Лука 23

ЯТӀОКӀЫРЭ ЩЫНЭРЭШЪХЬ

Исус Ӏэшъхьэтет Пилат ыпашъхьэ зэрэращагъэр

(Маттэ 27:1-2, 11-14; Марк 15:1-5; Иуан 18:28-38)

1ЕтӀанэ хасэм хэт пстэури къэтэджыжьи, Исус Ӏэшъхьэтет Пилат дэжь ащагъ. 2Исус агъэмысэу къаублагъ, моущтэу аӀоу: – Мы лӀым тэ тлъэпкъ къыгъэбырсырэу, Кайсарым хьакъулахь ахъщэр раримыгъэтэу, ежь Христос пачъыхьэу зыфиӀожьэу тыубытыгъэ.

3– О джуртхэм уряпачъыхьа? – къеупчӀыгъ Пилат Исус – Ары, къызэрэпӀорэм фэд#23:3 – Ары, къызэрэпӀорэм фэд, – е – О пшъхьэкӀэ къэоӀо., – риӀожьыгъ Исус.

4Джащыгъум Пилат дин пэщэшхохэмрэ цӀыф купышхохэмрэ ариӀуагъ: – Мы лӀыр зи зэрызгъэмысэн езгъотылӀэрэп.

5– Галилей хэкум къыщегъэжьагъэу мыщ нэсыфэ, Иудей хэкум зэкӀэ тыдэ укӀоми, мы лӀым цӀыфхэм Ӏофхэу аригъашӀэхэрэмкӀэ къегъэбырсырых, – аӀуи, ыуж имыкӀыхэу къаӀуагъ ахэмэ.

Исус пщэу Ирод ыпашъхьэ зэрэращагъэр

6Пилат Галилей гущыӀэр зызэхехым, къэупчӀагъ: – Мы лӀыр Галилей щыща?

7Хэкоу Ирод зипщым Исус зэрэщыщыр Пилат къызешӀэм, Ирод дэжь Исус аригъэщагъ, сыда пӀомэ, а мафэхэм атефэу Ирод Ерусалим къэкӀогъагъэти ары.

8Ирод Исус зелъэгъум, лъэшэу гушӀуагъэ, сыда пӀомэ, Исус игугъу зэхихыгъэти, бэ шӀагъэу зэригъэлъэгъу шӀоигъуагъ. Исус нэшэнэ гъэшӀэгъон горэ къыригъэлъэгъунэу гугъэщтыгъэ. 9Ар Исус бэкӀэ къеупчӀыгъ, ау Исус зи риӀуагъэп. 10Дин пэщэшхохэу, Тэурат егъэджэкӀо пащэхэу ащ дэжьым щытхэм Исус лъэшэу агъэмысэщтыгъ. 11Иродрэ идзэлӀхэмрэ агъэпыутэу Исус дэзекӀуагъэх, кӀэнакӀэщтыгъэх. ЕтӀани Ирод идзэлӀхэм Исус шъошэ фыжькӀэ пачъыхьэм фэдэу аригъэфапи, Пилат дэжь аригъэщэжьыгъ. 12А мафэм Иродрэ Пилатрэ ныбджэгъу зэфэхъугъэх. Ащ ыпэкӀэ зэпыищтыгъэх.

Исус укӀ зэрэтыралъхьагъэр

(Маттэ 27:15-26; Марк 15:6-15; Иуан 18:39–19:16)

13Ӏэшъхьэтет Пилат дин пэщэшхохэри, адрэ тхьэматэхэу Тхьэмэтэ Хэсэшхом хэтхэри, цӀыфхэри къызэӀуигъакӀэхи, 14ариӀуагъ: – ЦӀыфхэр къыгъэбырсырхэу шъуӀуи, мы лӀыр къысфэшъущагъ. Джы шъуапашъхьэ сыщеупчӀыгъ, ау зэрыжъугъэмысэрэмкӀэ лажьэ иӀэу езгъотылӀагъэп. 15Пщы Ироди мысэу ылъытагъэп, сыда пӀомэ, къытфаригъэщэжьыгъ. ЗэрэшъулъэгъурэмкӀэ, укӀ зыкӀытефэрэ Ӏоф мы лӀым зи ышӀагъэп. 16Арышъ, къамыщкӀэ езгъэонхэшъ, стӀупщыжьыщт.

17ӀутӀыжъ мэфэкӀ мэфэшхом пае хьапсчӀэсхэм ащыщэу зы нэбгырэ Пилат цӀыфхэм шъхьафитэу къафитӀупщыжьын фэягъ. 18ЦӀыфхэр зэкӀэ къэзэрэгъэкуухэу аублагъ: – Мыр Ӏущ, Бар-Аббэ къытфэтӀупщыжь.

19А Бар-Аббэ къэлэдэсхэр къызэригъэбырсырыгъэхэм паий, цӀыф горэ зэриукӀыгъэм паий хьапсым чӀадзэгъагъ.

20Пщэу Пилат Исус шъхьафит ышӀыжьыныр шӀоигъуагъэти, цӀыфхэм джыри зэ зафигъази, адэгущыӀагъ.

21Ау ахэр куо зэпытыгъэх: – Къащым теӀулӀ! Къащым теӀулӀ!

22– Мы лӀым сыд бзэджагъа ышӀагъэр? УкӀ зыкӀытефэрэ Ӏоф зи ышӀагъэу езгъотылӀагъэп. Арышъ, къамыщкӀэ езгъэонхэшъ, стӀупщыжьыщт, – ящэнэрэу ариӀуагъ пщы Пилат ахэмэ.

23– Къащым теӀулӀ! – аӀозэ, мэкъэшхокӀэ цӀыфхэм зэпамыгъэоу аӀощтыгъ. Якуо макъэкӀэ зыфаери къадэхъугъ. 24Аущтэу цӀыфхэр зыфэягъэр Пилат къафишӀэнэу тыриубытагъ. 25ЦӀыфхэр къызэригъэбырсырыгъэхэмрэ цӀыф горэ зэриукӀыгъэмрэ апае, хьапсым чӀадзэгъэгъэ Бар-Аббэу цӀыфхэр зыкӀэлъэӀугъэр шъхьафит къафишӀыжьыгъ. Ау Исус зыфаер рашӀэн фитхэу ахэмэ аӀэкӀилъхьагъ.

Исус къащым зэрэтыраӀулӀагъэр

(Маттэ 27:32-44; Марк 15:21-32; Иуан 19:17-27)

26Исус къащым тыраӀулӀэнэу преторием зыращым, къалэу Кириние#23:26 къалэу Кириние – Либие хэгъэгоу Африкэм итемыр лъэныкъом итым икъэлэшхуагъ. щыщ Симон губгъом къикӀыжьызэ ӀукӀагъэх. Ар къаубыти, къащыр ытамэ тыралъхьи, Исус ыуж итэу къащыр ыхьынэу рагъэзыгъ. 27ЦӀыф купышхо Исус лъыкӀощтыгъ. Абгъэгухэм яожьхэу, Исус зыгъэерэ бзылъфыгъэхэри ахэтыгъэх. 28Ахэмэ Исус зафигъази, ариӀуагъ: – Ерусалим ибзылъфыгъэхэр, сэщ пае шъумыгъ, шъо шъушъхьэ пае, шъуилъфыгъэхэм апаий шъугъ нахь; 29сыда пӀомэ, «Бзылъфыгъэхэу сабый зыхэмыкӀыгъэхэри, джыри мылъфагъэхэри, быдз езымыгъэшъуагъэхэри гъогу мафэ теуцуагъэх» зыщаӀощт мафэхэр къэсыщтых. 30Ащыгъум къушъхьэхэм «Шъукъыттеф!»#23:30 къушъхьэхэм, «Шъукъыттеф!» – еплъ Пегъымбар Хьошеа тхылъэу ытхыгъэм 10:8 Ӏуашъхьэхэми «Тыкъэшъуухъум!» араӀо хъущт. 31Сыда пӀомэ, чъыгыр къэтӀэмыгъэ зыхъукӀэ, цӀыфхэм мыщ фэдэ Ӏофхэр зашӀэхэкӀэ, чъыгыр гъужьыгъэ хъумэ, ащ нахьи нахь бзэджагъэхэр ашӀэщтба?

32БзэджэшӀитӀу Исус игъусэу къащхэм атыраӀулӀэнэу дащыгъэх. 33«Шъхьэпкъ» зыфаӀорэ чӀыпӀэм зынэсхэм, ащ дэжьым Исус къащым щытыраӀулӀагъ. БзэджэшӀитӀур, зыр иджабгъукӀэ адрэр исэмэгубгъукӀэ, Исус игъусэхэу къащхэм атыраӀулӀагъэх.

34– Сэ ся Т, къафэгъэгъу! – къыӀуагъ Исус. – Мы цӀыфхэм ашӀэрэр къагурыӀорэп. ДзэлӀхэми пхъэдз радзэзэ, Исус ищыгъынхэр зэфагощыгъэх. 35ЦӀыфхэу ащ дэжьым щытхэр хъурэм еплъыщтыгъэх. Тхьэмэтэ Хэсэшхом хэт тхьэматэхэми Исус кӀэнакӀэхэу къаӀуагъ: – НэмыкӀ цӀыфхэр мыкӀодхэу къыгъэнэжьыгъэх. Тхьэм къыхихыгъэ Христос ежьырмэ, мыкӀодэу зыкъерэгъэнэжь.

36ДзэлӀхэри Исус кӀэнакӀэхэу къыбгъодахьэхи, сэнэпс шӀоӀугъэ къыфащэизэ, 37къыраӀуагъ: – О джуртхэм уряпачъыхьэмэ, умыкӀодэу зыкъэгъэнэжь.

38«Джуртхэм я Пачъыхьэр мыры» ыӀоу алыджыбзэкӀи#23:38 алыджыбзэр – грекыбзэр ары., латинабзэкӀи, джуртыбзэкӀи тетхагъэу Исус ышъхьагъкӀэ пхъэмбгъу къащым тыраӀулӀэгъагъ.

39БзэджашӀэхэу ащ дэжьым тыраӀулӀэгъитӀум язым, Исус къехъони, къыӀуагъ: – Орыба Христосыр? Ори тэри тымыкӀодэу тыкъэгъэнэжь!

40Ау адрэр ащ егыеу къыӀуагъ: – Тхьэм ущыщынэрэба? Хьыкумэу мы лӀым тырашӀыхьагъэр ори къыптырашӀыхьагъэба? 41ЗэфагъэкӀэ тэ тагъэпщынэжьы, сыда пӀомэ, бзэджагъэу тшӀагъэхэм яфэшъуашэ тагъэгъотыжьы. Ау мы лӀым мыхъун зи ышӀагъэп.

42ЕтӀанэ къыӀуагъ: – Исус, уи Тетыгъошхо къызыскӀэ, угу сыкъэгъэкӀыжь.

43– Шъыпкъэр осэӀо, непэ джэнэтым ущысигъусэщт, – риӀожьыгъ Исус а лӀым.

Исус зэрэлӀагъэр

(Маттэ 27:45-56; Марк 15:33-41; Иуан 19:28-30)

44Щэджагъо хъугъагъэ, а хэгъэгуми тыдэкӀи шӀункӀ къыщыхъугъ сыхьатыр щым нэс, 45сыда пӀомэ, тыгъэр ушӀункӀыгъэти ары. Тхьэм иунэшхо ипэӀухъо тӀо къызэготхъыгъ.

46– Ся Т, спсэ о къыпӀэкӀэсэлъхьэ#23:46 спсэ къыпӀэкӀэсэлъхьэ – яплъ Орэд ЛъапӀэхэм 30:6., – мэкъэшхокӀэ къыӀуагъ Исус. А гущыӀэхэр къызеӀохэ ужым, ыпсэ ытыгъ.

47ДзэлӀхэм япащэ хъугъэр зелъэгъум, Тхьэм щытхъу фишӀи, къыӀуагъ: – Шъыпкъэ дэдэу, мы лӀыр шъыпкъагъэ зиӀэ лӀыгъ.

48А зэкӀэри зэрагъэлъэгъунэу къызэрэугъоигъэ цӀыф купышхо пстэуми хъугъэр залъэгъум, абгъэгухэм яожьхэзэ, яунэхэм якӀолӀэжьыгъэх. 49Исус иныбджэгъу пстэури, бзылъфыгъэхэу ежь игъусэхэу Галилей къикӀыгъагъэхэри ахэмэ ахэтхэу, чыжьэкӀэ уцугъэхэу мы хъугъэ-шӀагъэхэм яплъыщтыгъэх.

Исус ихьадэ къэунэм зэрэчӀалъхьажьыгъэр

(Маттэ 27:57-61; Марк 15:42-47; Иуан 19:38-42)

50Юсыф зыцӀэу лӀы горэ Тхьэмэтэ Хэсэшхом итхьэматэхэм ащыщыгъ. Ар шъыпкъагъэ зиӀэ лӀы дэгъугъ. 51Тхьэмэтэ Хэсэшхом итхьэматэхэм ашӀэнэу аухэсыгъагъэр адиштэгъагъэп. А Юсыф Иудей хэкум ит къуаджэу Ариматей щыщыгъ. Тхьэм и Тетыгъошхо къэсыным паплъэщтыгъ. 52Ар пщы Пилат дэжь кӀуи, Исус ихьадэ кӀэлъэӀугъ. 53ЕтӀанэ хьадэр къащым къыпихыжьи, чэфын рищэкӀи, Ӏошъхьэ цакӀэу акъутагъэм хашӀыкӀыгъэ къэунэу ыпэкӀэ цӀыф зи зычӀамылъхьажьыгъэм чӀилъхьажьыгъ. 54А мафэр бэрэскэшхо мэфагъ, шэмбэт мафэри къэблэгъагъ#23:54 къэблэгъагъ – тыгъэр зыкъохьажьыкӀэ, къыкӀэлъыкӀорэ шэмбэт мафэр къихьагъэу алъытэщтыгъ..

55Исус игъусэхэу Галилей къикӀыгъагъэ бзылъфыгъэхэр Юсыф игъусэхэу кӀохи, къэунэри Юсыф хьадэр къэунэм зэрэчӀилъхьажьырэри алъэгъугъ. 56ЕтӀанэ унэм къызагъэзэжьым, мэӀэшӀу зыпихырэ щыфэн дагъэхэмрэ осэшхо зиӀэ дагъэхэмрэ агъэхьазырыгъэх. Хабзэм тетэу етӀанэ шэмбэт мафэм загъэпсэфыгъ.

നിലവിൽ തിരഞ്ഞെടുത്തിരിക്കുന്നു:

Лука 23: AdgNT14

ഹൈലൈറ്റ് ചെയ്യുക

പങ്ക് വെക്കു

പകർത്തുക