Luc 5

Yeesu yíiń u-boonnooliibi bipeepeekaabi

(Kpèè Maat 4.18-22, Maar 1.16-20)

1Ŋwiin ŋubɔee, Yeesu cūtì ki yú Geeneesareeti#5.1 Geeneesareeti mɔɔl: Galiilee mɔɔl ní bi gíti yíì míǹ. Kpèè Maar 6.53 mun. mɔɔgbandi, ní binib dɔ́miń ki múkúǹ u-pu kí pīlifì Unimbɔti bɔti. 2Ní u ká iŋaliŋfi ili yú dimɔɔgbandi, bilaantɔliibi kpákatì ki bíi fíntí bi-laanti. 3Iŋaliŋfee kansikinee, Siimɔn yì bubɔ, ní Yeesu cūtìi kɔ́ bu-ni ní ki gbāam̀-u ki lī yii, ú sútí buŋalimbu kí wàatī digbándi kí kɔ́ǹ dimɔɔlin fiii ú sòoǹ nì binib bí ŋmā kí gbìl̄. Ní Yeesu kāl̀ buŋalimbun, ki bíi dàkà kunipaauee Unimbɔti bɔti. 4U sòon̄ ki dóòyee, ní ki bí Siimɔn yii: «Sútí buŋalimbu kí cùnnì laakin nnyim nyóòyee, sii nì a-bɔɔbi ń tɔ̄ ni-laanti kí cúú ijɔm.» 5Ní Siimɔn bí yii: «Ukpil, ti dū kunyamɔŋu ní ki tɔ́ tilaandi, kaa cúú báà tiba, ama a nín lēe puee, m làá tɔ̄ kulaaŋŋu.» 6Ní bi dūu tɔ́, ní ki cúú ijɔm tikpil, áli bi-laanti bíi tìfī#5.6 Dūú ŋmàntī nì Yoow 21.6.. 7Ní bi kábitì bi-bɔɔbi bin bí buŋalimbu bun béeyee nee bí dāan̄ kí tūtuǹ-bi bí dáaĺ ijɔm kí nyāntí. Ní bi dɔ́miń ki dáaĺ ki nyántìń ijɔm ki gbéeǹ iŋaliŋfi liitil, ní iŋaliŋfee bíi múl̀ nnyimin. 8Siimɔn Peetroo nín ká mimmee, ní u dɔ́miń ki gbāaǹ Yeesu nimbiin ní ki bí-u yii: «M-Dindaan, sútí kí wàatī-mi, kun puee man sá unikpiti ní.» 9Di sá yii ijɔm in bi nìn cúúyee wíiŋŋu yāntì tifaandi nìn kɔ́ Siimɔn nì u-bɔɔbi, 10ní ki kɔ́ Seebeedee jipɔmbi Yakubu nì Yoowaneesi, bin sá u-jɔncuujutiibee mun. Ama ní Yeesu bí Siimɔn yii: «Taa fàŋkì! Di sá yii, kí yòon̄ díǹ kí nīn cée, a làá nīn kíǹ ki sá un cāabìń binib m-ceeyee ní.» 11Niinee ní bi cáań bi-ŋaliŋfii ki yóoǹ dimɔɔgbandi, ní ki yāntì tikɔkɔ ní ki kíǹ ki nóó Yeesu.

Yeesu cáaǹ unyaŋgbanti ubɔ

(Kpèè Maat 8.1-4, Maar 1.40-45)

12Yeesu nìn bí kitiŋ kiban, ní uninja ubɔ dɔ́miń dinyaŋgbandi píń u-pu. U ká Yeesuee ní ki tātìi dōoǹ dicincibil u-nimbiin u-yigbeel tūū kitiŋ ní ki gbāam̀-u yii: «Ukpil, cáaǹ-mi kun puee m nyí yii a yaa là, a ŋūǹ kí cáaǹ-mi m-wunti ń ŋāŋkì.» 13Ní Yeesu tāntì u-ŋal ki gbēē-u, ní ki bí-u yii: «M là, Pɔ̄ɔkìm̄!» Niin niin ní dinyaŋgbandi kpáàa wáŋkì uninjee pu. 14Ní Yeesu kpáafì-u yii ú taa pée tùkù báà ubɔ, ama ní ki bí-u yii: «Cáá a-ba kí dàkà usaraaŋakpil ú béé yii a-wunti ŋáŋkì ní kí cùú ŋá saraa kii Mooyiisi nín yóoǹ mara uŋyee ní usaraaŋalee ń tùkù báà ŋma yii a pɔ́ɔkì#5.14 Kpèè Akoo 14.2-32..» 15Niinee, Yeesu yindi mɔ̀tīi gbìtī ki cá, ní kunipaau dòoń ki pílifí u-bɔti kí kpáàa ká bi-weeŋyi cáaǹtam. 16Ama Yeesu nìn cá u-baba laakin binib kpée ki mèé ŋwimmeem.

Yeesu cáaǹ ufaliŋfaan ubɔ

(Kpèè Maat 9.1-8, Maar 2.1-12)

17Ŋwiin ŋubɔee, Yeesu bíi dàkà binib Unimbɔti bɔti. Fariisab nì bimaradakaliibi nìn kā niin. Bi nìn nyánní Galiilee nì Juudee nì Jeerusaleem timbilimmu kɔkɔn ní. Ti-Dindaan pɔŋŋu nìn bí Yeesu pu ki yàntī u cāantí bibunliibi. 18U bíi sòoǹee, ní binib biba ŋúbiń uninja ubɔ u sá ufaliŋfaan nlún pu, ki nyàab̀ kí kɔ́ǹ-u Yeesu cee kudiin. 19Nniwíin puee, baa béè bi nín làá ŋá pu kí bà Yeesuee. Míǹ puee bi jɔ́m̀ kudii yilpu ki cíl̀, ní ki dū ufaliŋfaanee nì u-lúŋŋu ki dūu dīń dibùndee ni ki kpákatì-u ki bíl̀ Yeesu nimbiin kunipaauee kansikin. 20Yeesu nín ká binib gbanti fōō ki kíí yii u ŋūǹ kí cáaǹ ubunlee, ní u bí ufaliŋfaanee yii: «M-bɔɔ, m dū a-kpitii ki pú-si.» 21Niinee ní bimaradakaliibi nì Fariisabee kíǹ ki bíi dàkafī bi-pɔbiliŋin yii: «Uninja nee sá ŋma ní ki ŋèeǹ nì Unimbɔti míǹ? Ŋma di ŋūǹ kí dū ikpiti kí pɔ̄? See Unimbɔti baba#5.21 ŋèeǹ nì Unimbɔti: dūú ŋmàntī nì Akoo 24.16. - ...Unimbɔti baba: kpèè Ilan 103.3, Yees 43.25..» 22Yeesu béè bi nín bíi dàkafī puee, ní ki bí-bi yii: «Ba pu ní ni bíi dàkafī míǹ ni-pɔbiliŋin? 23Ba di kaa pɔ̄ɔ̄ dilil ní: <A ká a-kpitii pɔ̄tam> di kaa pɔ̄ɔ̄ dilil naaa, <Yīkì kí yūĺ kí nīn còom̄> di kaa pɔ̄ɔ̄ ní? 24Ama ní béé yii man Kinibiki cáá mpɔn kitiŋ pu kí dū unil kpitii kí pɔ̄. Niinee ní u bí ufaliŋfaanee yii: <Sii yīkìm̄ kí yòon̄ a-lúŋŋu kí nīn kùǹ a-dumpu.>» 25Kpalaayee ní u nyīī ki yíkì samaa nimbiin, ki yōoǹ u-lúŋŋu ŋun pu u bàà dɔ̄ee, ki pàkà Unimbɔti ki kùǹ u-dumpu. 26An yāntì báà ŋma fāŋkì ki bākatì sèeee ki pàkà Unimbɔti, ki lì yii: «Ti ká tibɔcan díǹ!»

Yeesu yíiń Leefii ú nóó-u

(Kpèè Maat 9.9-13, Maar 2.13-17)

27Míǹ boonee, Yeesu nyáń ki búntì, ní ki ká ufɔtil ubɔ, bi yíì-u Leefii u kā fɔtiku diikun. Ní Yeesu bí-u yii: «Dāan̄ kí nīn nóó-mi!» 28Ní u yíkì ki yāntì u-wanti kɔkɔ, ní ki lafun táá-u. 29Ní Leefii ŋá Yeesu tican u-dumpu, ní bifɔtiliibi nì binib biba mun tikpil dɔ́miń ki kútì bi-pu ki kpáfì ki bíi jīǹ tijin. 30Fariisab nì bimaradakaliibi nín ká mimmee, an kaa mɔ́ɔkiǹ-bi, ní bi bālifì Yeesu boonnooliibi yii: «Ba pu ní ni nì bifɔtiliibi nì binikpitib nee kpáfì ki kā ki jīǹ ki nyù míǹ?» 31Ní Yeesu kíí-bi yii: «Bin pɔ̄ɔ̄yee kaa nyàab̀ unyɔɔdaan, bin būǹee di nyàab̀ unyɔɔdaan. 32Maa dɔ́miń kí yíiń deedeedambi, m dɔ́miń kí yíiń binikpitib bí kpántí bi-bimbim ní.»

Yeesu sòon̄ dinyɔɔboobil pu

(Kpèè Maat 9.14-17, Maar 2.18-22)

33Ní bi lī Yeesu yii: «Yoowaneesi boonnooliibi bōob̀ kinyɔkɔ múlmul ki mèé ŋwimmeem, ní Fariisab boonnooliibi mun ŋáań míǹ, ama ní sii boonnooliibi jīǹ ki nyù.» 34Ní Yeesu bí-bi yii: «Ni ŋūǹ kí yàntī unimpucaan cal bɔɔbi ń bóob́ kinyɔkɔ ŋyunti ŋun u dáá bí bi-ceeyeeee? 35Ama ŋwiin ŋubɔ bí ki dòoń, bi làá dāá yòon̄ unimpucaan cal bi-kansikin. An yuntiŋu ní bi dāa bōob̀ nnyɔmu.»

36Ní Yeesu gíti dū tibɔti nee ki ŋmāntì-bi yii: «Baa gífí dibɔkutipɔndi ŋaakatil kí dūú lìb̄ dikpikil. Bi yaa ŋá mimmee bi gíí ki bíil̀ dibɔkutipɔndee fám dee, ní dijandi din bi gííyee kaa làá ŋmā kí lìb̄ kí kàl̄ dikpikil pu. 37Baa tí dù ndapɔm kí fúuń tilɔkpikilin. Bi yaa ŋá mimmee, see tilɔtee#5.37 tilɔtee: Isirayeel yabee, ipii nì iŋoobu ní bi nìn lèekī igban ki ŋáań tilɔti ki fūuntí idafi nì nnyim. ń pōō ní ndaam ń kpáatíí fá, ní tilɔti ń bīil̀. 38Ama bi dù ndapɔm kí sìtī tilɔpɔnni ní. 39Bi yaa nyùn̄ ndakpikim ŋmaniŋmee, ní bi lì yii ndakpikim di ŋān̄, baa ti là ndapɔm.»

നിലവിൽ തിരഞ്ഞെടുത്തിരിക്കുന്നു:

Luc 5: BASSARDC

ഹൈലൈറ്റ് ചെയ്യുക

പങ്ക് വെക്കു

പകർത്തുക