ATITI AWM ANGCHEI NAI 7
7
Tuibai tuitleng theu nai
1 Areng my Nova teng y, “Nang hawi nang i yhm dengtheung kangym paleaung theung y kun u; nang leaungrei naini khaileaung pri verei y khumi kahawi ne, nanai kang niu. 2No-na by y nai mawi cheaungkhang theung i amjy harei y nu kalo ka-bom saryhrei, na i py chai y nai theung i amjy harei y nu kalo ka-bom harei lo khyh. 3Tavo cheaungkhang theung i amjy harei y nu kalo ka-bom saryhrei, khaileaung salo y peung ali teang ai nai paleaung theung y pakun. 4Vai momang kani saryhrei nai khala y, kaimy sa nai heng nai cheaungkhang tama thai ai nai, kani vui palyhrei, vum vui palyhrei kani nai hai ai,” napi. 5Naibaly Nova ly Areng i leu pei nai kamta sa angym be bo.
6Nova ly khaileaung salo y tuibai theu nai khala y saneng chungvai tariurei awm. 7Naibaly tuibai tuitleng theu ai nai deaungkho y law tleaung ai nai Nova ly my i aju, chapo lengngochi hawi vanrei paleaung y kun u bo.#Mt 24.38–39; Lk 17.27 8Tameuh my leu pei nai kamta no-na by y nai mawi hawi tavochi, chai y nai amso mawichi hawi tavochi theung i nai amjy harei y nu kalo ka-bomchi ly Nova hawi vanrei paleaung pui theung y kun u bo. 9Tameuh my leu pei nai kamta hunichi ly Nova hawi vanrei paleaung pui theung y kun u nai ne. 10Kani saryhrei bo baly tui len hai dudu bo.
11Nova i saneng chungvai tariurei saneng, pa-nyh lo kani holai saryhrei khala y, suida pangli tuino bawibawi py am-eaung iy kanitui pa-khochi py am-eaung hai bo.#2 Pet 3.6 12Naibaly kani vui palyhrei vum vui palyhrei khaileaung salo y kani khri pa-rei taawi hai bo. 13Huni kani y Nova hawi my i aju, chapo leaung thomrei Sema, Hama, Japheth hawi ajuchi py paleaung pui theung y kun u bo. 14Tavo cheaungkhang hawi daichi mawichi, yhm i tawnbawi katheang kalenchi hawi, amso mawi cheaungkhang py mymychi hawi vanrei kun u teang nai ne. 15Heng nai amjy cheaungkhang nu kalo ka-bom ly Nova hawi vanrei paleaung pui theung y kun u. 16Tameuh my leu pei nai kamta, Nova kun nai bo y Areng my katheu kho pi vui bo.
17Kani vui palyhrei tui um dudu nai y, paleaung pui ly tui salo y ajau lawp na bo. 18Tui ly len i paleaung pui ly amjau bo. 19Tui len nai ly mawi ka-sangchi ai py um pawn na. 20Tui ly mawichi salo y miu holai pangrei asang nai ne. 21Huna nai khala khaileaung salo i khumichi, amso mawichi, tavochi napi nai heng nai amjy cheaungkhangchi dei u bebe. 22Khaileaung salo i taho thai nai amjy cheaungkhangchi ly dei chauchau bo. 23Areng ly tavochi hawi amso mawichi, khumichi, khaileaung y heng nai amjy cheaungkhang tamyh be bo. Nova hawi paleaung pui theung y vanrei awm naichi naini tleaung khyh nai ne. 24Tui ly khaileaung salo y kani chungvai atlo vuipangrei um naimy awm bo.
നിലവിൽ തിരഞ്ഞെടുത്തിരിക്കുന്നു:
ATITI AWM ANGCHEI NAI 7: KCL02
ഹൈലൈറ്റ് ചെയ്യുക
പങ്ക് വെക്കു
പകർത്തുക
നിങ്ങളുടെ എല്ലാ ഉപകരണങ്ങളിലും ഹൈലൈറ്റുകൾ സംരക്ഷിക്കാൻ ആഗ്രഹിക്കുന്നുണ്ടോ? സൈൻ അപ്പ് ചെയ്യുക അല്ലെങ്കിൽ സൈൻ ഇൻ ചെയ്യുക
Khumi Common Language Bible © Bible Society of Myanmar, 2005.
