Suku-saakị 6
6
Tomi Si-sịḅịḅio-sụa Ḅụramam
1 #
Job 1.6; 2.1 Tomi tomikiri mẹ ḅụ saakị lolo-kama tẹ in eremịna-awọmẹ iyi-iyi ịn pịrị tẹso, 2Tamụnọ owiapụ-awọmẹ#6.2 Tamụnọ owiapụ-awọmẹ jen-apụ ḅẹẹm, Tẹmẹ atomi anịanịa, enjeliapụ anịanịa, tẹmẹ kụrọ tẹ apụ ma nwẹnị ẹrị mịnẹ tomina eremịna-awọmẹ ma iḅi wararị; tẹ ịn nwẹnị ịna ḅụụ-ḅẹlẹ apụ sẹlẹ, sẹlẹ sime. 3Anịtẹso KỊNỊNYANAḄỌ ḅe nwẹnị ḅẹẹ, “Ị̀ ḍumo-pịrị-ọwụ mẹ ḅarị tomi oju ḅio sime gbamaso ḅịa, kẹ gotẹ ọkọ ḅẹẹarị, ini anie meni; kụma ịn ḍumo mu kụra sonioa asi (120) la ḅa.”
4 #
Kịẹ 13.33
Arị ene ma ḅụ pịkị arị asakị ma ḅọrọ tẹ sakị ḅụ sọ, tomikiri mẹ ḅụ ḍụḅa-ḍụḅatẹ ịnyọ nyana owiapụ emi, tẹ in ḅo tomina eremịna-awọmẹ ma na simem, tẹ awọmẹ iyi ịn pịrịm. Mịna apụ ma anie elemu iḅere-iḅerea sakị ḅẹ kụrọ nyanatẹ opu aị mịẹ-mịẹ tẹ ereso opu atomi ma.
5 #
Mat 24.37; Luk 17.26; 1 Pit 3.20 KỊNỊNYANAḄỌ ḅe nwẹnị ẹrị mịnẹ tomikiri mẹ ḅụ tomi asi-sịḅịḅio mẹ ḍụḅa tẹ, anịsakị tomi kuroma ḅụ ịn mịẹ ḅẹ tẹ sakị mamgba ịna aḅioḅẹngbọ simearị aị goyegoye, si-aị sikima jen ofori. 6KỊNỊNYANAḄỌ ḅe nwẹnị kururu mịnẹ tomikiri mẹ ḅụ ò tomi tẹmẹ tẹ ye mẹ, tẹ anị nwẹnị ọ̀ ḅụụ-ḅẹsọ mu ọ̀ tẹmẹ la. 7Mie ḅụ KỊNỊNYANAḄỌ ḅe nwẹnị ḅẹẹ, “Tomi ma tẹ à tẹmẹ tẹ apụ ma, tomikiri mẹ ḅụ arị ịn ọfịn siin ḅa, anị tomḅọ-o, piri-ḅio-ḅẹ nama-o, ikiriarị aị-o, So-tọrụ fiin-arị afeni-o, à gbala ịn tẹmẹ ye mẹ ḅụ tiye-ì-gbo ḅẹẹ tẹ ẹrẹsị.” 8Kụma KỊNỊNYANAḄỌ ḅe ḅụụ-ḅẹlẹ nyanam Noha ḅụ.
Noha KỊNỊNYANAḄỌ ḅe ḅụụ ḅẹlẹmam
9 #
2 Pit 2.5
Mịna apụ ma anie Noha aḅụọ ḅẹ apụ ma. Noha anie karakara tomḅọ, ọ̀ ḅụọ ḅụ ọ̀ ḅụụ ḅẹẹ-ḅẹẹye ofori; Noha Tamụnọ na gbọrụ ḅụ mẹnjịm tẹ ọ̀ ḅịḅị pokim. 10Tẹ Noha tẹra owiapụ-awọmẹ iyim: Sẹmụ na, Hamụ na, Jafẹtị na.
11Mịọkụ Tamụnọ ḅe ḍiki-tọrụ ḅụ tomikiri mẹ ḅụ si sikima jen ofori, anịsakị ye kẹ kịnị lama amịẹaị mie tomikiri mẹ ḅio ḅin wararị ye. 12Tẹ Tamụnọ nwẹnị tomikiri mẹ ẹrị, anịsakị ḍikii, anị ḅụ ọkị-ọkị ye ofori, gbala tomi mamgba ịna etela mịẹ sima fama tẹ tomikiri mẹ ḅụ.
13Tamụnọ nwẹnị Noha ḅẹẹ, “À mịẹtẹ tomi mamgba aḍumo fama ḅẹ ḅara kẹ ye tọn-pẹlẹ tẹẹ, gbala ye kẹ kịnị lama tomina ḅụụ ḅụ ḅọrọ ḅo tomikiri mẹ ḅụ ḅin tẹ, ḍikii àrị ini na tomikiri mẹ na kẹ sụa fama ḅa. 14Ịn kẹ gọfa sịn-arị sịn mẹ kẹ opu arụ ịkasị ị́ ḅụụ pịrịị, tẹ opu arụ mẹ ḅio mẹ kẹ ḅio-ḅio pẹlẹẹ, tẹ mịẹtẹ anị firi ḅịa kpootẹ agba kẹ ọḅụ-na-kuḅu-na ọmbị gbaịn. 15Mie ị́ kẹ anị ịkasị ḅarị ḅara: opu arụ mẹ ḅẹ nangwọ anie gbọrụ ẹndẹ na mesi oyia aḅụọ-kuḅu finji (133 m); anị ḅẹ finjima anie tesi oyia aḅụọ-kuḅu finji na sọnọ na (22 m); anị ḅẹ gele anie mesi sọnọa aḅụọ-kuḅu finji (13 m). 16Isun mịẹ opu arụ mẹ pịrị tẹ isun mẹ ḅara tẹra ẹnzụ pembe ye kẹ arụ ọgọnọ mẹ ḅụ gele. Arụ mẹ akaka ḅụ ḅọkọ sụa. Tẹra dẹkị ḅara kẹ arụ mẹ ịkasịị, ọgọnọ na, ogbo-ḅiri na, suku-ḅio na. 17À ḍumo ọwụ sararị tẹ So mẹ suku-ḅio simearị meni sụa aị mamgba ḅaa fama ḅẹ gotẹ opu minji kẹ ḅo tomikiri mẹ gbaịn ḅa. Tomikiri mẹ ḅụ sime ye goyegoye fịị ḅa. 18Kụma àrị ị́ na ị̀ ọḅọkụ fị ḅa, anịsakị ị́yẹrị na, í owiapụ-awọmẹ na ị́ ta na, í owiapụ-awọmẹ ma sime-ereme na ị́ ḅụụ sọ tẹ mị arụ mẹ ḅụkụlọ ḅa. 19Anịsakị ḍumo wararị tẹ meni sụa aị mamgba ḅụ ị́ maaịn-maaịn, owi-na-ịyọrọ-na ọkị-ḅo arụ mẹ ḅio sẹịn ḅa, mịẹtẹ arị ị́ ḅụụ sọ tẹ ḍumo ḅẹ ḅara. 20Feni kịrị-kịrị ma na, nama kịrị-kịrị ma na, kiri mẹ ọgọnọ ikiriarị kịrị-kịrị anama ma goyegoye na ḅụ, arị wẹrịtẹ sime kịrị-kịrị ḅara ḅụ maaịn, maaịn kẹ ḅo ḅụkụlọọ, mịẹtẹ ịn ḍumo ḅẹ ḅara. 21Mie kụma fị-fị fịye ḅara-ḅara sọ ọkị sụa sẹịn, tẹ arị kokoo, anịsakị anị fịye sọ ị́yẹrị na, ini na pịrị ḅa.” 22#Hib 11.7Noha Tamụnọ tọn ọ̀ pịrị ye mẹmgba mịẹ famam.
നിലവിൽ തിരഞ്ഞെടുത്തിരിക്കുന്നു:
Suku-saakị 6: KBTP
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
(C) The Bible Society of Nigeria
