ATITI AWM ANGCHEI NAI 9
9
Tameuh my Nova hawi Leu Maikawm asa nai
1Tameuh my Nova hawi chapochi ai amtheaung hai nai leu ly “Nang i kangpreangchi ly khaileaung pri verei y kawi ai nai cho chanau neangneang so u,” napi.#AA 1.28 2Amso mawichi, tavochi hawi ngochi py nang ai jei naimy awm u ai, nichi ly nang i sa thai naira anui y heng u ai. 3Nangchi ly huni amso mawi hawi amti amjangchi cha pajau mang; huni bawibawi ly nangchi cha ai nai kang pei nai ne. 4Na i py thi abawi nai mawi cho moh; hengra ly thi y awm nai deaungkho y cho y ai nai, kaimy leu kang pei.#Lev 7.26–27, 17.10–14, 19.26; Leu 12.16, 23, 15.23 5Khumi ami py, khumi ai padei baly mymy ai pajeng teang ai. Khumi ai padei nai amso mawi ai ly kaimy padei teang ai. 6Tameuh mymy ka-tawm khyp naimy khumi ai sa nai ne i, amimi py khumi ai padei nai keung ai ly ami my padei teang ai.#AA 1.26; Theu 20.13
7“Nangchi ly cho chanau neangneang so u; naibaly nangchi i kangpreang ly khaileaung pri verei y peung u ai,” napi.#AA 1.28
8Tameuh my Nova hawi chapochi teng y, 9“Vai kai ly nang hawi py, nang i kangpreangchi hawi py Leu Maikawm asa ai; 10nang hawi vanrei paleaung pui theung i theu nai, heng nai amjy cheaungkhang, tavochi hawi amso mawichi hawi py sa ai. 11Heng nai amjy cheaungkhangchi ai tui hawi taphra bi y ai nai nangchi hawi Leu Maikawm sa mang. 12Kaimy nang hawi sa nai Leu Maikawm ly heng nai amjy cheaungkhangchi i vui deungtasarei khaw hai nai ka-ma-ra ne. 13Kaimy tamai salo y seaungjai kang khai pi mang. Huni ly kai hawi khaileaung pri sala y kai i Leu Maikawm sa nai ka-ma-ra ne. 14Kani mang tamai salo y seaungjai amteng nai tleirei, 15kaimy heng nai amjy cheaungkhangchi ai py, amso mawichi ai py, tui hawi taphra bi y leang bo, nanai nang teng y leu adeu nai ly kapany jo ai mang. 16Tamai salo y seaungjai amteng nai kaniu nai kha y, khaileaung salo y heng nai amjy cheaungkhangchi hawi, kai hawi sala deungtasarei Leu Maikawm asa nai ai ly kapany jo ai. 17Huni ly kaimy heng nai amjy cheaungkhangchi hawi leu adeu nai ka-ma-ra ne,” napi.
Nova hawi chapochi
18Paleaung pui i dengdairei theu nai, Nova i chapochi ly Sema, Hama hawi Japhethchi ne. (Hama ly Kanan i ampo ne.) 19Khaileaung pri verei y awm nai khumi bawibawichi ly Nova i chapo leaung thomrei kangpreangchi ne.
20Nova ly li hlau py, kreip akho py sa man nai keung ne. 21Mymy ly kreip hang pavui nai deaungkho y, ateaung aleng pan iy kanih tangbeung theung y jawn jo bo. 22Kanan i ampo, Hama ly ampo tlang ka-keu naimy jawn jo nai niu i, angam mang y theu iy amnau ni teng y thui pi. 23Naibaly Sema hawi Japheth nini ly kanih la iy paleang y achang hawi naimy nithun mang anaw hawi; ampo tlang ka-keu naimy jawn jo nai ly khen hawi y nai deaungkho y niu y nai ka-awi sa hawi i, ampo ai kanih khiu hawi bo. 24Nova ly cheng vau nai khala chapo katheang i sa nai ly pany bo. 25Mymy ly
“Kanan ly amsawi lawi kalei sy!
Mymy ly amjo amnauchi teng y miseaung achei sy.
26Sema i Areng Tameuh ai ly palo u!
Kanan ly Sema teng y miseaung achei sy.
27Tameuh my Japheth ai ly tahm pasang sy!
Mymy i kangpreangchi ly Sema hawi vanrei awm u jojo sy!
Kanan ly Japheth teng y miseaung achei sy,” napi.
28Tuibai tuitleng theu nai bo y, Nova ly saneng chungvai thom palyh vui pangrei heng rai. 29Naibaly saneng chungvai takaw hongan vui pangrei khala y dei bo.
നിലവിൽ തിരഞ്ഞെടുത്തിരിക്കുന്നു:
ATITI AWM ANGCHEI NAI 9: KCL02
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Khumi Common Language Bible © Bible Society of Myanmar, 2005.
