GÉNESIS 9
9
Diosax Noé chachampiw mä arust'äwir manti
1Diosasti Noé chachampiru, wawanakapampirux aka arunakampiw aski waxt'äwinak churäna: “Jichhax walja wawanakanïpxam, aka uraqirusti phuqhantapxam. 2Aka uraqinkir taqi animalanakasti jumanakatakix axsarañat khathatipxaniwa. Thuqnaqir animalanakasa, wañankir animalanakasa, qutankir animalanakas jumanakan apnaqatäniwa. 3Taqi animalanakampi, ch'uxña alinakampix jumanakan manq'añamatakïniwa. Nayaw ukanak churapxsma. 4Ukampis wilanpach aychxa janiw manq'apxätati, jakañan wilankatap layku.#9.4 Nayra pacha israelitanakasti, jaqin jakañapasa, animalanakan jakañapas wilankkaspa ukham amuyapxäna. Ukatpï aychxa wilanpach jan manq'apxañapäkäntixa, ukampix Diosan jakañ churirïtap iyawsapxäna. Tatitun iglesiapa qalltaskän ukkhasti, kawkïr judionakatix Tatitur iyawsapkäna ukanakasti, uka kamachi phuqhapxapunïnwa (Hch 15.19-20). Lv 7.26-27; 17.10-14; 19.26; Dt 12.16,23; 15.23. 5Nayasti, sapaqat jaqiru, sapaqat animalaruw sapa mayni jumanakan wilanakamat wayt'ä. Sapaqat jaqiruw jaqi masipan jakañapat wayt'arakï.
6“Maynitix mä jaqir jiwayanixa,#9.6 Ex 20.13.
juparux yaqha jaqiw jiwayarakini,
jaqin Diosar uñtasit irnuqt'atätap layku.#9.6 Gn 1.27.
7Ukhamasti jumanakax
¡walja wawanakanïpxam,
aka uraqpachar phuqhantapxam!”#9.7 Gn 1.28. sasa.
8Diosasti Noé chachampiru wawanakapampirux sarakïnwa: 9“Ist'apxam, nayaw jumanakampi, wawanakamampix mä arust'äwi lurä, 10ukhamarakiw jumanakamp chika arcat mistunkän taqi uka animalanakampi, jamach'inakampi, uywañ animalanakampi, pampankir animalanakampi, taqi akapachankir animalanakampiw mä arust'äwi lurä. 11Nayan jumanakampi arust'äwir mantataxasti janiw mayjt'kaniti; janipuniw jaqinakarusa, animalanakarusa mayampis uma taripäwimpix tukjkäti. Aka uraq tukjañatakix janiw yaqha uma taripäwix utjkxaniti. 12Kuna arust'äwtix nayax jumanakampi, animalanakampi wiñayatak lurkta ukan unañchapax akawa: 13Nayax qinaya taypin kürmi uskta, ukasti mä unañchäniwa kuna arust'äwtix aka uraqimpi lurkta ukata. 14Nayax uraqxaru qinay apayankä ukkhaxa, uka kürmiw qinay taypin uñstani. 15Ukapachaw nayax kuna arust'äwtix jumanakampi, taqi animalanakampi lurkta ukat amtasï, janirakiw jumanakar tukjañatakix kuna uma taripäwisa utjkxaniti. 16Kunapachatix kürmix qinay taypin uñstkani ukapachaxa, uka kürmi uñjasin kuna arust'äwtix taqi jaqinakampi, taqi aka uraqin utjir animalanakampi lurkta ukat amtasï. 17Ukaw jaqinakampi, animalanakampi lurkta uka arust'äwin unañchapaxa” sasa. Ukhamwa Diosax Noé chachamp parläna.
Noé chachampi, wawanakapampi
18Noé chachan yuqanakapax Sem, Cam, Jafet ukanakänwa, khitinakatix arcat mistupkäna ukanaka. Cam jaqisti Canaán sata mä yuqanïnwa. 19Noé chachan yuqanakapax uka kimsanïnwa, jupanakan wawanakapampiw wasitat aka uraqix phuqhantatäxäna.
20Noé chachax yapuchir jaqïnwa, juparakiw uva yapuchañ uñstayäna. 21Mä urusti Noé chachax vino umantasin machjasïna, ukatsti chhujllap taypin q'alalpachaw liwisiskarakïna. 22Canaanan awkipa, Cam jaqisti ukham q'alalpacha awkipar uñjasaxa, pani jilanakapar yatiyiriw saräna. 23Ukatsti Sem, Jafet uka wawanakapax awkipar janxatañatak mä isi katupxäna, q'alala jan uñjañ munasasti, jupanakax qhipäxat jitkatasaw awkipar uka isimpi janxatapxäna, maysa tuqi uñtasa.
24Noé chachasti machatap apaqtayasisin sartxasinxa, kuntix sullka yuqapax jupar lurkatayna uk yatisax 25akham sänwa:
“¡Canaán jaqix ñanqhachatäpan!
¡Jupax pani jilapan sinti jan yäqat uywataparuw tukuni!”
26Ukatsti saskakïnwa:
“Sem chachan Tatit Diosapax qullanäpan,
Canaán jaqisti jupan uywatapar tukpan.
27Tatitux Jafet chachan uraqip jach'aptaypan,
jupasti Sem chachan chhujllanakapan jakpan,
Canaán jaqisti jupan uywataparakïpan” sasa.
28Uma taripäwi qhipatsti, Noé chachax kimsa pataka phisqa tunkan marampiw jakaskäna; 29jupax llätunk pataka phisqa tunka maranïxän ukapachaw jiwxäna.
നിലവിൽ തിരഞ്ഞെടുത്തിരിക്കുന്നു:
GÉNESIS 9: AYOPD
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Biblia Aymara ©Sociedad Bíblica Boliviana 1997.
Mapas ©Sociedades Bíblicas Unidas, 1996
