Luc 24

Yeesu fīkitì

(Kpèè mun Maat 28.1-10, Maar 16.1-8, Yoow 20.1-10)

1Kinyɔŋ poon wimpeekaaŋu dal ntaafaabɔmbɔminee, ní binimpoobee búntì dikaakul laŋki ki ŋúb́ ikpafi nì talaalub bin bi bɔ́ntèe. 2Bi bàn̄ee, ki ká ditaŋkpal din bi nìn dūu pīiǹ dikaakul nyɔkɔee bíntì ki tin dɔ̄ ŋkpaanceeti, 3ní bi kɔ́ dikaakul poon kaa ká ti-Dindaan Yeesu wunti. 4Bi bākatì ki kíǹ ki yú ki dàkafēe ní bininjab bili cílìń bi-pu ki pēē tiwampin káŋkaŋ. 5Bi fāŋkì ki tīntì, ní binibee bí yii: «Ba pu ní ni nyàab̀ unil un wāĺee bitaŋkpiibi kansikin ní? 6Úǹ fīkitì, waa bí doo, téetímaan u nín nìn bí Galiilee ki tùkū-ni puee, 7yii: <An sá bí dū man Kinibiki kí ŋúbíǹ binikpitib ní bí kpáá-mi ndɔpuntikaa pu ḿ kpú, ní winta dalee ḿ fìkitī.>»

8Niinee ní bi fātìi téetì Yeesu bɔti gbanti pu. 9Ní bi búntì ki cūtìi máafì an bɔti kɔkɔ akpambal saalaa nì dibee nì biboonnooliibi bin kíǹee kɔkɔ. 10An nimpoobee di sá Maarii Magidalaa yɔu, nì Jaani, nì Maarii Yakubu na. Binimpoobi biba mun nìn céeǹ-bi, ki tùkū akpambal tibɔbaantiil. 11Ama binimpoobee nín dɔ́miń ki tùkū akpambalee, baa nìn fōō ki kíí, bi nìn dūu yíiń mmaam ní. 12Ama ní Peetroo yíkìi sáǹ ki nín cá dikaakul laŋki. U bàn̄ ki gbóońee ŋŋaabu ŋun bi nìn dūu fìn̄-uee baba di dɔ̄. Ní u fātìi nín gítiń, ki bākatì nì an bɔti sèeee.

Biboonnooliibi bili ká Yeesu Eemaayusi saŋŋu pu

(Kpèè mun Maar 16.12-13)

13Ŋwimbaanti gbanti ní u-boonnooliibi bili yíkì ki nín cá kitimbilii kiba bi yíì-kì Eemaayusi. Kí yīkì Jeerusaleem kí cù kitiŋ gbantinee, an sá ataŋkpee saalaa nì diba ní. 14Ní bi còom̄ ki sòoǹ tin kɔkɔ jítì Yeesu puee. 15Bi nìn bíi sòoǹ míǹ ki kpákèe, ní Yeesu u-ba bāań bi-cee ní u nì bi táá ki nín cá. 16Bi wál̀-u ní tiba yāntì baa béè-u. 17Ní Yeesu bālifì-bi yii: «Tilati ní ni còom̄ ki kpákà ní?» Ní bi sāā ki síl̀ nì kunimbaau. 18Ní bi-kansikin ubɔ, bi yíì-u Kileewoopasi, bí-u yii: «M pàkā sii baba di pée kíǹ Jeerusaleem tiŋkin doo, kaa gbìl̄ tin jítì iwiin nee poonee.» 19Ní u bālifì-bi yii: «Ba bɔti di jítì ní?» Ní bi kíí-u yii: «Tin bāań Yeesu Naasaareeti yɔu, un nìn sá Unimbɔti bɔnaatiliu ki ŋáań maamaaci tuuŋŋi, u-nyɔɔbuŋŋi mun cáá mpɔn Unimbɔti nì binib kɔkɔ nyée. 20Ti-saraaŋakpilib nì ti-yidambi dū-u ki tīī bi sòon̄ ki kūū u-bɔti, ní bi dū-u ki kpáá ndɔpuntikaa pu. 21Úǹ pu ní ti bàà máká yii u làá fīī Isirayeel yab. Nì míǹ kɔkɔee, an bɔti nín jítèe díǹ iwiin ita sèé nee. 22Ama ti-kansikin binimpoobi biba cáań-ti maamaaci bɔti díǹ nee. Di sá yii bi péé kutaafaau ní ki cūtì u-kaakul laŋki. 23Bi bàn̄ee, kaa ká u-wunti, ní ki fātìi gítìń ti-cee ki máafì-ti yii Unimbɔti tuuŋyi cílìń bi-pu ki tùkū-bi yii u fīkitì. 24Ti-yab biba mun cūtì u-kaakul laŋki ki mun ká kii binimpoobee nín bàà lī puee, ama baa ká úǹ u-ba.» 25Niinee ní Yeesu bí yii: «Óooo binib nee kaa cáá iciin, kaa yáb̀ kí fōō Unimbɔti bɔnaatiliibi nín sòon̄ tiŋyee kí kíí. 26Mimmee an kaa máaǹ Meesiya ń jī falaa míǹ kí nín kɔ́ u-nyootinaaa?» 27Ní u kíĺ ki bíi sòoǹ ki cántí-bi Unimbɔti gbɔŋku poon tibɔti tin kɔkɔ Mooyiisi nì Unimbɔti bɔnaatiliibi nìn ŋmàn̄ ki síiǹ u-puee.

28Bi nín bāań kitimbilii kin ni bi cée, ní Yeesu ŋá kii u là kí càatī nyɔkɔpuee. 29Ní bi bí yii: «Aayee, gbíntí ti-cee, ŋwìiń làá jēetí kunyeeu ń mɔ́ dee.» Ní u kɔ́ bi-cee. 30Ŋyunti ŋun bi kāl̀ ki làá nīn jīǹee, ní Yeesu yōoǹ kpɔnɔ ní ki jáam̀ Unimbɔti ní ki gífì ki tīī-bi. 31Niinee ní bi-nimbiliŋ cúu ŋāatì ní bi béè-u, ní u wáŋkì bi-kansikin niin. 32Ní bi bíi lì tɔb cee yii: «U nín bíi sòoǹ nì ti ki lèekī Unimbɔti gbɔŋku taapu ki dàkà-ti nsannee, saa bàà ká an nín kɔ́ ti-pɔbiliŋin fíŋfiŋeeee?»

33Ní bi yíkì niin niin ki nín gítí Jeerusaleem. Bi bàn̄ee ki ká akpambal saalaa nì dibee nì bi-jutiibi bin kíǹee kpáfì, 34ki bíi lì yii: «Tiŋman, ti-Dindaan lafun fīkitì! Di sá yii Siimɔn ká-u.» 35Ní bi mun dū tin bi ká nsannee, nì Yeesu nín gíí kpɔnɔ bi béè-u puee ki máafì-bi.

Yeesu boonnooliibi ká-u

(Kpèè Maat 28.16-20, Maar 16.14-18, Yoow 20.19-23)

36Bi bíi sòoǹ mimmee, Yeesu bāań bi-kansikin ki jáam̀-bi yii: «Unimbɔti ń tīī-ni ŋgbansɔŋfi.» 37Ní bi fāŋkì tikpil bi-wunti kpíì, kun puee bi dàkafī yii an sá ufaŋfanti ní. 38Ní Yeesu bālifì-bi yii: «Ba pu ní ni-pɔbiliŋ máfí míǹ? Ba pu ní ni cáá ilandɔkɔ ili ili míǹ? 39Man dee, kpèèmaan m-ŋalii poon nì m-tafati tibuŋwati. Gbēēmaan-mi kí kpèè! Ufaŋfanti kaa cáá tiwunaaa, kaa cáá akpab kii ni nín wāĺ man cáá pu nee.» 40U lī mimmee, ní ki dàkā-bi u-ŋalii nì u-taaŋi. 41Baa nìn dáá baasii fōō ki kíí mbaamɔmin, kun puee an nìn sá-bi mmɔnnaaa, ki ŋá-bi bitii mun, an puee ní Yeesu bālifì-bi yii: «Ni cáá tiba doo kí jāaa?» 42Ní bi dū dijɔŋgindi din ŋɔ́fèe ki tīī-u, 43ní u fōō ki ŋmɔ́ bi-nimbiin niin. 44Ní u bí-bi yii: «Naa téetí m nín nìn dáá bí ni-cee, ki tùkū-ni yii tin kɔkɔ bi ŋmàn̄ m-pu Mooyiisi marab nì Unimbɔti bɔnaatiliibi gbɔnti nì Inyɔŋki laŋyi gbɔŋku poonee máaǹ kí ŋá mimmaaa?» 45Niinee, ní u pīitì bi-landɔkɔi bí ŋmā kí gbìl̄ Unimbɔti gbɔŋku poon bɔti taapu, 46ní ki bí-bi yii: «An nín ŋmàn̄ puee sèé, yii: Meesiya làá jī falaa kí kpú ní winta dalee ú fàtīí fìkitī#24.46 Dūú ŋmàntī nì Yees 53, Oosee 6.2.. 47An máaǹ yii ní sòoǹ u-pu atimbun kɔkɔ nib cee, kí kíliń Jeerusaleem, yii binib ń kpántí bi-bimbim kí ká bi-kpitii pɔ̄tam. 48Nimbi di sá seeradambi yii m kpíì, ki fīkitì. 49M làá yàntī Circir Fam min m-Baa nìn pōoǹee ń dāan̄ ni-pu. Ama ní nīn kā Jeerusaleem kitiŋ poon kí nīn cí ŋyunti ŋun Unimbɔti pɔŋŋuee làá kpákatiń ni-puee#24.49 Kpèè Atuun 1.4-5..»

Yeesu jɔ́m̀ yilpu

(Kpèè Maar 16.19-20)

50Ní Yeesu yōoǹ-bi ki nyántì kitiŋ kpaanceetiŋu ki cá Beetanii#24.50 Kpèè Maar 11.1. watil pú. Niinee ní u yōoǹ u-ŋalii yilpu ki mēē ki bīiǹ bi-pu. 51Ŋyunti ŋun u bíi mèé ki bìintí bi-puee, ní u yíkì bi-cee ki nín jɔ́ḿ yilpu#24.51 Dūú ŋmàntī nì Atuun 1.9.. 52Ní bíǹ gbāaǹ ki nyɔ́ŋkì-u, ní ki fātìi nín gítiń Jeerusaleem nì dipɔɔpiŋkpaandi. 53Bi nìn bí baabadal kunimbɔtidiin ki pàkà Unimbɔti ki jáaḿ-u.

നിലവിൽ തിരഞ്ഞെടുത്തിരിക്കുന്നു:

Luc 24: BASSARDC

ഹൈലൈറ്റ് ചെയ്യുക

പങ്ക് വെക്കു

പകർത്തുക