Luk̆a 8

Yesos na Noums Oxorcalepe

1Hamuşen ç̆ut̆a oraşk̆ule Yeso, vit̆ojur mamgurale muşi k̆ala noğape do oput̆epe kogoxtu. Ğormotişi Mapoba ognapamt̆u do k̆ai ambai meçamt̆u. 2Vit̆ojurepe, p̆at̆i şurişen do zabunobaşen na muçites oxorcalepe, doloxe muşişen şkvit ç̆ink̆a na gamaxtu Mağdaluri na uʒ̆umenan Maria, 3İrodişi metele Xuzaşi çili na ren Yoana, Susana do çkva dido oxorcalepe hemu k̆ala rt̆es; hantepek na axenenan k̆onari Yesos do hemuşi mamguralepes nuşvelt̆es.

Tasişi Memgapura

4K̆at̆a noğaşen dido mitxanepe ok̆ibğesşk̆ule Yesok hentepes ham memgapura up̆aramitu: 5“Ar maxaçkale tasi oxaçkuşeni kogamaxtu. Na xaçku tasepeşi bazi gzap̆icis kelalu, k̆uçxepete dizu do k̆inçepek oç̆k̆omes. 6Bazi tasepeti kvalepunas keolu, tasi mzguduşk̆ule uʒ̆k̆areli doxomu. 7Bazi daz̆onas kamalu, mzgudesşk̆ule daz̆epek meşoşkvides. 8Baziti dobiras komelu, hantepek mzgudes do irdesşk̆ule oşi fara manz̆ines.” Hantepe dotkuşk̆ule “Uci na uğun ognas!”-ya uʒ̆u.

9Mamguralepe muşik “Ham memgapura mu itkven?”-ya do k̆itxes.

10Yesok hentepes haşo uʒ̆u: “Ğormotişi Mapobaşi mpulerepeşi oçkinu tkva meçameri ren. Mara çkvapes memgapurapete bup̆aramitam. Hemuşeni ki,

Oʒ̆k̆edannati mot z̆iromt̆an,

Ognannati mot oxoʒ̆onamt̆an.

11Memgapura haya itkven: Tasi Ğormotişi nena ren. 12Gza k̆ala na melupe ham nena na ognes k̆oçepe renan; mara uk̆açxe İblisi komulun, mot icert̆an do mot muçiturt̆an-ya do nena gurepe mutepeşişen eşumers. 13Kvalepuna k̆ele na melespe, na ognes nena xelebate moik̆ardes, mara peso na var uğurt̆esşeni, xvala ar mʒika oraşeni ucerunan. Hantepe niʒadanşk̆ule oceru naşkuman. 14Daz̆epeş oşkendas na dololespe, nena kognes, mara gza mutepeşis naones, skidalaşi derdepe, zenginobape do sefaşi doloxe komeşişkides. E do soğunis hentepe k̆ai var içanenan. 15Dobiras na melespeti nena ognesşk̆ule hea k̆ai do k̆ap̆et̆i gurite na şinaxespe renan. Hantepe moç̆ibreri nuxondunan do k̆ai içanenan.”

Te Mot Mpulumt

16“Mitik k̆andeli nudvinams do uk̆açxe angi var mutums, varna dorçelis var eʒ̆udums. Na amaxtanenpes te az̆iran-ya do hea ok̆andeles geladuman. 17Hemuşeni ki, na va gamalasen, mpuleri mutu va ren. Na var içkinasen, na va gamalasen t̆k̆obaşa mutu va ren. 18Hamuşeni Ğormotişi nenas muç̆o nuucamt, hayas uk̆atalit. Na uğuns çkva niçasen. Mara na var uğun, miğun na daʒ̆onenti eiç̆opinasen.”

Yesoşi Lavoni

19Yesoşi nana do cumalepe komoxtes, mara gomti muşis k̆oçepete opşa na rt̆uşeni hemus var nanç̆ines. 20Yesos “Nana do cumalepe skani gale dginan. Si oz̆iramu unonan”-ya do ambai komeçes.

21Yesok, hentepes: “Çkimi nana do cumalepe, Ğormotişi nena na ognams do hemus na ducerspe renan”-ya uʒ̆u.

Yesok Zifozi Oslibams

22Ar ndğas, Yeso mamguralepe muşi k̆ala ar feluk̆as kogexedu do hentepes, “Ham t̆obas melenk̆ale mek̆ebilat”-ya uʒ̆u. Haşonite t̆obaş p̆icişen imendranes. 23Feluk̆ate nulurt̆esşk̆ule Yesos danciru. Hem oras t̆obas zifozi kogextu. Feluk̆aşa ʒ̆k̆ari amulurt̆u do p̆at̆i ar dulya omç̆urt̆es. 24Yesoşa ides do hea gok̆uʒxines, “Mance çkuni, Mance çkuni, bğururt!”-ya uʒ̆ves. Yeso eiselu, ixis do na empu dalgapes duperxu. Zifozi nik̆vatu do dislibu.

25Yesok mamguralepe muşis “Ocera so giğunan?”-ya uʒ̆u.

Hentepe eşkurdineri do goşaşeri artikartis “Ham k̆oçi min oren? İxi do ʒ̆k̆aristi geçinadums do hentepekti duceraman”-ya tkves.

Yesok Ç̆ink̆oni Ar K̆oçi Ok̆aams

26Yeso do mamguralepe muşi Galileaşi meleni t̆obaş k̆ele na ren Gerasurepeşi dobadonaşa komextes. 27Yeso let̆as gyobaz̆guşi hem noğaşen ar k̆oçi hemus keʒ̆agu, ham k̆oçis ç̆ink̆ape uonut̆u; do dido oraşen doni dolokunu var dolikunamt̆u, çkar oxorişa var amulun mara mezarepes skidurt̆u. 28Yeso z̆iruşi, gamiuru do Yesoşi k̆uçxes komatu. Zori xomate haşo uʒ̆u: “Yeso, iri-xoloşen didi Ğormotişi skiri, ma mu mak̆van? Goxveʒ̆ebur, ma mot monʒ̆orinapam!” 29K̆oçik haşo gamiuru, hemuşeni ki, Yesok pinti şuris ‘K̆oçişen kogamaxti!’-ya do geçinadudort̆un. Pinti şurik ordoşen ordo k̆oçişa mulurt̆u. K̆oçi zinciri do bork̆ilite k̆oreri rt̆u, ti muşi k̆alati ar k̆arauli yodgit̆unati, tok̆i niç̆k̆idamt̆u do ç̆ink̆ak uk̆oçeli svalepeşa gotorumt̆u.

30Yesok hemus, “Si mu gcoxons?”-ya do k̆itxu.

Hemukti “Legioni”-ya. Hemuşeni ki doloxe dido ç̆ink̆ape meşuxert̆u. 31Ç̆ink̆apek hemus axveʒ̆es ki ‘Ğunçkişa idit!’-ya do mot gemçinadumt̆an! 32Hem oras, rak̆anis ar didi ğecişi surik cumt̆u. Ç̆ink̆apek Yesos, “Ğecepeşa meşaptat”-ya do axveʒ̆es. Yesokti hentepes izni komeçu. 33Ç̆ink̆ape k̆oçişen moşaxtes do ğecepes komeşuxtes. Ğecepe rak̆anişen gemtumani gyuk̆ap̆es, t̆obas kodoluk̆ap̆es do dişkides.

34Ğecepe na ocvinamt̆espek, iri-xolo koz̆ires; k̆ap̆ineri noğapes do oput̆epes ham ambai ognapines. 35Hantepeşk̆ule xalk̆i ham dulyape oz̆iramuşeni Yesoşa keşaxtes. Yesoşa moxtesşkule ç̆ink̆apeşen moşletineri k̆oçi koz̆ires. Dolokuneri do noseri k̆oçi, Yesoş k̆uçxepes goʒ̆uxert̆u. Haya na z̆iresşeni xalk̆is aşkurinudort̆un. 36Hantepe na z̆irespek, ç̆ink̆oni k̆oçi muç̆ote muçitu, xalk̆is dup̆aramites. 37Hemindoras mteli Gerasurepes na şkurdesşeni Yesos axveʒ̆es ki mutepeşen igzalas. Heati goktinuşeni feluk̆as kogexedu. 38-39Ham oras, ç̆ink̆apeşen na moşletinu k̆oçik Yesos, “Mati skani k̆ala bort̆a”-ya do oxveʒ̆u. Mara Yesok, “Si oxori skanişa goikti, Ğormotik skanişeni mutxa na vu, ip̆aramiti!”-ya do k̆oçi mendoşku. K̆oçiti mendaxtu, Yeso muşişeni mupe vu mteli noğas ognapinu.

Ğuraşen na Edgitu Bozo do na İk̆au Oxorca

40Yeso melenk̆eleşa goiktuşk̆ule milleti hemus nagu, mtelik hea çumert̆es. 41Hem oras, sinagogişi tigemçanu na rt̆u, Yairi na coxons ar mitxani komoxtu. Yesos k̆uçxepes matu do “Oxori çkimişa komoxti”-ya do oxveʒ̆u. 42Hemuşeni ki, vit̆ojur ʒ̆ana k̆onari opodrage bozo muşi ğururt̆u.

Yeso, heşo ulurt̆uşk̆ule milletepe k̆at̆a k̆eleşen t̆ora keʒ̆izes. 43Hek vit̆ojur ʒ̆anaşen doni diʒxiri na gyalen ar oxorca kort̆u. Çkarti xekimis hea var ak̆audort̆un. 44Yesos ek̆aç̆işu do dolokunu muşis muç̆o elonʒ̆u, diʒxiri kodudgitu. 45Yesok, “Ma mik elemonʒ̆u?”-ya do k̆itxu.

İrik moivares, mara P̆et̆rek, “Mance çkimi, milleti kogogabğu, megokaçaman”-ya uʒ̆u.

46Mara Yesok, “Ma ar mitxak xe komemonʒ̆u, menceli na gamomixtu kobogni”-ya. 47Na vu, na var ampulasen oxoʒ̆onuşk̆ule oxorcak tirtineri moxtu do Yesoşi k̆uçxepes gaxvelu. Mtelişi ʒ̆oxles, hemus muşeni xe nonʒ̆u; xe nonʒ̆u do var, muç̆o ik̆au, dip̆aramitu. 48Yesok oxorcas, “E osuri, ocera skanik mogişletinu. Misobate idi!”-ya uʒ̆u.

49Yesok, op̆aramitu var oçodinuşa, sinagogiş tigemçanuşi oxorişen ar mitxa komoxtu do tigemçanus, “Bozo dogiğuru, arçkva mamgurapales mot aʒ̆uxer”-ya uʒ̆u.

50Mara Yesok haya ognuşi hemus: “Mot gaşkurinet̆as, xvala iceri, bozo skani muçitasen”-ya uʒ̆u.

51Yeso, k̆oçişi oxorişa amaxtuşi, P̆et̆re, Yani, Yak̆ovi do bozoşi nana-babaşen met̆a miti var amoşku. 52Mtelik bozos gyabgart̆es do k̆oreʒxumt̆es. Yesok hentepes, “Mot ibgart! Bozo var ğuru, xvala incirs”-ya uʒ̆u.

53Bozo ğureri na uçkit̆esşeni Yesos noz̆iʒes. 54Mara Yesok bozos xes ak̆nu do: “E bere, edgiti!”-ya uʒ̆u. 55Şuri xuraşa gaktu do bozo aşvacis kedgitu. Yesok, “Hemus ar mutu oç̆k̆omale komeçit”-ya do geiçinadu. 56Bozoşi nana-baba goişaşes do doskides. Yesok, “Hantepe çkva miti k̆ala mot zop̆ont”-ya do andu.

നിലവിൽ തിരഞ്ഞെടുത്തിരിക്കുന്നു:

Luk̆a 8: LZZ

ഹൈലൈറ്റ് ചെയ്യുക

പങ്ക് വെക്കു

പകർത്തുക