Ubwandilo 4
4
Kaịnị na Abelị
1Po papo Atamụ alinkummanya unkasị Efa, umwene alinkukaba ikifụba, alinkumpāpa Kaịnị, alinkujoba alinkuti: Kyala āmbēle umwana unnyāmbala. 2Pānyụma po alinkumpāpa ugwamyabo gwa Kaịnị uju āli jo Abelị. Umwene Abelị jo āli ntị̄mị gwa ng'ōsị, lolị Kaịnị jo āli nndimamịgūnda. 3Pānyụma pali sịsịsị po Kaịnị alinkuntwalila Kyala ilịkemo lya ifị fyafụmaga mbulimị bwake. 4Jope Abelị alinkuntwalila ing'ōsị ija kwanda ukupāpịgwa mụntị̄mo gwake, bo ajibōlịle, UNTWA alinkwịkyela na Abelị nị̄kemo lyake. 5Lolị alinkusịtakwịkyela na Kaịnị nị̄kemo lyake. Po lelo Kaịnị alinkukalala fị̄jo alinkwịluka na kumāso. 6UNTWA alinkunndālūsya Kaịnị alinkuti: Ukalēle fịkị? Gwịlwịke fịkị na kumāso? 7Linga gwabōmbịle inụnụ, kali ikyenị kyako kikājaga kisangalufụ? Ngali nambilị̄le ilịkemo lyako. Lolị linga utịkubōmba īnụnụ ubutulanōngwa bukutegelị̄le bụkulōnda ukukutola; lolị sịkulōndịgwa ukuti ubulāmbikege.
8Po papo Kaịnị alinkujoba kwa Abelị unnụgụna alinkuti: Oko, tubūke kulukubo. Lelo bo bali nndukubo, Kaịnị alinkunsanụkila unnụgụna alinkunngoga. 9Po papo UNTWA alinkunndālūsya Kaịnị alinkuti: Alikūgu Abelị unnụgụnago? Umwene alinkummwamụla alinkuti: Ngamanya kuno alịko, ne nguntị̄ma une ugwamyitu? 10Umwene Kyala alinkunndālūsya alinkuti: Ubōmbị̄le sya fịkị? Ilịlopa lya gwamyinụ lịkukōlela kumyangu ukufụma pakị̄su, lịkufwana ịsyu ili lịkulukōlela ulubụkisyo. 11Popāpo lilino ugụnị̄gwe pakị̄su, ikị̄su kyasēme ukwambilila ilịlopa lya nnụgụnago ukufụma nkiboko kyako. 12Apa linga kulima umfụ gutịsakukupaga īmboto, kwịsakujaga mụ̄ndu uju ịkubēta ịtolo unsịta bujo pakị̄su. 13Po papo Kaịnị alinkujoba ku NTWA alinkuti: Ulufụ̄ndo lwangu, lukulūmba fị̄jo ngamanya nukulutola. 14Kēta, umụsyugu ūngagịle nkị̄su; kangi ndịkubonekangapo pamāso pamyako, nikwịbīlilaga; nịsakujaga mụ̄ndu uju ịkubētabēta ịtolo unsịta bujo nabumo nkị̄su; po lelo umụ̄ndu gwesa uju linga ịkūnyāga une isakungogaga. 15Po papo UNTWA alinkummbūla alinkuti: Najumo atịsakukugogaga. Uju linga ịkunngoga Kaịnị jo ịsakubụkisịgwaga kahāno na kabili. UNTWA alinkummbīkapo ikimanyịlo ukuti najumo āngisakunngogaga kuno linga ammwagịle. 16Po papo Kaịnị alinkusōkamo nkyenị mwa Kyala, alinkwakwịtūgala nkị̄su kya Nondi kulubafụ lwa kubusōkelo bwa ịsuba lwa nngūnda gwa Etenị.
Aba nkikolo kya Kaịnị
17Po papo Kaịnị alinkummanya unkasị, alinkuja nikifụba, alinkumpāpa umwana unndumyana, jo alinkumpa īngamu ja Enokị. Kaịnị alinkujenga akāja akakulūmba alinkukapa īngamụ ja mwanāke Enokị. 18Po papo Enokị alinkumpāpa Īlati, jōpe Īlati alinkumpāpa Mehujaleli, umwene Mehujaleli alinkumpāpa Metusyale, umwene Metusyale alinkumpāpa Lamekị. 19Lamekị alinkwega abakị̄kulu babili; jumo āli jo Atala īngamụ, unnịne āli jo Sịla. 20Atala alinkumpāpa Jabali, uju bāfụmịlemo abāndu aba bālị nimịtị̄mo gya ng'ōmbe aba bāgonaga mụhēma. 21Ugwamyabo āli jo Jubali īngamụ uju bāfụmịlemo bōsa aba bịkukuba amapāngo na malōnge. 22Umwene Sịla jo alinkumpāpa Tubalikaịnị umpōsị gwa fịbōmbelo fyosa ifya kiḳuba ikibūngu nifya fyela. Ulịlūmbu gwa Tubalikaịnị āli jo Nāma ingamụ.
23Po papo Lamekị alinkubabūla abakasị bo babīli alinkuti:
Bā Atala na Sịla, pilikisya ilịsyu lyangu mwe bakasị bāngu; Mụtegege imbulukutu bo nịkujoba; Nunngogịle umụ̄ndu jumo papo umwene āfụlēsye une, Nunngogịle untụbwa papo umwene angomịle une.
24Linga uju ịkunngoga Kaịnị ịkubụkisịgwaga kahāno na kabili po uju ịkūngoga une ịsakubụkisịgwaga amalōngo mahāno na mabili na kahāno na kabili pamwanya (77).
25Po papo Atamụ alinkummanya unkasị kangi; umwene alinkumpāpa umwana unndumyana. Alinkumpa īngamụ ija Setị. Papo alinkwịnogona ukuti, Kyala āmbēle umwana ujūngi mbujo bwa Abelị, uju Kaịnị ālinngogịle. 26Mōpe mwa Setị alinkupāpịgwamo umwana unndumyana uju ingamụ jāke āli jo Enosị. Pakabalilo kala kala po apa abāndu bālyandịle ukujimanya īngamụ ja NTWA
നിലവിൽ തിരഞ്ഞെടുത്തിരിക്കുന്നു:
Ubwandilo 4: NYB96
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Nyakyusa Bible © Bible Society of Tanzania, 1996.