.36-46; Marako 14.32-42)

39A Yesu iti tu a iti i Mere lo Jeitun gwoso na yeŋ na; a ŋutu kanyit kajujumuk moraddi ko lepeŋ. 40a nagon nye aje ’dur i ŋinu pirit nu, a nye kulyani ko lepeŋat adi, Kwakwaddi ta kwakwaddu, anyen moriesi böŋo gwon ti pokin kasu ki. 41a nye ko mugun nanyit iti kaŋo kase kata ko kwake gwoso nagon ŋurupit bubulo gubaji nyin, a nye rugwuŋökine kak a kwakwaddi kwakwaddu, 42adi, Baba, ko do ’de ’dekan, ’dumara lo kopo lo ŋoŋga kaŋo köyö, ama ti gwe ti gwon gwoso ’deket nio, ama ti konani gwoso i ’deket inot. [ 43A malaikatat lo puku ki yu ko lepeŋ ni, a togo ’yi lepeŋ. 44a nye ŋoŋgi ŋoŋga i töili a momo ’yi ko pusök, a ŋiŋiresi kanyit ’do ’done kak gwoso rima na ’don.] 45a nye ko ŋine ki i kwakwaddu, a nye yitwene yitwe ko ŋutu kanyit kajujumuk ni, a ryeji se i doto kogwon delya. 46a nye pije se adi, Nyo nagon ta dodoto? Ŋine ta ki ko kwakwaddi ta kwakwaddu anyen möriesi böŋö gwon ti pokin kasu ki.

Moka na Yesu

(Köti Matayo 26.47-56; Marako 14.43-50; Yoane 18.3-11)

47A nagon Yesu nyuŋ kukulya nu, a lodir lo ŋutu lo ’dure. A ŋuto lo luŋu a Yuda logon a lele lo ŋutu kajujumuk puök wot murek kulo nyömuŋdye lepeŋat. A nye poŋdi ko Yesu ni i roman ko ’bi ’biyet. 48a Yesu pije lepeŋ adi, Yuda, do roman ko nan ko ’bi ’biyet anyen tiŋdu nan ŋuro lo ŋuto i tatua le? 49A nagon ŋutu lo gwon ko Yesu kulo ko meddi ŋo nagon de kokona kune, a se pije adi, MATAT, ti yi toke tok ko baŋdujin? 50A lele lose toggi ’dupiet lo koane duma, a tukuŋdye swöt lonyit lo lutaten kaŋo. 51A Yesu waddi adi, Kolöki ta! Aje jo! A nye ’bo ’yi swöt lo ŋilo ŋuto a toliŋge lepeŋ.

52A kirut Yesu pije koanejin temejik ko dumalak ti aseker katiyuk ti Kadi na Ŋun se ko ŋutu temejik logon a po ko lepeŋ ni kulo adi, Ta po ko baŋdujin ko turya lobot i morga na nan gwoso nagon nan a karyakanit le? 53#Luk 19.47; 21.37Na gwoŋdi nan ko ta perok liŋ i Kadi na Ŋun nu, a ta gwe a ko mok nan. Ama na a diŋit nasu, ko a na riŋit na mudwe.

Petero a renya adi nye a ko den Yesu

(Köti Matayo 26.57-58, 69-75; Marako 14.53-54, 66-72; Yoane 18.12-18, 25-27)

54A se morgi Yesu, a nyömöddi lepeŋ kaŋo, a se joŋgi lepeŋ ko koane duma mede. A Petero kepoddi lepeŋ wörö pajo. 55A se iŋge to ’debba kimaŋ i ’baŋ kiden, a se si ’dani kak dumbö ŋina kimaŋ, a Petero si ’dani kase kiden. 56a nene koliŋonit ’diet iŋge met lepeŋ i si ’da i parara na kimaŋ, a diŋe lepeŋ go, a kulyani adi, Lo ŋuto köti a gwon ko lepeŋ i pirit na geleŋ.

57Ama a Petero renyani renya adi, ŋuro na, nan a ko den lepeŋ. 58Diŋit a na ’dit, a lele ŋuto meddi lepeŋ, a kulyani adi, Do köti a lele lose. Ama a Petero waddi adi, Ŋuto lo, nan ’bayin a nye. 59a i mukök na diŋit nagon gwoso saa geleŋ, a lele ŋuto tiddye parik adi, ’Diri gwak lo ŋuto köti a gwon ko lepeŋ i pirit na geleŋ, kogwon nye a Galilayatyo. 60Ama a Petero waddi adi, Ŋuto lo, nan ti den ŋo nagon do jajam kine. ’De ’de nagon nye nyuŋ kukulya nu, a sukuri lo sirani.

61A MATAT wöriŋöni woriŋo a diŋe Petero, a Petero iŋge yeyeoro kulyaesi logon MATAT a jamakin nye kulo adi. A kokwe nagon sukuri a ko nyuŋ sira i lo lor na, do de rerenya nan daŋin musala adi do a ko den nan. 62A Petero lupuŋdye kaŋo a gwine gwien parik.

Yesu a ’dö ’döyo ko a ’bito

(Köti Matayo 26.67-68; Marako 14.65)

63A ŋutu lo tiju Yesu kulo gwe i kwekweni ko lepeŋ a se gwuddye lepeŋ.

64A se muŋge konyen kanyit a pije lepeŋ adi, Ŋa lo gwuddyö do? Keŋ koi!

65A se iŋge jambu ŋo jore nagon ’dö ’doyorikin lepeŋ.

Yesu i komor na momoret na ŋutu kaliliyak lokukwön

(Köti Matayo 26.59-66; Marako 14.55-64; Yoane 18.19-24)

66Nyena ko kak aje waran, a momoret na ŋutu temejik ko koanejin temejik se ko katodinök ti Saresi ti Mose momoruŋdye i pirit na geleŋ, a Yesu jweni ko lepeŋat i komor i lilia, 67a se pije adi, Do a Masia le? Taki yi. A nye waddi adi, Ko nan a takin ta a ta de tine yuŋ;

68a ko nan a pi ta a ta de tine waddu.

69Nyena suluja soŋinana tojo ko ŋerot nan ŋuro lo ŋuto mo sisi ’da ko ŋun Loriŋit i könin lutaten. 70a kirut lepeŋat liŋ pije adi, Do a Ŋuro lo Ŋun le? A nye waddi lepeŋat adi, Ta aje tuk adi nan a nye. 71a se kulyani adi, A yi ’deke kunie tökoresi a ti nyo? Yi ko ’borik aje yiŋ kulyaesi lo lupe kaŋo kanyit i kutuk kilo.

നിലവിൽ തിരഞ്ഞെടുത്തിരിക്കുന്നു:

Luka 22: BBE

ഹൈലൈറ്റ് ചെയ്യുക

പങ്ക് വെക്കു

പകർത്തുക