Hanana Enjil 5
5
Bag. 5.
1Terin aharro Yahudichina kore wer dasum. Yesu wide Urushalimgir kujsum.
2Teddo Urushalimir, egedina babnai, birke wer dasum. Tenn erigon Ibriged Betesday esan. Hoha dicchi kosum. 3Inder zoli digrichi weri busan odilirton, dugrigon, afogriligon, batibuligon. Essina guyarki erjedagsan. 4Mine malaika wer gir bagidti birken tur shugurka essigi aguyigirsum. Eddi koyal guyarn aharro shugril agenansum tenna oderton, tenna ode min ekingon.
5Mandogon dasum zol odil wer jen telatin idwirton. 6Ingi Yesu nalos teddo bungon, wide iyiros watti noso werroton teddor esingi wetirsum: „Abirigna genaningi?“ 7Odil rude wetirsum: „Wo anna tirti, ai zol wekki komnim, aigi birken tur soke undrilgi essi guyinna kello. Ai imbelliy ankiri, wer ann owollo ashugrosin.“ 8Yesu wetirsum: „Imbel kute teb! Enna angaregi soke injed talos!“ 9Tenna wattin tur id tayibanos tenna angaregi soke injed wide talossum. Man ugroskon samten ugros esum.
10Yahudichi id tayibanoselgi wetirsan: „Elongu samtema! Ekki hiletirmunum enna angaregi soke injed talerar.“ 11Ter rude wetidirsum: „Aigi tayibkirel, ter wedensum: Enna angaregi soke injed wide talos an.“ 12Tekki isigsan: „Ni terre in zol ekki wetirel: Enna angaregi injed wide taler an?“ 13Zol tayibanel iyirkomnum ni ter esingi. Mine Yesu zolin barerton aziltakkoskosum. Man agarrogon jematti wer dasum.
14Manin aharro Yesu tekki jaman tur eled wetirsum: „Er eleken tayibanossum. Waye owittiged zenbigi awmen, owoldogor kosir tomeninna joro.“ 15Ter tale jurgi Yahudichigi wetidirsum: „Yesu teran aigi tayibkirel.“ 16Inin joro Yahudichi Yesugi atursan, ingi samten tur awingad. 17Yesu rude wetidirsum: „Abo ittagbokon aawin. Aigon aawrin.“ 18In werena jorogon Yahudichi digrigir abirigsan tekki berarki, samtena togar agudenaimunum, ama artigi atimbabkiringad, widegon tennewertigi artigodon awekringad.
19Yesu rude wetidirsum: „Aleged, aleged irgi wetidirri, tod eske tennewertirton haja wekki awmunum. Timbab awingi uru nalka, man awin malegi, ter awidna kidti tod aawin. 20Mine abo todti adolin. Wide ter awin malegi aamdin. Inin dogor dulgon bamintirkanin, iri ajiberunna joro. 21Mine abo dieligi aagsin nawite, ikke todton tennawre ter abirginna tirtigi bagsin. 22Abo zol wekk adinemnum. 23Ama todti dinad malegi tirsum, male todti kermeranna joro, abogi akermeran nawite. Todti kermemenil abo tekki ishinelgongi akermemnum. 24Aleged, aleged irgi wetidirri, anna weregi gijril wide aigi ishinelged amnel, ayar dimendi tendum. Wala dinadir tamnum, ama diarroton ayarkir torarna masir. 25Aleged, aleged irgi wetidirri, saa wer bitan, won ter elekentonum, tedder dibuli zolna todna hisagi bigijirran. Wide agijringon baïran.
26Miney ankomnum, abo tennewertir ayarki kon nawite, ikkegon todti tirsum, ayar tennewertir dangir. 27Gudragon tirsum, diner an, zolna tod engad. 28Indeton ajibemenwe. Saa wer bitakanin, tedder techir dabul male todna hisagi bigijirkandan. 29Adelgi awel malegon ayarkir bimbelkandan. Won uski awengon dinadtir bimbelkandan. 30Ai eske annewertirton haja wekki awminim. Gijirrin nawite bidineri. Anna dinadton sewam. Mine ai abirigringi ai akashmendingad, ama abo aigi ishinel abirgingi.“
31„Ai on annewertigi ashehedetirkiri, anna shahada mursum. 32Aigi ashehededenil owittima. Aigon iyirrin tenna shahada, tekked aigi ashehededenin, aley engi. 33Iri Hananai ishinkosun. Tekkon alegi shehedetirsum. Won 34ai id werna shahadagi awerisminim. Ama ingi ai awerin, irgi halsew an. 35Ter komsedi aribe ulibul ter esum. Won irgon birigsun tenna dawiged kinnekki gurerungi. 36Ama ai Hanana shahadan dogor dul wekki korin. Mine awdi aigi abo kemiler an densinigi, tir tinna kidir aigi ashehededendan abo aigi ishinsingi. 37Abo aigi ishinelgon aigi shehededensum. Kidir iri tenna hisagi gijirkomnum wala tenna hegagi nalkomnun. 38Wala tenna were idder kewidbumnum. Mine iri ter ishinsinna tirtigi aamnemendungad. 39Iri bacchichig akashrun. Mine tidder teran, iri innewertir awerun, ayar dimendigi bellu an. Won tir teran aigi ashehededenili. 40Ikke bungon y iri annai tararki abirigmunun, aïrunna jiradilo.“
41„Zolina dulkanegi adolminim. 42Ama irgi iyirosirsim artina dole idder dameningi. 43Ai tasim abon erir. Won iri aigi gebladti monsun. Echel wer tenn erir takin, mangi iri bigeblerun. 44Won minegon iri bamnerun, ittiwrinaiton dulkanegi akashrungon? Ama dulkane arti habbernaiton talgi akashmunun. 45Innewertir wemenwe, ai abon owollo irgi bishekeringi. Irgi bishekel Muse teran, tendogor inna rejagi kujredagrunna tirti. 46Ir on aleged Musegi aamnekokrun, aigedgon bamnesun. Mine ter addeton teran bajkosum. 47Won iri manina bacchichigi aamnemenkurun, won mine anna weregi bamnerun?“
നിലവിൽ തിരഞ്ഞെടുത്തിരിക്കുന്നു:
Hanana Enjil 5: XNZ1912
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Published by the British and Foreign Bible Society in 1912.
