Luk̆a 16

Tolgonʒ̆k̆imeri Metele

1Yesok mamguralepe muşis haşo uʒ̆u: “Ar zengini k̆oçis ar metele kuonurt̆u. Ar ndğas metelek para gogindinams-ya do ok̆ut̆ales. 2Mance muşik hemus ducoxu do haşo uʒ̆u: ‘Skanişeni na bognipe mu ren? Meteloba na vişi xesabi komomçi, arçkva metele çkimi varti iva!’

3Metelek muşeburaşi, ‘Ma haʒ̆i mu p̆a? Mance çkimik ma metelobaşen gemt̆k̆oçums. Let̆aş dulya oxenuşeni menceli var miğun. Ok̆vandinuti oncğore maven. 4Metelobaşen memt̆k̆oçanşk̆ule oxori mutepeşişa muç̆o amomoşkvanen ma komiçkin’-ya.

5E do, mance muşis na eaʒxvespes tito-tito koducoxu. İptineris, ‘Mance çkimişen nak̆o egiʒxapun?’-ya do k̆itxu.

6Hemuk, ‘Oşi ozumaşe zeytinişi yaği’-ya uʒ̆u.

Metelek hemus, ‘Meʒxuşi senedi ezdi, manişa doxedi do jureneçidovit ozumaşe donç̆ari’-ya uʒ̆u.

7Uk̆ule majuras, ‘Si nak̆o egiʒxapun?’-ya.

Hemukti ‘Oşi sumyari dik̆a’-ya.

Metelek hemus, ‘Ezdi senedi, otxeneçi sumyari donç̆ari’-ya uʒ̆u.

8Mance muşik, elakteri dulya na ikoms metele, haşo noseri dulyape na vuşeni omʒku. Mtinala, ham oraneri skirepe, mutepes na nugaman k̆oçepe k̆ala dulya ikomt̆anşk̆ule, gotaneri k̆oçepeşen noseri ivenan.

9Ma haya giʒ̆umert, ham kianaşi mʒudi malepe, k̆atape moborga-ya do ixmarit! E do ham malepe gaçodanşk̆ule, uçodinu oras na dogadginanen oxorepeşa amogoşkvan. 10Ç̆ut̆a dulyapes emnieti na ixenen k̆oçi, didi dulyapesti emnieti iven. Ç̆ut̆a dulyas emnieti var ivenna, didi dulyapesti emnieti var ixeninen. 11Kianaşi moğordinace malepeşeni emnieti var ivertna, mtini mali mik emaneti mekçanoren? 12Çkvaşi malepeşeni emnieti var ivertna, tkvani na ren mali mik mekçanoren?

13Ar ç̆k̆oris jur mances ç̆k̆oroba var axenen. Arti moz̆uldun, majuras oroms; aris ducers, majuras gyoç̆onams. Tkva ar k̆ele Ğormotis do ar k̆eleti paras ç̆k̆oroba var gaxenenan.”

14Paras na oromt̆es Farisurepek, Yesoşi mteli nenape ognesşk̆ule, hemus noz̆iʒes. 15Yesok hentepes haşo uʒ̆u: “Tkva k̆oçepeşi ʒ̆oxle ti tkvani uk̆rimeli şinomt. Mara Ğormotis guris na giğunanpe kuçkin. K̆oçepes na moʒ̆ondunanpe Ğormotis moz̆uldun.

16Ʒ̆k̆onda K̆anoni do ambayocepeşi ora, Yanişi oraşakis konanç̆u. Yanişk̆ule Ğormotişi Mapobaşi k̆ai ambaepe kogoxtu. İri-xolok Ğormotişi Mapobaşa amaxtimuşeni inç̆işenan. 17Ʒa do let̆aşi gondinu, Ʒ̆k̆onda K̆anonis ar boncaş pirçişi gondunuşen k̆olai ren.”

Oçilu do Gamak̆atu

18“Oxorca muşişa gamik̆atas do çkva ar oxorca k̆ala na içilasen k̆oçis zina uxenun. Komoci muşişen gamak̆ateri ar oxorca k̆ala na içilasen k̆oçisti zina uxenun.”

Mak̆vande do Zengini K̆oçi

19“Ar zengini k̆oçi kort̆u. Hea ʒ̆it̆iaş metimoni ar porça dolokuneri k̆at̆a ndğas sefas doloxe ipxort̆u do şumt̆u. 20Mteli xura muşi pupuloni, coxo Lazare na gyoz̆in fuk̆ara ar mitxaniti kort̆u. Ham fuk̆ara k̆oçi ham zengini k̆oçişi nek̆nas naşkumt̆es. 21Fuk̆aras, zenginis magidas na gyuskidams punçxapete korba oz̆ğapu dido unt̆u. Ar k̆eleti coğorepek k̆oçis pupulepe ulok̆amt̆es.

22Ar ndğas fuk̆ara k̆oçi doğuru. Melaikepek hea ezdes do Avraamişa mendiones. Ham orapes zengini k̆oçiti doğuru do kodoxves. 23Ğurelepeşi kianas, dido na onʒ̆orinapamt̆es ham zengini k̆oçis, tolepe ezduşk̆ule mendrale Avraami do hemus na eludgin Lazare kaz̆iru. 24‘E baba çkuni Avraami, guris memiç̆vi’-ya do ducoxu. ‘Lazare çkimda moncğoni do k̆iti muşi ʒ̆k̆aris dolonʒ̆as do nena gemikosas. Ham daçxurepes doloxe dido mʒ̆orum’-ya uʒ̆u.

25Avraamik, ‘E skiri kokşunsi, skidalas si k̆aoba ganç̆u, Lazaresti p̆at̆oba. Haʒ̆iti hemus guri goindums, siti nʒ̆orum. 26Arti, tkvani do çkuni şkas ar ğunçki goşomiz̆inan ki, varti miti hakole tkvande mealen, varti ar mitxa çkuni k̆ele moalen’-ya uʒ̆u.

27Zengini k̆oçik ‘Heşo renna, e baba çkimi, goxveʒ̆ebur, hea baba çkimişi oxorişa mendoşkvi. 28Ma xut cuma komionun. Lazarek hentepes uci gedvas, hentepeti ham svas dololan do mot nʒ̆orumt̆an’-ya.

29Avraamik, ‘Hentepesti Moseşi do ambayocepeşi nenape kuğunan, hentepes niucan’-ya uʒ̆u.

30Zengini k̆oçik, ‘Var, e baba çkimi Avraami! Varti uci meçan! Ğurelepeşen ar mitxani var edgitasşakis hentepe Ğormotişa varti goiktan’-ya.

31Avraamik hemus, ‘Mose do ambayocepes var nuucanna, ğuraşen na edgitasen mitxanisti varti aceran’-ya uʒ̆u.”

നിലവിൽ തിരഞ്ഞെടുത്തിരിക്കുന്നു:

Luk̆a 16: LZZ

ഹൈലൈറ്റ് ചെയ്യുക

പങ്ക് വെക്കു

പകർത്തുക