Suku-saakị 4
4
Keni Na Ebẹlị Na
1Mịọkụ Adamụ ọ̀ ta Ivu na gbolomam, tẹ á fura tẹ Keni iyim. Á nwẹnị ḅẹẹ, “KỊNỊNYANAḄỌ ḅe ḅarasụa ḅụ à gbọrụ owiḅọ iyi tẹ.” 2Sakị kẹlẹ ḅọrọ tẹso, á pịkị ori iyimbere Ebẹlị iyim. Ebẹlị anie anana ḍikiḍikiḅọ, anịsakị Keni anie ḍụọ-kọrịḅọ 3Sakị kẹlẹ ḅọrọ tẹso, Keni ọ̀ ḍụọ mẹ ḅio ò soku ḅo fịaị kẹ ḅo agba mịẹ KỊNỊNYANAḄỌ ḅe pịrịm, 4#Hib 11.4tẹ Ebẹlị pịkị ori anana ma ḅẹ tarị iyi aị ma ḅẹ jaị ḅụ ḅẹlẹkị sụa apakịrị ma ọkị-ḅo KỊNỊNYANAḄỌ ḅe pịrịm. KỊNỊNYANAḄỌ ḅe nwẹnị Ebẹlị na ọ̀ mịẹ agba mẹ na daa-ọkị; 5kụma Keni na ọ̀ mịẹ agba mẹ na ọ̀ daa-ọkịa. Mie ḅụ Keni nwẹnị ịganị lama, tẹ tọrụ-fụrụma. 6KỊNỊNYANAḄỌ ḅe nwẹnị Keni ḅẹẹ, “Í tiegotẹ ịganịarị, anịsakị ị́ tọrụ tiegotẹ fụrụ? 7Ị́ iḅiọkụ mịẹ kụma, arị ị́ daa-ọkị ḅịa? Anịsakị ị́ iḅiọkụ Mịẹ-a ḅẹḅẹ, si ị́ ḅọkọ anga kpụmbụlụ sime wararị; anị ḅiiarị ị́ anị ḅii ye, ḅii ye mịẹ, kụma ị́ anị nẹngịma nyanam.”
8 #
Mat 23.35; Luk 11.51; 1 Jọn 3.12 Keni nwẹnị ori iyimbere Ebẹlị ḅẹẹ, “Yee wa paka-so piri-ḅio mu.” Ịn piri mẹ ḅio simearị ogbo, Keni nwẹnị saakị tẹ owu kẹ ori iyimbere Ebẹlị paka tẹ ọ̀ ḅaa.
9Anịtẹso KỊNỊNYANAḄỌ ḅe nwẹnị Keni gbela, “Í iyimbere Ebẹlị ọ̀ tọ-anga emi?”
Ọ̀ nwẹnị pakịrị, “À nimi-a; yẹrị ḅọrọ ì iyimbere ḅe ḍikiḍikiarị?”
10 #
Hib 12.24
KỊNỊNYANAḄỌ ḅe nwẹnị ḅẹẹ, “Í tiegotẹ nwẹn sime ye mịẹ? Í iyimbere ọmbie mẹ pọkọ kiri mẹ ḅio sime tẹ owu ị̀ pịrịarị. 11Anịsakị mịọkụ kiri mẹ tẹ amịna ḅịḅị finji tẹ ị́ ḅara ḅụ í iyimbere ḅe ọmbie mẹ daa-ọkị ye mẹ ḅụ í wori tẹ. 12Í kiri mẹ tẹkẹ ma tẹ fịye ḍiḅi sakị, ḍiḅi sakị anị ḅarị amịna ịnyọ pakama-ḅo ị́ pịrị ḅịa. Tomikiri mẹ ḅụ ị́ karakara nimi-a ḅọ sọ tẹ ikelekelema-ḅọrọ ḅa”.
13Keni nwẹnị KỊNỊNYANAḄỌ ḅe ḅẹẹ, “Ì fomu-ḅara mẹ ḍụḅa àrị inetẹ dogi ḅẹ ḅara nẹngịm. 14Ḍikii, mị gbọrụ ene mẹ ḅụ í kiri mẹ ḅụ ì dee-siin tẹ, anịsakị à pịkị ị́ tọrọkọ ḅụ ị̀ ḅụụ ḅọị ḅa; tẹ karakara nimi-a ḅọ sọ tẹ tomikiri mẹ ḅụ ikelekelema-ḅọrọ ḅa, anịsakị ị̀ ẹrị ḅọ ẹrị ḅọ nwẹnị ị̀ ḅaa ḅa.”
15Anịtẹso KỊNỊNYANAḄỌ ḅe nwẹnị ọ̀ ḅẹẹ, “Ọkọ-a, ḅẹḅọ-ḅẹḅọ tẹ Keni ḅaa ḅọ ḅaa ḅọ, sọnọma apụ Keni sịḅị ḅẹ gbẹẹfị ḅụ fịị ḅa.” Tẹ KỊNỊNYANAḄỌ ḅe nwẹnị elekima kẹ Keni oju ḅụ pakama, mịẹtẹ ḅẹḅọ-ḅẹḅọ tẹ ḅo ori na donia ḅọ, donia ḅọ ọ̀ ḅaa ḅịa ḅara. 16Anịtẹso Keni KỊNỊNYANAḄỌ ḅe tọrọkọ ḅụ mẹnjị-som, tẹ mu Ideni sin anga mẹ ḅẹ ịrụa-saakịarị-anga ịn kẹ Nọdị#4.16 Nọdị fiearị ye, Ikelekelema-ḅọrọ sịn anga ḅụ angam.
Keni Furo-ḅẹ-apụ Ma
17Keni ọ̀ ta na gbolomam, tẹ á fura tẹ Ẹnọkụ iyim; tẹ ọ̀ nwẹnị gbọrụ opu ama pakama, tẹ nwẹnị ori owiḅọtụḅọ ḅe ẹrẹ kẹ anị koro — Ẹnọkụ. 18Ịn nwẹnị Iradị iyi Ẹnọkụ pịrị, anịsakị Iradị anie Mẹhujahẹlị ḍa, anịsakị Mẹhujahẹlị anie Mẹtusẹla ḍa, anịsakị Mẹtusẹla anie Lamẹkị ḍa. 19Lamẹkị nwẹnị maa ereme sime, ini ḅẹ gbọrụḅọ ẹrẹ anie Ẹda, anịsakị osi-ḅọ ma ẹrẹ anie Zila. 20Ẹda, Jebalị iyim; ori anie inima tẹ opu anama ḍikiḍikitẹ akpụrụ-awarị pike-pike tẹ angarị apụ ma. 21Ori iyimbere ẹrẹ anie Jubalị anie inima tẹ nume-suapụ ma na, ọbọ farị apụ ma na, ye ofuro apụ ma na ḍaḅọ. 22Zila, Tubalikeni iyim; ori anie ojo na, ikulele na kẹ kịrị-kịrị akọrịnama-kọrịaị tẹmẹḅọ Tubalikeni ịyịmbara anie Nahama. 23Lamẹkị nwẹnị ori ereme ma ḅẹẹ:
“Ẹda na, Zila na, ọmịnị ị̀ pọkọ naa;
ọmịnị Lamẹkị ereme, ọmịnị à ḍukoarị ye pokii;
à gbọrụ owiḅọ ḅaa tẹ, ò ye kẹ ì lamam ẹrẹsị;
gbọrụ asatụḅọ, ori ị̀ ḅakụm ẹrẹsị.
24Sọnọma apụ nwẹnị Keni sịḅị ḅẹ gbẹẹfị ḅụ fị-fịị,
karakara-ḅara-ḅụ Lamẹkị sịḅị anie tẹra apụ fa kịnị inia si.”
Sẹtị Na Ẹnọsị Na
25Adamụ nwẹnị pịkị sin ọ̀ ta na gboloma, tẹ á nwẹnị gbọrụ owiḅọtụḅọ iyi, tẹ ẹrẹ kẹ ọ̀ sịn Sẹtị, anie árị mẹẹ, “Keni ḅaa Ebẹlị ḅe kiri ḅụ Tamụnọ jụmọ tọn ị̀ pịrị tẹẹ.” 26Ịn nwẹnị pịkị gbọrụ owiḅọtụḅọ iyi Sẹtị pịrị, tẹ ọ̀ nwẹnị ẹrẹ kẹ ọ̀ sịn Ẹnọsị. Anị sakị ḅụ mie tomi saakị KỊNỊNYANAḄỌ ḅe ẹrẹ sịn ye.
നിലവിൽ തിരഞ്ഞെടുത്തിരിക്കുന്നു:
Suku-saakị 4: KBTP
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
(C) The Bible Society of Nigeria
